JAKU SEMAYA TI ENDA BETUL ENGGAU BALA IBAN – Berita ari Borneo Post

JAKU SEMAYA TI ENDA BETUL ENGGAU BALA IBAN – Berita ari Borneo Post

Taja pan Borneo Post nya sebengkah surat khabar ti ditemu seruran ngemesai berita pasal tang Borneo Post enda tau ngenang pasal pemerinsa pendiau enggau pengidup bala Iban, tang nusui pasal pemanah sukong bala Iban ngagai Taib Mahmud enggau BN.

Ba sebengkah berita, surat khabar nya enggau bendar merita ke bala Iban balat amat nyukong Kepala Menteri ti nyau tuai umor nya awak ke iya tau terus mangku pengawa iya, lalu berita tu mega ditambah ulih siku tuai orang ba endur nya ti mansut ke jako ngenang Taib “ngembuan penemu ti maioh” lalu pengawa iya “agi mengkang dipeguna mensia maioh”

Siku Tuai Iban di Miri, Temenggong Wilson Atong Limping mega bisi direkod mansut ke jako sukong iya ti madah ke “semina perintah BN aja ti ulih meri rakyat maioh agi pemansang”. Tu mih jako pesan ti dikerindu ke Taib Mahmud, lalu jako tu ti selalu ke leka puchau iya sepengelama 30 taun udah bekuasa.

Maju enggau mansang nama?

Tang Borneo Post terus betusui ke semua macham perambu Taib, ti “ngembuan penemu ti maioh”, ti udah diberi iya ke bala Iban sekumbang iya megai perintah 30 taun.  Jauh amat bala Iban nya kala ngasai ke pemansang, baka ti ditusui Taib, maioh amat mega genturung rumah-rumah panjai bala Iban “agi beguna ke maioh macam perengka ti diguna.”

Nambah ke nya, raban Iban ba endur nya “tussah amat ngidup ke diri laban ti kurang ba perengka ti diguna baka jalai alun ti bebelakin, ai paip ti beresi enggau kuasa eletrik”. Taib mega madah ke perengka ti dikena bepadah kin-kitu (telecommunication) endang apin meruan, lalu orang ti deka ngena talipaun di menoa nya suah agi ngiga endur ti tinggi-tinggi!

Tu mih arung menoa ti udah kala endur Taib enggau bala kroni iya ngambi kayu kampung suba, atas nama “maju enggau pemansang”. Maia nya menya bala Iban udah kala disemaia ke Taib pampas ketegal sida ti lenyau kampung lalu deka diganti enggau semoa macham perengka ti diguna. Tang pekara nya disemaia iya bepuluh taun sebedau nya.

Ba kali kedua Taib ngeruga menoa nya enggau chara ti ngerampas tanah bansa asal (NCR) dia endur nuduk ke ladang sawit, mega, atas nama ‘maju enggau pemansang’. Sekumbang Taib ngulih ke pengeraja iya ti ngelui ari ti ulih diperunding ke kitai, lalu pia mega sekumbang iya beranak ke puku di menoa luar, bala Iban di menoa nya mengkang nganti diri bulih ai paip ti beresi enggau kuasa elektrik.

Tuai Iban nya udah nguji enggau naka ulih madah ke pemanah pendiau enggau pengidup. “Kami berasai gaga lalu beterima kasih ke pengawa bala orang perintah atas pendiau enggau pengidup kami ngelama tu”, ku iya meri penerang, ti lalu mega ngerintai ke projek-projek MRP diberi perintah, awak ke manah didinga maia nya.

Projek-projek nya nyengkaum meri tulung tangki ai ngagai bala Iban di endur nya ngambi ke bisi dikena sida nambun ai ujan. Terima kasih ngagai Taib ti udah meri pemansang sepengelama 30 taun, udah bekau tanah kami dikeruga.

Tang Temenggung Atong mega sempat ngerintai ke sekeda perengka ti diguna ti endang lalu apin bisi di menoa nya. Sekula enggau klinik endang nadai, lalu pia mega jalai alun ti agi betanah kuning dia pan lalu enda digaga manah ke agi. Nyangka pemansang udah tekelalu maioh mih dikereja, nya kebuah ba endur nya pemansang apin ulih diberi ke endur nya.

Wakil Rakyat enggau pengari BN ba menoa nya, Dr. Stephen Rundi, mega bisi nambah ke penerang pasal pendiau enggau pengidup orang ba endur nya. Iya ngaku, semua perengka ti dipeguna mensia maioh ba endur nya endang agi kurang! “Perintah endang nemu sereta suah ninga serebana orang ba menoa nya,” ko iya meri penerang ngagai Borneo Post. Ngagai surat khabar nya mega iya besemaia deka mai pemansang baka ti udah diperambu perintah ke endur nya.

Maioh agi jaku semaia enggau ‘perambu’

Sekumbang 30 taun ti mangku pengawa dalam perintah BN lalu ngereja menoa bala Iban dikena ngulih ke duit ari kayu kampung enggau ladang sawit, nama kebuah BN agi ngenang maioh bansa perambu?

Taja pan suah belunjak ke jaku perambu tu, perambu nya, Rundi bisi nerang ke duit perintah ti diagih ke ngagai menoa nya endang apin chukup, nya alai pengawa lalu enda ulih dipejalai ke.

“Duit RM18 juta ti diagih ke ngagai menoa Kemena dalam perambu pengawa pemansang NKRA enda chukup, tang agi ulih dikeripit dikena ngereja projek-projek ti udah diperambu lalu patut iya tembu dalam taun 2012” ku iya ngaku! Reti nya, endang nadai mih duit ke endur nya, lalu anang mih arap ke bisi ai paip beresi enggau kuasa elektrik – lalu anang mega arap ke jalai alun ti manah, sekula-sekula tau ke sepital-sepital.

Kini penunga duit nya?

Enti bala Iban ti suah amat udah diperansang nganti enggau penuh pengarap baka ti diasuh BN, lalu arap ke diri ulih meda pemansang nyengenda ayan ba moa mata diri empu, sida mega patut diasuh meda reta enggau pengeraja Taib Mahmud di menoa luar, tau ke semina meda gambar rumah iya empu ti digaga iya enggau sida sebilik. Enda mar kitai meda gambar pengeraja nya, ngambi ke kitai nemu kini penunga duit dikena ngaga pemansang ba menoa-menoa ti patut diasai ke, tang lesap baka nya aja.

Bala Iban diatu patut berunding ni pengelama agi endur BN enggau Taib Mahmud deka nganjung pemansang ngagai menoa sida, ti lama amat udah disemaia ke. Tang siti pekara ti tentu deka nyadi iya nya, Kepala Menteri nya enda ulih idup 30 taun agi!

Enti kitai deka ngambi pulai duit ti ulih ari kayu kampung kitai enggau penguntung ari ladang sawit ti ditanam atas tanah bansa asal kitai empu, iya nya enggau chara ngubah diri empu lalu nukar semoa orang ti suah amat udah besemaia deka meri kitai pemansang, tang pemansang lalu enda datai-datai. Maia bepilih ke pengari tu ila mih kitai nentu ke pendiau enggau pengidup kitai ke dudi ari. Berubah mih diatu! Anang betanggoh agi. Anang beila-ila!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments