BUKTI TI TEGAP – PENYARUT DALAM SANYAN NGAYAN KE TAIB!

BUKTI TI TEGAP – PENYARUT DALAM SANYAN NGAYAN KE TAIB!

Penegap bukti ba sebengkah pechara dalam court di dipejalai ke si Sibu, bisi ngayan ke siti penerang ti tau ngasuh kitai tekenyit laban penerang nya tebantai ari tengah-tengah perintah Sarawak

Mimit amat berita ti bisi ditusoi pasal kes tu, laban Taib enggau sida sebilik endang seruran nagang berita tu pansut ari court (nengah suratkhabar, radio tau ke televisyen menoa Malaysia). Tang taja pan disekat baka nya, Sarawak Report bisi bulih dokumen-dokumen bepenerang ti chukop ti bekaul enggau pechara tu, semoa tu diayan ke ba court tebuka dia.

Kes tu, ti dibai siko orang dagang ti benama Dato’ Ting Check Sii ngelaban kaban dagang kunsi iya, Tufail Mahmud, iya nya menyadi Kepala Menteri, deka ngayan ke baka ni chara sida Taib sebilik ngulih ke pengeraja ari Sarawak. Tu mega ngayan ke baka ni Kepala Menteri nya ngatur sida sebilik ngerebut pengawa dagang enggau pemendar dagang menoa (state concessions) lalu baka ni sida ngena kaul dagang begulai enggau bala orang dagang dikena ngelamun pengawa jai sida atas menoa tu.

Konsesi dagang dikena ngelamun pengawa sida sebilik

Sebengkah penerang ba kes ti dipechara ke nya Ting nusoi chara sida Taib sebilik nuduk ke siku wakil (nominees) dikena ngelamun pengawa bepilih kasih leboh ti meri konsesi enggau lesen dagang. Dalam bukti betulis iya, Ting madah ke:

“Dalam taun 1987, aku muka sebuah kompeni ti benama Sanyan Lumber Sdn. Bhd lalu diberi (perintah) pemendar ngereja kayu kampung. Ba kompeni aku nya, aku bisi 50% share, and Draman @ Morshidi bin Omar (50% share) (siku wakil ti ari atur Datuk Tufail Mahmud). Datuk Tufail madah ke aku iya enda tau enda ngena wakil laban meda menyadi diri empu agi mangku pengawa nyadi Menteri Perancangan Sumber. Diatu Datuk Tufail nyau enggai ngaku Draman nya wakil iya, taja Datuk Tufail enggau aku tu sama-sama signatories ba bank kompeni aku tu”.

Penerang Dato’ Ting pasal baka ni dagang iya dipejalai ke tau amat mai pengerusak, laban sebedau tu iya endang rapat amat ba pengawa dagang enggau sida Taib sebilik, lalu iya mega dikelala siko ari taukey kayu balak ti benama. Iya udah bekunsi dagang enggau Datuk Tufail Mahmud sengelama 25 taun, lalu Sanyan bisi bempu 25 iti anak kompeni. Anak-anak kompeni tu mega bisi meri penguntung ngagai sida Kepala Menteri menyadi ti nyengkaum Arip Mahmud, Onn Mahmud enggau Ibrahim Mahmud. Kelimpah ari sida nya, Taib mega bisi minta ke sekeda ari share kompeni nya dibagi enggau anak indu iya, Hanifah Taib, ti mega nyengkaum sejuta share ba Sanyan Wood Industries. Ting kala ninga jaku pujuk Taib ti munyi tu:

“Enti nuan ulih meri menyadi aku lebih ari 50% share, aku ka meri nuan maioh agi konsesi!”

Penerang ti munyi nya nunjuk ke Kepala Menteri nya ‘makai suap’ lalu melakang ke tanggung pengawa iya dikena iya ngulih ke pengaya ke diri empu. Ting nerang ke  bala menyadi Taib endang nadai ngeluar ke sebarang belanja dikena numboh ke Sanyan Group lalu sida mega nadai mayar share ti diserah ke suh sida. “Nyuap” Taib enggau chara ti mai bala menyadi iya nya mih chara Ting dikemendar ke bedangang.

Enda mukai-mukai, terang amat Ting ti udah pechaya ke kaul iya enggau sida menyadi Taib nya ngujong ke dagang iya runtuh. Pemegai share ti besai dia, Tufail udah ngena peluang iya dia ngulih ke penguntung US$400 juta ke iya empu ari dagang kunsi nya, taja pan iya endang nadai kala udah ngeluar ke duit suh Sanyan Group

Ditemu orang maioh

Enggau penyarut ti baka tu mih ti ngujong ke Ting nya siko ari pemaioh orang dagang ti berani sereta mutus ke penemu diri lalu mantai ke serebana diri ngelaban sida Kepala Menteri sebilik ba mua court. Enggau penerang (bukti), taja pan udah tu ila bepanggai ba pemutus court, tegap amat sereta bepelasar ke penerang berita ti tau dikarap ke.

Nambah ke nya, penrang iya pasal Morshidi bin Omar di ngari ke Tufail Mahmud sereta enggau dawa ke bukai disukong ngena penerang-penerang bedokumen ti bisi ba upis Pengerejister Kompeni-Kompeni. Ba siti dokumen, nama Morshidi bin Omar bisi dalam rintai bala orang ti megai share ti dikemata ke Tufail, taja pan iya ukai siko orang dagang, lalu iya mega suah ditemu nyual share iya empu ngagai Tufail leboh maia ti manah.

Goodmatch Sdn. Bhd., anak kompeni Sanyan

Nitih ke penerang dalam dokumen-dokumen dlam court, Goodmatch Sdn. Bhd., iya nya anak kompeni Sanyan nya ngayan ke siti agi chunto baka ni salah guna wakil-wakil (nominees) dikena ngelamun sida Kepala Menteri sebilik. Goodmatch SB endang dikena Ting seduai Tufail dalam taun 1993masuk dagang kunsi begulai enggau Noda Corporation ari menoa Jepun ngaga kilang papan lapis.

Kompeni Goodmatch SB ukai semina diberi konsesi ngulih ke kayu kampung ari Menteri Sumber Alam Sarawak (iya nya Kepala Menteri empu, Abdul Taib Mahmud), tang mega diberi ‘Pioneer Status’ sengelama 5 taun dalam dagang kunsi nya, lalu udah nya ditambah ke 5 taun da agi, ari Menteri Kewangan Sarawak (iya nya Kepala Menteri, Abdul Taib Mahmud), lalu ari nya kompeni nya bedagang 100% enda bechukai!

Nitih ke portal Perintah Sarawak, “pioneer status” diberi ngagai sebarang kompeni ti “bejalai ke projek-projek beteknologi tinggi, ngena puku ti besai, bejalai ke pansik enggau pemansang ti tinggi, lalu maioh kaban dagang kunsi”, tang baka ni sebuah kilang papan lapis tau bulih “pioneer status”, nya ti ngalit ke ati. Nambah ke nya Tufail Mahmud enggau naka ulih besalam ke share ti dipegai iya enggau chara ngengkah ke Morshidi bin Omar nyadi pengarah enggau pemegai share ba lima taun ti terubah, ti diasuh megai 55% share bebanding enggi Ting, 45%.

Dokumen-dokumen berejister kompeni nya nadai nyebut Tufail mangku pengawa nyadi pengarah nyentuk ke taun 2002, lebuh timpoh “pioneer status” enggau lesen kayu balak sida tamat. Baka nya mega iya ukai pemegai share, nyentuk ke taun 1998 leboh Goodmatch ‘nyual’ 54.997% share ngagai iya, ti lalu ninggal ke Ting enggau share iya 45%, enggau Morshidi bin Omar terus mangku pengawa nyadi pengarah ti semina bisi semina RM1.00 share! Meda Goodmatch SB nya semina anak kompeni Sanyan Group ti dikemata ke Ting enggau Tufail, lalu tau pemutus penemu ti ngumbai Morshidi Omar nya semina pengari Tufail enda ulih dikeengai ke.

Tang Tufail ti meri penerang (ti bebelit-belit) ba court ti madah ke Morshidi nya semina wakil iya. Taja pan Morshidi direjister bempu kompeni, diatu Tufail madah ke:

“Aku enggau Ting mih pemegai share ti lalu nyadi pengarah ba kompeni (Goodmatch) nya”

Kepala Menteri empu bisi kaul enggau pengawa jai

Bukti penerang ti dipansut ke Ting ngayan ke Kepala Menteri empu endang bisi kaul enggau pengawa jai, lalu salah guna kuasa politik iya dikena iya ngemata ke sida iya. Ba kes Sanyan Lumber tu, ambi ke chunto, udah 16 taun beridup ke konsesi (ti diidup ke genap taun) Taib lalu ngetu ke konsesi nya, udah Ting enggau Tufail charut. Ba penerang iya, Ting madah ke:

“Lesen konsesi kayu balak enda diidup ke ba bulan Tujoh 2003, tang diberi ngagai Misi Gagah SB, sebuah agi kompeni enggi Datuk Tufail nengah wakil iya … diatu Misi Gagah SB terus bejalai ke pengawa dalam upis Sanyan Lumber lalu ngena pengereja pengawa ti terus digaji Sanyan Lumber, nyentuk upis Tenaga Pekerja nagang nya ba tengan taun 2006”.

Diatu Sarawak Report pechaya ke penerang ti ngayan ke pemegai share ti besai dalam Misi Gagah nya Eleanor Ong, ti mega setiausaha peribadi ke Datuk Taib! Enggau tu, kami deka nemu, bepelasar ke nama pekara ti ngasuh Kepala Menteri/Menteri Perancangan Sumber, Abdul Taib Mahmud, mutus ke penemu diri meri indu nya tender enggau lesen konsesi kayu balak? Sekali ke, ketegal indu nya wakil menyadi iya, tau ke puku belanja indu nya tegap, bisi pengelandik ba pekara kampung enggau rampa menoa ti nyadi ke sukong iya tau betebang ke kayu balak?

Kaul ti ‘kamah’ nya nyau ngayan ke chara iya ngenggam sapa-sapa ti diberi iya lesen kayu balak. Iya enggau sida sebilik mega nyau nyadi ngelusu lalu enda agi ulih nyalam pengawa ti ngerampas peluang dagang di Sarawak, laban udah kelalu lama ngereja utai baka nya.

Nitih ke penerang ari upis Pengerejister Kompeni-Kompeni, Goodmatch, ti benung dikemata ke Tufail enggau sida sebilik, baru udah ngenatai ke peminta sida nginjau duit jali (loan) RM500,000 ari RHB Bank, sebuah bank ti kala diempu sida Taib sebilik, lalu suah kala nyali duit ti maioh ngagai sida sebilik empu.

Dagang enggi Taib ngerekai ngagai tiap bengkah dagang

Penerang Ting ba court pasal pemansang Sanyan Group ngayan baka ni chara Taib bisi bekaul enggau semoa bansa dagang menoa Sarawak, lalu bulih penguntong ari tiap-tiap dagang nya. Ting madah semina kediri iya aja ti ngeluar ke puku belanja dikena numbuh kompeni lalu udah nya dikena ngaga indu upis iya, Wisma Sanyan di Sibu. Ting semina ngarap ke kaul enggau sida Taib menyadi-nyadi ketegal beguna ke kuasa Kepala Menteri.

Ting mega madah ke Tufail Mahmud selalu minta share tinggi-tinggi, lalu mar amat endur Ting deka ngenggai ke, laban berunding ke lesen konsesi kayu balak iya nya ti diberi Taib. Rekod kompeni mega nunjuk ke penyampau gaji Ting semina setengah ari enggi Tufail. Bisi mega jako tundi bala orang ti kereja ba Sanyan ti madah ke Ting nya pengurus siang hari, lalu Tufail nya pengurus malam hari. Tu dikena orang nyema ke Tufail suah agi enda nurun kereja maia jam kereja, lalu mega kena nyema ke perengka bilik tinduk ti dibeli iya ari menoa tasik ti diengkah ke iya ba upis iya ba Wisma Sanyan

Lebuoh Wisma Sanyan udah tembu, perintah Sarawak kala berunding deka mindah ke sekeda upis-upis kia, awak ke sewa ari upis-upis nya tau pulai ke penguntong Sanyan Group. Pelita Towerview SB nya sebuah anak kompeni Sanyan Holdings ti bempu Wisma Sanyan, ti endur Tufail megai 56% share lalu Ting megai 44% share, reti nya bebida enggau peneka Taib ngulih ke sewa ari ruang upis.

Berebak enggau  maia Ting numbuh ke dagang kunsi enggau Tufail enggau menyadi iya Arip ba tengan ’80, penerang Ting nya bisi ngayan ke bemacham-macham kontrak diterima sida. Nasib ti baka nya enda patut nyadi ba kompeni-kompeni ti kurang bekaul enggau orang, lalu ari nya sida Taib sebilik bisi bepangku ke pengawa nyadi pengarah ba kompeni-kompeni sida di serata Sarawak, enggau orang duduk baum taja pan nadai pemandai/beseling ba kontrak.

Sanyan enggau Achipeligo Shipping

Kaban dagang kunsi Sanyan Group dagang pejalai kapal tu iya nya Binta Corporation SB. Court nerang ke dagang kunsi tu siti ari dagang kunsi ti bulih kontrak begulai enggau Achipeligo Shipping ti nyendia ke sistem pengankut nengah ai ari penyangkai kapal Tanjong Manis. Lalu ari nya Achipeligo lalu diberi kuasa bejalai ke pengawa dagang chara tunggal (monopoly) ti ngemata ke semoa pekara pasal pejalai kapal di menoa Sarawak ulih Kepala Menteri, lalu dagang tu dempu menyadi iya, Onn Mahmud.

Achipeligo Shipping endang diatur Taib ngemata ke pejalai kapal ti ngundan kayu balak, awak ke ngumpul chukai ari sebarang kapal ti ninggal ke penyangkai kapal menoa tu. Sekeda ‘orang dalam’ ba kompeni nya bisi meri penerang suh Sarawak Report ti madah ke menoa tasik ti meli lalu ngangkut kayu balak pansut ari Sarawak dichukai lalu dipinta mayar ngena mata duit dollar US, ti dibayar ngagai kompeni-kompeni Taib di Hong Kong sebedau ngangkut kayu balak ari Sarawak.

Ngena sistem nya pemerat semoa kayu balak deka dichampur tiap bulan lalu Kin Kwok Shea, iya nya pengurus upis Onn Mahmud ti bepalan di Hong Kong, lalu madah ke penyampau chukai ti patut dibayar sida ngagai kompeni-kompeni Taib ti Hong Kong. Chara-chara tu bisi diterang ke upis Chukai di Jepun dalam taun 2007, leboh udah sida ti minta chukai ari semoa kapal Jepun ti tama ke menoa sida mai kayu balak.

Upis Chukai Jepun nya ngayan ke abis kurang US$100 juta semoa penyampau ‘chukai’ dibayar ngagai Regent Star Company di Hong Kong, ti endur Kin Kwok Shea pemegai share ti berejister dia. Penerang ari ‘orang dalam’ suh Sarawak Report mega bisi madah ke Kin kwok Shea semina wakil ke Onn Mahmud, sebaka amat enggau tanggong pengawa Morshidi bin Omar ba Sanyan Group ti nyadi wakil ke Tufail.

Duit ti ulih Achipeligo ke Kepala Menteri datai ke bebillion Ringgit dalam setaun, munyi ti dipadah ke ‘orang dalam’, ti mega nyebut Achipeligo nya telaga mas sida Taib sebilik. Pejalai kompeni tu mih ti ke pun pengaya sida Taib, nyentuk ke dalam kandang sepuloh taun tu baru sida ‘bekeliti’ ke kampung puang, enggau tanah bansa asal di Sarawak.

Bisi mega orang dalam madah ke batang pengawa Achipeligo ti diasuh Taib ngemata ke pejalai kapal ti ngundan kayu pansut ari Sarawak tu awak ke tau ngumpul semoa macham penerang (i.e. data statistik) ti bekaul enggau pemaioh kayu, udah nya lalu meri penerang ti bula (palsu) ngagai perintah Sarawak, ti udah nya lalu disadong ke serata dunya, lebih agi baka Gerempong Kayu Tropika Entarabansa (ITTO). Ngena chara ti baka tu mih Sarawak meri penerang (ti bula) madah ke pengawa betebang ke kayu dipejalai ke ngena atur ti terit, ti kena ngelalai ke pengamu ti benung, tau ke, majak nyadi!

Sanyan Group ti enggi Ting bulih penguntong ari ti ngereja kontrak enggau Achipeligo Shipping ngena chara meri maioh macham bantu ngagai pengawa ngemata ke pejalai kapal ti ngundan kayu. Sida nerima kontrak nya, terima kasih ke  Onn ti udah ngemendar ke bala menyadi iya Arip enggau Tufail (ti endang kaban dagang kunsi enggau Ting). Enggau nya Sanyan majak bulih lesen konsesi kayu balak lalu mujor ngaga kilang kayu, terima kasih sekali agi ke sukong Kepala Menteri Sarawak

Bekunsi ngereja pengawa salah?

Orang dalam bisi ngamat ke berita ti madah ke chara bala sida Taib Mahmud menyadi ti ngasuh orang bukai nyadi wakil sida, dikena sida ngelalai ke pemesai share pechuma sida ari kompeni-kompeni ti bekunsi dagang enggau sida, sama sebaka enggau sida empu ti nyadi wakil ke Kepala menteri nya. Semoa untong ari dagang Taib di Sarawak endang masuk ngagai Taib Mahmud empu. Chara ngulih ke untong baka tu bisi ditemu Sarawak Report di menoa United States, ti ngayan ke Taib ngasuh bala menyadi iya sechara resia megai share ti besai-besai, lalu tu mega nerang ke ngagai kitai penyampau pengeraja ti enggi iya di Malaysia, enggau di menoa tasik.

Kami mega bisi tetemu ke penerang ti madah ke Taib ngemata ke bala menyadi iya ti nyadi wakil dagang iya enggau chara majak ke sida nyain suraty ngetu kereja ti nadai beharibulan enggau nyain surat mindah ke share, semoa surat-surat nya disimpan iya empu! Enti sema siko ari sida wakil-wakil iya nya bisi penyarut enggau iya, surat-surat ti udah disain sida nya mih dikena iya muai sida ari pengawa! Onn Mahmud empu bisi udah besengki jako enggau Taib udah ti ditemu bisi skandal dagang lalu diatu iya udah ‘dipulau’ ari pengawa dagang Taib beberapa taun tu udah.

Ba penerang ti diberi iya, iya madah ke ari iya ti ngasuh Tufail megai share ke maioh agi lalu ngemendar ke Tufail bekuasa agi atas kompeni nya, lalu pia mega ngemendar ke Tufail ngasuh maioh agi bala sia sebilik nyadi pengarah dia, nya udah mai reti iya udah ngawak ke sida Taib ngerampas kompeni nya ari iya. Ting nulis:

“Dalam taun 1998 [Tufail] minta ngambi ke  menyadi iya, Dato Haji Ibrahim bin Mahmud dipadu ke mangku pengawa nyadi pengarah Sanyan Holding, lalu aku pan ngemendar ke peminta iya nya. Dalam taun 2003, sekali agi iya minta ke anak indu iya, Anita Hamidah binti Tufail dipadu ke nyadi pengarah, lalu peminta iya nya pan dikemendar ke aku. Enggau penyampau sida sebilik ti betambah dalam lembaga pengarah nya iya udah ngambi kuasa nyaga/ngemata ke kompeni nya lalu melakang [ke aku]”.


Ting ngutok sereta beserebana madah ke sida ti bepechah nya udah iya ngemendar ke Anita, indu ti baru beumor 20 ti baru badu belajar ba kolej ti nadai beseling penemu ba pengawa dagang, mangku pengawa nyadi director. Ko Ting nambah, sereta Anita datai dia, Anita lalu bebantah ke chara-chara Sanyan Holdings nya dipejalai ke, lalu belabuh ari nya, kaul sida lalu nyadi enda manah. Nengah undi-undi menyadi iya, Ibrahim enggau undi anak iya, Anita, Tufail udah ulih muai Ting ari pengawa iya ti nyadi pengarah urusan ba kompeni nya lalu pia mega atas semoa anak kompeni Sanyan.

Udah ngambi kuasa megai kompeni ti diambi sida enggau nadai bebayar sesen lalu pia mega nadai ngereja sebarang pengawa, sida Tufail sebilik lalu ngetu mayar gaji Ting nyengkaum semoa dividen, lalu muai semoa pekereja ti lama udah kereja enggau Ting ti dipelaba ke talok ngagai Ting. Ting mega madah ke sida Tufail muai anak menyadi, siko engineer ti begaji ba kompeni nya lalu diturun ke pangkat nyadi tukang cuci!

Sarawak Report bisi bendar pengarap sereta pechaya bendar, nadai agi bukti bukai dikena nekan ke penyalah ‘makai suap’ ti dikereja Kepala Menteri ti mai pangka ti besai ngagai penatai-pemisi menoa Sarawak sengelama 30 taun kelimpah ari kes Sanyan tu. Bala sida Taib sebilik nya tentu deka ngelaban pemutus court beamat-amat ti endur Ting minta pampas ganti-rugi enggau pengerusak ti udah nyadi sereta minta pulai kompeni iya, tang sida tentu enda ulih belalai ke diri nya sida bediri ba mua bala akim dalam court.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments