10 Jan 2011

DIREKOD DALAM VIDEO! TAIB NGAKU DIRI KAYA RAJA LALU NYUAP BALA PENGUNDI!

This post is also available in: English

DIREKOD DALAM VIDEO! TAIB NGAKU DIRI KAYA RAJA LALU NYUAP BALA PENGUNDI!

Taib ukai semina udah direkod ngena kamera deka ‘nyuap’ bala pengundi, tang iya mega ngaku ngembuan pengeraja! Penyalah enggau jako aku iya sama-sama direkod rambau pengawa pilihanraya ti mit di Sibu, diatu bisi dikebuan Sarawak Report. Ba jako iya ti direkod nya iya madah ke bala orang ti datai ngulu pengawa nya:

“Aku bisi duit ti lebih ari ulih dipelanja aku, nya alai aku enda irau ke duit. Semoa anak aku ngemata [ke duit aku], nya alai aku ka meri kita utai ti manah”. Udah nya iya lalu terus-terang deka ‘nyuap’ bala pengundi ba sebuah rumah panjai ti endor iya nemuai maia pilihanraya mit di Sibu tu tadi;

“Aku besedia ka meri kita 600 Ringgit sepintu, biasa nya, nadai berubah. Ko orang, maioh amat duit nya. I bisi maioh bakih di serata dunya tu. Sida nya ari menoa Jerman, Jepun, China. Kami ulih berandau, ngasuh sida beranak ke puku dagang ditu.”

Peda iya ‘nyuap’ bala peninga

Iya bejako sumbong ke pengeraja diri

“Maioh duit lebih ari ti ulih dipelanja aku” – penerang ti amat ari Sarawak Report taja pan dikumbai orang bukai bula

Video ti ngayan ke Taib benong bejako ba orang maioh rambau pilihanraya mit di Sibu, ti endor iya meda enggau mata iya empu calon ari parti ti betuai ke iya alah. Tu ngayan ke Taib ti nyau udah tuai umor udah teleba ngena chara nya menang ba pengawa bepilih, lalu iya enda nemu maia enggau teknologi udah mansang manah. Iya patut nemu semoa utai ti disebut kitai ba moa orang maioh ulih kena rekod sapa-sapa! Sarawak Report beterima kasih ke Taib ti mansut ke jako (penerang), ti tau ke penerang ti amat taja pan kami tu suah dikumbai orang mansut ke berita ti bula ngelama tu, nyengkaum jako iya ti ngaku ngereja pengawa ‘makai suap’.

Jako penerang iya ti madah ke diri ti ngumpul “duit ti maioh lebih ari ulih dipelanja aku” ti datai ari pengawa salah guna kuasa iya di Sarawak, bisi direkod ngena perengka pengerekod to murah ulih bala pemerati ti ngulu pengerami nya. Iya nyebut iya suah ngereja nya lalu ‘nyuap’ tiap-tiap pintu bilik rumah panjai ngena duit 600 Ringgit tiap kali iya nemuai ngagai genturong pendiau orang.

Ari jako nya iya nyau enda belalai ke diri ti bempu pengeraja nengah bala sida sebilik, lalu seruran ngira diri ulih rari, tang mansut ke jako nya ba orang maioh, lebih agi maia iya nguji narit ati pengundi ngena ‘suap’. Sekali tu iya enda ulih rari. Di menoa Sibu bala pengundi udah nemu iya deka ‘nyuap’ sida ngena duit sida empu, udah iya ti ‘ngeliti’ ke tanah enggau rampa menoa sida, lalu naban ke asil ari pengawa iya nya. Bala pengundi bepesan ngagai Kepala Menteri maia nya, udah iya ti mansut ke jako nya dalam bulan Enam ti madah ke diri bisi maioh duit lebih ari ulih dipelanja, nama kebuah iya agi minta diri mengkang ngenan ke upis iya lalu seruran agi ka ngulih ke duit ari menoa Sarawak? Pesan tu patut diapal bala pengundi belama-lama ba pengawa pilihanraya ikas Federal enggau DUN. Semoa bala kaban parti penyakal endang enggau naka ulih madam ke pengawa kamah ti lama amat udah dikereja iya atas menoa Sarawak tu!

Peda mih enggau mata diri empu

Diatu Sarawak Report udah bisi ngeluar ke transkrip pasal utai ti udah disebut Kepala Menteri berekod, sekeda nya ngena jako Melayu enggau jako English lalu bisi ga jako Iban, ba jako iya ba moa orang maioh ba sebuah rumah panjai ti penoh. Taja pan munyi  enda berapa terang, tang kitai agi ulih belaba ke nama utai ti disebut iya nunda ke mulut iya ti kebut-kebut bejako nya.

KLIK DITU DIKENA NGULIH KE TRANSKRIP DALAM ENGLISH ENGGAU MELAYU

Semaia-semaia tu bula enggau mimpi pasal ‘pemansang’

Kelimpah ari ti ngaku, Kepala Menteri nya numpu ke jako iya minta bala orang rumah panjai nyerah ke laloh tanah bansa asal sida suh menoa Sarawak. Alasan iya nya ngambi ke ulih nyaup iya ngaga “master plan” dikena nganjong pemansang enggau perengka-perengka ti diguna besari-sari ngagai menoa sida. Tang, udah lebih 30 taun orang Sarawak udah puas sereta leju ninga jako semaia ti munyi tu. Maioh orang udah nyerah ke tanah sida, tang nadai nerima nama-nama. Sarawak nya sebuah menoa ti kaya enggau pengeraja asal, tang orang Sarawak maioh mega ti seranta lalu tinggal jauh di belakang nengeri-nengeri bukai, terima kasih Taib Mahmud.

Nambah ke nya, iya bisi mega didinga ngutok orang ke penyeranta sida. Ari ti ngayan ke penyinu ati enggau berasai besalah, iya terus didinga ngutok sida ketengal enggai nyerah ke MAIOH AGI tanah sida. Iya mega madah ke pekara nya endang udah dikembuan sida kenyau ari serak orang ti dulu agi.

“Berapa iko kita bisi gaji?” ko iya nanya. “Ba kita ti bisi gaji, berapa iko kita ulih meli rumah?” Iya nganu sereta ngutok bala maioh ngambi ke “ngeleka ke chara lama” sereta ninggal ke “bumai padi bukit” laban chara nya “nadai pemansang enggau ngenatai ke penguntong”. Tang iya ngasoh sida “nitih ke master plan” lalu “meri kuasa atas tanah ngagai Perintah!”

Ngena runding ti betul, rakyat di Sibu udah nulak penemu ti dibantai ke Taib. Di serata menoa Sarawak tu penuh enggau “Master Plan” ti baka uras, ti endur sekeda aja kroni Tain enggau sida sebilik ngulih ke penguntong. Udah bekau 30 taun, diatu orang maioh nyau ngelala “pemansang enggau penguntong” Taib ti nyengala iya nya ngemata ke akaun bank iya empu. Meri iya tanah, reti nya sebaka enggau pengelenyau tanah nya.

Comments are closed.