RINGAT BARU – NGERAMPAS MENOA ORANG KENA NGEMATA KE PENGELANTANG ANAK IYA

RINGAT BARU – NGERAMPAS MENOA ORANG KENA NGEMATA KE PENGELANTANG ANAK IYA

Sarawak Report bisi tetemu ke siti berita ti ngenyit ke ati kitai ari menoa Sri Aman, ti endor Kepala Menteri Sarawak ditemu deka nyual tanah ti diberi iya pechuma ke anak iya, ngena untong berjuta-juta ringgit.

Tanah 22,000 ekar (tau ke 8,800 hektar) nya ba kandang Bijat Land District, nebing Sunggai Tisak. Tanah bansa asal (NCR) tu dipungkal bala Iban, munyi ti disebut SADIA, sebengkah gerempong ti ngemata ke pengelantang hak orang Iban. Ko SADIA, bisi kira-kira 15 bengkah komuniti deka kena ‘empas’ pengawa ti ngambi tanah nya ti deka endor numboh ke ladang sawit. Tang taja baka nya, bala Iban dia nadai dipadah ke lalu nadai mega diberi sebarang pampas.

Tu ti dikumbai “pemansang tanah ti rancak”?

Orang Iban di menoa nya bisi madah ke bala tukang tumbang udah tama ngagai menoa sida kia 4 bulan ke udah lalu tu ngujong ke bala orang di menoa nya ringat. Sida dia nadai dipadah pasal tanah-tanah ti bisi bekaul enggau bala anak Taib, lalu tanah dia deka ditukar nyadi ladang sawit

Siko ari orang ti endang nguan menoa nya besebana, “Uji kita ngira berapa juta ringgit ulih sida lalu ngujong ke bansa Dayak merinsa!”

Pemansang datai beberapa hari aja udah Menteri James Masing ti ngari ke Perintah Sarawak madah ngagai bala penulis berita, BN merambu deka nukar guna tanah enggau rancak agi ba tanah-tanah NCR nyadi ladang sawit di menoa Sarawak. Jako iya ti munyi nya udah tau dikira nyakal bantah entarabansa ba pengawa ti ngerusak rampa menoa enggau ngachau hak asasi bansa Dayak. Enti BN menang baru ba pilihanraya tu ila, sida deka ngereja DUA KALI LIPAT ladang sawit dia ngagai 2 juta hektar datai ba taun 2020.


“Makai suap” ti terang amat

Tu terang amat ngayan ke sapa orang ti bulih untong ari pengawa jual-beli tanah dia ti dikumbai “pemansang”. Bala orang di menoa dia enda dipadah ke pasal pengawa-pengawa ti dikereja ba tanah-tanah dia, lalu penemu ‘ngemansang’ ke menoa nya bisi ditemu ba upis Tanah enggau Penyukat, ti dikemata ke Taib Mahmud mangku pengawa Menteri Perancangan & Pengurusan Sumber.

Kenyau ari bulan Disember 2008, tanah-tanah nya diserah ke suh Titanium Management SB, sebuah kompeni enggi anak iya empu, bekunsi enggau Chris Chung, siko orang dagang ti selalu bekaul enggau skandal kontrak di menoa tu. Tanah ti besai amat rampa nya diserah ke ngagai siko ari anak Taib dikena ngulih ke ‘sebarang bayar’ ti enda ditemu penyampau. Chara “sebayar bayar” nya endang selalu dikena ba pekara dagang perintah di menoa tu (ti dipejalai ke Taib) enggau sida sebilik, lalu nadai sebarang rega ti nyengala. Tanah-tanah tu enggi bansa lalu diambi baka nya aja nadai bepampas, tang nyangka mih sida Taib tau meri penerang ti manah agi ila!

Ngulih ke penguntong ngena chara ti ngemali diri


Chris Chung ti nyadi Pengurus kompeni Titanium bisi ditemu deka nyual tanah nya ngagai FELCRA ti diempu Perintah Malaysia. Sarawak Report deka nemu, ukai pekara tu ti disebut ‘minta duit bantu ari perintah besai (Federal Govt) dikena ngemansang ke tanah-tanah di Sarawak’ baka ti dipansut ke James Masing? Tu ila siti ari chara duit bantu nya deka pulai ke anak Taib enggau bala kroni iya aja.

Chung disadang minta rega RM3,200 ke seeker ari FELCRA, tang rega nya dipelaba ke deka ditiki ngagai RM4,200 ke seeker. Enggau rega nya, kompeni Titanium deka bulih penguntong entara RM70 ngagai RM93 juta!

Kes ti baka tu tau disebut ‘Apai ti mentas sereta nelap’ ngemata ke pengelantang anak diri, tang menyati sereta merinsa ke orang ti dirampas iya tanah ke penguntong sida sebilik. Taib mega kala direkod leboh maia iya bejako, “aku bisi duit ti maioh, ti lebih ari ulih dipelanja aku, nya alai aku ngawak ke bala anak aku ngemata ke duit aku”. Enti Taib udah maioh duit, nama kebuah iya agi majak ngerumpak ari rakyat iya empu?

Pekara tu nyadi di serata Sarawak, lalu BN deka majak nambah ke pemaioh tanah dua kali lipat

Chara ngerampas tanah baka ti dikereja di menoa Sri Aman tu, nya siti ari pengawa ti suah dikereja di serata Sarawak. Nicholas Mujah ari gerempong SADIA deka mai kes tu ngagai pechara, laban pengawa nya endang ditemu salah ari segi undang-undang menoa.

Pagi tu tadi (hari Empat) bisi 16 iko bala tuai rumah dikangau betemu enggau pemesai-pemesai ba upis Tanah enggau Penyukat, nengah surat panggil ti diterima sida dua hari ti udah. Bala tuai-tuai rumah nya nadai dipadah ke nama kebuah sida dikangau ke, tang maioh sida ulih belaba ke surat panggil nya bisi kaul enggau pengawa ngambi tanah sida. Enti isi surat nya endang amat bisi kaul enggau pengawa ngambi tanah NCR sida, reti nya tanah nya udah diambi ngena sempekat lebih dua taun SEBEDAU nya!

Ba sebengkah penerang ti diterima kami, anak Taib enggau bakih iya deka mujor minta rega ti tinggi ari FELCRA ke tanah-tanah di menoa nya. Bala Iban deka ringat laban chara jual-beli tanah ti baka nya endang salah! Ba sempekat jual-beli tanah ke bukai mega, sida Taib sebilik kala ditemu jampat-jampat nyual share sida dikena ngulih ke untong. Ba pengawa tu, pengawa sida tu deka diayan ke, lalu bala orang ti meli tanah tentu deka berasai enda lantang ati.

Pechara ba maia-maia ti ka datai

Diatu bala Iban ari menoa Sri Aman enggai neju ke pekara tu pia aja. Sida udah nemu nengah program Radio Free Sarawak, lalu deka mai pekara tu ngagai court. Ba pechara-pechara ke pasal tanah ngelaban Kepala Menteri Sarawak enggau perintah ti dipega iya kala udah diator ba court perintah besai (Federal) lalu orang ti bempu tanah-tanah bisi udah menang.

Udah ti ditemu ngereja pengawa belalai dikena meri pengeraja ke diri sebilik, Kepala Menteri tentu deka napi pemar nalat berita ti baka tu. Tang, baka ti ngelama tu mega, iya tentu deka nimbal enggau chara enda nyaut sekali!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments