PERINTAH ‘APEK BAYAT’ DI MENOA SARAWAK

PERINTAH ‘APEK BAYAT’ DI MENOA SARAWAK

Gambar-gambar ti ngayan ke Minggat Anak Nyakin enggau anak lelaki iya, Juan Anak Minggat, tau bendar mai penyinu ati ngagai semoa orang di serata dunya tu, ti endor gambar-gambar baka nya ngayan ke penanggol ti nyadi dalam menoa Sarawak diatu. Seduai dua menyanak nya udah dijamah enggau naka pemalat kena malam 14 haribulan Februari 2011 ulih bala orang ti bekereja enggau kompeni ngulih ke kayu kampong ti tama enggau enda beradat ngagai kandang menoa sida. Minggat udah diteju ke bakal sereta benyawa-nyawa ikan ba atas tangga nuju ngagai opis manager kompeni nya lalu diatu sida sebilik agi nganti iya nyau suman ti endor sida deka ninga ke penerang ari iya empu, lalu anak ti mega kena jamah bala ‘apek bayat’ ulih meragau ngerari ke diri ngelaban malam laban deka ngesah sereta minta bantu sida serumah.

Seduai menyanak nya bidik bendar laban diatu benong berubat di sepital, dijaga polis, laban seduai sama-sama dalam remand polis. Serimbai enggau penusah nya, polis nadai bejalai ke sebarang pansik tau ke nangkap bala orang ti udah nyamah seduai menyanak nya. Bala ‘apek bayat’ nya bepalan ba opis kompeni nya di Sungai Rusa ti dikelala orang maioh. Beberapa taun dulu ari penusah tu, Minggat enggau sida sebilik kala udah ngaga report polis, pasal orang luar ti tama ngagai kandang menoa sida lalu ngulih ke kayu kampong di endor nya, tang bala polis lalu nadai engkeretik.

Serebana orang asal enda dikibuh ke orang ti bekuasa

Sida Minggat semenoa idup dalam penangi sereta takut udah penusah nya ti lalu nadai dikemata ke orang ti bekuasa. Bini Minggat ti benama Jelembai madah ke laki iya nya mimit bendar peluang ulih suman enggau meruan, udah meri penerang ngagai Radio Free Sarawak:

“Semoa kami ti ditu takut bendar napi bala gangster nya”

Nitih ke penerang ari Jelembai, laki iya kala beberapa kali udah ngaga report ba opis polis, opis Lands & Survey, enggau opis JKR, lalu nyentok ke bulan Disember tu tadi ti endor iya mega ngaga report ketegal umai enggau jalai sida serumah udah balat bendar ditujah kompeni nya. Tang, taja baka nya, opis-opis ti udah endor iya ngaga report endang nadai ngambi tindak atas pengawa bala ‘apek bayat’ ti kasar sereta ngenakut ke sida di menoa nya.

Nyau ke puas ke udah enda tan ati agi dikeduan orang ti tama ngagai menoa sida di Sungai Rusa enggau Sungai Kuba (Kiba), seduai dua menyanak nya lalu mutus ke penemu diri betemu enggau bala orang ba kompeni nya kena 14 Februari tu tadi. Seduai iya sama-sama andal ke diri ulih berunding ke pampas ari kompeni. Tang enda mukai-mukai pejalai seduai menyanak ngusong kompeni nya nyau ngujong ke seduai kena jamah bala orang ti bekereja dia.

Bala polis ti enda bejalai ke ator

Enti polis amat-amat deka ngemata ke pengelantang mensia maioh, sida patut udah ngambi tindak atas kompeni ti tama ngagai kandang menoa nya udah nerima report ari orang empu menoa nya. Tang polis nadai begerak mantu bala orang asal di menoa nya, ti ngujong ke Minggat enggau anak iya mutus ke penemu diri betemu enggau kompeni kayu kampong.

Penusah ti nuntong Minggat enggau anak iya Juan udah ngayan ke kitai nya bala kompeni ti ngulih ke kayu kampong enggau enda beradat enda ulih ditagang sapa-sapa. Bala ‘apek bayat’ nya nyau nyadi bala penerit ator ke Taib berampas ke tanah orang asal, lalu bala polis nyau nemu sereta ngasai ke sida nadai agi kuasa bejalai ke pengawa nerit ke adat menoa tu.

Perintah apek bayat

Sarawak Report diatu arap sereta pechaya ke pengawa bala ‘apek bayat’ nyau nyadi ke sebengkah perengka dikena Perintah BN, ti melanja kompeni-kompeni kayu kampong nya. Pengawa bala apek bayat enggau pengasar nya udah ngerembai ngagai serata menoa Sarawak, lalu perintah BN enda tau ngelulu ke diri ngumbai penyarut nya mit aja. 

Semina ba pengujong minggu nyin kemari sebengkah penyarut bisi nyadi ti endor menoa bala orang ari Rumah Ranggong bisi dipasok seraban apek bayat ti diangkut ngena dua buah bas lalu diasoh bejaga-jaga ba moa rumah panjai dia. Bala orang ti empu menoa nya nyadang bala apek bayat nya endang diupah kompeni Niamas Istimewa Sdn. Bhd, ti ngulih ke kayu kampong di kandang menoa nya. Ba penyarut nya bala polis bisi datai kia, ti endor bala apek bayat enggau bala orang menoa nya ulih ngenyaoh ke diri enggau pangan diri.

Tang nama kebuah bala apek bayat ti besenyata nya enda diasoh pulai ke Sibu, lalu kompeni kayu kampong ti melanja sida nya enda kena pansik polis? Tu mai reti, sekumbang betaun-taun bala orang nya endang nyadi ke kaki-jari Taib Mahmud ngereja pengawa kamah di serata menoa Sarawak. Tuju sida semina ngenakut ke bala orang ti empu tanah NCR ti deka diambi kroni-kroni Taib. Ari nya kayu kampong ti berega tinggi deka dijual dikena nambah ke pengeraja sida Taib sebilik. Tang diatu pengasar bala apek bayat tu udah kala direkod, lalu chara-chara sida nya enda ulih dilalai ke sida agi.

Serang dibalas

Ba bulan sigi nyin kemari, sebengkah kandang menoa udah ditesau nengah telefon binching ti madah ke sida bisi 20 iko apek bayat dianjong kia dikena ngemba orang dia, lalu ngena telefon, sida di menoa nya mujor bulih bantu 500 iko orang ari kandang menoa bukai, ti ngujong ke bala apek bayat ulih ditangkap sida semenoa dia. Kes-kes ti baka tu udah dilaban ari bantu kepala penyakal PKR, lawyer pengelantang mensia Baru Bian enggau bala pangan lawyer iya.

Lalu sari tu mega sebuah agi kes penyarut tanah NCR udah menang ngelaban Perintah Menoa Sarawak ba court-court di Kuching lalu pampasti besai bendar dijangka deka dipinta ari kompeni kayu kampong. Diatu maia enggau jam nyau suntok amat ke Abdul Taib Mahmud.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments