7 Feb 2011

NI PENYAMPAU NUAN KA, PECHUMA MAGANG NYA, ANAK!

This post is also available in: English, Malay

NI PENYAMPAU NUAN KA, PECHUMA MAGANG NYA, ANAK!

Leboh Menteri Besai Malaysia Najib Razak nemuai lalu deka meresa rekod-rekod BN di Sarawak ba ujong minggu tu, kami minta iya ngambi kira siti penerang ti tau ngasoh iya tekenyit ti endor kami mansut ke berita pasal pengawa ngerampas tanah ti baru dikereja Taib Mahmud. Tiga taunt u udah Kepala Menteri nya udah meri tanah-tanah rampas soh anak iya, Mahmud Abu Bekir Bin Taib, ti bulih mesai pulau Singapura, enggau PECHUMA!

Maioh tanah nya udah nyadi reta kompeni ti ditumboh ke Mahmud ti benama Titanium Management. Titanium Management kala dipesebut ke mensia maioh laban bisi kaul enggau beberapa iti penyarut bulih kontrak ti besai-besai lalu enda ditender ti dikeluar ke perintah Taib.

Ba pun iya Titanium Management numpang opis kompeni CMS enggi Taib Mahmud empu, sebengkah kompeni ti besai ti suah amat ngerebut peluang bedagang ari orang bukai. Udah nya kompeni Titanium Management bepindah opis ngagai blok opis sida empu, Titanium Tower, ti tinggi degi-degi tanda pemujor ulih ari pengawa ngerampas tanah ari orang asal di Sarawak, ti dikira kami manggai ngagai beratus-ribu ringgit.

Taja pan baka nya, kelimpah ari Titanium Management, kami bisi mega nemu agi maioh kompeni bukai ti nerima tanah-tanah ti dikemata ke Taib begulai enggau pangan dagang iya Chris Chung enggau siku bekas Pengarah JKR ti dulu suba, Michael Ting. Semoa kompeni nya ti berejista ngena nama siko tau ke ketiga-tiga iko sida nya endang bejalai ke pengawa sida bekunsi ke siti aja opis lalu bekunsi ke siti lumor telefon baka ti enggi Titanium Management!

Ba kes anak aku tanah patut diberi pechuma!


Kami bisi tetemu ke 14 buah kompeni ti terang amat dikemata ke Titanium Management ti diempu Mahmud Abu Bekir, ti endor semua kompeni nya udah diberi tanah-tanah bulih 70,000 hektar. Pemesai tu lebih besai ari

Genap kali udah bulih tanah, bayar tanah nya dipasok ke dalam kategori “Payment in Kind”. Tu siti mega chara ti tau disangka kitai awak ke tanah nya enda berupai diberi enggau pechuma.

Tanah-tanah ti bukai mega sama diberi pechuma. Ketebal agi orang ti bulih pengasih ari tanah rampas nya ari Taib deka dipinta iya bayar ti mit amat. Tang enti iya meri sebarang tanah rampas soh anak iya semoa bayar nya deka diapus ke!

Leboh bala Taib ngeruga, bala rakyat napi pemerinsa

Menteri Besai Malaysia Najib  patut ngumbai pengeraja Taib ari ti berampas ke tanah orang asal nya jauh amat bebida enggau gaya pemerinsa enggau penyeranta bala rakyat iya empu, taja pan bala rakyat iya diau nguan menoa ti ditemu sebuah menoa ti pengambis kaya di Malaysia ari segi pengeraja asal.

Ba minggu-minggu ti deka datai tu Sarawak Report deka bejalai ke maioh pansik atas tanah-tanah ti dikereja Taib. Ulah iya nya udah ngenatai ke pemerinsa soh orang bansa asal ti kena rampas iya tanah, kayu-kayu kampong ambis ditebang, tanah disungkor lalu dibuka nyadi kebun sawit ti besai, lalu ngujong ke sungai nyadi pabu. Ninting kali pengawa ngundi sida di menoa nya disemaia ke deka diberi bekal ai ti beresi, kuasa elektrik, jalairaya ti meruan, peluang bulih pengawa ti meruan enggau pemansang ti bukai. Tang udah 30 taun merintah di menoa tu, Taib agi mengkang enda ulih nembu ke tanggong pengawa iya ti meri pengelantang soh rakyat iya empu.

Aram kitai meda gaya pengidup orang di Batang Ai ti ditapi bala Iban rumah panjai dia. Sida kala dijanji ke duit agih belanja RM70 juta dikena ngemanah ke perengka-perengka ti diguna orang maioh enggau belanja-belanja bukai maia pengawa ngundi taun 2009 olih Taib enggau bala menteri BN. Taib endang terang-terang nyebut pekara nya ba moa bala rakyat enggau pengundi di Batang Ai, lalu jako semaia iya mega bisi dicelak ba surat-suratkhabar di menoa tu sari sebedau hari muai undi!

Tu meh sebengkah penyalah lalu pengawa nguji ‘nyuap’ bala pengundi  ti tau ngujong ke Taib dibechara dalam court. Tang taja pan bala pengundi nemu jako semaia ti munyi jarang deka dikamat ke, sida mengkang milih pengari BN. Siko pengari PKR, Nicholas Bawin, nerang ke soh Sarawak Report ti endor iya madah ke orang di Batang Ai lalu empai nerima RM2, enda iboh ga RM70 juta baka ti disemaia perintah BN!

Kami udah bisi berandau enggau bala orang rumah panjai di menoa Batang Ai ti udah diasoh Taib ninggal ke menoa lama sida dalam taun 1983 laban diasoh meri awak endor perintah ngaga tekat ai kuasa elektrik (diatu mega Taib enggau BN deka ngaga 12 buah agi tekat ti baka nya ti endor lebih 600,000 orang asal diasoh ninggal ke menoa lama sida mega, enti sema perintah BN agi menang ba pengawa ngundi tu ila). Orang di Batang Ai udah diperansang pindah ngagai menoa baru lalu perintah BN bejanji ka meri sida bekal ai beresi enggau bekal kuasa elektrik pechuma, nyengkaum peluang bulih kereja di meruan sereta menyana enggau sekeda pemansang ti bukai. Kami udah betanya soh orang Batang Ai, udah tau ke empai semoa semaia nya dikamat ke BN?

Baka ti ditemu kitai ba maioh pelilih menoa di Sarawak, bala orang diri sebilik ti idup merinsa di Batang Ai udah enda ulih agi ngena kuasa elektrik laban sida bisi penanggol ngeluar ke belanja dikena mayar bil elektrik. Pekara tu nyau enda setipak enggau semaia BN ti deka meri kuasa elektrik pechuma leboh maia sida ti diasoh pindah ninggal ke menoa lama sida sebedai tekat ai kuasa elektrik digaga suba! Jako semaia Taib enggau BN nya bula amat – tau ditugong ke kitai pemula Taib enggau bala menteri BN iya! Nambah ke semaia bula nya, bala orang Batang Ai mega disemaia deka diberi penguntong asil ari tanah sida ti udah diambi BN ti lalu deka dikereja kompeni-kompeni bekebun dandang besai. Tang nyentok ke sari tu untong ti mimit pan lalu nadai diterima sida, lalu endor sida beridup ti diberi soh sida pan kelalu mit sereta kelalu jauh ari pendiau sida ke diatu.

Baka ti di pelilih menoa bukai di Sarawak ditu, kampong enggau tanah ti endor orang asal beridup enggau ngendoh ke diri udah dirampas perintah Taib, tang penguntong enggau pengaya ti pansut ari kampong enggau tanah nya dipasok ke ngagai endor bukai. Taib ngembuan rekod-rekod ti manah amat ti nunjuk ke iya endang amat nulong sida sebilik aja enggau bala kroni iya empu aja. Sida tu endang udah kaya sereta tegap pendiau.

Pengeraja Taib enggau sida sebilik jauh amat bebida enggau penyeranta enggau penyuntok pengidup bala rakyat ti diau lalu nguan menoa pesisir ti udah dirampas iya tanah enggau kampong. Rekod-rekod pengawa baka tu meh ti patut diperati ke Najib ti tau dikena iya enggau BN ngator strategi sebedau pengawa ngundi ti ka datai tu ila. Rekod-rekod Taib tu patut disbanding enggau rekod-rekod bala pemesai enggau tuai perintah bukai di menoa tasik baka rekod pengawa Robert Mugabe ari menoa Zimbabwe … tau ke Hosni Mubarak ari menoa Mesir, tau ke Zine El Abdine Ben Ali ari menoa Tunisia, ti kala besemaia enda encabar penyabar ati rakyat lalu minta pilih baru udah 30 taun bekuasa.


Tang Taib selalu ngumbai diri agi ulih ngempong-merabong menoa tu, lalu ba iya, orang Sarawak agi beguna ke siko tuai baka iya mangku pengawa lebih ari 30 taun. Ba iya mega, bini biak iya nya ulih meri iya pengering ti endor iya ulih terus bekereja ke iya empu enggau sida sebilik. Tu enda setipak enggau pengangat pekara ketegal 200 iti kes bekaul enggau pengawa ngerampas tanah ti dikereja iya. Najib patut merati ke ni naka rakyat Sarawak agi ulih nat ke pekara tu?