UDAH NYATA! TAIB KEPALA SAMSENG

• 10 Jan 2011
• BM 翻译

UDAH NYATA! TAIB kepala samseng

Sarawak Report udah tetemu ke maioh surat penerang ti tau dikena ngamat ke tudoh atas Abdul Taib Mahmud, Kepala Menteri Sarawak, nya ngembuan reta tengkira ti beungkos bejuta-juta ringgit di menoa tasik lalu diengkah ke iya atas nama sida sebilik.

Penerang pansik udah ngayan ke chara jual-beli reta ti belalai, ti endor Kepala Menteri endang enggai ditemu sapa-sapa iya bisi reta tengkira ti maioh nya. Dipelaba ke tu dikereja iya dikena iya ngelamun pemaioh reta iya, ti alai iya disadang tusah amat deka meri penerang ti betul ba mata undang-undang.

Ngena chara tu, semoa sida sebilik diasoh iya berejista nyadi pemegai share sereta mangku pengawa nyadi pengarah-pengarah dalam semoa kompeni ti bempu reta tengkira nya, lalu ba sempekat entara sida sebilik semoa share ti dipegai sida nya endang enggi iya magang.

Sebengkah salin surat penerang ti bisi ditemu Sarawak Report ti ngayan ke sempekat entara sida sebilik iya nya bekaul enggau share sida dalam Sakti International, sebuah kompeni ti bempu lalu ngemata ke beberapa buah rumah di San Francisco. Sakti tu sebuah ari ti bekait-kait enggau maioh agi kompeni bukai, ditumboh ke sida Taib di menoa North America. Siti ari kompeni ti mampang ari Sakti tu iya nya Sakto, sebuah kompeni besai ti ngemata ke pasal reta tengkira, enggau kompeni Wallyson’s, ti bempuRumah Abraham Lincoln di Seattle, ti disewa upis FBI.

Bisi lima iko pemegai share dalam kompeni Sakti International ti berejista di California, iya nya bala menyadi Taib baka Onn Mahmud enggau Arip Mahmud, lalu pia mega tiga iko anak iya, Sulaiman Taib, Mahmud Taib enggau Jamilah Taib. Taja pan baka nya, surat penerang ti ditemu kami nya, bisi ngembuan pemutus jako ti ditulis ke sepengudah kompeni ditumboh ke, lebih setengah ari semoa share nya deka pulai soh jari Kepala Menteri. Semoa penyampau tu dikira ke USD40 juta ti enggi Sakti aja, nitih ke penerang ari kompeni nya empu.

Meinggil-inggil?

Taja pan baka nya, Sakti International ti dpelaba ke ngembuan reta USD80 juta, nya semina sebagi aja ari pengeraja sida Taib sebilik. Ba berita bukai ti udah diayan ke kami agi maioh amat reta tengkira sida ti di menoa tasik. Ambi ke chunto, bala anak Taib mangku pengawa nyadi pengarah lalu pemegai share ba kompeni-kompeni ti nguasa dagang pengawa berumah enggau pendiau di Canada, Australia, Britain enggau di United States, lalu semoa penyampau reta tenkira tu disadang manggai bebillion-billion dollar US. Tang, siti penyelai iya semoa reta tengkira enggau pengeraja tu endang udah dikembuan bala sida maia sida baru beumor 20 taun lalu bisi mega sida nya baru masuk besekula ba kolej ti enda nyata dikemendar ke undang-undang tau masuk pengawa beranak ke puku enggau bedagang besai-besai. Pekara ti deka ditemu kami ari Taib, sekali ke bala sida sebilik tu agi bisi ngembuan enggau chara besalam reta tengkira iya? Enti enda pia, nama penerang ke bukai pasal pengawa beranak ke puku tu?

Beberapa iti report udah dikenatai ke ba upis MACC, sebengkah upis ti ngemata enggau matau penyalah ‘makai suap’ menoa Malaysia, bekaul enggau reta tengkira sida Taib sebilik. Penerang tu udah ngayan ke Kepala Menteri deka meri penekan soh MACC ngambi ke ngator pansik ti silik.

Maioh agi chap jari ditemu

Surat-surat penerang Sakti International ti bisi ba kami, ti dikeluarkan ba sebengkah kes dala court, udah meri penerang (bukti) ti ngayan ke Kepala Menteri bisi bekaul enggau kompeni nya, taja pan iya kala madah ke diri nadai nama-nama kaul. Ba surat penerang ti digaga dulu agi, iya ti disain dalam taun 1987, endang bisi ngerintai ke nama iya empu mangku pengawa nyadi siko ari bala pengarah dalam kompeni Sakti International nya.

Surat penerang ti ditanya ke iya pasal Domestic Stock Corporation ke kompeni Sakti International, ti endang dipinta tiap-tiap taun ulih perintah menoa California. Dalam taun 1987, leboh maia kompeni tu ditumboh ke, surat penerang ti keterubah endang terang amat ditulis ke nama Taib Mahmud empu ti mangku pengawa nyadi pengarah sama-sama enggau bala menyadi iya, Onn enggau Arip. Semina siti aja  pengawa pemesai (officer) ti bekereja dia dipangku Mahmud Taib, iya nya anak tuai Kepala Menteri.

Kala ditemu dulu ari tu menya, bala sida Taib sebilik endang enggau naka ulih enda mai nama iya dalam sebarang bansa surat penerang. Tang ba penyaru ti tumu dikereja tu deka ngujong ke pansik ti silik dikereja atas iya ari ketegal iya mangku pengawa Kepala menteri tang bisi mega bekaul enggau pengawa dagang. Enggau nya, terang amat mih iya endang numboh ke kompeni iya empu, Sakti International, ti bepalan ba alamat rumah di menoa San Francisco.

Dilamun

Surat-surat penerang mega bisi ngayan ke tusun bala pemangku pengawa enggau bala pemegai share dalam kompeni nya diubah endor Onn, Arip enggau Mahmud Taib nyadi pengarah dia, lalu semina Rahman Taib aja ti nyadi pemesai dia. Kami ulih nerang ke enggau silik Taib Mahmud endang enggau chara besalam bisi kuasa atas kompeni nya nitih ke pemutus penemu bala pengarah kena 8 haribulan April, taun 1988. Ba pemutus aum nya bisi 500 ari 1,000 iti share ti dikeluar ke kompeni nya diengkah ke ba pegai iya.

Kepala Samseng

Surat-surat penerang dalam kompeni Sakti ngayan ke chara Taib ti nguasa bala sida sebilik, ti endang bala orang nya mih ti ngiga duit ke kompeni dikena nambah ke pengaya Taib. Kelima-lima iko sida sebilik nya endang dipilih iya ngempu sereta mega share dalam Sakti. Share sida tu enda sebaka penyampau, lalu tiap iko sida tu deka nyerah ke share ba ibun diri ngagai Kepala Menteri.

Menyadi iya Onn bulih 400 share, tang 200 ari share nya dipegai iya ngari ke Kepala Menteri. Arip ngintu 200 share, lalu ari penyampau nya, 100 iti dipegai iya ngari ke Taib. Mahmud Taib mega sebaka chara enggau penyampau share baka Arip. Tang taja baka nya, adi biak sida, Sulaiman Rahman Taib ti udah nya dipadu ke mangku pengawa nyadi pengarah tunggal kompeni Sakti semina dikemendar ke apai iya megai 100 iti share ti besempekat ti ngemata ke share apai sida. Anak indu iya, Jamilah megai 100 iti share, tang diempu iya. Enggau chara tu Taib Mahmud bisi setengah ari semoa share dalam kompeni nya, ti endor nadai siko ari bala sida bukai megai lebih ari 200 iti share. Enggau chara tu mega terang amat iya ulih bekuasa penoh ba kompeni ti dikelulu ke iya nadai bekaul sekali enggau nya.

Taib ti bekuasa

Sekeda ari bala pengereja pengawa dalam Sakti kala meri penerang ti madah ke Kepala Menteri endang megai kuasa penoh  atas sida sebilik ti bukai. Rahman, leboh iya baru mangku pengawa nyadi pengarah tunggal dalam Sakti endang agi benong belajar dalam kolej, lalu endang anak asie apai iya. Kala sekali apai iya nganti seminggu baru ulih betemu lalu berandau enggau iya.

“Ba bala kami tu, Taib nya tuan besai ti suah agi ngaga sebarang pemutus runding” pia ko siko ari eksekutif madah ke Sarawak Report. “Iya endang pun penatai duit, lalu Rahman bebida ari iya”.

Ari ni penatai duit nya?

Datai ke diatu, Kepala Menteri lalu bedau mansut ke jako bantah ke semoa penerang enggau report ti dikeluar ke ditu. Penerang ke sekali tu disadang nambah ke agi peminta kitai ti ngasoh iya meri penerang baka ni enggau ari ni iya enggau sida sebilik tau mudah amat bulih duit ti bejuta-juta ba pengawa dagang, tau ke beranak ke puku. Baka ti ditemu kitai, gaji ti diterima Taib semina baroh ari RM50,000 (kira-kira US$16,000) sebulan.

Ba minggu-minggu ti dulu ari tu Sarawak Report bisi udah ngeluar ke berita ti bekaul enggau kompeni Ridgeford Properties di London, enggau Sakto Corporation di Ontario. Dua bengkah kompeni tu ngempu enggau ngemata ke maioh blok upis ti beungkos beratus-juta dollar. Bala pengarah ke dua bengkah kompeni tu iya nya Jamilah Taib enggau laki iya Sean (Hisham) Murray, orang bebansa Canada. Dua bengkah kompeni tu sebaka enggau penumboh Sakti international, iya nya ditumboh ke sida Taib sebilik, ukai ditumboh ke Murray.

Taja pan tebal agi bala sida Murray sebilik ti bekereja enggau kompeni Sakto tu, tang semoa penerang madah ke kompeni-kompeni tu diempu sida Taib sebilik, ti endor Taib empu lebih agi bekuasa atas nya. Pemerat enggau pemaioh penerang pasal pekara tu enda ulih diseliah ke bala pemesai ari MACC bejalai ke pansik ti silik atas Raja Bepala Burak menoa Sarawak?