‘PEMAJU ENGGAU PEMANSANG’ KINI PENUNGA DUIT NYA?

‘PEMAJU ENGGAU PEMANSANG’ KINI PENUNGA DUIT NYA?

Leboh Kepala Menteri, Taib Mahmud enggau bala kroni kompeni kayu kampong iya ngereja pengawa atas tanah-tanah NCR bala orang asal, sida betabor ke jako semaia ti sebaka. Sida besemaia deka meri ‘pemaju enggau pemansang’. Maioh amat orang asal nadai bulih sebarang utai udah kayu sida ditebang lalu pia mega tanah NCR sida disukat, dibagi lalu diambi. Ba bala orang asal ti bisi dipampas, sida nya semina nerima pampas beberapa ringgit aja ti semina numbas dikena sida meli beras sekilo-dua aja. Taja pan baka nya, sida suah dipadah ke, Taib deka mai ubah ngagai pengidup sida enggau chara meri sida semoa bansa perengka ti patut diguna sida idup besari-sari ba rebak moden tu, baka bekal ai beresi, bekal kuasa elektrik 24 jam, jalairaya ti manah, sekula ti nyamai endor bala anak sida belajar, peluang nampong pelajar ngagai ikas ti tinggi enggau peluang bulih pengawa ti menyana.

Tang udah 30 taun dipegai Taib enggau bala kroni politik iya, nama utai ulih dipeda enggau diasai ke kitai? Pekara ti ditemu kitai nya Taib enggau bala kroni kompeni kayu kampong iya udah nebang satu setengah juta hektar kampong kayu kering tropika ti bulih bejuta-juta dollar Amerika. Lalu court ti menoa Malaysia tu mega benong mantu bala orang asal bechara ke kes tanah NCR dikena sida ngambi pulai tanah sida ti udah diambi sida Taib nya. Taja pan bakanya, bala orang asal menoa tu agi mengkang idup dalam penyuntok enggau pemerinsa.

Bala orang asal tu nyau nadai agi kampong endor begiga ke pemakai, lalu sungai sida pan udah balat bendar rusak. Ikan dalam sungai maioh udah mati lalu semak deka punas. Ai sungai nyau enda selamat diirup, lalu kamah bendar dikena mandok pemakai enggau bebasu dikena sida nyaga pemersei diri empu. Sistem pemindah kin-kitu nyau nyadi tanggol laban sungai sida nyau penoh rumput enggau utai tumboh ti udah idup galak ditelusor baja enggau suom ari kebun sawit bedandang besai. Nambah ke nya, begulai nguan menoa enggau sida nyau udah bisi orang kereja datai ari menoa bukai ti sanggup begaji mit, lalu bala orang asal ti udah nadai pengawa semina diau di rumah sambil ngirup arak enggau enda betagang, arak ti mudah dibeli enggau nadai disekat undang-undang enggau adat perintah ti betuai ke Taib Mahmud.

Sarawak tu sebuah menoa ti pengambis kaya di Malaysia lalu orang nguan menoa tu enda betuboh maioh baka ba menoa bukai, lalu orang nguan menoa tu mega seraban orang ti pengambis miskin, taja pan menoa Malaysia tu udah 40 taun merintah diri. 30 taun diperintah Taib, agi maioh pelilih menoa di Sarawak mengkang nadai jalairaya ti manah enggau nyamai ditengah mindah kin-kitu, nadai bekal ai beresi, nadai bekal kuasa elektrik 24 jam ti ulih diasai ke semoa orang ti diau di rumah panjai enggau genturong rumah ti bukai. Bala anak sida ti baru beumor 7 taun diansak bemalam laban genturong sida diau jauh ari rumah sekula – lalu bisi sekeda bala anak sida orang asal nya dipasong bala tukang tumbang kompeni kayu batang dalam rantu jalai sida nurun ke sekula. Ba perengka pengerai enggau perubat di menoa Sarawak, bala orang ti  deka berubat ngasai ke mar amat deka berubat, baka ti bisi dipansut ke kami dulu ari tu. Ikas pemati bala indu ti deka ngada ke anak di menoa Sarawak tu jauh tinggi ari di menoa bukai – 3 kali tinggi ari di menoa-menoa bukai di Malaysia, lalu 10 kali tinggi ari di UK enggau di Australia.

Kini penunga semoa duit asil ari tanah enggau kampong Sarawak? Sapa orang ti endang amat-amat ngasai ke ‘buah pemaju enggau pemansang’? Serimbai enggau Taib Mahmud ti deka nyambut 30 taun udah nyadi Kepala Menteri, kami mutus ke runding kami ngayan ke sekeda gambar ti bisi dikirum ke bala pemacha ngagai Sarawak Report kitu. Sida Taib Mahmud menyadi bisi 10 iko, lalu anak iya bisi 4 iko, enggau sida sebilik ke bukai pan maioh mega ti diau nguan rumah-rumah ti manah-manah nyau ka sebaka enggau enggi Taib empu.

Bala kroni enggau pangan dagang Taib nya seraban orang ti tau ngumbai diri bidik laban sida udah bulih tanah NCR ti diberi Taib soh sida awak ke bisi dikereja sida. Pemidik sida nya diasai ke sida laban ngena peluang Taib ti nyadi Kepala Menteri, ti mega nyadi Menteri Pemansang Pengeraja Asal enggau Perambu, ti mega nyadi Chairman STIDC, LCDA, enggau gerempong-gerempong bukai ti meri iya kuasa atas Perintah Sarawak enggau atas pengeraja asal di menoa tu.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments