9 Jan 2011

TAIB NGERANSI!

This post is also available in: English, Malay

TAIB NGERANSI!

Perintah BN enggau Kepala Menteri Sarawak, Abdul Taib Mahmud, udah ngayan ke pengirau ati sida ba jako bantah ti majah nambah ti nyau mungkor perintah sida ari ti ngena beberapa bengkah chara dalam kandang 24 jam tu.

Kena malam hari Empat tu tadi sida BN ngena kuasa polis nangkap dua bengkah raban NGO ti tebilang, be-entara ke empat lima jam enggau pangan diri. Kedua-dua bengkah raban NGO nya diemba enggau jako dawa laban ti bisi ngembuan kereban dikena betenah, tang udah nya sida nya lalu dilepas ke baru.

Kereban petenah nya nyengkaum CD ti ngundan program ti direkod ari Radio Free Sarawak, sebengkah radio ti dipejalai ke ngati ke diri dikena ngeluar ke penemu politik di Malaysia tang ukai ngena lesen perintah, sereta enggau TV Bebas, ari Sarawak.

Kesal ketegal dibantah ngena undang-undang?

Ditu, Sarawak Report ulih ngayan ke sekeda gambar ti bekaul enggau pengawa polis ti nyerungkai upis gerempung Sarawak Dayak Iban Association (SADIA) di Kota Sentosa, Kuching, tumu pagi hari Empat tu tadi. Raban bala polis ti ngena pekayan periman enggau bala pemesai ari Kementerian Dalam Negeri (KDN) nyerungkai upis SADIA nya lalu ngerampas semua CD enggau perengka penyalin, nyengkaum surat-surat enggau poster. Surat-surat nya ngundan jaku tesau – ti ngayan ke kar menoa Sarawak disema baka jelu sapi ti ngeluar ke tusu lalu Taib enggau Najib dikelulu ke duduk ari baru jelu sapi nya ngulih ke tusu sapi nya! Secretary General ke gerempung SADIA, Nicholas Mujah enggau dua iko kaban iya dibai ngagai balai pulis laban dipansik nyentok ngagai pukol 3 pagi sebendau ti dilepas ke. Raban pulis mega dipeda ngerampas sekeda perengka ari upis SADIA nya, tang udah nya bala sida ti ditan ke nya lalu dilepas ke baru enda diukum.

Tangkap di Miri ditangkan ke tangkap ti Kuching

Tangkap di Kuching nya nangkan tangkap ba padang penerebai bilun di Miri atas siko lawyer NGO ti di dipebasa ke, Abun Sui Anyit, ti suah ngari ke orang bansa asal ba maioh pechara ngelaban perintah pasal penyarut tanah bansa asal NCR. Abun tu baru datai di Miri (ari Kuching) lalu dipelaba ke bisi mai sekeda CD ti ngundan recording ari program Radio Free Sarawak. Diatu stesyen Radio Free Sarawak nyau mupok-mupok nambah ba pemaioh bala peninga di serata menoa Sarawak lalu tau ngenatai ke pengirau ati Kepala Menteri. Stesyen radio tu, ti ditabur ke ngena gelumbang pandak (SW) lalu ulih mega didinga nengah internet, suah amat ngeluar ke penemu enggau jako bantah ba penyalah makai suap enggau penyalah ngelanggar hak pengelantang mensia. Radio tu mai peninga berati ke pekara pasal rampas tanah ti nanggol orang bansa asal, ti nyadi ba tanah orang bansa asal ti dibagi nitih ke undang-undang tanah ti dikemendar ke perintah Taib.

‘Ya mih, nya endang politik’!

Abun Sui udah diterang ke bala pulis ti nangkap iya, iya ti ditangkap nya kegetal “penyalah politik” lalu iya deka didawa nitih ke undang-undang petenah enggau ngasut (Sedition Act 1948) laban ngembuan perengka dikena meransang ‘petenah’! Tang udah nya Abun diasuh pulai lalu enda didawa. Bala penerit adat ti nangkap iya mega nadai ngayan ke pengeran ati sida baka tuan-tuan politik sida empu. Beserimbai enggau nya, Chee See How, siko lawyer ti bekereja enggau tuai PKR Baru Bian di menoa Sarawak mega bisi dipeda nyempulang kaban SADIA ngagai balai pulis, lalu bala kaban SADIA nya mega dilepas ke ngena ikat jamin tang enda didawa.

Tindak balas ngagai bantah ti baka tu nyau ngayan ke perintah enggai bebatak-asur agi ba pekara ti meri peluang bejako sepeneka ati (bebas besuara) (baka penemu ti ditan ke Menteri James Masing lebuh iya ditanya ba jako randau iya enggau Radio Free Sarawak). Penumboh raban penyakal di Sarawak nyau ngenatai ke pengirau ati soh perintah BN kejang ti nyendia ke diri ba pengawa bepilih besai ru ila.

Perintah nyau nemu enda sida ngena pengawa kasar nagang bantah, sida iya napi penanggol ti besai ari rakyat, ti ditambah ke mega enggau pemaioh bala raban lawyer ti tebilang ti besedia deka ngari ke pengari penyakal enggau raban-raban NGO ti nyukong kes-kes ngelanggar ator pengelantang mensia (hak asasi manusia) ba penyarut tanah bansa asal ti dikereja Taib enggau raban BN iya. Pengasar tindak balas baka nya mega tau narit ati raban NGO ari serata dunya, ti endang nengkila ke penanggol perintah ti ngelanggar ator pengelantang mensia di menoa Sarawak

Tangkap ti deka mai penanggol?

Diatu Taib nyau majak ‘ngayan ke taring’ iya. Tang iya mega enda tau enda berunding panjai nama patut dikereja iya lalu sekali ke iya majak bekeras bekasar sereta betangkap ke sapa-sapa ti mantah iya, tau ke iya belembut laban nangi enggai ke ngemedis ati mensia maioh ti endang majak betambah diatu.

Radio Free Sarawak tau didinga ke pukol 6.00 – 7.00 lemai nengah gelumbang pandak (SW) 15420 khz enggau pukol 8.00 – 9.00 malam nengah 6205 kHz (SW), tau ke nengah podcast ari laman sida ba www.radiofreesarawak.org

  • http://- Kayau Anak

    Biar Thief Minister Taib Mhd tangkap sapa ia pilih, maioh orang agi bedau deka muai Dynasty Detector kaya raya ari makai menua rakyat jelata. Tangkap aja awak mensia maioh sedar agi penyai kerja iya ke encuri reta menua kitai.

    Jampat bubar DUN Sarawak diatu.

    Change We Must.