10 Jan 2011

DIACHU NGENA SENAPANG LALU DIRUMPAK

DIACHU NGENA SENAPANG LALU DIRUMPAK

Diatu Sarawak Report ulih ngayan ke pemendar (bukti) serebana ari mensia maioh ti bekaul enggau ulah bala orang ti jai (gangster) ti seruran dikena kompeni kayu balak bejalai ke pengawa sida ti ngena lesen bekontroversi ti beri Kepala Menteri Abdul Taib Mahmud, lalu betebang ke kayu kampung ba tanah bansa asal (NCR).

Kami ngayan ke video pemendar penanggol nya ti bisi nyadi ba minggu nyin kemari, ti ngayan ke siko ari orang ti bekereja ba kompeni nya nuju ke munchung senapang tunga ngagai bala orang rumah panjai dia ti ngempang (blockade) pejalai lori kompeni nya. Orang rumah panjai nya madah ke pengereja pengawa ke kompeni Sentiasa Maju Sdn. Bhd. Ngitau-ngitau ke senapang iya sereta bejako “kompeni kami tu bisi ngaji samseng ti maioh”. Tu mega terang amat ngayan ke bala orang rumah panjai nya enggau naka ulih nan ke kayu buah enggau kayu getah sida ari ti ka kena tebang orang bukai.

PEDA VIDEO

Pemendar berita tu nunjuk ke tu sekeda ari pemaioh pengasar ti udah suah dikereja kompeni-kompeni kayu balak atas orang asal di menoa Sarawak beberapa taun tu ti udah. Cherita serebana pasal bala samseng ti diupah kompeni-kompeni kayu balak enggau ti diupah Taib Mahmud endang suah didinga ari tusoi tetiap orang bansa asal di menoa Sarawak. Pengawa bala samseng endang dikena ngeremba tau ke ngemba bala orang rumah panjai awak ke badu ngaga empang laban ngenan ke tanah bansa asal (NCR) sida ari ti kena rusak orang. Diatu udah terang bendar samseng ari kompeni Sentiasa Maju nya di rekod bekasar enggau bala orang ari rumah panjai Gran’ in Sumbin, di menoa Bagi Sri Aman, Sarawak.

Pengawa-pengawa jai atas kampung

Naka ke diatu orang bansa asal ti bempu tanah enda nemu kini tunga deka belindung ari bala samseng nya. Penakut ke pengasar bala samseng ti baka nya majak dikerandau ke mensia maioh, lalu enti orang bansa asal ngayan ke pengeringat diri lalu dikumbai tau ngeruga pengelantang menoa. Penusah ti nuntong orang bansa asal ti kena keduan bala samseng mega enda, tau ke jarang amat didinga tau ke dipansik polis. Tu ari ketegal sida polis nya endang nemu ‘Tuan’ Sarawak endang deka ke orang bansa asal nya ngeleka ke tanah sida awak ke bisi endur ‘tuan’ nya numbuh ke pengawa ke penguntung iya empu. Bala polis ti bepangkat besai mega bisi ditemu bekaul bendar enggau bala pengurus kompeni-kompeni kayu balak ti kaya-kaya.

Bala orang bansa asal lalu nadai kala bulih pemendar penerang ti berekod dikena ngelaban orang ti beduan sida. Taib ulih duduk enggau naka pengelantang ati ba upis besai iya ba Wisma PELITA di Kuching, seraya ke bebagi ke pengaya asil enggau sida sebilik tau ke orang ti bekunsi dagang enggau iya. Maya nya mega Taib lalu ngelulu ke sinu, madah ke bisi ‘bekunsi dagang’ enggau orang bansa asal ‘ngemansang’ ke tanah sida empu, taja pan, iya ke bendar orang bansa asal endang seruran dikeduan bala samseng tetiap kali sida ngayan ke pengeringat diri dalam kampung din.

Betaun-taun sekumbang tanah sida dikeruga orang, orang bansa asal tu dalam penusah enggau pemerinsa lalu serebana sida nadai didinga orang. Tu mih kebuah ti bendar pemansang ke orang bansa asal nya pekara ti penudi diberi Taib. Iya enggau sida sebilik, enggau sekeda taukey-taukey kayu balak ti dikerindu ke iya, nyadi kaya raja, ti datai ari tanah (NCR) enggi orang bansa asal ti udah dirumpak.

Tang diatu teknolgi nyau udah masuk ngagai kampung puang menoa Sarawak ti benong dikeliti ke. Ba penyarut ti naydi tu, siku ari orang bansa asal dia bisi ngembuan telefon binching ti ulih dikena iya ngerekod utai ti nyadi nya. Laban ari tegal chip telefon iya nya kelalu mit, utai ti benung direkod iya nya padam diri. Taja pan baka nya, utai ti direkod iya nya, taja pan kabur-kabur, tang nya ulih nyadi ke pemendar (bukti) dikena ngenegap ke agi cherita pasal pengasar pengawa bala samseng nya. Nama kini saut Kepala Polis pasal penyarut tu enti lawyer Baru Bian ari upis PKR mai kes tu dipending ke dalam court, ngari ke orang asal di Gran’ in Sumbin? Naka ke diatu polis di pelilih menoa nya udah ngaga repot bepelasar ke penerang (aduan) ari bala orang asal dia, tang polis lalu nadai ngereja nama-nama pansik. Baka nya mega, samseng ti ngitau sereta nuju ke senapang nya suba dipelaba ke udah rari ari menoa nya.

Ngelama-lama tu orang di menoa suah amat udah ngaga repot ba upis polis, tang semina pansik ti dipejalai ke polis iya ti bekaul enggau pengelenyau kunchi sebuah ari kereta kompeni dia. Pekara tu mih ti nyau ngujong ke bala polis niki rumah orang di menoa nya, tang mega ngujong ke polis nyau betanya ke pasal penyarut ti nyadi entara sida dia serumah enggau kompeni kayu balak ti ngeruga kampung sida!

Kitai tau belaba ke kompeni nya deka ngemadu ke pengawa siku ari pekereja sida ti enda likun, lalu udah nya kompeni nya tau ngelulu ke jako penanggol nyadi nya ‘jarang nyadi lalu patut diputar ke sida empu aja’. Kompeni nya patut mayar gaji pekereja nya, lalu muai iya ari kereja lalu pia mega nyamah iya, laban enti enda baka nya, Sarawak Report tau ngupah pekereja nya ngena duit ti maioh dikena ngulih ke cherita ari iya!

Enggau pemendar berita ti baka tu, Taib patut badu agi besemaia meri pemansang. Suah agi utai ti nya atas orang bansa asal iya nya penusah kena terumpak orang tanah. Taib tentu enggai ningga ke serebana lalu ngelulu ke cherita, semoa utai ti nyadi nya nadai apa-nama. Tang diatu semoa utai udah tebantai. Iya diatu benong diperati ke, lalu iya mega deka dipechara ba pemendar, lalu ukai ketegal semaia bula iya ke ngelama tu.

Comments are closed.