BINI SIMPAN SAPIT KEPALA MENTERI BULIH KONTRAK NGAGA SEPITAL JANTONG BEUNGKOS BEJUTA-JUTA RINGGIT – BERITA EKSKLUSIF!

Sarawak Report ulih mansut ke penerang ti bekaul enggau sebengkah skandal ngaga sepital jantong di Kuching ti baru dipenyadi udah bekau pansik-pansik dipejalai ke.

Sepital nya, ti baru udah dipenyadi Menteri Besai Malaysia Najib Razak bedau tentu lama tu udah, nya sebuah sepital ti penambis mar udah digaga di menoa Malaysia.

Tambah mega kami bulih penerang ti madah ke bisi bala orang ti sakit udah enda ulih diterima berubat ba sepital nya ketegal ti enda chukop perengka. Semoa perengka ti dikena nyikap sepital nya ditemu enda ulih kena laban perengka nya bansa ti lama lalu semina sebuah aja ward ti dipeda bisi orang bekereja taja pan sepital nya lapan tingkat peninggi. Sepital nya patut iya tembu gaga lalu ulih kena dalam taun 2006, reti nya diatu projek nembu ke sepital nya udah laun 6 taun ari timpoh!

Penanggol-penanggol tu nyadi ke tanya ti patut dituju ke soh Sapit Kepala Menteri George Chan ti mega nyadi tuai parti SUPP. Kebuah pia, laban Chan endang siko ari menteri BN ti ngemata ke Opis Menteri Pengerai Menoa Sarawak lalu iya meh ti ngemendar ke agih belanja dikena ngaga sepital nya.

Penanggol nya bisi bekaul enggau iya ti udah meri kontrak ngagai bini simpan iya ti benama Christina Foo meli perengka-perengka perubat dikena nyikap sepital nya ti beungkos bejuta-juta ringgit. Christina Foo ditemu meli semoa perengka nya ngena kompeni iya Trend-Nics.

Christina Foo ti ditemu orang bajik sereta regas endang udah nyadi ke bini simpan George Chan lama udah taja pan iya agi jadi enggau bini terubah iya. Taja pan baka nya, bala orang ti landik-landik enggau orang ti meri penerang besetuju madah ke kontrak nya tau enda beguna ke orang tengah, lalu Christina Foo ukai siko orang ti landik ba perengka perubat lalu enda patut bulih kontrak nya. Siti tanya ditu, berapa penguntong ulih indu nya enti belalau ke RM130 juta modal iya dalam kontrak meli perengka ke sepital nya taja pan enda chukop.

Dikena ngelamun?

Kami tetemu ke siti penerang ti madah ke pengawa dikena ngelamun kaul Christina Foo dalam skandal Trend-Nics lalu mega dikena ngelamun penduduk iya tyi nyadi Director iya dalam kompeni nya.

Pansik kami nunjuk ke Trend-Nics bisi surat-surat penerang pasal bala director kompeni ti berejista nya bisi dua iko Christina Foo ti ngena nama Florence enggau ‘Celine’. Chara tu ulih ngenyauh ke Christina Foo ti bendar ari kompeni nya. Tang, taja baka nya orang ti megai 100% share dalam Trend-Nics ti berejista atas nama siti agi kompeni ti benama Chastain Sdn. Bhd. Kompeni Chastain diempu 80% Christina Foo ti berejista nyadi director ti ngena alamat rumah iya ba Kasuma Resort. Bala director ke bukai nya Florence Foo megai 10% share lalu 10% da agi dipegai ‘Celine’ – bali nama kedua Christina Foo empu!

Pemeri penerang madah ke Sarawak Report sida pechaya ke Trend-Nics bulih kontrak RM40 juta. Enti berita tu amat, berapa penguntong ulih George Chan ari sebagai ari nyampau nya dikena iya melanja bini simpan iya nya?

Ngerumpak orang ti sakit

Orang maioh di nengeri Kuching diatu suntok amat endor berubat. Bejuta-juta ringgit duit ari bala orang ti bebayar ke chukai udah dikena melanja projek sepital ti baru udah dipenyadi nya. Tang penerang ari orang dalam madah soh Sarawak Report perintah BN udah ngaga sebuah sepital ti bestatus gajah burak. Ba pun pengawa sepital nya endang digaga endor orang ti sakit riman berubat, lalu ukai sepital mensia maioh biasa. Iya ga jauh bebatu-batu ari nengeri Kuching lalu nadai arus pejalai bas mansa endor nya. Tambah mega iya digaga dalam timpoh ti lama amat lalu semoa perengka ti dikena nyikap sepital nya bansa perengka ti lama lalu nadai ulih guna agi!

Sebengkah penerang ti datai ari orang ti bisi bekaul enggau Opis Menteri Pengerai madah soh Sarawak Report:

“Sepital nya digaga endor orang ti kaya-kaya aja berubat, ti semina ulih mayar ungkos perubat ti tinggi, lalu salah amat Perintah Besai udah mayar ungkos ti besai ke sepital ti enda setipak dikena mensia maioh”

Sarawak Report ulih nyimpul penemu nama kebuah sepital Kota Samarahan nya ti udah dipenyadi nyau berubah guna nyadi sepital perintah nya laban dikena ngelamun kes penyalah ngenchuri ti besai lalu dikena ngelamun pengelemi perintah BN dalam bejalai ke tanggong pengawa sida ngemata ke belanja menoa. Projek nya dipun ke dalam taun 2003 laban dikena napi penatai bala ‘temuai sakit’ ti deka berubat ngagai menoa Sarawak. Opis Menteri George Chan ti melanja projek nya ngaga ke nama sepital nya Sarawak International Medical Center (SIMC) ngena agih belanja RM473 juta.

Tang, ungkos ngaga sepital nya udah niki laban Chan enggau Taib sama besetuju maya ungkos ngena mataduit Euro ngagai bala kontraktor, ti ngujong ke rega iya niki ari RM3.2 ngagai RM4.8 ba timpoh nya. Tu ngujong ke perintah enda tau enda ngeluar ke RM660 juta, ukai rega asal RM473 juta. Ba pengujong iya bala orang ti bekunsi pengawa lalu matak diri. Bala sida nya nyau nadai agi pengarap ba perintah laban nemu penyalah makai suap udah nyadi!

Gajah burak dikena nipu orang maioh

Chara muntang dikena Taib mutar ke penanggol tu iya nya majak ke Perintah Besai meli sepital nya lalu dipenyadi dikena orang maioh berubat! Nyau puas ti berunding tang seruran tetemu ke jalai puntol, dia Taib lalu minta saup Najib dikena meresi nama iya laban diatu pengawa bepilih nyau semak.

Najib telah berjanji untuk membayar sejumlah RM400 juta untuk hospital berkenaan.

Najib pan besemaia mayar RM400 juta ke ungkos ngaga sepital nya.

Bala orang ti landik ti udah ngira belanja madah ke sepital nya sebuah sepital ti pengambis mar udah digaga di menoa Malaysia ti dikiran belalau ke ungkos belanja siti katil. Selalu iya sebuah katil ngena ungkos belanja RM1.2 juta aja. Ba pelan asal SIMC nya ditaga ke ulih muat 300 iti katil lalu semoa ungkos manggai RM473 juta, iya nya RM1.57 juta lebih mar ari kira-kira ungkos ke dulu tadi.

Tang, sekumbang projek nya ti laun ditembu ke semoa perengka perubat penyakit riman dia lalu enda dikiboh ke agi, baka nya mega penmaioh katil dia, ti ngujong ke katil dia semina 137 buah aja dipelanja ngena ungkos RM660 juta. Kira-kira tu belalau ke RM4.8 juta ke sebuah katil, tau ke semak lima kali lipat mar agi ari sepital biasa.

Pemeri berita bisi mega mantai ke jako sebana enggau jako bantah ti madah ke enti belanja ngemaioh nya dikena ngaga sepital biasa, naka meh pemanah perengka dikena mensia maioh datai berubat.

Sebengkah pengawa bebasau ke duit – sepital baru tang disikap ngena perengka lama lalu nadai bekal oksigen!

Sarawak Report bisi nemu, taja pan ungkos sepital ti besai amat nta, ninting kali orang ti sakit datai deka berubat kia selalu enda ulih diterima laban sepital nya agi kurang ba perengka perubat. Pemeri penerang mega bisi madah ke bala lutor ti bekereja dia enda ulih ngereja pengawa operation laban perengka enggau bekal oksigen ti enda chukop.

Udah lama

Pengurang bekal oksigen ukai penanggol ti bendar. Semoa perengka ti di-order diatu nyau udah beumor lebih sepuloh taun, nyangka sepital nya ulih tembu ba taun 2006. Kami bisi ngambi sekeda gambar dalam sepital nya ngengkaum ti ngayan ke katil enggau perengka bukai ti agi bebungkus lalu diengkah-engkah semanjai arong-arong ti puang. Semina tingkat 3 aja bisi endor orang bekereja, ari lapan tingkat di udah tembu gaga nya. Tu ari ketegal semoa perengka dalam sepital bansa ti lama lalu bala lutor madah ke perengka-perengka dia enda tau dikena agi lalu enda tau enda diganti.

Pemeri penerang mega bisi didinga nyebut sida kala udah charut penemu enggau Christina Foo ti merambu deka meli katil ti berega murah lalu ngelekat ke tanda rega tinggi – bida rega entara RM2,400 enggau RM48,000 sebuah! Siko agi pemeri penerang kami madah ke iya kala dikangau ke Sulaiman Taib, iya nya anak Kepala Menteri Taib Mahmud, ti mega laki Anisa, anak George Chan, dipinta Sulaiman meri penerang nama kebuah iya ‘mar enggau berunding’. Udah nya Sulaiman Taib bisi didinga ngenchabar iya, “kami ulih ngapus ke nuan diatu” – taja pan maia nya Sulaiman endang nadai nama-nama tanggong pengawa bekaul enggau projek nya.

Skandal enggau penanggol ti bekaul enggau projek agi benong dipansik orang. Tang pekara ti terang amat iya nya bala orang ti sakit meh ti udah kena kelakar lalu diterumpak ketegal pengamu bala menteri dalam Perintah BN.

Leboh nemuai ke menoa Sarawak bedau lama, Menteri Besai Najib Razak bisi bejadi ke sebuah sepital di pelilih menoa Belaga ti nadai lutor. Udah nya Najib bejadi ke Sepital Jantong di Kuching, ti endor bala lutor enda ulih ngereja pengawa operation bala orang ti sakit! Baka ni meh gaya rekod perintah tu?