31 Mar 2011

KELALU TUAI LALU LENYAU PENGINGAT? – TAIB ENDA INGAT KE DAGANG DIRI!

This post is also available in: English, Malay

KELALU TUAI LALU LENYAU PENGINGAT? – TAIB ENDA INGAT KE DAGANG DIRI!

Taib Mahmud diatu berupai bendar dipeda baka ke suntok penemu enggau runding, lalu seruran ngering diri kejang ke deka napi pengawa bepilihbesai enda lama agi. Tu siti chara dikena iya nyakal jako petenah bala penyakal ti ngumbai iya ngereja penyalah ngerampas tanah, ‘makai suap’, lalu ngeraup semoa pengeraja asal menoa Sarawak tama ke dalam bank, pengawa dagang enggau kompeni hartanah iya di menoa luar.

Bala raban penyanding penemu iya mega ditemu bebendar amat nyikap iya, lalu dikena iya nyaut semoa issue ti deka ditanya orang ngambi ke dikena iya narit pengarap bala pengundi ba iya, ti diatu ditemu nyau semakin ringat ngagai iya. Sebengkah chara ti dikereja bala penyanding penemu iya diatu iya nya ngator ‘perang-cyber’ ti endor sida mandang ke video ti ngayan ke iya ti nyaut semoa macham tanya bala pengarang berita (nyengkaum siko pengarang berita ari menoa tasik ti diupah kompeni PR). Udah nya program iya nya lalu dibali baru lalu diayan ke dalam blog-blog BN ti baru didiri ke dalam pengawa sida ngambi ati rakyat.

Manah agi enda bemunyi?

Tang Taib suah agi dipeda enda lantang maia iya ti nyaut tanya-tanya ti mar-mar ti bekaul enggau pekara ti deka diseliah ke iya baka pasal mulai ke pemanah kampong ti udah ditebang, pengaya iya enggau sida sebilik tau ke penanggol iya enggau orang asal ti udah diambi iya tanah – lalu ba pengujong jako randau iya nya tau bendar ngasoh sapa-sapa malu ninga saut iya nya.

Leboh maia iya ngenang pasal diri empu, iya bisi berupai bendar deka nyeliah ke diri nyaut tanya pasal dawa tau ke tudoh orang, ti endor iya madah ke pasal bala anak iya bedagang ketegal ari duit ti diberi iya ke sida. Tang semoa saut iya enda masok akal, lalu sapa-sapa ke ninga saut iya nya tau ngumbai Taib nya udah berinsor tuai sereta enda pengingat agi:

Bala anak aku semoa nya besekula tinggi-tinggi magang, sida bedagang di menoa tasik magang. Aku bedagang di menoa tasik laban aku enggai ke dagang aku nya nanggol pengawa aku. [Enti] aku bedagang dalam menoa Sarawak tu, orang tentu deka ngumbai aku salah guna kuasa aku dikena aku nambah ke pengaya aku, nya kebuah kami bedagang di menoa tasik”.

Pekara ti enda dikingat ke orang tuai nya, tang bala rakyat iya ingat, iya nya sida sebilik endang bisi bedagang dalam menoa Sarawak tu. Maioh dagang ti dikereja sida nya endang dagang ‘diswasta’ ari perintah menoa tu ti diberi Taib ke sida sebilik!

Berengkah enggau CMS, tang diatu ngagai Titanium Management!


Pemberita ti ‘jinak’ ti endang diambi ari menoa tasik, ukai diupah betanya ke sebarang tanya susulan ari Taib, enti enda baka nya, pemberita nya tentu deka nanya “Baka ni ko CMS enggau Titanium Management?!”

Cahya Mata Sarawak (CMS) diatu nya sebengkah kompeni ti pemadu besai di menoa Sarawak, lalu pia mega di serata Malaysia – ti bekaul enggau dagang ngaga rumah, jalai ngagai pengawa banking (nyimpan duit). Sapa pemegai pemadu maioh share dalam CMS? Iya ke bendar, sida Taib Mahmud sebilik orang ti pemadu maioh share dipegai dalam kompeni CMS nya. Nitih ke penerang dalam Repot Taun kompeni nya ke taun 2009 suba, orang ti megai share dia pemadu besai iya nya niang bini iya empu, Laila! Dalam CMS nya, Laila megai 11.23% share ti berega manggai RM94 juta.

Dua iko agi orang ti maioh share dipegai dalam CMS nya anak lelaki iya, Abu Bekir enggau Sulaiman, ditangkan ke anak indu iya Jamilah enggau Hanifah. Jamilah enggau Hanifah nya endang bisi kompeni kunsi, kompeni Majaharta. Nama reti utai ko Taib nya ti madah ke diri empu enggau bala anak iya semina bedagang di menoa tasik aja? Lalu, sekali ke iya ngumbai bala pengundi iya deka ngumbai niang bini ti kala megai pemadu maioh share dalam kompeni CMS nya cherita ti selebubu ngapa?

Taib kala ‘privatise’ maioh pengawa dagang enggi perintah menoa ngagai kompeni CMS iya berengkah ari iya ti nyadi menteri suba.

Baka nya mega, Taib udah ‘privatise’ sebengkah dagang ti nengali (monopoly) enggi perintah menoa ti bekaul enggau pengawa ngeluar ke lisin pengangkut ngena kapal ngagai sebuah kompeni sida sebilik, Achi jaya (ti dikemata ke menyadi iya Onn Mahmud, ti mega nyadi kaban kunsi dagang iya). Salah guna kuasa tu meh sebagi ari chara iya ngulih ke pengeraja ke iya empu enggau sida sebilik, kelimpah ari ti meri bala kroni dagang iya ti berebut-rebut minta lisin ngulih ke kayu kampong enggau bekebun bedandang besai.

Taib udah salah guna kuasa iya dikena nambah ke pengaya kompeni CMS


Jauh ari iya ti nyeliah ke diri ‘bebalut pengawa’ (konflik kepentingan) leboh maia iya bekereja nyadi menteri, bala pemacha semina macha enggau ngelansa Repot Taun CMS ke taun 2009 ti dikeluar ke ngengah on-line dikena nemu enggau silik baka ni Taib udah suah ngena pangkat ti tinggi – Kepala Menteri, Menteri Pekara Belanja, enggau Menteri Perambu enggau Ngemata ke Pengeraja Asal Menoa, dipasok ke ngagai dagang sida sebilik.

Taib udah mandang ke video nengah on-line ti ngena topik “Financial Transparency in Sarawak” [Penampak Dalam Pekara Belanja di Sarawak], tang iya suah ditemu nyerah ke projek ti besai-besai enggau chara belalai! Pekara  tu mudah ditemu dalam Repot Taun CMS ke taun 2009.

Dalam kandang semina setaun aja, maioh kontrak besai-besai ari perintah Sarawak udah ditangkup kompeni CMS, nyengkaum projek ngaga rumah Parlimen Negeri ti baru (RM296.5 juta); Palan Aum Besai Borneo [BCCK] (RM195 juta); ibupejabat Sarawak Energy Berhad ti baru (RM20 juta). Baka ni ko Taib tau enda ingat ke sida sebilik bisi bedagang dalam menoa tu dikena iya nyeliah ke pengawa ti bebalut (konflik kepentingan)?!

Siko ari anak iya nya orang dagang ti tebilang di Sarawak!


Nyentok ngagai maia Taib ti deka ngator anak iya, Abu Bekir, bediri minta pilih , iya endang tetap neju ke anak iya nya ngemeran ke pengawa bedagang lalu nadai hari bepolitik. Tang, dini pengawa dagang Abu Bekir nya dipejalai ke? Abu Bekir dipelaba ke bisi dagang di menoa tasik, tang iya mega bisi pengawa di dalam menoa Sarawak tu. Iya ukai semina siko ari bala pengarah dalam Lembaga Pengarah CMS, tang iya mega ngembuan maioh pengawa dagang ti bukai, semoa nya ngasai ke penyamai nerima kontrak-kontrak ari apai iya, Taib ti nyadi Kepala Menteri.

Abuk Bekir ukai semina nyadi Sapit Group Chairman dalamCMS (Chairman nya ipar iya empu, laki menyadi indu iya, Hanifah), tang Bekir mega nyadi Chairman enggau pemegang share ti pemadu maioh dalam kompeni Sarawak Cable. Iya mega siko ari pengarah sereta megai share pemadu maioh dalam kompeni iya empu, Titanium Management ti kala ngasoh orang maioh ringat laban ti suah bendar nerima kontrak-kontrak besai ari apai iya empu, Taib, sereta kompeni nya baru dikorporat ke, tang iya pan endang nadai nama-nama rekod pasal pengawa kompeni nya.

Skandal ti pemadu besai iya nya leboh perintah menoa Sarawak ngeluar ke kontrak enggau belanja dikena ngaga 384 buah jambatan enggau ungkos RM551 juta. Kompeni Titanium Management ukai semina puntan nembu ke semoa jambatan nya, tang kompeni nya mega udah teparuk ngeluar ke belanja lebih RM947.8 juta, ti endor apai iya Taib Mahmud enggau mentas ati besetuju ke pengerugi nya ditanggong Menoa Sarawak!

Ngerampas tanah mega

Titanium Management enggau anak-anak kompeni sida mega bulih tanah-tanah ti dirampas perintah BN ti betuai ke apai iya, Taib Mahmud. Abu Bekir udah nerima tanah-tanah nya (maioh agi nya tanah NCR) ti bulih mesai sebuah pulau Singapura, nitih ke pansik enggau sidi’ kami ba opis pengerejister tanah.

Semoa pemutus dikena nyerah ke tanah-tanah rampas nya ngagai kompeni enggi Abu Bekir dikereja enggau chara belalai magang-magang, lalu ukai ngena ator tender tebuka, lalu pengawa nya dikereja Taib Mahmud. Abu Bekir mega enda dipajak ke mayar premium tanah nya ngagai perintah Sarawak, laban iya nerima tanah-tanah nya ngena chara bayar “payment in kind”.

Enggau nya, nama utai diperunding ke orang tuai tu, leboh iya ngaku’ madah ke diri nyeliah ke diri ari bebalut pengawa (konflik kepentingan) leboh iya enggau sida sebilik ngereja pengawa dagang di Sarawak? Tiap iko rakyat Sarawak enda nemu pasal pekara tu!

Seruran arap ke diri bulih utai, baka Awang Tengah

Kelimpah ari nya, bisi mega skandal bukai ti majak dikereja ti bekaul enggau pengawa nyerah ke kebun dandang besai-besai dikena iya ngulih ke sukong ari bala menteri enggau bala kroni iya. Nitih ke pansik kami, kes bebalut pengawa ti bekaul enggau bala pangan politik Taib iya nya bekaul enggau kandang tanah ti besai amat ti diserah ke iya ngagai Menteri Perambu enggau Pengator Pengeraja Asal Ke-dua iya, Awang Tengah.

Ngelama tu, Awang Tengah udah mansut ke jako penerang ti terit, madah ke hak-hak Perintah Menoa nyukat lalu magi tanah-tanah NCR ba minggu-minggu nyin suba, lalu iya tu siko ari bala menteri ti bulih 6,000 hektar tanah ba kandang menoa Balai Ringin. Orang ti direjister iya nerima semoa tanah nya ngari ke iya empu iya nya sapit iya empu, Awang Matusin Awang Drahman.

  • Alan Newman. NZ

    Idris Buang! You should be buang to the crocodiles. When you popped up with your words, I vomited. Am speaking from NZ – a country ranked top 3 globall for non-corruption and full democracy.

    Am telling you straight in your face, don’t ever how your idiotic face again or utter another nauseating word. You have just lowered yourself to the lowest pits, and become a disgrace to all of mankind. You know too well Taib & sons are serving their own wallets, never the people.

    Soros: “In China people have been shot for embezzling one thousand dollars. With 8 billion you have stolen, therefore you would be shot 80 thousand times.”

    http://www.sarawakreport.org/2011/08/taib-highly-

    TAIB “HIGHLY CORRUPT” – SECRET US DOCUMENTS PUT PRESSURE ON FBI!

    http://malaysiadigest.blogspot.com/2010/01/corrup

    “Look at the Sarawak Chief Minister selling billions worth of timber concessions under the table; selling every piece of state land to businessmen without tender; using his own companies to obtain lucrative government contracts; selling approval signatures for a fee 'you pay I approve'. He has 8 billion US stashed overseas. Thousands of acres of land are given to one or two companies while thousands of poor people still live in cardboard makeshift homes; have no water and shit into the river.”

    Alan Newman

28 Mar 2011

BAKA NI CHARA TAIB MALAS BUDI BALA BAKIH POLITIK IYA!

This post is also available in: English, Malay

BAKA NI CHARA TAIB MALAS BUDI BALA BAKIH POLITIK IYA!

Maioh orang udah didinga kami betanya dalam ruang komen ba laman kami tu, nama kebuah bala bakih Taib sama bela ngemendar ke iya enda badu-badu ngereja pengawa ‘makai suap’ ti dikutuk nya?

Pansik enggau sidi’ ti dipejalai ke kami ba opis pengerejista tanah udah meri saut ke tanya-tanya nya. Maioh agi bala kroni politik iya, ti mangku pengawa menteri penuh, nya endang orang ti nyukong iya ba pengawa ngerampas tanah menoa tu ti dikereja Kepala Menteri.

Beberapa taun tu udah sida nguji ngelamun sereta belalai ke diri, tang kami chukop bidik sereta lansik laban kami udah mujor bulih rekod-rekod ti lama-lama! Ba bala menteri BN nya, enti Taib ngetu ari pengawa iya, reti nya sida kroni iya mega nadai agi bulih pala tanah ke kebun sawit bedandang besai sida nya. Ari nya, sida enda tau enda bekereja bebendar ke agi, laban dikena sida ngenan ke Taib ba penudok iya ti nyadi Kepala Menteri nya, enda salah-salah, awak ke iya nyadi batu ti dugau-dugau dalam Dewan Undangan Negeri dia!

Naroden Majais

Chunto iya, Naroden Majais nya. Iya udah meli pengarap bala pengundi iya di Simunjan enggau chara ngambi tanah-tanah adat sida dia! Kami udah mujor amat tetemu ke enda kurang ari 19 iti pala tanah udah diserah ke soh iya nengah kompeni Hydroflow enggau kompeni Indranika Jaya di menoa Simunjan dalam timpoh 2003 – 2007.

Beserimbai enggau nya, nitih ke rekod ti ditemu kami, Naroden mega udah bulih plot 5,000 hektar ba pelilih menoa Baram.

Semoa tanah enti dipegulai ke nya nyadi 15,500 hektar ti diserah ke enggau bayar premium RM5.7 juta. Tang, enti Naroden empai ulih mayar premium nya, iya deka diberi diskaun RM500 ke satu hektar ke bagi ti besai agi ba tanah-tanah nya, lalu iya mega tau mayar enggau chara pupok dalam kandang 5 ngagai 10 taun!

Ngelalai ke diri!

Sarawak Report mega udah mujor tetemu ke pengawa Naroden ti deka ngelamun diri empu bekuasa penuh atas pala tanah nya, ti ngujong ke iya udah balat dibantah sereta dikutok bala penulis blog dalam taun 2008 suba. Ari rekod-rekod ti mudah amat diperati ke kitai nya, kitai ulih meda dua buah kompeni nya, Hydroflow enggau Indranika, direjister ngena nama Kong Goon Siong, ti ba opis sida ba Lot 298, Tingkat 1, Lorong 9, jalan Rubber, Kuching.

Tang, enti kitai mansik rekod-rekod taun 2007 ba opis pengerejister tanah nya, kitai deka enggau mudah amat tetemu ke nama Naroden bin Majais. Nama iya ditulis ke enggau terang bendar besemak enggau alamat ti dikena Kong Goon Siong!

Ari penerang-penerang nya, Naroden Majais nya dipasok ke dalam rintai nama orang ti nerima pala tanah 5,000 hektar di menoa Baram ngena nama Harta Mastira Sdn Bhd! Tang beserimbai enggau nya, menyadi Taib Mahmud, Onn Mahmud, mega ditemu benong ngelaku ke tanah endor kebun sawit iya 15,500 hektar enggau rega RM30,000 seikar, ti dijangka ke ulih meri iya penguntong lebih satu billion ringgit!

Nama utai ulih orang bansa asal?

Pengawa ti ngambi tanah-tanah NCR ba endor nya udah ‘diperunding ke’ Naroden Majais enggau bala orang asal ti bempu tanah nya, ti endor sida dibai ngambi ke bulih share dalam dua buah kompeni ti diberi 30% share dia.

Ba ujong taun nyin kemari, sebengkah pengerami nyua ke chek udah diator ba rumah besai Taib Mahmud, ti endor bala orang asal nya diberi duit dividen ke penguntong ba taun ke terubah. Suratkabar The Sarawak Tribune (ti dikemata ke anak indu Taib, ti bedama Hanifah) udah nusi baka ni 23,579 ton metric minyak sawit udah mujor bendar dikeluar ke ari kebun nya, lalu ari nya, dia sekeping chek RM575,400 udah disua ke soh bala orang ti empu tanah ti dikangau ke Taib berami ba rumah iya nya.

Ari pemaioh tuboh, 2,877 iko bala orang ti megai share ti dirami Taib enggau Naroden nya, tiap iko sida nya nerima ‘dividen’ RM200 ke taun nya! Baka ni penguntong ari semoa pun kayu kampong ti udah ditebang enggau tanah sida ti kena ambi nya? Kada enda lebih ari duit untong nya udah tama kandi’ Naroden? Kitai mega tau meda gaya pemesai-mesai rumah ti digaga iya ngena gaji menteri iya ke enda tentu besai nya?

WFM Plantations

Laloh ari penguntong nya, baka ke ditemu kami, endang diambi Naroden enggau bala bakih iya nya. Bala orang-orang asal nya semina bulih 30% ari semoa share (ti enda dikuasa sida enggau penuh ba kompeni nya), lalu 60% ari share dipasok ke ngagai sebengkah agi kompeni ti bedama WFM Plantations, ti diempu WFM Enterprise Sdn Bhd. Kompeni WFM bejalai ke pengawa sida ngena alamat kompeni-kompeni bala pemegai share dia, ti bedama Punggor Wibara S/B enggau Saddor Wibara S/B.

Pemegai share dalam WFM Enterprise nya Kong Goon Siong enggau Kong Goon Khiing! Dua iko orang nya nyadi pengarah ke kompeni WFM Plantations. Kong Goon Siong mega bekerja ba opis Naroden Majais, ti bejalai ke pengawa iya betemu enggau orang ari opis pengerejister tanah udah bekau sida kena kutok orang dalam taun 2007 nya! Kong Goon Siong bekunsi ke alamat enggau Naroden Majais.

Tanah di menoa Gedong tu udah dibuka nyadi kebun sawit bedandang besai, 12,000 hektar lalu disadang ulih meri penguntong satu billion ringgit, enti nunda ke rega ti dipinta Onn Mahmud. Kepala Naroden Majais semina ngasoh iya mayar premium tanah RM6 juta soh menoa Sarawak! Peda kita pemanah enggau pementas Kepala Menteri nya ba Naroden!

Enti baka nya gaya pendiau penchuri BN, puntan meh pengidup orang di menoa Sarawak ila?1

Ati Naroden Majais pan dipeda mentas laban ke udah meri bala orang asal di Simunjan RM200 siko ke pampas sida ti udah lenyau menoa endor sida manggai ke pengidup sida!

Maioh agi enggi Naroden

Diatu Sarawak Repot deka ngaga simpul penemu ti endor Naroden bin Majais nya siko ari penyokong kuat ke Abdul Taib bin Mahmud enggau perintah BN iya. Kada enda, penalok ati iya soh Taib udah dibayar enggau tanah ti diberi soh iya?

Pengirau enggau penyaru kitai udah ditemu kitai saut dalam rekod-rekod opis pengerejister tanah, lalu Kepala Menteri endang rindu bendar ngupah bala ‘orang kanan’ iya dikena ngulih ke sukong sida nya. Kitai enda tau enda meresa rekod taun 2007 (baka ti diayan ke kami ba entri jako English dalam laman tu).

  • Dom

    Orang ari kampung Lubuk Punggur,Tegelam,Tanjung Sab,Sungai Paku enggau Lubuk Buntin semina diberi sagu hati RM200 aja setaun,maia deka ngintu gawai enggau Hari Raya.Nya pen Ukai semua orang diberi.Kami nadai nemu perjanjian.NO BLACK AND WHITE

    Genturung menoa dia nadai agi kampung abis jadi ladang sawit.

    Nadai olih dipadah enggau mulut , dipeda enggau mata.KITA DATAI kediri meda pengamat tu. Sida dia PUTIH TULANG ENGGAU PUTIH MATA. Jalai Raya ari simpang Bangka semong Lrg8 ke Lubok Punggur nadai digaga.Apa agi api,ai enggau pemansang bukai.47 YEARS is NOTHING.ARE THEY BLIND?

    Tu meh Pemansang dibai Naroden.

    Tang sida ke diau dia penyokong Tetap Naroden.

    SUNGGUH KASIHAN ,BILAKAH MEREKA AKAN SEDAR?

  • Bukit Sadok

    Sida tu enti mati, seluar dalam enda meh sida iya ulih mai…kelalu jai meh sida suku juru taip tu.

  • Uchu Aki

    RM200 ke dividen SETAUN? Tauka SEPEMANJAI umur? Jabu rindu endar nyebut figure dividen ke besai-besai! Ratus-ribu munyi didinga, tang udah dibagi-bagi ngagai beribu iku 'shareholder', semina seratus-dua aja ke diterima siku-siku.

    Enda ngemelika bala orang rumah panjai ke empu tanah temuda baka nya?

    BEBEREKAT sida menteri BN ngaga rayat bakenya!

    Ni kita anakbiak rebak baru … bah! Angkat bala kita! Kesaika ulih kita bala menteri BN nya! ANANG ngundi sida agi! Merinsa sida apai, sida aki kita laban bala menteri BN nya! Abis tanah diperimba sida aki kita kelia! Diatu kita anakbiak nya ke betik-betik mata nadai meda tanah ulih aki kita nya. BAH! Angkat kita! Sadong ulih kita berita ti baketu!

  • =87-

    Nya meh aku ngasai Jabu tu bisi pail Mathematic maya sekula dulu. Kitai bansai Dayak mesti meransangka anak kitai awak sida ya rindu ka Mathematic. Awak ka sida ya nemu bepikir enti bisi orang baka Jabu ka ngemulak ka sida baka tu.

  • http://yahoo bujang saratok

    endang semua sida YB enda ulih dikarap..(arap ke pagar tang pagar ga makai padi)..baka ni ko kitai ulih ngelaban sida ia tuk… UJI ANANG AGI NGUNDI SIDA TU MAIA KE BEPILIH KA DATAI TUK…ngarap ke sida ia ngemansang ke menoa tang sida ia semina ngemansang ke kucik diri ngencuri reta ti pemadu berega bala anak sarawak…maia ka bepilih tu sida ia sibuk ka bejalai kimpin ke diri ngamnbi ke bala rakyat ka milih sida..(tak anang ngelumu sida ia enti datai ke menoa diri) nya baru sida ia nemu..tang maioh kitai bansa lalu lembut ati meda sida ia bisi bejalai ke menoa lalu dikumbai manah tang bisi sida berunding ke nama utai ke udah dikereja ia ba menoa kitai…abis tanah ,kayu pesaka kitai udah dicuri sida ia…nama penguntong kitai rumah panjai tegal sida nya…nya meh bala kaban anang ngundi sida ia maia ke bepilih tu awak ke sida ia nemu kitai bisi pengering ka ngetan ke tanah pesaka ini aki kitai kelai…ARAM ANGKA KITAI REBAK BARU

28 Mar 2011

DUIT TUNAI RM21 JUTA – ASIL TANAH RAMPAS KE MENYADI TAIB!

This post is also available in: English, Malay

DUIT TUNAI RM21 JUTA – ASIL TANAH RAMPAS KE MENYADI TAIB!

Semina tinggal beberapa hari da agi endor pengawa ngundi deka diator di menoa Sarawak, sida Taib Mahmud sebilik agi bisi nerima duit asil ari tanah-tanah ti diberi soh sida ulih Kepala Menteri.

Kena ke 18hb February tu tadi, Bursa Saham Malaysia bisi udah mansut ke jako gerah pasal pengawa bejual-beli RM21 juta ke 80% kompeni ti udah diberi share ke pengawa kebun sawit bedandang besai 5,000 hektar di pelilih menoa Baram ulih Taib Mahmud. Nitih ke pansik ti dipejalai ke kami, kami tetemu ke share ti berega tinggi nya udah dibayar ngena duit tunai soh menyadi iya empu, Ibrahim Mahmud!

Ibrahim Mahmud ti seranta?

Ibrahim nya siko ari sida Taib menyadi ti pengambis seranta ke sida menyadi, laban iya semina bekereja nyadi polis baka orang bukai. Sida sebilik endang bisi pengasih ke Ibrahim laban iya ti ukai orang kaya baka sida ke bukai ti endang ngelempai ke pengidup sida ba pengawa nebang kayu kampong enggau pengawa bekebun sawit bedandang besai ti diberi soh sida ari Kepala Menteri.

Tang, diatu kami bisi tetemu ke penerang pasal Ibrahim udah nyadi kaya-raya nengah kompeni Masretus Plantations, iya nya nengah Tanah Menoa (state land) ti diberi Taib soh iya, lalu diatu Ibrahim nya lantang amat ngidup ke diri!

Meri duit bantu, tang ke lebih nya ditinggal ke sida sebilik!

Kandang endor ti bulih 5,000 hektar nya udah diserah ke ngagai Amgreen Plantations di menoa Baram, sebengkah kandang endor ti benong dituntong pengerusak laban pengawa ngulih ke kayu kampong, kebun sawit bedandang besai, lalu diatu projek ngaga tekat-tekat hidro-elektrik, terima kasih ke polisi ti dipejalai ke Taib Mahmud. Amgreen, ti dulu ari nya diberi nama Yayasan Sarawak Plantations, nitih ke penerang dalam rekod-rekod ti diperesa kami, endang sebagi ari Yayasan Sarawak, ti betanggong pengawa ngulih ke belanja dikena mantu anakbiak besekula (pengari Yayasan Sarawak nya Adenan Satem ti endang ipar ke Kepala Menteri), ti mega sebagi ari Yayasan Kebudayaan Melayu.

Tang, pemegai share ti besai dalam kompeni Amgreen ukai dua bengkah yayasan nya, tang sebengkah kompeni ti bedama Victoria Square Plantations Sdn Bhd, ti megai 65% ari semoa share dia. Nya kebuah Adenan Satem nadai irau deka betanya ke sapa megai share ti maioh agi dalam Victoria Plantations (iya nya Ibrahim Mahmud), ti nyadi orang ti tau dikangau ke, dalam taun 2007 baka ti bisi dalam dokumen-dokumen Pengerejista Tanah, ngari ke sebengkah agi kompeni ti bedama Victoria Square Development.

Nya semina alamat aja.

Pengawa jual-beli enggau nyerah ke tanah, ti nitih ke patut iya dikena ngemata ke dua bengkah yayasan nya, udah dipejalai ke dalam pejabat Ibrahim Mahmud. Uji peresa ari alamat opis enggau lumor-lumor telefon sida (ba entri jako English tu)!

Diatu, udah dua-tiga taun, Ibrahim udah berunding deka ngulih ke duit tunai. Kena 18hb February nyin kemari, pengawa jual-beli lalu dipansut ke ba jako gerah Bursa Saham Malaysia. Jako gerah nya madah ke 80% ari semoa share dalam Victoria Square Plantations udah dijual, lalu dokumen-dokumen nya bisi ngayan ke penerang pasal pengawa jual-beli, lalu pia mega ngayan ke sapa empu apa. Ari nya kitai udah nemu berapa pemaioh duit ulih Ibrahim Mahmud!

Dokumen-dokumen awam udah ngayan ke kena 18hb February, sebuah kompeni awam, ti bedama Firma Bhd udah meli 126,000 iti share enggi sida Victoria Square Plantations ari sebengkah kompeni ti bedama Network Jaya Sdn Bhd. Kompeni Network Jaya nya endang dempu kompeni Victoria Square Plantations. Uji peresa kita alamat kompeni Network Jaya ti endor alamat sida nya dikelala kitai!

Ibrahim Mahmud mega megai pemadu maioh share dalam Network Jaya. Kompeni Victoria Square Plantations ti bisi disebut dalam bup prospectus bala pemegai share dalam kompeni Firma ti nyadi sebengkah kompeni ‘dormant’. Reta tengkira (ti nyadi ke kebuah Firma Bhd mayar duit ti maioh dikena ngulih ke 80% share nya) endang, 65% share dalam Amgreen Plantations – iya nya ke tanah 5,000 hektar pemesai ti diserah ke soh ‘pengawa dagang kunsi’ entara Yayasan Sarawak, Yayasan Kebudayaan Melayu enggau kompeni enggi Ibrahim Mahmud kenyau ari taun 2007 nyin kemari, ari menyadi iya, Abdul Taib bin Mahmud.

Pengawa meli nya, ti ditemu kitai dikereja sebulan tu ke udah, udah mujor amat meri penguntong RM21 juta soh kompeni Network Jaya, lalu ari ketegal sida semina nyual 80% share nya, Ibrahim enggau bala bakih udah bisi ngalau share dalam pengawa bekebun dandang besai semina lebih mimit ari penguntong ti besai ti udah diambi sida.

Leboh Ibrahim agi megai share ti lebih ari setengah dalam Network Jaya iya dipelaba ke udah mujor bulih RM11 juta ba pengawa jual-beli nya.

Berapa penguntong ti bendar enggi iya?

Penyampau ti bendar, jauh amat bebida enggau premium ti diterima Menoa Sarawak ari tanah ti tinggi rega nya baka ti udah direjista dalam bulan Lapan 2009 (Uji peresa ba penerang dalam entry jako English).

Bayar RM3.7 juta udah dipinta ba atas pengawa ti nyerah ke tanah 5,000 hektar pemesai nya. Kompeni enggi Ibrahim udah bulih 65% ari semoa share dia. Nitih ke kerja kira-kira kami, semina RM2.5 juta ke bayar premium dibayar soh Menoa Sarawak. Tu mai reti, penguntong RM18 juta udah pansut ke guna Ibrahim enggau bala bakih iya – lalu sida mega ditemu agi mengkang ngalau 20% ari share dalam kompeni nya!

Enggau penampak ti manah dalam pengawa perintah disadang ulih ngemendar ke penerang-penerang diperesa orang maioh enggau bala kepala penyakal ti tentu deka mejal Taib awak ke bebendar agi nerang ke nama kebuah iya nyerah ke tanah ti berega tinggi nya soh menyadi iya enggau rega ti murah amat.

Tang, diatu kami udah nemu nama kebuah Taib seruran nyeliah ke diri ari ti belalai ke semoa pengawa leboh maia ‘berunding’ enggau sapa-sapa!

Sekeda orang deka pechaya, lalu ngumbai Ibrahim nya udah ngeluar ke duit iya empu ba pengawa jual-beli lalu nyerah ke tanah nya, laban sida Taib sebilik endang udah teleba ngasoh bala bakih dalam dagang sida ti ngeluar ke ngari ke sida, lalu sida semina ngambi untong pechuma ari semoa share ti besai-besai.

Menoa Sarawak diatu udah balat bendar dituntong penyalah makai suap ti endor nadai siko orang tau bedagang sebedau sida mayar ‘chabut dagang’ soh Taib enggau sida sebilik. Tiap iko sida sebilik endang seruran ngumbai diri bisi tanggong pengawa ti nyedia ke peluang bedagang ari ti bekering ke nama Kepala Menteri ti menyadi sida nya, lalu ukai deka bekunsi ke penanggol-penanggol ba pengawa dagang. Sida sebilik nya dipeda baka ti bebendar amat bekereja!

Enda kelalu suntok!


Abdul Taib bin Mahmud enda patut irau maia iya deka ngagih ke tanah-tanah rampas soh Ibrahim. Nitih ke pansik enggau sidi kami, Ibrahim diatu bisi maioh amat duit dikena iya bedagang. Dokumen-dokumen kompeni ti nunjok ke sebedau kompeni Frontken Corporation Sdn Bhd nya dibuka soh orang awam dalam taun 2006 suba, Ibrahim ditemu udah ulih meli 34% share ba kompeni nya, lalu semoa penyampau nya manggai 125,125,000 iti. Repot Taun kompeni nya ke taun 2007 ngayan ke sida udah ngeluar ke 118,750,000 iti share baru ti meri penguntong RM31.4 juta soh kompeni nya. Nya siti mega ‘rian runtoh’ soh Ibrahim Mahmud! Ba punchak pengawa dagang sida, share dalam kompeni FCB nya ti berega lebih-kurang setengah ringgit ke tiap iti share nya udah ngujong ke Ibrahim bulih untong RM60 juta.

Diatu Ibrahim bin Mahmud patut tau dikumbai udah tepantup enggau utai ke diulih ke iya, laban umor iya pan udah tuai.

  • Bujang Sadok

    Seagi-agi Taib enggau bala ukui iya megai perintah menua Sarawak, seagi-agi nya meh kitai di Sarawak tu nyadi ulun bala sida iya. Saritu (28.03.2011) bendar endar Jabooo bejaku di Betong, ngugut urang di Betong enda tau enda ngundi iya(BN)…tu meh menteri UGUT menua Sarawak ke baru (Portfolio ke baru digaga Taib)

  • bujang berani ari la

    tu ndang stail jabu…lama udah bakatu..tak stat ari ada aku nang udah meda jabu bakanya…nyau munyi nama jabu ngugut bala kami di layar,spak…ooo apai…ooo indai…oooo anak…oo ucu….nyau baka ka nyembah petara.ko jako dalam runding ia…tanah kita beri ngagai aku…temuda rimba kita beri ngagai aku…..madah ka pemansang ,pemaju menua betong…..30 tahun dah umur aku tu …tak jalai alun,elktrik,ai…lalu ga bedau…agi ga kami ngena perau,injin api..nyetok ka saritu….jabu tu pemula ti pemadu besai menua betong…………enti jabu nemuai …mai anak ikan,mai tambak kepayang….anak ikan di lepaska ia gau rakyat ..bah sapa ka ngulih ka nya ila…enda ka meri baya makai anak ikan nya,…uji tak pegong gaga ba tisi rumah kami …nda ga senang kami ngulih …jau..jabu….

  • Bukit Sadok

    Perintah sida keluarga Brooke jauh manah ari perintah sida taip. Sida keluarga Brooke mai kitai Dayak enggau semua bansa bukai di Sarawak sama-sama ngemajuka Sarawak maya nya menya. Sida iya nadai ngereja/ngerampas tanah baka sida taip. Sida iya nadai balat ngelakar rayat Sarawak, nadai nekanka rayat Sarawak, nadai ngaga janji bula…enti bisi mimit meh. Sida iya ngasuh kitai Iban badu bebunuh serta diau manah ngidupka diri, tambah mega bisi ngansak kitai Iban ngereja pengawa dagang. Tau bacha ba buku sejarah ke bisi besangkut paut enggau sejarah menua Sarawak. Kati deh! Jaboooo kala ngansak kitai Iban bejalaika pengawa dagang? Ngundi dachin aku tu ila enti sema iya bisi ngansak kitai Iban bejalaika pengawa dagang tauka pengawa ngemansangka pengidup. Oh! enda ingat tadi, karan elektrik pan nadai meh sida keluarga Brooke enchuri..

  • http://www.ayamayaschapan.blog aya mayas chapan

    Nyamai munuh seput jabooo….kaban. Urik ngena pensil ja maia bepilih besai tu ila, nanai guna orang baka jabooo…nya idup di sarawak tu. Jaboooo…nya meh IKAN JUAK(ADONG) kitai ditu. UKAI NGIDUP JABO…..NYA, MUNUH BANSA DIRI EMPU. Taun 1987 suba rauh-rauh Jabooo…nya madah sapa bagi bala IBAN/DAYAK ti ngelaban Dacin(BN)nya disemaka ia baka LANUN. BAH!!! KABAN…????? Diatu SAPA LANUN ke bendar deh????? BEPIKIR MEH KITA DAYAK MENUA SARAWAK TU….., RINDU GA KITA KA JABOOOOO MENTERI UGUTnya??? kelebih agi agai bala kaban kitai dayak bagi sitak betong.

27 Mar 2011

TAIB MAHMUD ENCHURI KUASA ELEKTRIK KE GUNA DIRI EMPU!

This post is also available in: English, Malay

TAIB MAHMUD ENCHURI KUASA ELEKTRIK KE GUNA DIRI EMPU!

Leboh orang maioh enggau naka ulih bekelimat dikena napi pemar bayar bil elektrik sida, Sarawak Report, tetemu ke ulah Kepala Menteri ti enchuri bekal kuasa elektrik dikena ba rumah iya empu!

Penerang ti ngasoh kitai tekenyit ati tu datai ari siko orang ti bekereja dalam rumah Taib Mahmud empu. Kami dipadah ke pasal pekara tu ari kepala juruteknik ti udah diasoh iya bejalai ke pengawa ngemata ke kereja-kereja teknikal ba rumah iya di Demak Jaya.

Kami dipadah ke pasal Kepala Menteri ti minta dipasang ke kabel baruh tanah dikena ngelaung ke meter elektrik, lalu disambung terus soh semoa dawai dalam rumah besai iya nya. Reti nya, setengah ari arus elektrik agi nengah meter tang udah tau bendar ngujong ke bayar bil elektrik iya jauh bendar dikurang ke!

Pengamu ti kelalu balat?

Taib nya udah ngayan ke iya enda teleba ngeluar ke belanja iya empu. Semoa pejalai belanja sida sebilik endang ditanggong orang bukai. Sida sebilik udah teleba bendar ngambi/nerima, tang enda kala deka nyurong/meri, nya kebuah sida enda tau enda nentu ke semoa bansa bil ti dibayar sida jauh mimit ari bil ti dibayar kitai ke bukai tu.

Tang kitai anang enda ingat, Taib endang patut mayar bil elektrik lebih ari kitai ke bukai tu. Beberapa taun tu ke udah, kitai kala ninga pemutus aum bala menteri dalam Dewan Undang Negeri Sarawak ti besetuju mayar elaun taun ti besai soh Kepala Menteri dikena nulong iya bebayar ke bil-bil eletrik iya, laban kitai pan sama nemu maioh pengawa berami dikena iya nyambut penatai bala temuai ngagai rumah besai iya nya.

Sarawak Report berasai sinu ati ngenang nasit bala rakyat Sarawak ti kena tekan pemar bayar elektrik Sesco ti diempu perintah nya, ti seruran mutus ke arus elektrik ke sapa-sapa orang ti enda ulih mayar bil ti semakin hari semakin mar.

Bekaul enggau polisi Sesco, ke lebih agi ba bala orang ti dientap ke pendiau dikena ngawak ke projek ngaga tekat hidro-elektrik, dia sebengkah ari pampas ti disemaia ke perintah iya nya meri sida bekal kuasa elektrik ti pechuma awak ke sida enda kakang ati pindah ngagai pengentap pendiau ti baru, baka bala orang ti dipindah ke ari  Batang Ai enggau Bakun. Tang bala orang ari dua bengkah komuniti nya dipinta Sesco bayar penuh baka bala penguna elektrik ti bukai mega, lalu maioh bendar bala orang nya udah diputus ke Sesco bekal ketegal sida ti enda ulih mayar bil sida iya.

Pengerusi Lembaga ke bala Pengarah Sesco Bhd, iya nya petunggal Taib ti kaya, Hamid Sepawi. Sama dalam lembaga nya mega iya nya anak lelaki Sapit Kepala Menteri Alfred Jabu Numpang. Hamid enggau Jabu endang dua iko ari bala orang ti lama udah ngasai ke penyamai bulih kereja enggau lisin-lisin ti diberi Kepala Menteri soh sida, lalu ari nya sida pan enda irau ke pemar bayar bil elektrik sida. Hamid Sepawi ditemu terit ba bala penguna elektrik, tang ulih belembut enggau bos iya empu ti kaya-raja nya!

Pekara ti diterang ke pengurus juruteknik ba bala kami

Dikena kami ngamat ke berita ti nyelai, sereta mar amat dikarap ke tu, kami lalu betanya ke ba orang ti endang kala udah diasoh Taib masang sistem dikena ngelaung ke meter nya.

Orang nya, ti bedama Jong Ka Ching, nya kepala juruteknik ti udah diasoh Taib ngubah sistem ba meter ba rumah besai iya di Demak Jaya. Kami mega bisi ninga pasal Raziah (iya nya menyadi indu Taib) mega tetengok deka ngena sistem ti baka nya ngambi ke dipasang ba rumah iya ti berimbai enggau rumah Taib! Raziah mega kaya-raja baka Taib, tang nama kebuah iya kelalu bekelimat, lalu enggai mayar bil-bil elektrik iya baka mensia maioh ke bukai.

Ari nya, kami lalu mukul telefon lalu berandau enggau Jong Ka Ching, sekali ke iya deka masang perengka nya ba rumah anak lelaki Taib ti bedama Mahmud Abu Bekir, meda iya baru udah sarak enggau bini iya ti endor bini iya udah nawa iya RM400 juta, lalu tentu Bekir deka bekelimat agi ba belanja iya! Kami mukul telefon soh Jong Ka Ching ti endor kami ngelulu ke diri nyadi siko ari sekretari ke Abu Bekir lalu ngasoh iya datai ngagai opis laban mai iya berunding enggau Datuk nya!


Ari jako randau kami enggau Jong Ka Ching, kami ulih nuku ke iya nya ti endang udah kala diasoh Taib masang perengka dikena ngelimat guna kuasa elektrik ba rumah besai Taib di Demak Jaya. Dalam jako randau nya, Jong endang suah nyebut diri endang masang perengka nya ba rumah Pehin Sri nya.

Leboh kami nusoi pekara nya ngagai pengurus senior dalam kompeni Sesco, dia iya nyaut kami “diatu udah meh kita nemu pekara nya, ya?!” Empai lama tu udah, Sesco kala dibantah ba pengawa sida ti ngambi bala pengurus ari menoa luar bekereja ke kompeni nya, lalu bala pengurus nya mega dibayar gaji ti tinggi. Kepala Pegawai Eksekutif ti baru sida nya, ti bedama Torstein Dale Sjotveit, dibayar Sesco RM4 juta setaun lalu diberi 10 iti tiket bilun pechuma ninting taun dikena iya pulai ke menoa iya empu di Norway. Kelimpah ari iya, Sesco bisi ngaji 20 iko agi bala engineer ari menoa luar bekereja enggau Sjotveit, semoa sida nya dibayar gaji jauh besai ari gaji biasa ti diterima orang di Sarawak.

Empai lama tu udah, YB Chong pengari parti DAP Kuching udah didinga ngenatai ke jako bantah ba parlimen pasal Sesco ti minta bayar masang meter ti tinggi ngagai sapa-sapa orang ti beguna ke kuasa elektrik ba rumah sida.

Bala orang dipinta Sesco mayar RM650 ke sebuah meter ti dikumbai sida meter bansa ti baru sereta manah, lalu sapa-sapa orang ti enda ulih mayar masang meter nya deka diau dalam pemetang!

Tang jako bantah soh Sesco ti tau ngasoh kitai tekenyit ati nya maioh agi rakyat di menoa Sarawak ti kaya ari menoa-menoa bukai di Malaysia nya, 80% rakyat iya ti diau di menoa pesisir enggau di ulu-ulu sungai mengkang empai ngasai ke penyamai ngena kuasa elektrik!

Ngari ke Mr. Jong, Sarawak Report deka nuku ke, ba maia kami ti berandau ke dua kali enggau iya laban deka betanya ke penembu pengawa ti diasoh kami nya, iya nyaut kami madah ke diri empai betemu enggau Abu Bekir, lalu madah ke Abu Bekir nya nadai di Kuching, lalu Abu Bekir nadai kala ngasoh iya masang perengka dikena ngurang ke kuasa elektrik ba rumah iya. Udah nya, Jong lalu bebula, lalu madah ke iya nadai kala masang perengka nya ke Taib. Kada enda Taib Mahmud empu deka nerang ke pekara ti bendar, sekali ke deka bebula tau ke ngamat ke berita ti diterima kami tu?

Bebadi ketegal perang-cyber

Dikena kami nambah ke artikel ti ditulis kami tu, kami deka ngenatai ke penyinu enggau pengirau ati kami ba siko proof-reader ti udah dibuai ari pengawa iya ba kompeni suratkabar The Borneo Post. Proof-reader ti dibuai ari pengawa iya nya udah kompeni suratkabar nya nerima surat arahan ari opis Kepala Menteri. Iya dibuai ari pengawa ketegal penyaru iya ti dikumbai Taib ngelese ke pengawa iya ti deka nyakal dawa enggau petenah ti ayan ba internet nengah ‘perang-cyber’.

Suratkabar The Borneo Post udah ngarang sebengkah artikel dikena sida nulong Taib ngelaku ke sebengkah ari bebelas-belas iti laman web ti dipelanja Taib nya. Nama laman web nya nyau deka sebaka enggau laman web kami tu, Sarawak Report, semina laman web Taib nya bisi urup ti lebih! Proof-reader ti enda bidik nya udah suah bendar macha artikel nya lalu iya ngumbai diri bisi tetemu ke penyilap ba spelling, lalu udah nya ngemetul ke, ngambi ke spelling nyadi www.sarawakreport.org, ti endang address laman web kami tu!

Ba pengujong pekara nya, artikel The Borneo Post ti udah diayan ke nya nyau ngelaku ke laman web kami, lalu ukai ngelaku ke ‘senyata-cyber’ ti dipelanja Taib Mahmud, udah sida ti nguji nguna nama kami!

Sinu bendar kami meda penanggol ti udah nuntong proof-reader nya, ti endang talok bendar ke tuan iya, ti mega bepanggai ba gaji bulan iya baka kitai maioh tu. Nama kebuah orang ti ngembuan pengelandik bekereja nya mudah amat dibuai ari pengawa ketegal penyaru ti mit laban deka ngemuas ke ati Kepala Menteri? Tu meh maia menoa Sarawak, ti dulu ari menoa-menoa bukai di dunya tu, patut ngaga undang-undang dikena ngelindong rakyat iya ari ti kena buai pengawa peneka ati siko tuai dictator baka Taib Mahmud.

Anang enda ingat nuan, Taib Mahmud, nuan enda ulih muai sebarang orang ari pengawa nitih ke peneka ati nuan … tang bala rakyat nuan ulih muai nuan ari pengawa nuan dalam kandang 3 minggu tu! Ngadang nuan!

  • Bujang Sadok

    Uji rendam da hidro Lubok Antu din Aki Uban tu jera iya bangat tak ngenyai nya. Nadai utai enda dicuri, butuh rakyat ka meh iya ngenchuri jangka aku.

    Kati YB bukai deh, kada enda bisi ga ngenchuri karan, tau pansik ulih kita.

  • Davis

    pancak kentut enggau Aki Uban tu…..siku-siku kitai iban mancak ya ba mua….jera ya…udah cukup kaya, agi gak encuri karan..ukai ulih ke baya ya karan nya……….

  • kuncit beragum ari l

    aku pengari ari layar betong…PKR tauka SNAP ,minta kita ka polis …sapa-sapa ka..sida Jabu di gensurai dia tau meh siasat….ni nemu kada nda encuri karan bala sida ………kami rakyat minta Jabu gau Taib ngundur diri maia bepilih ka datai tu ila…kami cukup benci ngagai urang 2 iko tu ..2 iko tu lanun ti pemadu jai menua sarawak .kami tetap nyukong SNAP …idup Mr Joe Unggang.

  • SHINEE

    MULUT NYAMAI MEH NYEBUT,SUBA KA NGAGA JEMBATAN……..DIATU NI…….NYAU PARAI IPAR KU LUTAU BEDAU MEH GAGA………MACAI AR……..

26 Mar 2011

PENYARU TAIB UDAH NGEMALU PETUNGGAL IYA EMPU!

This post is also available in: English, Malay

PENYARU TAIB UDAH NGEMALU PETUNGGAL IYA EMPU!

Bala penyanding penemu Taib enda tau enda bejaga-jaga enggau pengalak iya maia iya berandau enggau bala pengarang berita. Iya ukai nya siko orang ti nemu betunga moa enggau orang media!

Ba pun minggu tu tadi jako randau iya bisi didinga jauh amat bebida enggau penerang ti dipansut ke menantu iya Hisham (Sean) Murray ti udah bebula iya ngumbai iya nadai bekaul dalam empayar reta tengkira sida sebilik di menoa tasik, ti endor iya udah ngaku diri ti ngemun ke semoa pengawa dagang nya ngena duit iya empu. Diatu, iya nekan ke petunggal iya empu, Abdul Hamid Sepawi, udah ngerichau ke runding orang pasal peminta iya ba lisin dikena nanam kayu kampong!

Penyaru nya pansut dalam sebuah artikel berita ba lambar moa suratkabar the Borneo Post, ti kala ditangkan Taib awak ke bekereja enggau regas agi ngiga berita-berita ti tau dikena nimbal berita pasal pengawa iya enggau BN berampas ke tanah rakyat di Sarawak.

Dalam sebengkah jako randau enggau sebuah suratkabar nya ti betopik “State Open To Forest Verification” [Menoa Sarawak Tebuka Ngagai Pengawa Ngemendar ke Rampa Menoa] nya, Kepala Menteri nya udah mansut ke jako penerang ti tau bendar ngasoh ati alit ti madah ke “70% ari kampong bungas di Menoa Sarawak endang apin dikereja”. Kepala Menteri nya ti suah bendar dikutuk tau ke dibantah orang di serata dunya ketegal pengerangka iya ti ngerusak rampa menoa Borneo, udah enchabar gerempong-gerempong NGO datai ke menoa Sarawak lalu meda ke gaya rampa menoa ke diri empu!

Diatu, sapa ke bula, Taib tau ke Hamid Sepawi?

Beserimbai enggau pengeringat bala orang ti rindu ke pemanah rampa menoa, sida Taib diatu nguji deka empelas moa diri lalu nguji nempa saut dikena sida nimbal jako bantah nya, kami deka narit bala pemacha ngagai pekara ti dipansut ke petunggal iya empu, Hamid Sepawi.

Kompeni Ta Ann (ti tebilang regas ngulih ke kayu kampong enggau bebuka ke kebun dandang besai-besai) enggi Hamid Sepawi udah minta lisin-lisin dikena nanam kayu kampong (dikena nganti kayu ti udah ditebang). Penerang-penerang dalam peminta sida ti dikeluar ke nya jauh bendar bebida ari penerang enggi Kepala Menteri nya.

Dalam taun 2006 leboh kompeni nya nganjong peminta sida deka nanam kayu kampong dalam kandang endor 200,000 hektar pemesai ti pelilih menoa Kapit, gaya penerang ti diayan ke sida Ta Ann tentu enda jauh bebida ari jako penerang ari Kepala Menteri. Dalam Repot Pangka Pengerusak Rampa Menoa ari Ta Ann, sida bisi nyebut:

“maioh bendar kampong bungas di menoa Sarawak udah dikereja ambis kurang sekali”

Enti gaya kandang rampa menoa agi baka ke dalam taun 2006 suba, baka ni meh gaya iya 5 taun udah nya, enti sema pengawa ngulih ke kayu kampong majak dipejalai ke di menoa Sarawak?

Nyangka meh, petunggal Taib nya, ti nyadi Pengerusi Eksekutif lalu megai 36% share dalam Ta Ann, udah bula maia iya nganjong peminta ba lisin? Tang taja baka nya, dalam taun 2008, Auditor General menoa Malaysia, udah iya mansik penerang ari Ta Ann, lalu mansut ke  jako kutuk ti endor iya madah ke menoa Sarawak nya sebuah ari 4 buah menoa di Malaysia udah “puntan dalam pengawa ngemata ke rampa menoa sida empu, ti ngujong ke sungai nyadi kamah, tanah tusur enggau pengerusak fauna enggau flora”, munyi penerang ari agensi berita bansa, Bernama.

Diatu, saut tanya tu!

Ba pun minggu tu tadi Taib udah mansut ke jako soh bala pengarang berita pasal pemanah ulah enggau pendiau iya empu:

“Peda kita ulah enggau pendiau aku kenyau ari 30 tau ke 40 taun tu. Aku enda kala bula soh sapa-sapa orang, aku mega enda kala bemain politik ti kamah” – Taib Mahmud, suratkabar The Star 22/03/2011

Enggau nya, ulih-enda kini Kepala Menteri  nyaut tanya sekali ke petunggal iya udah bula ti nyebut “maioh bendar kampong bungas di menoa Sarawak udah dikereja ambis kurang sekali”?

Enggau tu mega, bala penyanding penemu enggau penyaga Taib enda tau enda ngemata ke mulut iya maia iya betemu lalu berandau enggau bala pengarang berita!

  • anak iban sedar

    jako taib nya semina ngelaku ka undi ia aja,madah ke diri enda kala bula ka urang,enda kala berpolitik kamah.ti ia amat amat enda bula ka rakyat nama kebuah menua sarawak enda maju maju sekumbang ka di pegai ia sepemanjai 30 taun ke udah di pegai ia.nama kami urang menua pesisil tak nadai bulih kemajuan langsung di beri ia.kini tunga duit peruntukan ka di beri kerajaan pusat ngagai menua sarawak sepengelama di pegai nuan.makin merinsa bisi lah kami urang pesisil tu laban nuan.abis semua damun aki ini kami di perimba kita sebilik.bala YB bangsa dayak pan sama mega,ketegal di beri taib zink sekepin abis bala bangsa dayak belaya pangan diri.ketegal damun di perimba bala kroni taib.ukai aku bula mata aku empu meda,sampai ka ka berpantap pangan diri ketegal ka berebut ka duit RM1.00 ka di beri compeny batang.

  • http://google Bujang Berani Kempan

    Nemu Kita………Aku nesauka bala semua rakyat kitai bansa dayak di menoa sarawak din anang bemimpi ba siang ari agi kitai semua menyade, buai meh mimpi rawan, mimpi remban, mimpi ngiggau kita ke ngelamatu menyade, undi meh parti pembakang anang sekali-kali kita nyunting parti BN leboh maya bepilih besai ti deka datai enda lama agi.Enti sida BN meri duit ambi meh wai menyade anang minta mimit, minta mayoh agi ngambika tau dikena kitai meli bangalow mesai rumah kepala menteri di kuching din, laban duitnya ke diberi maya ari deka nyunting ila,ainya duit kitai rakyat,hasil duit rampas Aki uban ari bejualke tanah NCR rakyat, ukai duit perintah BN nya bakih, anang takut kita bakih, minta mayoh… menyade, tang udahnya sunting meh Pakatan rakyat.Bedau bisi undang-udang ti deka ngukum kita enti nyema kita enda nyunting bala pengari ari BN. Kitai sama udah bela nemu cerita ke ditusoi bala orang ke bejako ngena arus radio free sarawak ngelamatu ke nerangka Bala YB kitai dayak diatu udah nyau nadai daya, nadai kuasa agi dikena sida ia ngerembaika pemansang penatai pemisie ngagai bansa dayak dimenoa sarawak.

  • http://www.ayamayaschapan.blog aya mayas chapan

    Uji kita berunding dalamka agi bala menyadi Dayak ti nyengala bempuka keresa/tanah temuda Pulau Borneo tu.Enti amat ko jaku Tai (taib)ti mai pemansang seta enti main politik kamah, NAMA KEBUAH MENGERI SARAWAK TU SITI MENGERI TI nombor 2 pemadu mensena/merinsa(miskin) dalam Malaysia, NAMA KEBUAH?????. KINIKA PENUNGA PENGAYA/PENGERAJA MENUA SARAWAK SEKUMBANG 30 TAUN TAI UDAH NYADI RAJA MENUA SARAWAK!!!!!!

    JABU PAN SATU, RINDU AMAT NYADI ULUN TAI KETENGAL TI DRKA BEMPUKA SIMPIR PENGERAJA TAI, SAMPAI NILAT BURIT TAIB PAN SAMGGUP MEH JABU NYA… AMAT NGEMALUKA BANSA.

    ARAM menyadi, UMBAS MEHNYA, BERUBAH MEH KITA, PUNASKA BALA TAIP ENGGAU SAPIT-BURIT IA ARI MENUA SARAWAK TU…..

26 Mar 2011

PENAMBAP TAIB

This post is also available in: English, Malay

PENAMBAP TAIB

Diatu Taib nyau suntok bendar runding lalu nukar chara iya napi penyakal ngagai chara serang ti baru iya nya ‘perang-cyber’ – lalu enda mukai-mukai ba pengujong program jako randau iya ti ditabor ke nengah video chara on-line, iya ngumbai menantu iya orang ti bula!

Lama amat orang tuai nya malu maia ditanya ba mua kamera lalu iya mega suah nguji nyeliah ke diri ari kena gambar kamera TV, tang diatu iya nyau dipeda mansar diri lalu enda tau enda nyakal jako bantah berita-berita ti dipansut ke kami dalam Sarawak Report, lalu dulu ari nya mega Menteri Besai Malaysia Najib Razak bisi udah mansut ke jako tangkan enti BN deka menang dalam sebarang pengawa bepilih besai, sida enda tau enda menang ba perang-cyber dulu!

Najib, ti jauh biak umor ari Taib, leboh iya nemuai ke Sarawak bisi ngena peluang penemuai iya ke Kuching betemu enggau bala ‘pangan’ facebook iya. Lalu ari nya Taib nguji deka ngereja pengawa sebaka enggau chara Najib – ngayan ke diri berandau nunga kamera ti lalu ditabor ke ba laman-laman web di dikemata ke BN.

Ba jako randau nya, ti udah dibagi-bagi lalu ditabor ke nengah laman-laman web ngena topik-topik ti enda sebaka, baka “Aku enda ngelala sapa Clare Rewcastle Brown” enggau “Sarawak ngintu rampa menoa iya empu”.

Tang, leboh datai ba slot video ti betopik “Pengawa dagang Jamilah di Kanada nya udah mujor, laban iya landik” udah ngemalu iya empu enggau BN. Kebuah pia, laban jako ti dipansut ke iya ba mua bala penonton udah jauh bebida ari penerang ti dipansut ke menantu iya empu, Sean (Hisham) Murray, di London, lalu ngumbai laki anak iya nya orang ti bula!

Sida BN patut ngalus ke cherita ti deka diayan ke sida!

Sean Murray ti masok dalam pengawa dagang Taib udah iya ti jadi enggau anak indu Taib ti benama Jamilah, diatu ngemata ke pejalai pengawa dagang kompeni-kompeni Taib di serata dunya.

Beberapa iko sida Sean Murray sebilik udah diambi bekereja dalam kompeni-kompeni nya baka dalam Sakto, Sakti enggau Ridgeford ti ditumboh ke Taib di UK enggau di Amerika Utara. Tang menantu iya Murray udah bebula ke Taib bisi bekaul enggau pengawa dagang nya.

Petunggal Sean, iya nya Christopher Murray ti ngemata ke Ridgeford Properties di London udah madah ke pemberita nya ba taun nyin kemari kompeni Sakto nya ditumboh ke apai iya enggau apai Sean, ti betul amat mega diri menyadi.

Tang udah nya sida Murray sebilik udah ngupah siko lawyer ti tebilang di London ngambi ke ngaga penerang dalam suratkabar ti madah ke kompeni-kompeni Sakto, Sakti enggau Ridgeford nya ukai ditumboh ke sereta nadai bekaul enggau Taib Mahmud, lalu sapa-sapa orang bisi mantah penerang nya deka didawa lalu disaman enggau nadai beadang-adang. Tang Taib ngaku iya endang orang ti numboh ke kompeni-kompeni nya ti endor iya meri duit soh Jamilah, baka ti diayan ke ba video ba jako randau on-line nya.

“Pengawa nya berengkah 20 ngagai 30 taun suba. Aku meri duit soh anak aku (Jamilah) laban aku nyau badu nyadi menteri ba kabinet Perintah Federal. Aku bisi nerima gratuity pencen lalu meri iya sebagi ari duit aku nya ngambi ke bisi dikena iya numboh ke kompeni dagang ti baru … Iya udah mujor lalu ari pemujor nya sida bedagang ke London” [Taib 22/03/2011, http://realsarawak.blogspot.com

Engka Sean Murray ti patut nyaman enggau nawa Taib?

Sapa ti bejako bendar?

Ensera ari Taib Mahmud nya mar amat dikarap ke, belalau ke ari ni iya bulih duit ti maioh baka nya dikena anak iya Jamilah beranak ke puku’. Nitih ke pansik enggau sidi’ kami, pengawa beranak ke puku’ taun ti terubah kompeni Sakto ba reta 700 buah rumah. Dalam Report Taun 1983 kompeni Sakto  udah ngayan ke iya bulih reta CAN$7 juta (RM22 juta), lalu $4.5 juta ari penyampau nya udah diperanak ke orang ti megai share nya, iya nya Taib Mahmud empu. Nama bansa ‘gratuity’ ti diterima siko Menteri Federal baka iya nya?

Leboh Taib nyadi menteri federal nya suba umor iya agi biak tang iya udah dikelala siko ari orang politik ti kaya-raya di Malaysia. Pengaya iya nya endang ukai bekaul enggau gratuity ti diterima iya, tang laban aya’ iya, Tun Rahman Yakub, udah meri iya lisin nebang kayu kampong!

Sarawak Report endang besetuju, semoa penerang baka ti bisi dalam opis rekod awam di menoa Kanada ti ngayan ke Taib nya endang orang ti melanja pejalai kompeni Sakto, lalu kompeni nya endang pengawa dagang sida Taib sebilik ti endang nadai bekaul enggau sida Murray sebilik tau ke enggau bala apai Sean enggau Christopher!

Penerang Murray nya endang bula-banggar!


Penerang ari sida Murray nya endang belaban enggau penerang Taib, kami udah (terima kasih ke niang Ross Boyert) meda semoa sereta bulih salin surat-surat ti bekaul enggau penumboh Sakti International di California – ti ngayan ke Taib Mahmud nya Pengarah asal ke kompeni nya lalu iya mega ti megai 50% share dia!

Diatu, Sarawak Report udah tetemu ke orang ti di belakang kempen perang-cyber ke Taib iya nya Ketua Penerangan Pemuda PBB, Abdul Aziz bin Tan Sri Adenan Satem. Apai iya Adenan Satem nya Ketua Penerangan PBB – ti kala bebini menyadi indu Taib ti bedama Zainab!

Kami ngari ke raban blogger deka meri tabi puji soh anak Satem nya laban udah bebendar amat bekereja ngemanah ke nama ‘Bok Burak’ ti nyau belinsor tuai nya ngambi ke dikelala agi nengah on-line. Tang, ba penemu kami, manah iya enda nulong Taib ba nya. Taib berupai amat bingking lalu kakang-kakang deka ngayan ke moa diri empu semanjai program on-line nya.

Taja baka nya, kempen ti dipejalai ke Ajis nya endang nadai ngayan ke penyinu lalu kempen nya mega endang dipelanja penoh. Beberapa bulan ti udah bala orang ti nyengok-nyengok laman-laman web berasai geli ati meda sekeda ari laman ti digaga sida nya nyau ka sebaka, lalu ke semoa laman nya endang nyagu ke Taib enggau BN.

Bala orang ti landik ba pasal laman web udah tetemu ke pengawa betunda ke laman web, ambi ke chunto, ngena arus ti sebaka dikena ngelalai ke ari ni asal – semua nya berupai bendar baru ditumboh ke, baka SarawakReport(s).org, lalu iya ke bukai nya berupai tegap tang digaga nitih ke gaya BN. Bala orang ti merati ke Abdul Aziz diatu nyau tetemu ke lebih-kurang 30 iti laman web ke baka nya lalu penyampau nya betambah tiap hari!

Semoa laman web ti digaga Ajis nya ngembuan dua gaya isi. Terubah, ngayan ke propaganda chara Soviet pasal Taib lalu ngelaku ke pasal ‘pemansang’ di Sarawak, lalu kedua, nyerang bala pengarang enggau pengeluar berita Sarawak Report. Taja pan baka nya, semoa laman web ti digaga BN nya jampat ngasoh bala temuai tau ke pemacha sida leju lalu enda ulih narit ati. Enti laman web SarawakReports.org digiga ngena Google, kita deka jampat agi bulih laman web ti tebilang, www.sarawakreport.org!

Tang, bisi chara serang ti diator enggau manah kelimpah ari perang-cyber BN, ti diatu nyau mupok-mupok tebantai. Sari tu tadi siti ari laman-laman web Aziz (iya nya Sarawak Bersatu) ngepun ke jako komen ti baka ke enda salah:

“Enti laman web tu belaboh betanya ke pengawa-pengawa Clare Rewcastle Brown enggau laman SarawakReport iya, kitai asai ke siti sada nyawa ti didinga datai ari puak kampong puang. Diatu tiap kali kita muka internet kita deka meda maioh orang betanya ke runding enggau penemu iya”!

Endang sigi iya baka nya! Lalu pengarang iya, Abdul Aziz endang nemu nama kebuah maioh laman baka enggi iya nya ditumboh ke!

Tang, enti iya kala besekula ba sekula ti endor matih pengarang berita, iya tentu deka diajar, enggau mansut ke komen-komen ti munyi nya tau dikumbai orang pengawa ti ngelusu, enti dibanding ke enggau cherita asal ti dikeluar ke bepelasar ke pansik enggau sidi’ ti silik. Bala orang ti ngena internet udah mupok-mupok betanya nama kebuah sida deka masau hari macha penemu-penemu ti berat sepiak baka enggi Ajiz, tang Sarawak Report nya sebengkah laman web ti dilawa 50 ribu temuai (hits) lalu penyampau temuai betambah ari sari ke sari, bebanding enggau siti ari laman web Aziz ti semina udah dilawa 8 penemuai.

  • Ata Nyuga.

    Rakyat Sarawak ia ke diatu patut berasai gaga ati laban udah bisi sarawakreport.org nggau radiofreesarawak.org. Nggau tu rakyat Sarawak ulih nemu utai ia ke bendar nyadi di negeri Sarawak tu. Enti ninga ari ari TV1, TV2, TV3 nggau TV4, semua TV-TV tu semina ngeluar ke utai ia ke manah pasal BN. Tang sida ia nadai kala ka mansut ke penyai sida BN tu. Laban sida ia mansut utai ti berat sepia, ianya madah ke BN tu manah, tang nadai madah ke penyai BN, nyadi rakyat enda nemu. Aku ngarap ke semua rakyat Sarawak ninga ke radiofreesarawak.org nggau maca berita ari sarawakreport.org awa ke kita bulih berita ti bendar. Siapa-siapa pun tau megai perintah. Ukai semina BN aja ia ke nemu megai perintah. Parti Pembangkang pun tau mega megai perintah asal rakyat Sarawak meri peluang ngagai parti pembangkang.

23 Mar 2011

RUNDING SNAP ENGGAU BN!

This post is also available in: English, Malay

RUNDING SNAP ENGGAU BN!

Sarawak Report bisi udah nerima sebengkah penerang ari Barisan Nasional, ti ngayan ke randau rahsia sida enggau parti SNAP, dikena sida numbang ke raban penyakal lalu ngenan ke genggam kuasa BN di menoa Sarawak udah lepas pengawa bipilih besai tu ila.

Kami tetemu ke penerang, ti endor BN perintah besai benong muboh ke duit ti maioh soh SNAP ti diidup ke baru (ti endang ditaga ke nyadi sebengkah kaban parti penyakal), udah diputus ke leboh maia penemuai Menteri Besai Najib Razak enggau Sapit Menteri Besai Muhyiddin Yassin ba ujong minggu tu tadi. Jako randau rahsia tu diator entara Ketua Penerangan UMNO, Datuk Ahmad Maslan, ti nyempulang penemuai Menteri Besai enggau sapit iya nya, lalu betemu enggau semoa pugu-kalu tuai-tuai SNAP di Kuching.

Penerang ari dalam BN, ti nyebut randau rahsia nya “rahsia ti kelalu dipelalai ke”, endang siko orang ti semak amat enggau bala pemutus-penemu dalam UMNO. Kenu ko pemeri penerang soh kami nya, UMNO-BN endang ngasoh SNAP nyadi ke pemechah undi, lalu SNAP ditaga ke dikena nentu ke bisi tiga sukut rebut kerusi ba tiap iti sitak. BN Perintah Besai endang deka ningkil ke Taib laban udah iya ti ditemu tentu deka alah nitih ke pansik BN ngelama tu.

Ator serang

Diatu Sarawak Report mutus ke runding sida ngayan ke ngagai orang maioh pasal tipu tu dikena sida nipu bala pengundi. Dalam jaku randau rahsia (belalai) nya, BN endang ngembuan julok ati meli SNAP dikena BN ngemadu ke penanggol ti endang nuntong sida ba ikas Perintah Besai ti seruran napi jako bantah ari raban parti penyakal. Sida BN deka meli SNAP awak ke bala pengundi majak saru ngumbai diri endang ngundi parti penyakal!

Sekumbang SNAP ti seruran madah ke diri endang ngelaban Taib/parti-parti BN, sida endang majak minta diri bediri ba semoa sitak ti dikarap ke ulih meri sida pemenang. Ngena peluang SNAP ti nyau charut lalu enda sepenemu enggau parti penyakal ti bukai, nya ti lalu dikena UMNO-BN nyarut ke runding bala pengundi.

Bala pengatur pekara tu bisi bendar pengarap, enti parti penyakal bepechah, dia SNAP deka nulong BN menang, tang sida mega arap agi, enggau tulong mata duit ti maioh ari Semenanjung Malaysia, sida ulih ngangkat ke SNAP nyadi sebengkah parti penyakal ti pemadu kering ba semoa sitak menoa pesisir Sarawak ti endor sukong ke BN udah nyau kusut. Laban dipeda sida semina SNAP aja parti penyakal ti endang ari Sarawak, enda baka parti bukai ti betumboh lalu bepalan sereta bepampang di Semenanjung Malaysia. Sereta SNAP udah ulih numbang ke BN Sarawak udah tembu maia ngundi tu ila, dia SNAP lalu ‘bekalih raong’ lalu nyadi kaban BN.

Leboh pemeri penerang kami ditanya, baka ni sebengkah parti ti endang tulin-tulin ari menoa Sarawak tau baka geraji bemata dua, pemeri penerang kami nya madah ke tuju pejalai parti SNAP ke suba, enda sebaka enggau tuju pejalai ke diatu. Taib udah mechah ke parti nya ngena chara ‘suap’. SNAP nya sebengkah parti ti dulu bendar ditumboh ke menoa Sarawak, tang leboh maia Taib bekuasa, iya mechah ke parti nya. Diatu SNAP disabong charut enggau Pakatan Rakyat dikena ningkil ke Taib, lalu berebak enggau nya dikena BN-UMNO terus bekuasa di Sarawak. Munyi ko pemeri penerang kami nya ti ngenang pasal Taib:

“SNAP diatu nyau nyadi ke simpanan tetap perintah UMNO/BN. Perintah Besai deka nguna SNAP nyadi ke pintu masok sida tama Sarawak”

Sebagi ari gambar ti besai

Penerang tu meri sekeda tanda ti ngayan ke SNAP ukai bakih ti lurus ati dalam raban PR.

SNAP ti baru udah direjista baru taun nyin kemari, udah bekau iya ti digantung dalam taun 2002, nyau majak ngeruga kaul dalam PR, bepinta ke ikas penudok ti tinggi agi ari parti PR ke bukai, taja kaban dalam SNAP ditemu nadai betuboh maioh. Ba taun nyin kemari SNAP udah diagih ke 3 iko pengari, udah nya sida minta 10, udah nya 28 lalu diatu 40 iti kerusi, ti tau bendar ngujong ke pugu parti penyakal, PKR Baru Bian, nyadi mimit.

Enggau bala kaban dalam SNAP ti mimit ba pun taun tu tadi, SNAP ditemu regap-regap sebelah menoa tu begiga ke kaban baru, lalu bisi mega sida meri pengawa enggau penudok soh sapa-sapa ti deka enggau sida awak ke dikena ngenegap ke parti nya nyadi sebengkah parti ti kering lalu tau dikarap ke. Upah ti diberi sida nya enda ditemu penatai, ti kenu ko sida nya endang duit parti nya empu.

Kami mega dipadah ke, nyau ka semoa pengari dalam PKR udah ditanya lalu dipinta merejok ngagai perau sida ba beberapa bulan ke udah, enggau upah ti manggai RM500,000, taja pan nadai siko kaban penyakal udah nerima peminta sida SNAP nya.

Ba sebengkah penerang ujong minggu dulu ti madah ke Granda Aing ti empai lama tu, udah enda lantang ati laban enda tulih ke penudok nyadi tuai dalam PKR, udah ‘bekalih raong’ ngagai SNAP, tang udah nya iya pan enda dikeiboh ke. Baru Bian mega kala diasoh sida SNAP matak diri di Ba’ Kelalan laban dikena meri awak ke pengari BN bediri dia.

Dikena SNAP nya ngayan ke sida endang udah bisi maioh pengari, sida ngerintai ke nama 16 iko pengari. Nyerumba nya sida kala mega minta siko ari raban pengarang berita Sarawak Report masok nyadi kaban sida (tang kaban kami nya nulak peminta sida).

Jako ambu Stanley Jugol ti madah ke SNAP endang enggau BN


Sarawak Report mega bisi dipadah ke Secretary General ke parti SNAP udah ngati ke diri meri penerang pasal kaul SNAP enggau BN soh sebuah suratkabar ba minggu nyin kemari.

Pengarang berita ari suratkabar nya udah nanya Stanley Jugol nama kebuah SNAP balat amat ngutok sereta bejai PKR tang ukai BN ti endang munsoh SNAP ‘ti bendar’. Dia Stanley Jugol lalu nyaut, laban SNAP ‘beguna ke BN meri pemansang ke menoa pesisir, lalu pengawa ngutok BN nya deka ngemuntan ke pemansang ba endor-endor nya!’

Penerang ti nyerupa jako BN nya ngasoh pengarang berita nya tekenyit bendar ati, lalu nanya enti SNAP endang bisi ati deka masok nyadi kaban BN enti sida menang ba pengawa bepilih besai tu ila. Enggau tanya nya, Stanley Jugol nyaut, “ya”. Nitih ke pemeri penerang kami, pengarang berita nya ngaga simpul penemu ti madah ke SNAP endang dipelanja BN Perintah Besai dikena numbang ke PKR. Berebak enggau nya mega, President SNAP empu, Edwin Dundang udah ngasoh sekeda orang alit ati ke pengeraja iya baka ke laboh ari langit, ti endor iya bisi ditemu meli sebuah kereta pick-up Toyata Hilux, lalu iya mega bisi didinga orang besemaia deka nyedia ke agih belanja RM300,000 ngagai pengari SNAP ba tiap iti kerusi ba sitak ti diperebut ke tu ila.

Beberapa bulan tu udah SNAP bisi udah didinga bulih sukong enggau mata duit ari siko-dua orang dagang ti enda ditemu nama. Datai ke sari tu, peragam bala orang endang bisi siko orang dagang bekaul enggau pengawa tu, tang diatu terang bendar penatai duit bantu ke SNAP nya endang datai ari munsoh PR (di Semenanjung Malaysia) lumor satu, iya nya BN, lalu nya meh chara UMNO-BN niri ke SNAP nyadi ke parti penyakal ti palsu!

Aum rahsia dikena ngelaban Taib


Perambu BN Perintah Besai mega digaga dikena ningkil ke Taib, ti endang ditemu perintah besai udah bulih pengeraja ti enda patut-patut sekumbang Taib bekuasa dalam pengelama 30 taun di menoa Sarawak. Perintah Besai nangi enggai ke BN alah ketegal pengusut pengerindu bala pengundi ke Taib ti mengkang enggai badu-badu bediri minta pilih, lalu perambu BN nya ukai semina deka ngulih ke kerusi nengah SNAP, tang sida BN mega merambu ngasoh semoa pengari SNAP nya ila ngalih tama ngagai BN.

Perambu nya dikena niri ke kaul BN ti baru lalu pia mega niri ke Tuai BN ti baru, iya ti ulih ngari ke BN Semenanjung, baka ti udah dikereja Taib dulu suba. Sekeda ari bala tuai-tuai ti dipelaba ke “ngalih raong” iya nya William Mawan, ti dikarap ke nyadi ke tuai raban Dayak. Tang, orang ti dikedeka ke BN Semenanjung iya nya Abang Johari, nyadi ke Kepala Menteri ti baru nukar Taib, dalam BN Sarawak.

Pemeri penerang kami mega bisi nyebut orang ti bisi enggau ngator perambu tu iya nya siko Iban ti endang tebilang tampak rita ti diau di KL, Leo Moggie.

Leo Moggie endang ditemu bisi kaul ti manah enggau sekeda tuai-tuai Iban baka Daniel Tajem. Tajem ti kala nyadi kaban PKR lalu besetuju ke Baru Bian nyadi tuai Dayak di Sarawak. Tang, munyi ko pemeri penerang kami, Leo Moggie diatu “berunding” enggau Daniel Tajem ti madah ke pengirau ati iya ba PKR di Semenanjung Malaysia din nyau “enda ulih ngempong bala kaban sida empu, lalu parti PKR nyau majak lemi”.

Sebengkah parti ti ngembuan cherita lama ti ngasoh ati sinu


Nitih ke pansik kami ti ngayan ke pengawa ‘numbok ari belakang’ dikena ngulih ke duit nya sebengkah ari gaya pendiau enggau ulah bala kaban politik dalam SNAP beberapa taun tu ke udah. Parti SNAP udah dipechah ke Taib. Bisi mega didinga cherita ti ngenang pasal sekeda kaban SNAP (sekumbang sida ti nyadi penyakal) udah ‘ngalih raong’ lalu masok BN, ketegal ti udah enda mujor maia kempen ngelaban BN. Diatu bala ‘raong’ nya ditengkila ke benong ngayan ke pengeraja ti enda ditemu ari ni penatai udah bekau sida ti ‘bekalih raong’ nya.

Empai lama dulu ari tu SNAP udah ngayan ke rintai nama 16 iko pengari ti deka didiri ke sida, taja pan sida endang empai besetuju enggau tiga bengkah parti Pakatan Rakyat maia ti ngator penudok-penudok ti deka dipelaban ke nya.

Bala pengari bisi ditemu udah diberi RM10,000 ke chengkeram sida, lalu sida nya dipadah ke deka bulih maioh agi duit bantu ba maia kempen tu ila. Bala orang ti merati ke pengawa politik madah ke semoa pengari sida SNAP nya endang ukai orang ti dalam penemu dalam politik, lalu nyimpul ke penemu ti madah ke bala pengari nya semina ke kaki-jari SNAP ba maia ngundi aja, dikena SNAP ngulih ke endor dalam politik menoa tu.

Enggau semoa penerang ti diterima Sarawak Report, kami minta SNAP nyaut sekeda tanya kami sekali ke sida endang deka nyadi sebagi ari kaban BN udah tembu maia bepilih tu ila. Enti enda, baka ni ko chara sida deka bebula ke sida endang ngeruga kaul dalam PR maia ti berunding ke agih penudok, ke terubah nya sida didinga ngati ke diri ngayan ke rintai nama pengari 16 iko sida empu lalu ke dua sida madah ke diri deka ngayan ke rintai nama 40 iko agi pengari sida ari semoa 71 iti penudok, ti enggau nya dikena sida nentu ke sida belaban 3 segi ba semoa sitak menoa pesisir?

Ngena peluang tu Sarawak Report minta SNAP diatu patut ngayan ke sapa parti nya ti bendar. Kami minta SNAP badu agi nipu pengundi Sarawak lalu bemain politik duit ti enda patut dikereja ba pengawa bepilih besai ti beresi sereta enda berat sepiak tu.

  • http://www.ayamayaschapan.blog aya mayas chapan

    Anang maiuh runding…… SNAP UNTUK BORNEO. BORNEO SEMINA UNGKUPKA ORANG BORNEO LALU ANANG MAI ORANG SEMENANJUNG MERINTAH BORNEO. kITA PANDAI AGI MERINTAH DIRI EMPU. ANANG MAGI PEGERAJA MENUA DIRI NGAGAI ORANG BUKAI. BORNEO SEMINA NGAGAI ORANG BORNEO.ARAM KITA SAMA DANI NGAGKATKAN BORNEO BAKA TIMUR LESTE. HIDUP BORNEO(SARAWAK, SABAH ENGGAU KALIMANTAN TETAP BERSATU NGELABAN PENJAJAH SEMANANJUNG)

  • Teperasa Agoo

    Enti SNAP merejok ngagai BN sepengudah bepilih tu ila, retinya undi ke diberi ngagai SNAP nya sama baka undi ti diberi ngagai BN. Akun enggai ngundi BN, baik ke nya BN-Taib tauka BN-Najib. Taib tu pengerampas enggau pencuri reta Sarawaak. Najib tu deka mai UMNO masuk Swk ngena jalai bekunsi enggau SNAP. Bakanya meh UMNO numbang ke Tun Mustapa ari Sabah suba ke ditukar Haris Salleh.

  • Anti-Kleptocrats

    Kita empai nemu berepa teguh sintak panjuk UMNO baka di Sabah. Undi meh SNAP enti kita deka parai selama iya diulun UMNO.

    Tang anang nesal ila. Anak uchu ichit wit kita mesti nyumpah kita ila enti salah pilih.

  • wss

    NUJU SNAP…….

    Enda ibuh nuan bejako ..bejai ke parti ari semenanjung……ya lapa kita empu ti udah lama nya sampai diatu pen bedau ulih megai sarawak? LAPA…LAPA…????

    Patut kita ke lama agi nya ari kelia ulih niri negi ke bansa …

    Tang diatu kami nemu …kita SNAp UDAH KENA BELI BN…..

    UNDI MEH PKR…..

  • wss

    “SNAP siti parti ke bepun ari komuniti Dayak ba Sarawak lalu ngelamatu ke udah, iya nyadi parti politik ke ngempuru komuniti Dayak,” ku iya.

    AKU NADAI KALA NEMU NI MAYA, DINI, SAPA,,?????? ti madah ke diri nyadi parti politik ke ngempuru ke Dayak….!!

    Uji aku nanya…NI NAKA PENYERAKUP BANSA DAYAK UDAH DIBAI KITA???

    Peda aku bansa Dayak semakin pecah….

  • Nabau Balleh

    anang maioh macam bala kita PKR, parti SNAP nya parti ke ngerusak pengawa kita ke ka ngelaban parti BN, lengka ke aja SNAP nya. SNAP nya semina jako aja ke besai, nama utai oleh SNAP nya. bula ke maioh. maioh kuah ari isi, baka letup betung ke di tunu, nadai leka.Enti SNAP tu amat kuat udah maioh penunduk MP di pegai sida ia sarawak dia.

    nya aja.

  • http://- bukit tunggal

    enti baka tu, sidak SNAP tu sebaka enggau taip, makai suap, enti sidak menang ila abis menua kitai sarawak tu di jual sidak, arap pagar, pagar makai padi.

  • http://www.ayamayaschapan.blog aya mayas chapan

    NUJU TUAI SNAP… Lekaka penemu kita ti deka sepemakai enggau UMNO. ENTI AMAT PENEMU KITA BAKANYA, RETINYA KITA UKAI SEMINA BULAKA BANSA DIRI TANG KA NGULAM BANSA DIRI EMPU NYAU LEBIH ARI TAI(tAIB). Uji titihka runding sida aki kitai EMPARI, MENGGA, RENTAP ETB. SIDA NADAI BEGUNAKA TULUNG ORANG BUKAI LABAN BA RUNDING SIDA, ENTI NGELABAN, LABAN SAMPAI MATI. ANANG BAJU AJA MNANAH TANG TUBUH KURAP.

    NUJU MENJADI DAYAK…. enti SNAP amat besemekih enggau UMNO, aram meh kita sama MUAI SNAP ngagai lembak pemati laban kita enggai dibai SNAP nyadi ulun UMNO. TANG ENTI SNAP AMAT DEKA NIRIKA BANSA DIRI SERTA ENDA BESEMEKIH ENGGAN UMNO KITA ENDANG TETAP BEDIRI DI BELAKANG SNAP. NGESAL DUDI NADAI RETI…ANANG NYADI ULUN BA MENUA DIRI EMPU.

  • http://yahoo anaksarawak

    Badu meh kita bala Tuai parti SNAP bejualka bansa kitai Iban. Kitai ga udah puas dijual TAIB berengkah ari maia parti SNAP dipegai Dtk Jame Wong kelia.Kami pengundi Iban ba sarawak udah jera. Enti kita enda jera, kita aja meh ke ulun TAIB/UMNO.Sidanya ga ulih melika kita kereta, rumah & indu sempit.Sida Jabu, Masing & Mawan enda begunaka kita. Enti beguna, nyau udah dibai sida ga kita.Siang malam Jabu ke ngutuk laly bejai kita. Enda patut kita enda ninga. Kita aja meh lalu anang mai kami pengundi Iban.Kapa enda kami bumai, nanam lada, sawit, kerja getah dikena ngulih ke duit ari ke bejualka bansa enggau menua.

    Kemaia meh sida Jugol meli injin duit?Ari parti ti merinsa, sekejap lalu bisi duit beratus ribu/bejuta-juta.Nyamai meh sida enda ibuh gawa baka kami rayat Sarawak.

    Kita tuai SNAP enda lurus ati ka nyadi penyakal ti deka mnerebahkan perintah(regime) Taib.Andal serta gaga amat ati kami ninga kita ari SNAP ka begulai enggau PR bukai ngelaban taib/bn ngena jalai undi.Peluang kitai besar amat enti atur keterubah dikena.Enda mukai-mukai kita lalu madahka diri ka bediri ba 16 iti penunduk. Seminggu dahnya madak ka bediri ba 40 iti sitak. Enti bakanya runding kita serta penemu kita, badu agi kita megai tampuk parti SNAP.Ukai bakanya penemu sida tuai SNAP ke dulu suba.Maioh nembiak rebak baru ti tau nganti kita. Ukainya kita aja ti bisi pemandai. Kita nya SAWA magang. Deka ngenyangka perut diri aja. Udah badu bepilih ila, kita lalu nadai dipeda leka mata agi. Nyin kita bejalai nuju menua luar ngelantangka lalu begiga ke indu, nyin kita betepanka kereta baru & lalu nyin kita benung besainka pom dikena meli rumah besai.

    Taib. Jabu, Masing, Mawan, Najib & yassin rakah-rakah meda kita ke nyarutka diri begulai enggau PR bukai.Udah dirintis sida tanah kitai di menua sarawak ti ka diempu sida.Udah ba ati sida berapa juta duit perintah deka dipajuh sida.

    GET OUT YOU IDDIOTS FROM SNAP. we don't need leaders like you. MERI MALU BANSA IBAN aja.

  • DOM

    UMUR AKU 47 TAUN.NYENTUK KE 27/3/2011 RUMAH PANJAI KAMI DI SIMUNJAN NADAI AI PAIP,API,JALAI ALUN.KLINIK,BALAI GEMPURU ENGGAU

    PEMANSANG BUKAI.TIAP KALI BEPILIH BN MADAH DEKA MERI PEMANSANG.

    ORANG KETUAI MEDA BN BAKA PETARA.MESTI NYUNTING BN NGAMBI KE BULIH PEMANSANG.KASIH AMAI MAIOH UDAH MATI LALU NADAI SEMPAT NERIMA BUAH MERDEKA.

    KITA KE SERAMBAU ENGGAU AKU,BEDAU BISI NERIMA BUAH MERDEKA,

    MAIOH ARI BALA KITA LARI KE MENOA BUKAI NGIDUP KE DIRI.BN NGERAMPAS TANAH KITA DI MENOA. kATI KITA KA NGANTI BUAH MERDEKA?

  • http://google Bujang Berani Kempan

    hi…. Parti SNAP besembahyang meh bala kita semua,patutlah parti kita tu dibuai olih aki uban dulu suba laban dikumbai ia parti APAI SALOI "SNAP-SERURAN NADAI AMPIT PEMANSANG" baka kerbau disabah din selalu ditarit idong ia ketegal ke enda pintar bejalaika pengawa perintah, meda bisi duit mayoh lalu deka bebini mayoh,semina nemu makai suap/nipu bansa diriempu aja. Bejalaika pengawa enda nemu nadai guna besekula tinggi suba enda dikena enggau betul.Puji Tuhan…Ngajihka parti SNAP tu enda disunting rakyat dimenoa sarawak Leboh maya ari bepilih tu ila, sunting meh parti pembankang ia ke olih mai penyenang enggau pengelantng ke jemah ila..Enti sida SNAP deka main talam dua mua anang ngerampit bansa kitai dayak ke enda nemu utai, kasihka bala sida ia,lakka sida ia ngundi pembangkang.

  • bujang berani.(nanga

    BN tetap BN …SNAP tetap SNAP….dala suratkhabar balat bendar sida BN bejako ka pasal SNAP nya parti pembangkang…..danya cda BN nemu diri ko alah lalu deka diambi sida SNAP mask BN…ang seberang wai………………..seagi -agi kita BN megai perintah seagi nya meh kami rakyat miskin..pemangsang diempu kita magang lkelibih agi ba pasal tanah ,temuda rimba ..di ambi kita magang serta kami tanah di kita enggau rega ke murah ….sorry BN…diatu tiada maaf bagimu…..KAMI RAKYAT TETAP NYOKONG SNAP….maju menua betong ila laban SNAP…

  • ilang temuai

    Enti ktai sma udh nmu,SNAP tu bkatu,bah..lapa ktai nda ulih ngubah ya mya bepeilih deka dtai 2 ila deh.Ang aja bri org RM10 / RM20 alu nyunting ga ila..lbn myuh org drumah pnjai x nmu reti utai ke bng nyadi dia2,lapa ktai ke rebak bru x mdh ke sida..

    lbn myuh didinga ku ktai ke dirumah pnjai mdh bka2 'sapa ke bisi meri duit,nya meh undi' ko sekeda..tegal RM5 alu ngundi org nya..

    amt salah..uji brunding bkni asai kedia2 ke dipegai YB ke megai mya2..nti nyamai asai x slah trus ngundi,enti enda undi utai bukai..bknya mg 5 taun ti deka dtai.

  • Bujang Sadok

    SNAP(Semadi Nadai Agi Pati)

    Sapa ke ngundi SNAP tauka nyukung parti tu maya bepilih tu segi tau digelar IBAN/DAYAK SUNDAL. Laban ka bejualka bansa diri..rengik-rengik gamal sida Stanly Jugol & Paul Kadang udah nyual diri ngagai be end.

  • http://google Bujang Berani Kempan

    PR/PKR anang ngasoh SNAP bediri ba betong,parti komponan PR kebukai tau asoh belaban enggau aki Jabu anang ngarapka SNAP ti semina bepura-pura aja ti deka ngelaban Jabu, kada enda kucik kambot tanchot udah dirasok enggau mata agong mata beliong lalu udahnya tang enda mukai-mukai lalu tak enggai betanding ngelaban jabu lalu madah deka narit diri leboh maya nganjong/ngantong nama calon ila.Nya ia bolih, Udah lenyap meh 21juta rupiah diempu calon SNAP ke betanding nya ila lalu ngejong ia deka nyadi bunsu raja katak merejok ngagai parti Barang Naik(BN)tauka(BN)parti Balat Nipu.SNAP-SERURAN NADAI AMPIT PEMANGSANG diberi ari parti Barang Naik(BN) pengelama dlm kandang 30 taun ke udah.

  • http://engkaras.blogspot.com Gaharu Agrotech Nurs

    nadai guna gak kitai ngundi SNAP enti sida udah dbeli ulih BN. sama baka ngundi BN gak. Menoa iban ulih berkalih enti maya election, bukti ia, Wong Judat d meluan bebas d Meluan, Rayong d Engkelili n d Ketibas. tapi bila udah menang lalu nyadi BN.. so nama reti keto? nadai guna bagi aku. Iban ka berubah tapi org ke menang nyak enda beramat-amat ka mai kitai iban berubah.. pikir kitai meh masa depan Iban..

  • Ata Nyuga.

    Aku ngarap ke semua rakyat Sarawak ulih beserakup lebuh maya ngundi ila. Kita nukar perintah ia ke merintah ke diatu. Aku ngarap ke parti SNAP ulih begulai nggau PKR nggau DAP awak ke rakyat senang ngundi pembangkang. Laban perintah ke diatu semina ngaya ke sida ia empu aja.

  • arfhartoe

    maaf jika menyelinap masuk sini tanpa di undang..

    saya berharap agar rakyat sarawak berani untuk berubah dan memilih yang memperjuangkan rakyat…pilih kerajaan untuk rakyat yang memperjuangkan rakyat…

    di harap rakyat sarawak mempertahankan hak mereka..

    tanah kita, milik kita, hak kita, berubahlah kita, demi masa depan generasi kita..kami di semenanjung ingit sangat melihat rakyat sarawak bergabung membina kerajaan untuk rakyat…kita tolak BN…

    maaf skali lagi…

  • bujang lembau

    lalu dekak mati bedau ngasai nyamai diau di rumah panjai . nadai api enggau ai 30 tahun taib megai nadai pemansang

  • http://yahoo.com.my kumang iban

    DIATU KITAI KA PECAYA KA SNAP ATAU ENDA?BAKA KAMI KE NGEMBUAN TINTING MELANJAN TUNGA KE BUKUT TI MASUK JALAI MUKAH, ENDANG KEJEMAN ARI KELIA ENDANG NADAI PAIP TAMBAH MEGA NADAI SEMAK UJAN. TI MAYA KEMARAU MIKIR KEDIRI EMPU MEH KITA BAKANI PENGIDUP KAMI NGEMBUAN DUNYA NYAK. SETIAP KALI BEPILIH NADAI ENDA JAKU BALA PERINTAH MADAH DEKA NGEMANSANGKA MENUA KAMI NYAK. SEMINA TONG AI AJA PERUJIK KE UDAH DIKEAMAT KE SIDA EA. SETIAP TAUN KAMI NYUKUNG BN LABAN DEKA NGUJI KELUAR ARI PENUSAH KE NUNTUNG MENUA KMI NYAK,TANG AGI GA BANSA NYAK. NYENTUK KE SARI TU MENUA KAMI AGI BANSA NYAK. ENTI NADAI LADANG, KADA ENDA JALAI MEGA NADAI BA MENUA NYAK. ENTI NGENANG KARAN, ENGKA RENGAT KAMI TU BEDAU MEH AGI BISI NYEPI ASAI KARAN BA MENUA NYAK. NYAK MEH KO URANG, JANJI BN AJA….MAYA KA BEPILIH, NINGA JAKU ARI CDA BN ASAI KE DALAM SYURGA. ABIS BEPILIH MENUA KE ENDUR NABUR JANJI DITINGGAL BKA MEDA TEMPAT PELUPUSAN SAMPAH!!!!!! SEKURANG-KURANGNYA BERI MEH PERUJIK NGAGA LOJI AI LABAN MENUA NYAK NGEMBUAN LEBIH ARI 10 BUAH RUMAH PANJAI.

  • danny

    10 thn kitai sarawak tk dudi pemansang ari semenanjung….tegal nama?tegal undi magang.kitai tk deposit tetep munyi ko pm,nadai pemansang ngundi bn meh…tegal nama?tegal kitai merinsa..tiap kali pr diberi 2,3ratus dh cukup kena bansa kitai mangkah bn.betul nda?seagi kitai iban nda berubah..seaginyak meh kitai nyadi bansa paling mundur

22 Mar 2011

KAMI NGELUAR KE PENERANG SERETA KAR PASAL TANAH RAMPAS!

This post is also available in: English, Malay

KAMI NGELUAR KE PENERANG SERETA KAR PASAL TANAH RAMPAS!

Sarawak Report udah mutus ke penemu sida ngeluar ke pengkalan data ti penoh pasal pengawa betukar nama pala tanah ba Opis Tanah enggau Survey. Dalam beberapa minggu tu udah kami udah bejalai ke pansik atas data-data ti dipelalai ke, tang tetemu ke lebih semina lebih ari seribu iti plot tanah di menoa pesisir udah diambi perintah menoa, tang kandang menoa ti jauh besai agi udah diserah ke soh bala kaban belayan tau ke bala kroni dagang Taib Mahmud.

Penyalah tu dikumbai kami skandal menoa lalu patut diayan ke enggau silik. Ari nya, kami minta sukong bala pemacha enggau bala ari media-media (suratkabar, TV enggau radio) mansik tau ke meresa rejista tanah ke diri empu lalu nentu ke ni bagi tanah di menoa sida ti udah diambi – lalu diambi sapa. Tu meh maia Taib patut badu belalai lalu ngelulu ke diri sereta nyebut “berita nya nadai pengamat”!

Pemesai rampa menoa ti dikeruga nya tau ngasoh kitai tekenyit. Lalu pemaioh pala tanah ti udah diserah ke ba beberapa taunt u udah, baka ti dikira ba Opis Tanah enggau Survey nya bulih 1.5 juta hektar. Maioh agi tanah ti kena ambi nya tanah-tanah NCR, ti udah ngujong ke lebih 200 bengkah penyarut benong dipechara ke dalam court – kes-kes ti endor perintah Taib dialah ke, lalu dikena nentu ke pengawa iya nya endang salah ba mata undang-undang menoa tu. Ba tanah-tanah ti udah kena ambi tu Menoa Sarawak udah bulih semina RM734 juta ari bayar premium diterima ari bala orang ti bidik nerima pala tanah. Banding ke penyampau tu enggau penyampau rega ti diletak menyadi Taib Mahmud, iya nya Onn Mahmud 30,000 ekar (tau ke 12,000 hektar), ti endor iya minta rega baruh mimit ari satu billion ringgit! Penguntong ari rega kayu kampong ti diulih ke ari kandang menoa nya jauh besai agi rega premium tanah ke dibayar soh menoa Sarawak. Kita mega dipinta ngambi bagi dalam projek kar interaktif tu, lalu bala pemacha tau nentu ke ni bagi kandang menoa ti kena keruga rampas tanah ti bisi bekaul enggau kita, tau ke ditemu kita, udah nya lalu ditambah ke kita ke dalam kar menoa Sarawak ti di-anotasi tu.

Anang kita irau, mudah bendar pengawa tu dikereja! Kami udah ngemun ke kita enggau chara ngelai sekeda kandang menoa ti kena keruga baka ti udah kala dipansut ke kami dulu ari tu. Kita semina ngengkah ke titik mirah ba senentang menoa ti ditemu kita nya lalu nulis ke penerang ti bekaul enggau titik mirah nya. Kelai ti udah ditentu ke kita nya deka mantu bala pemacha bukai ngelala kandang menoa ti dikeruga nya.

Kami udah mun ke projek tu, laban penerang ti diayan ke kami ditu endang patut ditemu semoa orang baka ti endang patut ba menoa ti bepegai ba ator perintah bedemokrasi. Dalam kandang 30 taun Taib Mahmud udah nyadi Kepala Menteri ti endor iya salah guna kuasa iya melakang ke pengarap rakyat ti udah milih iya nyadi ke tuai sida, iya ngeruga lalu ngenchuri tanah sida ke guna iya empu! Anang, lalu badu agi ngumbai kami tu nadai bukti tau ke nadai penerang ti amat, peda enggau mata diri empu ba pengkalan data kompeni-kompeni, lalu pansik sapa ti beempu kompeni nya lalu ti udah bulih pala tanah. Suah agi kompeni-kompeni nya dijual enggau lengkas ulih bakih tau ke sida sebilik udah sida bulih pala tanah ari Taib ti udah mujor berunding ke bayar premium ti patut dibayar soh perintah menoa Sarawak. Tu mai reti, duit premium ti patut pulai soh rakyat nyau pulai soh akaun sida Taib enggau bala kroni iya.

Maia pansut dalam penampak


Ba sebarang ator dikena nyukat enggau magi tanah menoa (state land) tau ke tanah-tanah NCR lalu nyerah ngagai jari orang bukai, baka ti dikereja dalam skala ti besai, endang pekara ti dikereja ba penampak, ngambi ke semoa orang meda sereta nemu, lalu nadai bekaul enggau penyalah makai suap, lalu ngambi ke semoa orang nemu ni pematut rega udah disetuju nya ti tau pulai ngagai rakyat. Tang Taib enda ngereja utai nya. Sereta iya nyadi menteri dalam taun 1981 iya lalu beguai-guai numboh ke sebengkah komiti ti dikumbai iya Land Custody and Development Agency (Pelita) lalu nudok ke diri empu nyadi Pengerusi diatu, lalu mega nyadi Menteri Perambu enggau Pemansang Pengeraja Asal. Tu meh pengawa enggau kuasa dikena iya ngemata sereta mutar ke ator-ator atas tanah-tanah di menoa Sarawak

Ari penudok iya ti bekuasa baka nya iya udah ngulih ke tanah-tanah ari bala orang asal lalu nyerah ke tanah-tanah nya soh sapa-sapa ti dikerindu ke iya – iya empu, wakil-wakil iya, bala menyadi iya, bala anak menyadi iya, bala bakih politik iya enggau bala kroni dagang iya ngambi ke bala orang nya ngasi sereta nurut ke peneka tau ke pengamu iya. Enti pengawa ti baka nya dikereja terang-terang, pengawa iya tentu deka puntan. Tang Taib udah nyerah ke pala tanah ti diambi nya enggau chara belalai. Nya kebuah semoa surat-surat perintah ti bekaul enggau betukar ke nama pala tanah dikelai ngena ‘Confidential/CONF’ (jako Iban: ‘Dipelalai ke’) ba semoa Rejistri Tanah, laban Taib Mahmud endang enggai ke orang nemu pemurah rega ti dibayar iya leboh iya nyerah ke tanah-tanah soh sida sebilik tau ke bakih dagang iya.

Data enggau penerang ti dikeluar ke kami ditu ti bekaul enggau tanah-tanah nya; kompeni ti bulih lalu rega ti udah dibayar sida, lalu haribulan ke pala tanah ti betimpoh 60 taun. Penerang tu ulih dibanding ke enggau penenrang pasal sesebengkah kompeni enggau pasaran saham lalu enggau penerang pasal rega jual ti mudah amat ditemu ngena internet diatu. Enggau chara tu semoa raban orang ulih meda enggau terang nama utai ti nyadi atas kandang menoa enggau tanah-tanah asal sida empu.

Datai ke sehari tub ala orang asal endang enda nemu Taib udah nyukat lalu magi/nyirap tanah sida semadi sida nyau meda kompeni kayu kampong enggau kompeni kebun sawit nuntong ba kaki tangga sida, suah nya beberapa taun udah nya. Diatu kami mai orang Sarawak empu ngabas data tau ke penerang lalu nentu ke diri empu kandang menoa diri ti udah dikeruga sida Taib sebilik tau ke bala kroni iya.

Pengawa ngenchuri enggau sekeda orang ti bisi bekaul


Ari beratus-ratus buah kompeni ti udah bulih untong bekeruga ke tanah-tanah di menoa Sarawak, kami udah bisi nemu maioh agi kompeni ke bukai ti diempu, tau ke udah kala diempu sida Taib sebilik, sebedau dijual dikena sida belalai ke diri. Dirintai ke baruh ti nya sekeda ari kompeni ti bekau enggau Taib. Tang enggau sukong ari bala pemacha kami, kami arap ke maioh agi kandang menoa ditemu kitai berebak enggau pengawa bepilih besai Sarawak di deka dipejalai ke tu:

Polar Horizon, Titanium Management, Ukiran Mantap, Umpama Mantap, Radiant Lagoon, Premium Haven, Polar Towers, Polar Red, Log Oak Promotions, Future Atmosphere, Essential Straits, Dataran Aras, Celerity Design, Bella Magic – [ABU BEKIR TAIB – ANAK]

Miracle Harvest, Green Ace, Usaha Jasamaju, Mega Bumimas, World Sign Harvest, Quality Concrete, Emerald Discovery, Kenyalang Resources, Limbang Sinar Mas, Kumpulan Parabena, Miri Properties, Borsamulu Resort, Saradu Plantations – [RAZIAH MAHMUD/GENEID – MENYADI]

Ikrar Bumi – [ELIA ABAS/GENEID – ANAK MENYADI]

Achi Jaya Plantations – [ONN MAHMUD – MENYADI]

Eastern Eden, Poh Zhen, Palmlyn, Rajah Mutiara, Lanco Plantations, Hariyama, Golden Star-Ace, Senandang Masyhur [ARIP MAHMUD – MENYADI ENGGAU TAIB EMPU!]

Delta Padi – [TAIB EMPU]

Sarawak Plantations, Kub Sepadu, Multi Maximum, Mega Bumimas, Europalm – [HAMID SEPAWI – SEKALI PETUNGGAL/PROKSI/WAKIL]

Masretus Oil Palm Plantation – [IBRAHIM MAHMUD – MENYADI]

Poliga Sdn Bhd [AHMAD BIN SU'UT – MANANG ULA TAIB]

Utahol, Herba Aromatics sdn bhd, Durafarm Sdn Bhd – [Alfred Jabu – Sapit Kepala Menteri]

  • http://www.sarawakreport.com.my Bantah

    BERITA TERBARU.AUGUST 11,2011

    TEMPAT :DI RUMAH SIANG SUNGAI SEBATU SUAI BATU NIAH.

    REPORT:SEBUAH COMPANY MEMBUKA SEBUAH LADANG DI KAMPUNG IRAN SUAI BERSEBLAHAN KAWASAN IRAN DI SUAI BATU NIAH.COMPANY TERSEBUT HENDAK MERAMPAS TANAH PEMAKAI DARI DATUK NENEK HAK MILIK PENUDUK DI RUMAH SIANG SUNGAI SEBATU.2 3 HARI YANG LEPAS

    PENUDUK MEDAPATI COMPANY TERSEBUT MELANGGAR PERATURAN DAN TIDAK MENGIKUTI PERJANJIAN YANG DI SETUJUI DENGAN PENUDUK KAMNPUNG.MENAGER COMPANY TERSEBUT MNGARAHKAN PEKERJANYA MEMBERSIHKAN TANAH YANG DI MILIKI OLEH PENUDUK TERSEBUT.

    INI BUKAN KALI PERTAMA COMPANY TERSEBUT MELAKUKAN PEKARA TERSEBUT DI MANA DI MENGARAHKAN PEKERJA NYA MENGERJA KAN TANAH TANAH KEPUNYAI PENUDUK DI KAWASAN TERSEBUT.TETAPI TIDAK DI PEDULIKAN OLEH MANAGER DAN COMPANY TERSEBUT.PENUDUK2 DAN KETU KAMPUNG DI KAWASAN TERSEBUT TELAH PUN PERGI KA JEPATAN TANAH DAN UKUR DI MIRI MERBINCANG KAN PEKARA TERSEBUT .TETAPI MASIH LAGI PEKARA YANG TAK DI INGINI BELAKU SEKARANG YANG COMPANY TERSEBUT MASIH MEMBUAT KACAU DAN MELAKUKAN PEMBERSIHAN DI KAWASAN TANAH KEPUNYAAN PENUDUK DI KAWASAN ITU.

    SEHINGGA PEKARA TERSEBUT TELAH DI BERTAHU KEPADA MENTRI YA MENYAGA KAWASAN TERSEBUT.TAPI MASIH SAMA JUGA TIADA PERUBAHAN.

    SEKARANG.

    PENUDUK PENUDUK .

    PERLUKAH KAMI MELAKUKAN KEKASARAN ATAU PEKARA BURUK KEMUNGKIN AKAN BELAKU SEKIRANYA COMPANY TERSEBUT MASIH MERAMPAS TANAH KAMI.KAMI MAHU KERJAAN BETINDAK DENGAN SERTA MERTA UNTUK PEKARA INI.HENDAKLAH TURUN PADANG DAN AMBIL TAHU APA KESUSAHAN RAKYAT SEBELUM PEKARA BURUK BELAKU,JANGAN DUDUK DIAM SAHAJA.PENUDUK AKAN MENGAMUK SEKIRANYA PEKARA INI MASIH DI TERUSKAN

  • sher

    Hi. i want to know the latest land issues in Machan & Kanowit. Heard that most of Tuai Rumah begempuru ba Dewan Suarah Machan to defend the lands and against Taib. Where can I get the issues? My grandparents are from Jagoi, Kanowit and I have very little knowledge about rampasan tanah org adat

22 Mar 2011

DUKUN INDU BEBUOK PiRANG RAZ

This post is also available in: English, Malay

DUKUN INDU BEBUOK PiRANG RAZ

Sekeda ari rahsia-rahsia ti bisi tebantai leboh maia perintah Taib Mahmud nyau mupok-mupok runtuh nya, sebengkah pekara ti nyelai dalam ruang bilik sida nya panggai sida ba siko dukun indu ti diambi menyadi indu iya, Raziah!

Udah pemati bini iya Laila, dia Taib ditemu balat agi bepanggai ba dukun, lalu nitih ke penerang ari dalam ruang bilik sida, Raziah lalu mupok-mupok ngayan ke kuasa iya enggau chara ngator dukun nya bekereja ba ruang bilik Taib.

Raziah ditemu ngeregas ke agi pengawa iya ti deka ngulih ke maioh agi kontrak perintah enggau pala tanah ari perintah menoa Sarawak.

Stella!


Stella, baka ke suah dikangau ke sida Taib sebilik, nya siko indu raban gypsy rakyat Australia ari peturun bansa Lebanon ti benama Kharleen Tashman udah dibai tama ulih Robert Geneid enggau Raziah dalam taun 2002 ngambi ke nyadi dukun ke Raziah!

Udah nya, Raziah enggau pemintar iya ngerembai ke kuasa iya ba atas pengidup menyadi iya Taib, ti endor iya ngambi peluang sekumbang Taib ti agi sinu ke pemati adi lelaki ti dikerindu sereta dikarap ke iya, Arip Mahmud, ti udah mati laban kena serang riman lempuang dalam taun 2005. Munyi ko sida sebilik, Stella udah ‘mindah ke semengat Arip’ awak ke diau dalam tuboh menyadi iya Raziah, lalu udah nya madah ke Raziah nya udah sebaka penau enggau pengelandik Arip ba bejalai ke pengawa!

Udah nya Raziah madah ke Taib iya udah tau nganti penudok niang Arip nyadi ke kaban-dagang enggau penyanding penemu ke Taib (sebengkah tanggungjawab ti udah kala dikereja siko agi menyadi Taib ti benama Onn Mahmud, tang udah nya bisi kala besengki penemu enggau Raziah enggau sida sebilik ke bukai).

Penemu dukun dikena mai pengeraja!


Niang Arip Mahmud, munyi ti udah dipansut ke dalam Sarawak Report dulu ari tu, bisi bulih tanah ti maioh amat ti udah diserah ke Taib kenyau ari taun 2000, maioh agi tanah nya endang tanah NCR. Udah penusah nya, Raziah mujor nganti pengawa niang nya. Ba penerang rasmi, baka ti bisi udah diayan ke dalam Sarawak Report, ngayan ke Raziah bisi bulih sereta ngembuan tanah ti besai amat dalam kandang beberapa taun tu udah – dikira kami sechara kasar, bulih mesai sebuah pulau Singapura. Anak indu enggau laki iya empu mega sama bisi bagi ba beratus-juta ringgit ari penguntong pengawa jual-beli tanah-tanah nya, ti ngujong ke sida tiga menyanak nya lalu dipegedi ke sida Taib sebilik bukai.

Penemu petang


Dulu ari tu kami kala nulis ke repot pasal pengerindu Taib ke pengawa bedukun. Bala pemeri penerang kami madah ke rumah iya di Demak Jaya nyau penuh laban perengka-perengka dikena dukun iya bekereja.

Nitih ke pemeri penerang kami nya, Stella lantang bendar diau lalu bekereja enggau sida Taib sebilik. Laban rumah Raziah ti endor iya diau nya endang berimbai enggau rumah Taib. Ninting tumu pagi Stella deka datai ari rumah Raziah lalu tama ngagai tengah laman rumah Taib ti endor iya ngereja pengawa bedukun iya nya, baka pengawa beburu antu enggau semoa macham ruoh ti jai-jai.

Nitih ke penerang ari siko agi pemeri penerang kami, “pengamu enggau pengerangka Taib nyau ngujong ke iya nundok bendar ngagai semoa macham utai ti disebut Raziah. Diatu Raziah nya ti bekuasa di Sarawak, ukai Taib. Taib udah kena jayau. Raziah nya ti lebih bekuasa atas Taib udah bini iya mati suba!”


Siko ari sida sebilik


Stella suah dipeda begulai enggau sida Taib sebilik leboh maia bisi pengerami, tau ke maia sida sebilik ngusung pengerami kaban sida di endor bukai, ti endor Stella endang amat bisi, baka ti diayan ke dalam sekeda gambar sida sebilik. Leboh pengerami nikah Elia dalam taun 2010, Stella mega bisi dibai sama-sama berami. Kelimpah ari nya, Stella mega bisi dibai ngusung pengerami ngayan ke Fesyen Islam di menoa Monaco, ti dipelanja Taib ngari ke bini Menteri Besai Najib Razak, sebengkah chara Taib ngambi ati Najib kejang pengawa bepilihbesai kunsi nengeri tu.

Upah dukun ti pengambis tinggi ke Kepala Menteri!


Penyampau upah ti diterima Stella tau bendar ngasoh kitai alit ati sekumbang maia iya ti bekereja ke sida Taib Mahmud sebilik. Iya suah nerima upah datai ke RM10,000 dalam dua bulan sekali. Sereta iya udah nerima upah iya, iya lalu pulai ke menoa Sydney. Kami mega diterang ke, indai ti beranak empat nya udah nerima upah datai ke setengah juta ringgit ke pengawa iya nya!

Tang taja baka nya, semoa utai ti manah-manah tentu bisi mega pengujong iya, lalu kami dipadah ke ba maia sida Taib sebilik ngintu pemati bini iya Laila, dia Stella dipeda baka ti bisi masok champur dalam pengawa sida Taib sebilik ti ngujong ke iya lalu bisi ngasoh ati bala anak Taib enda lantang.

Udah bekau penanggol enggau Stella, dia iya lalu diganti enggau siko agi indu bebansa Lebanon, ti lebih agi bekuasa enggau tau bendar narit ati – kami dipadah ke indu nya mega dibai ngagai Taib ulih adi iya, Raziah!

Kaul sida Geneid enggau bini biak Taib


Dukun indu ti disebut kami ditu nya Ragad Waleed al Kurdi, bini biak Kepala Menteri. Maia Taib baru mangku pengawa nyadi menteri menya, Ragad baru ada ke dunya tu, ti diatu tau bendar nyadi ke buah mulut sekeda orang. Tang Sarawak Report bisi udah bulih penerang ari sekeda ari sida sebilik ti madah ke Ragad nya endang anak menyadi Robert Geneid empu!

“Taib udah teempa ke pengaruh Raziah. Iya meh ti bekuasa lebih ari Taib. Iya bekuasa atas semoa kontrak enggau pala tanah rampas ti diserah ke ngagai nya”, ko putap siko ari sida Taib sebilik.

Singkang Raziah ti pintar?


Tuju Raziah bejadi ke Taib  enggau Ragad udah pemati bini Taib suba enda mar disagam kitai. Nitih ke gaya penyuntok runding sida sebilik meda Taib nyau mupok tuai umor nya, lalu sida deka ngerembai ke kuasa sida atas menoa Sarawak, lalu dikena sida nentu ke orang ti patut nganti penudok Taib nya endang patut siko ari sida sebilik. Dulu ari tu, Taib bisi udah ngerintai ke 10 iti nama orang ari sida sebilik ti diasoh iya enggau berebut ke kerusi ba bepilihbesai tu ila, ti ngujong ke Najib udah ngenggai ke rintai tusun nama enggi Taib nya.

Tang Raziah udah berupai bendar ngayan ke pengingin ati iya ti deka ngenegap ke kuasa sida Geneid sebilik di menoa Sarawak. Laki iya, Robert Geneid, ti datai ari ruang bilik orang ti semina bedaja buah di Australia, nadai ngembuan pelasar ba pengawa dagang, lalu anak menyadi iya Ragad ti udah disabong iya jadi enggau Taib tentu deka meri penampak ke peluang iya bekuasa di Sarawak lalu bekuasa atas pengeraja enggau pengawa dagang di Sarawak, sekumbang iya ti udah ngambi Raziah ke bini iya nya.

Enti BN agi diberi peluang menang ba serak tu, tu meh raban orang ti deka dipeda bekuasa lalu ngemata ke menoa Sarawak, ko putap siko ari bala sida Taib nya ba kami. Tang Raziah enggau Robert ditemu nganti peluang ngulih ke kuasa deka meda bini biak menyadi iya nya jauh manah agi ari dukun Kharleen Tashman. Tang enti sema Raziah enggau Robert deka ngubah runding seduai, mudah tau ke enda seduai iya deka muai Ragad ari pengawa dukun nya?

  • http://politikkeluarga. anak iban

    tuk..cara orang udah kelalu ankun kereta enggau dunya sampai bebumuh indah..aku mintak utai tok disebut kitai RADIOFREESARAWAK.ambi kitai seua sedar..

  • Bujang Sadok

    Uji ngagai menua Iban manang tu ngambika ANAK BUAU makai iya mata-mata, kena nguji iya sekali ka tuai tauka enda bulu iya..

  • Davis

    beli amai taib tu…ukai ya nadai agama..agi gak ka pecaya ke bomoh..enti kitai iban baik gik gak…mayuh ke bedau sembahyang..kada kala ngelawa masjid taib tu..semadi ke ka ayan ba tv, baru ya ke masjid…….

  • Davis

    pelaba aku ila enti ya ulih dipenjara, bisi ya ngupah org ke miskin ambi ngaga pembedahan plastik ambika ulih nukar ya….ukai nya mimit reta ya..agi ke ngaga utai bakanya, asai kitai ke meli gula2 ke anak kitai ya ngereja nya….

22 Mar 2011

NAJIB ENGGAU SAPIT IYA DATAI KE SARAWAK DEKA MUAI TAIB ARI PENGAWA IYA – BERITA SILIK!

This post is also available in: English, Malay

NAJIB ENGGAU SAPIT IYA DATAI KE SARAWAK DEKA MUAI TAIB ARI PENGAWA IYA – BERITA SILIK!

Sarawak Report berasai gaga amat ati laban bisi peluang endor bulih penerang ari orang dalam ti bekereja dalam BN di KL, ti madah ke Menteri Besai Najib Razak enggau sapit iya Muhyiddin Yassin sama bela datai ke menoa Sarawak ba ujong minggu tu tadi ukai ketegal deka meri sukong soh Taib, tang ngasoh Taib badu ari pengawa iya.

Tu meh kebuah penemuai ti berebak ti empai kala diator dua iko pemesai menoa Malaysia ngusung menoa Sarawak sebedau tu.

Taib ti udah beumor 74 taun ti udah merintah dalam pengelama 30 taun udah minta tanggoh ngemadu ke diri ari dua iko pemesai menoa nya – enggau jako semaia pengawa bepilih kunsil nengeri deka diator enggau lengkas enti ‘timpuh betukar kuasa’ ulih ditumboh ke ulih orang ti patut nukar iya udah temu. Nitih ke penerang ti diterima kami, Kepala Menteri ti ditemu suah bendar enggai ngelepas ke penudok iya nyentuk ke ngagai maia iya ngasai ke diri selamat ngelalai ke semoa reta pengaya iya, ti lalu ngujong ke bala bakih politik BN iya di KL nyau mupok-mupok enda rindu ke iya agi. Nya meh kebuah, Taib seruran betanggoh-tanggoh ngator pengawa bepilihbesai. Menteri Besai enggau sapit iya nya enggau bala BN ke bukai di KL bisi bendar pengirau ati, enti Taib majak ngenan ke diri nyentok ngagai maia ti penudi, pengawa nya deka balat agi nanggol.

“Diatu, abis iya!” – penerang pasal pengeruntoh ditemu ari raban BN empu!


Penerang ari dalam BN empu ti madah ke kami, penanggol ti besai nuntong Taib iya nya pengerindu bala pengundi ke iya nyau makin kusut-sekusut, baka ti ditemu raban pemansik undi rahsia BN empu. Penerang ti baka tu meh ti mar deka dilalai ke BN.

Taja pan bala menteri BN seruran ngayan ke mua ti manah lalu suah didinga regas maia bejako sida seruran nyebut Taib nya ‘mar amat dialah ke’, tang BN ba ikas perintah besai di KL endang nyadang Taib deka alah lalu mega lenyau penudok iya.

Pemeri penerang kami  nya, ti rapit bendar kaul enggau sekeda tuai-tuai BN, madah ke Opis Pemansik Penerang ke Taib udah ngator pengawa ngundi rahsia dalam beberapa bulan ti udah. Chunto-chunto keretas undi ti digumpol sida ari ambis kurang 2,000 iko pengundi ari genap iti sitak bepilih kunsil nengeri ngayan ke pemutus nya tau bendar ngasoh ati BN irau.

Ba chunto pemutus nya, parti PBB enggi Kepala Menteri empu lenyau ambis kurang 14 ari 30 iti kerusi lalu parti SUPP George Chan deka lenyau 90% ari semoa kerusi sida ke diatu, iya nya sepenyampau 17 ari 19 iti kerusi! Parti SPDP William Mawan enggau parti PRS enggi James Jemut Masing mega deka lenyau siti kerusi tiap parti nya. Nitih ke pemeri penerang kami nya, serak tu BN deka alah besai, enggau pengelenyau 33 ari 70 iti kerusi lalu pemutus ke bendar tentu tau bendar ngasoh ati irau agi.

Penemu-penemu ti ngumbai bala parti penyakal deka mujor ngerampas majority dua ari tida bagi ari BN di Sarawak nyangka enda bentul, enti belalau ke pemutus pengawa ngundi rahsia ti diator BN nya. Lalu BN empu dijangka deka kena pangka tsunami ubah ti tau ngujong ke sida deka balat bendar ngutok Taib Mahmud ti ngelama tu endang dikarap ke sida nyadi “simpanan tetap” sida nya.

Raban SPRM endang nganti maia datai ke pengawa ngundi tu ila tembu!


Sarawak Report pechaya ke pengawa ti ngeluar ke penerang rahsia ari orang dalam BN empu, taja pan jako-jako bantah kami dituju soh perintah BN ngelama tu, nya ti nyadi ke ketegal sekeda tuai-tuai dalam BN di KL nyau majak ngenyauh ke diri.

Meda Taib udah kelalu lama sereta tegap di entara sekeda tuai-tuai dalam BN di sekayu menoa Malaysia tu, tang sida tuai-tuai BN ba ikas Perintah Federal udah ngering diri ngasoh iya badu mangku pengawa iya, laban sida berati ke pengusut ba sukong pengundi iya empu.

Pengeringat enggau pemenchi ti bendar ke atas pengerangka Taib ngelama tu udah nambah ke pengamah BN ti endang udah bisi rekod penyalah makai suap. Diatu kami udah dipadah ke pasal BN di KL udah mupok-mupok ngiga lalu ngambi pulai semoa reta tengkira Taib di menoa tasik ti asil ari enchuri enggau nerumpak ti dikereja iya ngelama tu.

Perambu Taib ti deka pansut diatu nyau udah tejanggal sereta kena sekat, baka ti dipadah ke, ti nyau ngenyai ke agi tekan ba kaul entara perintah Besai enggau perintah Menoa tu. Ator enggau chara-chara Kepala Menteri dikena iya nyurut ke diri nya, ti diperambu iya empu ba taun nyin kemari, iya nya nerima pengawa enggau pangkat nyadi Tuai Pemegai Menoa (Governor), siti chara dikena iya ngulih ke pengebal ari ti kena dawa dalam court. Tang perambu nya udah ditemu Najib lalu enda dikemendar ke Najib. Enggau nya, Taib seruran nanggoh ke pengawa bepilihbesai kunsil nengeri awak ke iya bisi peluang endor iya ngiga chara-chara bukai, tang tanggoh maia nya nyau nambah ke penyai kaul enggau KL baka ti diatu.

Nadai agi jalai ti selamat soh Taib


Taib seruran deka nentu ke orang ti nganti iya nya siko orang ti liat, lalu iya suah ngasoh KL ngemendar ke penganti ti aroh ati iya empu, iya nya Awang Tengah Ali Hassan, Menteri Muda Perancangan dan Pengurusan Sumber. Awang Tengah diatu benong ngaga sebuah rumah ti besai bendar di Kuching, ti dipeda Taib tau nyadi ke tanda pengaya sereta senutok amat enggau gaji menteri ti diterima iya! Tang KL mengkang ngasoh Taib ngambi Abang Zohari Tun Open, ti dipeda sida iya siko menteri ti mentas sereta lurus ngereja pengawa. Taib seruran enda ulih nerima Abang Zohari. Diatu bala temuai ari KL nya nyau udah enda lantang ati ke orang ti dikedeka ke Taib. Taib mega didinga ngerintai ke sepuloh iko sida sekaban ba maia bepilih tu ila. Tang Najib enggau sapit iya endang enggai nitih ke rintai tusun nama pengari ti udah ditusun Taib nya.

“Kaul enggau KL diatu nyau semakin gerah sereta jai”


Nya kebuah, sida ngayan ke moa senyum ba moa kamera. Tang di belakang kamera kitai ulih meragam, penyarut dalam BN udah bisi nyadi, taja pan sida seruran didinga balat bendar bejai ke bala penyakal ti mega benong charut enggau diri sama diri diatu.

Ari gaya bala orang politik bukai ti maioh agi ti diau jenoh laban takut ke Taib, nya mega siti chara Taib nerang ke orang ti patut nganti penudok iya tusah deka digiga sebedau pengawa bepilihbesai tu. Tang BN nemu Taib deka alah, siko orang ti bidik ti dipegedi ke sida lalu mega siko orang ti enda bidik ti ulih kena sida nyadi ke chunto.

Sekumbang seminggu dua ti deka datai tu KL ngiga jalai pansut lalu deka meda Taib ninggal ke dunya politik enggau semoa ‘asil rumpak’ iya. Tang udah sida belembut enggau pengawa ngenchuri enggau ngerumpak ti dikereja Rajah Buk Burak Sarawak ngelama tu, sida KL mega deka napi suntok penemu dikena sida nyerenih ke agi perening bala pengundi ngagai sida!

19 Mar 2011

KINI PENUNGA FAROK MAJEED LALU BERAPA PENGAYA ONN MAHMUD?

This post is also available in: English, Malay

KINI PENUNGA FAROK MAJEED LALU BERAPA PENGAYA ONN MAHMUD?

Dalam pengelama sembilan bulan ke Sarawak Report udah bebendar amat ngiga Farok Majeed, kali ke penudi iya bekereja di luar nengeri Sydney ke menyadi Kepala Menteri, iya nya Onn bin Mahmud. Diatu kami nyau enda tetemu ke Farok udah ke lenyau enda temu penunga sekumbang court kes ti endor iya nyaman Onn Mahmud lebih $15 juta dollar Australia.

Dalam repot kami ti dulu ari tu, kami udah nerang ke baka ni Farok udah nyerah ke semoa macham bil soh Onn dikena iya minta bayar upah iya bekereja nyeruri sebuah penthouse ti pemadu mar di menoa Australia. Court kes nya mega nerang ke enggau silik maioh agi pengawa ngemata ke reta tengkira ti bekaul enggau Onn Mahmud, tang kes nya ngetu setengah jalai laban Farok Majeed lalu enda ulih ngenatai ke diri bechara.

Tuan Akim menoa Australia, Tuan Akim Brereton ari Court Tinggi nengeri New South Wales, udah nanggoh ke pechara kes nya kena ke 1hb Januari 2008 ketegal Farok udah enda ulih ngenatai ke diri bechara maia nya lalu pia mega kena 13hb Disember 2007 dulu ari nya.

Laban ari ketegal Farok enda ulih datai ngagai court nya, dia akim Brereton lalu ngeletak ukom $2,212,615 ke gantirugi ti patut dibayar iya soh Onn ke kereja-kereja iya ti empai bebayar ti udah tembu dikereja kompeni penyeruri rumah Australasia Pacific enggi Farok.

Akim Brereton mega minta Farok mayar semoa ungkos belanja lawyer Onn ba pechara-pechara jemah ila. Gaga amat ati kami enti Onn ulih meri kami bukti iya udah nerima bayar ari Farok. Kes nya ke udah ditanggoh ba bulan Februari 2008, tang lalu nadai penerang ti nunjuk ke iya udah ngereja pekara baka ti diperintah court.

Penyalah tipu enggau penerang ari Farok pasal pengaya Onn Mahmud


Kes Farok Majeed ti ngelaban Onn Mahmud dalam court nya berebak bendar leboh maia menyadi Kepala Menteri nya ti napi penanggol ti kelalu sensitive. Surat-suratkabar di menoa Jepun udah ngeluar ke repot pasal opis pengumpul chukai Jepun benong nawa kompeni-kompeni kapal pengangkut kayu ramu ti datai ari menoa Sarawak laban sida udah ditemu mayar bebilion-bilion dollar asil penguntong ti enda diterang ke soh sebengkah kompeni di menoa Hong Kong ti dikemata ke sekretari Onn empu, iya nya Kin Kwok Shea.

Kompeni Regent Star ti bejalai ke pengawa, numpang dalam opis kompeni Richfold ti enggi menyadi indu iya empu, ti endor Onn mega nyadi pemegai share ti pemadu maioh dia. Sekumbang dalam kandang penyalah tipu nya Onn bekereja nyadi pengarah lalu pia mega nyadi pemegai share dalam kompeni Achipelego, ti udah diberi lisin ngemata ke ekspot kayu-sayat ti diangkut ari meno Sarawak ulih menyadi iya empu, iya nya Kepala Menteri Abdul Taib bin Mahmud. Kompeni-kompeni kapal pengangkut nya madah ke sida mar bendar bulih lisin ari kompeni Achipelego semadi sida iya udah mayar ngagai Regent Star!

Reta-reta ti diterang ke dalam dokumen Farok ti difail ke iya ba court


Court kes Farok Majeed, ba pun iya difail ke iya dalam bulan September 2006, terang amat ngayan ke iya empu bisi kala diberi siti kontrak kereja nyeruri beberapa iti reta di Sydney enggau di Singapura. Farok mega ditemu nguji deka nyaman semoa reta Onn ari chara iya ti meri penerang ti silik nyentuk ke alamat-alamat rumah enggau reta Onn nya sekali. Farok mega udah ngayan ke bukti ti bekaul enggau kompeni-kompeni reta enggi Onn, bini Onn enggau bala anak Onn mega.

Ke terubah iya, Farok nyebut pasal flat sida Onn sebilik di alamat 1902 Peach Gardens di Singapura. Rumah flat nya sebuah penthouse begembar dua, ti bisi ruang ti luas amat ba nengeri ti sekut. Sebagi ari dua gembar rumah nya udah diiklan ke enggau tanda rega $7 juta dollar Singapura.


Tang rumah Peach Gardens dipeda enda ngemanah enti dibanding ke enggau sebuah da agi rumah Onn sebilik di 26 Carrara Road, Vaucluse di barat Australia, ti endor Farok mega ditemu nguji ngenatai ke saman iya. Rumah nya ditemu sebengkah ari rumah ti pemadu pintar digaga ba genturun kandang endor ti pemadu mar di Sydney. Rumah-rumah ba Carrara Road suah bendar ngerikod rega jual ti pemadu tinggi di Sydney, ti endor sebuah ari rumah-rumah dia udah kala dijual ba rega $27 juta dollar Australia leboh maia dagang rumah dituntong pengusut.

Pemaioh reta-pengeraja, asil ngulih ke kayu kampong ti kamah laban penyalah makai suap?

Bala orang ti ngayan ke pengeringat diri diatu minta awak ke semoa reta pengaya sida Taib sebilik di Australia, US, Kanada, UK enggau ba endor ke bukai dipansik enggau silik enti iya endang ditemu bekaul enggau penyalah makai suap ari pengawa ngulih ke kayu kampong. Beberapa siri pengawa ngayan ke pengeringat diri deka diator di menoa Australia ba minggu-minggu ti deka datai belaboh ari di nengeri Sydney kena hari Satu tu ila. Kaul Onn enggau sekeda orang dagang kayu kampong di Sarawak ti udah pulai ke pengeraja sida Taib Mahmud sebilik deka nyadi ke pansik enggau sidi.

Belalau ke penerang-penerang dalam surat, ti nunjuk ke, ba taun 1983, Onn enggau bini iya udah beranak ke puku dagang RM2.00 dalam anak kompeni Achi Jaya, iya nya kompeni Achipelego Shipping, ti udah nya lalu diasoh Taib ngemata ke pengawa ngeluar ke lisin-lisin dikena ngangkut kayu-sayat ari menoa Sarawak.

Udah beberapa taun ngereja pengawa baka nya, taja pan bebalut enggau penyalah makai suap nya, kami bisi bulih penerang ti madah ke Onn enggau bini iya ulih ngidup ke diri ari ti idup sedang-sedang ngagai idup ti ulih bulih sereta ngembuan reta tengkira enggau naka iya pemaioh ba renggat entarabansa. Kami udah ulih nyidi sekeda ari reta sida nya di sebelah-belah menao Amerika Utara, Sarawak, Malaysia lalu diatu di menoa Australia, terima kasih ke penerang ti diterima kami ari Farok Majeed.

Malaysia


Sekeda ari surat-surat court kes ti dianjong Farok ngayan ke Farok kala udah nguji deka nyurong ke surat saman soh Onn empu ba hotel iya empu di Kuala Lumpur. Hotel nya ti benama The Coronade, sebuah hotel ti besai sereta tinggi di puak nengeri KL ti diatu udah dijual Onn enggau rega RM93 juta. Udah iya nyual hotel nya, Onn ditemu meli sebuah hotel di Pulau Langkawi ti beikas 5 bintang.


Kebun-kebun sawit bedandang besai – dijual enggau rega RM930 juta


Ba konteks tu kitai enda tau enda ingat ke kebun-kebun sawit bedandang besai ti benong dikereja sida Mahmud sebilik di serata menoa Sarawak ti dikena sida ngerembai ke dagang sida ke serata Malaysia enggau ke menoa luar. Bisi ba sebengkah maia Onn ditemu nyual kebun dandang besai 30,000 hektar iya enggau rega RM930 juta, iya nya ba rega RM31 ribu se ekar! Kitai tentu kala ninga berita pasal bala orang asal ba sitak Balingian ti semina bulih pampas RM250 ke se ekar tanah NCR sida ti deka endor sida Taib muka kebun dandang besai. Taib enggau kaban BN iya nadai ngayan ke penyinu sida ba orang asal ti udah dirampas sida tanah NCR ti ngujong ke bala orang asal nya nadai agi endor begiga ke pengidup.

Pekara ti betul sereta patut ditemu kitai nya kaul entara Farok enggau Onn ba pengawa dagang. Farok  udah kala bekaul enggau pengawa ngambi tanah-tanah NCR ngari ke Taib di Sarawak, lalu Farok mega ditemu landik berunding ke jual-beli tanah-tanah NCR enggau bala orang asal, tau ke bala orang dagang ti beguna ke tanah-tanah nya.

Agi maioh reta di Australia


Tang dalam taun 2007, Farok udah mai saman dikena iya nagih Onn ba kereja-kereja nyeruri reta Onn di Australia. Sebengkah ari projek ti disebut dalam kes nya bekaul enggau ‘hotel butik’ ti agi mengkang diibun Onn ti benama The Valentine ba George Streeet, lalu mega kala dipenyadi Sultan Kedah dalam taun 2007.

Pemansang projek The Valentine enggau dua buah kedai makai, ti diempu lalu dikemata ke bini Onn, menyadi iya enggau ipar iya, udah nyadi sebengkah dagang ti beprofil tinggi. Taja pan baka nya, ukai peninggi profil dagang nya ti diterima ditu. Kompeni Donmastry di Australia, ti diasoh ngemansang ke sebengkah agi reta Onn udah kala dikenang dalam dewan parlimen di Australia udah bekau ti ditemu bisi penanggol baka ti kala direpot ke dalam surat-suratkabar di menoa Australia. Sekeda ari penanggol ti pansut iya nya ti endor bala tukang enggau kuli projek nya udah ngayan ke pengeringat sida bekaul enggau gaji ti enda dibayar.

Repot nya udah dituju ke ngaga siko ari orang ti megai share ba kompeni Donmastry, ti mega nyadi pengarah kompeni nya, iya nya James Nasmi, tang bala pemegai share ti bukai nya bala bini anak enggau ipar Onn Mahmud empu.

Farok udah ngeluar ke saman tagih soh Onn laban iya ngasai ke diri udah mansut ke belanja dikena iya mai James Nasmi ngagai court bekaul enggau kes nya, baka ti endang bisi diterang ke iya dalam surat-surat iya ti difail ke iya ba court.

Onn ditemu udah nguji magi diri ari bekaul enggau pengawa-pengawa dagang ti bekaul enggau reta-reta iya, ti endor iya endang pemegai share ti pemadu besai dalam kompeni iya empu, Kesuma Holdings. Ba pun taun 2009, Onn lalu madam ke kompeni Kesuma Holdings. Tang kaul bini, enggau anak indu iya , enggau ipar iya agi mengkang enggau kompeni-kompeni bukai di bepalan ba Carrara Road, lalu udah muntan ke julok ati iya ti deka ngelalai ke nama enggau kaul iya empu!


Rumah Penthouse ti pemadu mar udah kala dijual di nengeri Sydney!


Tang, nitih ke penerang ari Farok, agi bisi sebuah reta ti tau dikumbai kelalu nyerupa bekaul enggau Onn. Reta nya, Ten Wylde Street, ti udah narit ati bala pengarang berita Australia. Reta nya ba kandang endor Potts Point, udah dijual iya enggau rega $20 juta dollar Australia dalam taun 2008, sebengkah rekod rega rumah ti pemadu mar di menoa nya!

Penthouse nya siti ari siri rumah-rumah flat ti diseruri Onn. Pengawa nyeruri nya ti bendar dikereja ba rumah-rumah flat ti lama, ti udah nya ditemu court, deka dijual Onn baka flat ti bekualiti tinggi. Udah nya court belaba ke Onn empu nyadi siko orang ti meli ‘ti enda dikelala’ ti besetuju ke rega $20 juta dollar Australia nya, tang diatu pekara nya nyau udah ditemu orang maioh. Bala penerit undang-undang menoa Australia enda tau enda bejalai ke pansik sida, sekali ke asil ari penyalah makai suap bisi dikereja ba pengawa ngulih ke kayu kampong di menoa Sarawak nya ngenatai ke pun penatai ti nyadi ke sebengkah kuasa meli reta di menoa Australia!

Nama penyadi ba Farok Majeed diatu?

Kami deka mansik pekara tu dikena kami nentu ke nama reta-reta ti enggi kompeni baka ti diterang ke dalam surat-surat penerang ti udah dianjong Farok ngagai court di Australia nya.

Tang kami lalu enda nemu kini penunga Farok Majeed. Kami nemu iya udah digaga bankrap, lalu nya kebuah iya enda mujor minta sebarang bayar ari sida Taib Mahmud sebilik. Tang semoa endor iya sekula menya enggau semoa endor iya udah kala bekereja nadai nemu penunga Farok.

Farok Majeed nya orang ti ngemun ke lalu nyadi chairman ba gerempong penyeruri rumah di menoa Singapura, ti dikelala enggau nama RADAC. Tang, taja pan Farok kala ngena alamat opis iya ba RADAC ba repot taun 2010 gerempong nya, nadai siko bala orang ba RADAC nya nemu penunga iya diatu. Bala bakih ti sama bekereja enggau iya ba RADAC madah soh kami sida lama bendar udah nadai nemu penunga Farok.

Baka nya mega sebengkah gerempong ti bekaul enggau Farok ti bepalan di menoa US, udah madah soh kami sida enda mujor nemu penunga iya “kenyau ari dua taunt u udah”.

Kami mega bisi nguji betanya ke penunga iya ba endor iya belajar kelia, University of Sydney, tang tuan Professor iya mega madah ke kami Farok lama nadai didinga berita.

Ke penudi iya, kami nguji ngiga lawyer ti ngari ke iya ba kes bankrap iya, tang sida lawyer nya mega enda ulih ngiga iya. Semoa kompeni iya empu udah ditutup lalu nadai agi berejista ngena sebarang alamat enggau gerempong pemansik ti ngati ke diri di Australia mega enda mujor tetemu ke iya. Nyangka iya udah pulai ke Malaysia? Nyangka mega iya benong ngelalai ke diri, sebengkah pekara ti nyelai lalu enda patut dikereja siko orang juru-runding pengawa dagang reta-tengkira?

Nyangka Farok Majeed nya nyau udah mujor tebacha ke berita kami tu lalu nguji deka ngangau ke kami, kami pechaya ke iya ulih meri kami maioh agi penerang pasal reta-tengkira sida Abdul Taib bin Mahmud sebilik? Tau ke, nyangka Onn Mahmud empu ulih meri kami semoa penerang ti diguna kami? Nyangka Onn mega ulih meri kami penerang pasal pekara ti udah nyadi ba siko bakih iya nya ti mega nyadi ke penyanding penemu ba undang-undang ke iya?

  • expriate

    Terima kasih ka berita ti di bai oleh nuan. Aku sigi siko ari enda nyukong BN

18 Mar 2011

balingian nyadi palan tanah rampas taib!

This post is also available in: English, Malay

balingian nyadi palan tanah rampas taib!

Taib Mahmud suah bendar udah bedanji meri pemansang, tang iya udah ngenatai ke pengerusak soh sitak bepilih-besai iya empu. Diatu maioh amat raban orang ti nerima pangka umbak ‘pemansang pengerusak’ ba kandang-kandang menoa, ti tebal agi nya tanah-tanah kampung galau (Forest Reserves)

Pansik-pansik ti dipejalai ke kami bisi nemu sekeda ari kompeni-kompeni ti ngenatai ke pengerusak nya endang semina meri penguntung ke Taib Mahmud, sida sebilik enggau bala kroni dagang iya enggau sekeda orang siko-siko ti suah diator iya nyadi proksi tau ke pengari iya aja.

Tiap-tiap iti nya enggi aku – tang enggi kita nadai

Taib udah ngelulu ke diri meri ‘pemaju enggau pemansang’ soh rakyat iya. Suah amat iya didinga maia iya bejako, begendang ke leka jako ‘bersabar’, tang ba maia nya mega iya nadai kala ngayan ke diri orang ti puh “bersabar” endor iya ngerampas lalu mai pengerusak ba tanah ti berega tinggi ti endang diwan rakyat iya empu, kenyau ari beberapa peturun.


Tiap iko orang di endor nya dibayar pampas RM250 ke tiap seekar tanah NCR sida – lalu bisi mega orang enda dibayar sesen! Bala pemansik kami ti bejalai ke pengawa di pelilih menoa nya bala orang ti semina dibayar pampas nya bala tuai-tuai raban bansa ti endang udah dipadu ke perintah BN. Bala sida nya endang bisi meruan gaji ukai dikena sida bejalai ke pengawa ngemata ke rakyat sida, tang awak ke sida seruran nunduk ngagai peneka enggau ator perintah BN.


Mai pengeraja ke kami sebilik enggau bala pangan aku atas nama ‘pemansang’!


Pansik ti dipejalai ke Sarawak Report ba pengawa ngambi tanah-tanah di pelilih menoa Balingian enggau di Mukah ulih Taib udah mujor bendar ngusai ke sebengkah penyalah tipu ti besai. Pengawa-pengawa ti dikena ngelalai ke pengulih duit ti maioh ti datai ari penyalah tipu tu udah ulih kusai ke kami.


Tanah-tanah ti diambi Arip Mahmud enggau Taib empu nengah kompeni Mesti Bersatu


Sebengkah chunto kes tu iya nya nyadi ba sebengkah kandang endor di Balingian ti mungkor 34,000 hektar pemesai, udah kala diserah ke ba pun taun-taun 2000 suba soh menyadi Taib maia nya, niang Arip Mahmud. Kami bisi nemu penerang pasal 7 iti plot ti besai amat ari opis pengerejista tanah, ti udah diserah ke iya soh beberapa iti kompeni ti dikemata ke Lanco Plantation, enggi Arip (agi iya idup suba). Opis kompeni Lanco Plantation bepalan ba 458/459, Sublot 62, Jalai Padungan di Kuching. Pengurus kompeni nya Patrick Embol, lalu lawyer ti ngari ke semoa kes undang-undang ke kompeni nya Lim Jit Meng. Kami mega bisi tetemu ke penerang ti ngayan ke pengari Arip Mahmud maia nya iya nya Hamni bin Juni enggau Haji Anwar Susadd bin Razali, laban seduai iya sama ngena alamat Lanco Plantation baka ti bisi dalam rekod opis pengerejista tanah!

Pengawa-pengawa ti dikena ngelalai ke pemeri tanah-tanah soh kompeni Lanco Plantations ngena nama kompeni-kompeni ti ngati kediri, tang semoa kaul sida nya nya bisi ditemu kami dalam opis pengerejista tanah. Kompeni-kompeni Palmlyn enggau Hariyama sama bekunsi ke alamat enggau lumor telefon enggau kompeni Lanco Plantations, pia mega lumor telefon pengurus sida, Patrick Embol, ti mega dikena ba Rajah Mutiara Sdn Bhd. Lim Jit Meng nya nyadi ke lawyer ti sama leboh maia ngambi dua buah ladang di Pulau Bruit ngari ke Arip Mahmud (kompeni Eastern Eden enggau Poh Zhen) ti endor Arip seduai Taib udah mujor bulih untong RM40 juta udah tanah-tanah nya dijual baru 12 hari udah nya!


Semoa kompeni ti udah diayan ke di atas nya udah kala besengki penemu enggau kompeni-kompeni enggi Tiong Hiew King, siko orang dagang kroni Taib ti tebilang ngenatai ke pengerusak rampa menoa ti ditemu di serata dunya tu. Bisi penguntong ti dipasuk ke ngagai akaun sida Taib sebilik, tang bisi mega dipasuk ke ngagai akaun kompeni Tiong empu ti enda ditemu kami.


Ba kes enggi Hariyama, ti udah bulih tanah 10,600 hektar di kandang menoa Retus, kami tetemu ke penerang pasal Arip ti mujor bejurai ke rega RM6.8 juta ke 24 hb February 2003 lalu empat hari udah nya dijual iya baru ngagai kompeni Jaya Tiasa enggi Tiong enggau penguntong RM17 juta. Sida Taib ti endang bisi enggau megai share dalam Jaya Tiasa nya tentu bisi mega bulih penguntong ari semoa pengawa ti dipejalai ke kompeni nya.

Baka nya mega kompeni Palmlyn ti bulih 5,000 hektar tanah ti endor Arip dipinta mayar premium RM3 juta kena 12hb February 2004, ti lalu dipindah ke iya ngagai jari kompeni Subur Tiasa, mega sebengkah kompeni enggi sida Tiong, kena 30hb September 2004 enggau rega RM11.7 juta, penguntong RM9 juta.

Rajah Mutiara enggau Golden Star-Ace direjista nyadi kompeni ti diempu kompeni Tiong, iya nya Rimbunan Hijau Group. Penyampau ti dibayar soh sida Taib sebilik enda ditemu kami, tang kami ulih nganggar ke penguntong tentu iya manggai bejuta-juta ringgit soh orang diri sebilik pengambis kaya di menoa Sarawak.

Raziah enggau skandal dalam Sarawak Plantation


Raziah enggau laki iya Robert Geneid udah bulih 27,000 hektar tanah ba kandang menoa nya nengah kompeni seduai iya, Miracle Harvest enggau Green Ace Resources, ti endor kompeni awam Kwantas bulih 70% saham udah bekau sida ke nerima konsesi. Udah nya konsesi nya dijual dikena sida ngulih ke penguntong bejuta-juta ringgit. Raziah mega nerima kompeni Saradu ari menyadi iya, Kepala Menteri, pemesai tanah ti bulih 5,000 hektar. Penanggol skandal Sarawak Plantation bisi mantai ke penyalah makai suap ti dikereja lalu nyadi ba tengah-tengah perintah menoa Sarawak ti betuai ke Taib, ti endor Taib ngator wakil tau ke proksi iya ngemata ke dagang iya. Hamid Sepawi enggau Hasmi Hasnan nya dua iko ‘orang dagang kaya’ ti selalu ngereja pengawa ngari ke Taib.

Profile kompeni Sarawak Plantations Bhd terang amat nunjuk ke iya udah betukar nyadi kompeni awam “ti ngemata ke semoa reta enggi Sarawak Land Development Board (SLDB). Reti nya kompeni nya udah nerima bungkor kandang menoa ti besai amat ti ari pun nya endang tanah perintah menoa.

Taib enggau sida sebilik mimit pan nadai nyebut jako minta ampun leboh sida ‘ngemansang ke’ tanah-tanah NCR bala orang asal ti diambi sida tanah. Tang pengulih penguntong ti datai ari tanah-tanah nya endang meruan direkod ba rintai nama-nama bala orang ti megai share dalam sebengkah-sebengkah kompeni lalu dikemata ke undang-undang.


Kroni-kroni bukai ti mai penanggol soh bala orang asal

Bisi beberapa buah kompeni bukai ti sama mai penanggol soh bala orang asal ke nguan menoa Balingian nya. Sida nya mega bisi lisin dikena ngereja rampa menoa dia. Desacorp (enggi anak Hamid Bugo) enggau Empire Plantations, enggi sida Wong sebilik nengah kompeni besai sida ti bisi mega bekaul enggau Taib, iya nya kompeni WTK.

Diatu udah bisi empat buah rumah panjai bansa Iban di Ulu Kenyana udah betemu lalu minta sukong Tuai PKR Baru Bian ngari ke kes sida nya.

Linggan anak Ngabok siko Iban ari Rumah Randi di Kenyana nusi soh kami baka ni penanggol ti dibai Empire Plantation ke menoa sida dia dua taun nyin suba.

“Leboh sida baum ba opis tuan DO berandau ke beberapa pekara, sida enda ngasoh kami tama. Sida semina minta ka betemu enggau Pengulu enggau Tuai Rumah kami”, pia ko tusi Linggan.

Jako pesan ti dibai sida ke tuai-tuai pansut ari bilik aum nya “Tanah nya endang tanah perintah (State Lands), lalu kita enda ulih betalat enggau sapa-sapa agi”, pia ko sebana orang dia. Tang sida bela nemu, tanah ti diambi kompeni nya endang udah kala diperimba beberapa serak tuboh dulu ari sida nya. Sida mega nemu bala tuai-tuai sida ti dibai orang baum nya tadi endang dipadu ke perintah BN, ti ngari ke sida, udah dipejal awak ke besetuju lalu udah nya diberi pampas RM250 ke tiap hektar tanah ba kandang menoa sida nya lalu pampas nya ukai pulai ngagai bala anembiak redak sida.

Bala orang di menoa nya nusi, tuai-tuai sida nya mega bisi diberi kompeni nya share ba ladang dia, ti nyadi ke peransang sida kereja ngalaban anembiak sida empu.

Maioh amat jako Taib ti ngenang pasal ‘pemansang enggau pemaju’ ti tau mai pemanah soh bala orang di endor nya. Sida udah enda dikiboh ke, lalu nadai nerima apa-apa, taja pan sida nya diau nguan ti kena bungkor sitak ti endor Taib bediri. Diatu sida nya nyau mupok-mupok ngelala. “Kami tu badu agi ngundi BN. Endang enda agi!”

  • expriate

    Pemasang SCORE ko ianya 2030 Sarawak Menua ti terkaya ba Malaysia tang maion nya Taib udah mati

  • sarawakian

    Terima kasih ngagai org Balangian laban udah ngundi taib…..

    Idup taip.

  • Lulong Bebendai

    Akai! Lapa pia Taib, enda chukupkah pengaya ti udah dikemuan iya ngelamatu.

  • Lulong Bebendai

    ANTU JELU PENGAWA TAIB MAHMUD TU

  • Lulong Bebendai

    ANANG NGUNDI BN, ANANG NGUNDI BN, ANANG NGUNDI BN x 100000000

  • Bujang Sadok

    Enti kita di Baligian agi ngemenangka Aki Uban tu ila, enda aku nemu…tak naka iya meh kita di Balingian dia, tak telanjaika Aki kita nya sekalitu, meda gamal utai iya..ila kitai sama-sama ketawa.

  • ari layar betong.Nan

    diatu tanah diambi aki uban kita Taib….Dahnya kita nya meh jual ia….nya alai ang ngundi Taib serta ngundi BN kita…maia pilih tu ila………..ingat wai,igat ,aya,aki,ini, anang ngundi BN……..

  • http://yahoo bujang simanggang

    kitai iban sigi agik pabuk ngau politik ukai nm ku nybut kenya lban kitai agi ga ngundi taib pasal dberi duit 2-3 ratus,atap zink,nlung meli keranda ti bs pemati..spatutnya kitai minta pemansang,jalai ti mnah,klinik, sekula,api,ai,projek ba rmh panjai ngau myoh utai agi ti ulih mansang ka kitai,anak,ucuk kitai jemah ila…bs YB ari bangsa iban dlm PBB pun baka 'JOKER' ga digaga Taib..mecah ka parti iban awak ka kitai iban tok ndai kuat dlm politik..org baka sida tok lah(joker taib) sigi munuh bangsa diri mpu

    Sepatutnya YB-YB tok nubuh siti parti bangsa iban nya bru ulih kitai megai menua dri mpu…tok ndai,nydi JOKER parti lain,PBB lah,SUPP lah, keni nuan nda jdi boneka org?! ti senario politik kitai iban enda brubah,agi bingking ngau pangan dri,enda ulih duduk semeja ngau bangsa dri mpu,maybe dalam 10-15 taun ti ka datai kitai iban ndai tanah agi,ukai stakat nya asai ku tpi kitai iban merinsa ba tanah diri empu sedangkan kitai tok penduduk asal ba sarawak !!Udah 30 taun megai sarawak ni pemansang udah beri PBB ngai kitai semua? tanah ti mayuh lesap kasak ka taib bsi meh…nyau kaya raya family taib nya,peda kita anak taib Abu Bekir sarak ngau bini pertama ya bini ya claim RM400 MILLION!! THAT MEANS ABU BEKIR IS A BILLIONER..anang nybut Taib gi.lg lah kaya..sampai ank ya pun bs bilun kediri mpu hasil kitai magang nya..

    Asai ku mayuh kitai enda nemu sejarah Sarawak masuk Malaysia..mksud ku perjanjian yang telah di buat di London ngau Queen..Dalam perjanjian nya kitai dayak engau melayu/melanau islam setuju dalam sistem pergiliran megai jawatan ketuai menteri sarawak.Dalam perjanjian nya bangsa Dayak(nda kira iban,bidayuh,kenya,lunbawang,kelabit engau myuh gi) janji SEA DAYAK @ LAND DAYAK, ulih megai jawatan ketuai menteri 2 kali,udah nya bru melayu/melanu islam ulih megai 2 kali ga udah nya pusing baru ngagai kitai dayak..sebagai contoh ketua menteri sarawak yg pertama Datuk STEPHEN Kalong Ningkai, ketua menteri ya ke-2 agi kitai iban Datuk Tawei Seli,pulai ngai laut tun abdul rahman ya'kub(uncle taib) udah nya bru taib…….tapi udah taib tok ila jawatan ketuai menteri sarawak mesti pulai baru ngagai kitai bangsa Dayak..ti melayu megai ketuai menteri sarawak(antara abg jo ngau awang tengah) that mean perjanjian dah nadai dititih ka taib…!

    • anak sarawak

      ku nyukung mat penemu d nya bujang simanggang.bangsa kitai iban sekadar beri taib 2-3 ratus alu gaga.dahnya beri atap,batu bata n perengka ngaga rumah meh.ukai semua nya meri pemansang agai menua kitai.nti nitih bala tuai rumah siti-siti menua patut bergempurup minta projek besai baka api,ai n jalai.tang urang tuai agi sempit pemikiran cda iya.asal beri bala yb barang mimit alu gaga.cda ya nda nemu bala YB gaga laban udah bulih untung bejuta-juta baka taib.taib nya cg nadai guna.peda pilihanraya arinya iya ngau bepilih ba balingian.Nama kebuah iya lari kia sedangkan rumah iya ba kuching din.nya kebuah iya takut alah laban menua kuching pegai bangsa cina.ba balingian mayuh bangsa iban,malayu n melanau.tipu iya madah ka meri projek macam-macam alu ka meh rakyat dia nyukung iya.tang semua nya jako bula taib magang.

  • http://yahoo.com.my kumang iban

    aq nyukung penemu sduai d bujang. ukai 6ma aq mdah pea, mya ti ngundi alu diberi taib 2 tauka 3 puloh sesiku ke ngundi, alu pdah ktai iban manah. tang ktai enda sedar dr menua ktai dilelong taib. akaidai…6ma mh nasib menua aq 2 ilak neh…nyau ambis tanah pesaka ti dikembuan aki ini ktai menya disapu taib magang…ujung2 ktai dijual taib mega. bka ngau kmi smenua, tanah ko jaku dipinjau kena beladang dlm tempoh 25 taun ngau dibayar semina rm 2 aja stiap eka. bayangkan brapa rgt aja t dterima tudah ke ngempu tanah ke ulih dipumai ngulihka padi stiap taun? ni raban aq ari balingian SEDARLAH….MENUA KITAI BENUNG DILELONG!!!!!!!!!!!!!!!!!!!!!!!!!!!!!

18 Mar 2011

onn mahmud enggau rumah penthouse iya ti berega pemadu mar di australia!

This post is also available in: English, Malay

onn mahmud enggau rumah penthouse iya ti berega pemadu mar di australia!

Sebuah rumah penthouse ti pemadu mar di Australia udah digaga di pelilih menoa Sydney. Bala pengarang berita kami udah bulih sebengkah penerang pasal pengawa nyual rumah tu dalam taun 2008 ti udah mujor ngerekod rega AUS$20 juta. Sapa ‘orang dagang bemisteri’ ti udah ulih meli rumah pemadu mar di Australia nya, lalu sapa ti nyual rumah nya? Pekara ti ditemu kitai iya nya rumah pemadu mar nya bisi bekaul enggau orang diri sebilik ti pemadu kaya-raja di menoa Sarawak, ke lebih agi Onn Mahmud, iya nya menyadi Kepala Menteri.

Kitai udah mega tetemu ke penerang ti madah ke kaul Onn Mahmud ba pengawa ngadu enggau meli rumah nya, sebuah rumah di Ten Wylde Street, enda jauh ari palan penyangkai kapal Sydney di Potts Point, laban penerang-penerang nya udah dibai ngagai court beberapa bulan sebedau berita ti bendar dipansut ke. Onn udah disaman bejuta-juta dollar Australia ulih sebuah kompeni perunding pengawa berumah Australia ti mega lalu ngemasok ke bayar yuran-yuran ke dalam bil-bil iya nya. Kes dalam court udah ditemu berebak enggau berita ti ayan ba suratkabar di menoa Jepun, ti benong ngenang pasal dawa opis chukai perintah Jepun ti ngelaban sebengkah kompeni kapal ti bepalan di Hong Kong. Dalam taun 2007 bisi sebengkah berita ti madah ke kompeni-kompeni kapal ti dipinta mayar ‘chukai’ sebagi ari untong ngangkut kayu ke menoa Jepun, soh sebuah kompeni ti bepalan di menoa Hong Kong ti bekaul enggau Onn Mahmud.

Onn ti benong bepalan di Sydney lalu bisi muka beberapa iti kompeni dagang bepelasar ke nama Kesuma Holdings, sebengkah kompeni ti dikemata sereta dipejalai ke iya empu enggau bini-anak iya, tang pejalai kompeni nya udah ngetu dalam taun 2009.

Leboh maia reta nya diayan ke ngambi ke dijual ba rega ti mar amat nengah internet, reta nya lalu terus dijual baka nya aja. Iya ke bendar, rumah nya semina rumah lama tang digaga sereta diseruri baru. Semina dalam beberapa hari aja ti endor rumah ti benong diseruri nya lalu dijual baru nengah pemaju tin gaga enggau miki rumah nya ba rega urong AUS$17.5 – 20 juta. Sapa ti bisi duit ngemaioh nya dikena meli rumah ti mar nya?

Bala pengarang berita Sarawak Report ti bepalan di menoa Australia udah madah ke kami pasal Ten Wylde Street ti benong digaga enggau dibiki. Laman web ti ngelaku ke rumah ti pemadu mar di Australia nya, diatu udah ditutup.

Nama Onn Mahmud enda kala dikait ke enggau projek. Pekara tu nyadi ke tanya, sekali ke Onn empu bejalai ke pengawa ngaga sereta nyeruri rumah nya, tau ke nyadi siko orang ti meli rumah nya ti enda dikelala?

Pekara ti enda ulih dipelalai ke Onn Mahmud, iya nya leboh kes nya dibai ngagai court urong tengan taun 2007 enggau 2008, ke bendar agi bisi pengawa-pengawa nyruri rumah nya ti dikereja ngari ke iya empu. Siti tanya ditu, ari ni penatai duit iya ti ngemaioh nya?

  • expriate

    Sigi baka slogan Malaysia Boleh

15 Mar 2011

DUIT TUNAI DIKENA MELI PANGKAT BA UNIVERSITY ADELAIDE?

This post is also available in: English, Malay

DUIT TUNAI DIKENA MELI PANGKAT BA UNIVERSITY ADELAIDE?

Beberapa minggu tu udah Sarawak Report nguji ngulih ke penerang ari University Adelaide, pasal nama pelasar sida meri nama ke sebuah endor dalam kampus sida dia ngangkat ke nama Kepala Menteri Sarawak.

‘Taib Mahmud, Chief Minister of Sarawak Court’ udah ditaga ke dalam taun 2008 dikena bebasa ke siko orang politik ti datai ari Malaysia Timur ti diatu benong napi bantah enggau kutok. Maia nya, endor nya ditaga ke “sebengkah ruang sosial ti udah digaga manah agi”, ti endor sekeping gambar ngayan ke siko orang politik ti bestatus multi-jutawan dipeda benong bejalai-jalai ba sebengkah endor dia sama sereta enggau Sapit Chancellor, Professor James McWha.

Tang peminta kami nya lalu nadai dibalas sida universiti. Semoa email kami enggau tanya-saut nengah telefon kami pan endang enda dikiboh ke sida. Sekeda ari kaban alumni (kaban gerempong nembiak ti udah belajar dia) udah mansut ke pengesal ati ke gaya basa ti diberi universiti nya soh Taib ba bulan Disember nyin kemari, ti ngujong ke sida sama-sama nulis surat, ko sida:

“Malu amat asai ati kami laban universiti ti endor kami besekula nya nyau meri tanda basa soh siko orang ti kleptomaniak sereta ti ditemu udah kala ngelanggar hak pengelantang mensia”


Kebuah universiti nya enda nyaut semoa jako tanya kami engka meda Taib Mahmud nya ulih meri duit bantu ti maioh amat, tang enda ulih dikereja Sarawak Report enggau kaban alumni universiti nya empu.

‘Pemeri siko-siko’ Taib diberi enggau maioh chara!

Taib nembu ke pelajar iya ba Adelaide dalam program undang-undang dalam taun 1961, tang udah nya, dalam taun 1994 iya nerima pangkat doktor kehormat, lalu ditangkan ke mega enggau tanda pangkat ti bukai ketegal sukong enggau bantu iya soh universiti nya. Jako-jako penerang ari universiti nya ti kala nyebut pasal pemeri-pemeri ari Taib Mahmud dalam kandang beberapa taun ke udah, tang udah sida nyau enda didinga bemunyi agi diatu, kami mar amat deka ngaga kira-kira kasar ni penyampau semoa tulong ari Taib nya.

Adelaide udah nerang ke tulong enggau bantu ke terubah ari Taib ti diterima sida dalam taun 1987, enam taun udah iya nyadi Kepala Menteri lalu iya mega udah mupok-mupok ngayan ke ikas penatai pemisi iya ti ari luar jangka. Kompeni reta iya ti bepalan di Amerika Utara, Sakti International, ti ditumboh ke sida sebilik ba taun nya lalu diatu beungkos beratus-juta dollar Australia. Nitih ke penerang ari universiti nya mega, duit tulong ke terubah ari Taib udah dikena sida ngangkat ke pemanah perengka ti diguna ba Sekula Undang-undang ba universiti nya.

Dalam taun 2001 Kepala Menteri nya udah nyua ke duit tulong $300,000 soh universiti nya ti lalu dikena sida niri ke “Malaysia Room, chukop disikap enggau kerusi mija enggau perengka pengias bilik ti dibai ari Sarawak”. Sida universiti nya udah nyebut pasal bilik nya:

“sebengkah pemeri ari Kepala Menteri ti gerah jari, ti mega siko alumni kami ti dipebasa lalu mega siko orang ti dermawan”.

Rega tanda basa nama nya?


Ari ketegal kami ti enda bulih sebarang saut ari sida universiti nya, kami belaba ke sida bisi nerima duit ti maioh agi sebedau sida ulih ngangkat ke nama Taib Mahmud, Sapit Chancellor, Prof. James McWha, meri terima kasih soh Taib atas “sukong iya ti nyengala sereta nyulut ari orang bukai enggau pengeregas iya ngereja pengawa” lalu nyebut:



“Pemeri orang siko-siko ari Kepala Menteri nya udah diterus ke iya dalam kandang beberapa taun tu udah”


Tang enda bidik amat, pemeri-pemeri ti disua ke siko orang ti bisi status enggau pangkat ti enda dipansik dulu sida universiti, baka ni orang baka Taib nya dikemendar ke undang-undang tau meri pemeri ti maioh. Taib nya semina siko orang ti dipilih mangku pengawa, baka pengereja pengawa perintah ti bukai lalu gaji iya nya endang ari rekod awam lalu dipelaba ke bulih RM20,000 sebulan (kira-kira $10,000 Australia). Tu mai reti, ungkos ngaga “Malaysia Room” ba universiti nya aja tentu udah manggai dua kali lipat gaji iya setaun.

Sida universiti nya semina mansut ke sekeda jako tanya ti endor semoa pekara tau tebantai ti benong ngelingi pengeraja Taib. Udah tentu sida deka bulih penerang ti chukop ti tau dikena ngait ke Kepala Menteri nya enggau penyalah makai suap ngulih ke kayu kampong ba serata Borneo, ti diatu nyau ngujong ke pemesai rampa kampong Sarawak tinggal semina 5% ari pemesai asal iya udah pengelama 30 taun Taib bekuasa.


Iya ke bendar, pengerusak ti dikereja kompeni-kompeni ti bekaul enggau Taib Mahmud diatu nyau udah ngerembai di serata dunya ti tau mai penusah sechara global. Kompeni-kompeni nya ngereja pengawa sida sebelah pulau Borneo, di Irian Jaya, pulau-pulau Solomon, emperan batang Amazon enggau Siberia, baka ti direpot ke bala NGO. Nyerumba enggau nya, the Green Party ti bepalan di Tasmania udah mansut ke tanya, nama kebuah sebengkah kompeni ti bisi kaul enggau Taib Mahmud udah diberi subsidi $8 juta ulih menoa nya dikena sida nebang kayu kampong lalu dijual pulai ke menoa Malaysia?

Sebengkah penyalah ti endor maioh orang udah tusah


Pangka ari pengerusak rampa menoa nya udah ngeruga pengidup jelu siga, sungai enggau chura ekologi di menoa tu. Pengerusak nya mega udah mai pangka soh orang asal ti endor kandang menoa sida dipasok peneka ati orang ti ngambi kayu kampong sida, lalu diatu rampa menoa nya rusak bendar.

Semina seraban aja orang ti ngasai ke penyamai ari pengaya ti datai ari pengerusak rampa menoa ti dikereja sida Taib. Iya ke bendar, University of Adelaide nya ukai nerima pemeri ari Kepala Menteri ti gerah jari, tang pemeri ti datai ari pengawa ngerusak rampa menoa enggau ngeruga pengidup rakyat Taib empu.


Jako-jako tanya kami

Enggau tu Sarawak Report ngerintai ke sekeda jako tanya ti endor kami arap ke Sapit Chancellor nya ulih besedia nyaut kami. Kami deka nemu sekali ke universiti bisi lalau etika ti dikena nerima pemeri ari sebarang orang, lalu enti bisi, nama pelasar Professor McWha nerima Taib nyadi ke kaban pengawa kunsi iya di Adelaide?

Kami mega deka nemu berapa penyampau ti bendar diterima ba universiti nya, lalu enti duit derma nya endang datai ari pengawa ngerusak rampa menoa, dia semoa duit derma nya enda tau enda diberi pulai soh rakyat Sarawak nitih ke ator undang-undang.

Enti universiti nya majak madah ke semoa pemeri nya datai ari ‘pemeri jari ti gerah’, kami enda agi ngiga saut tang kami tetap ngumbai semoa duit nya endang ari semoa gaji iya, taja pan gaji iya ukai tau dikumbai besai.

Agi maioh di Australia

Baka ti suah dipansut ke bala NGO, agi bisi reta Taib di Australia, ditambah ke enggau duit bejuta-juta iya ti lebih ari patut. Adelaide Hilton 380 bilik nya sebuah kompeni hotel ti direjista ngena nama bala anak iya enggau nama niang bini iya, lalu pia mega reta tengkira iya ba endor ke bukai.

Ketegal Australia nya endang bisi pengeraja asal bumi diri empu, umbas meh University of Adelaide minta derma ari bala rakyat sida empu, ti datai ari pengeraja domestic sida empu, ari ti ngarap ke pemeri ti datai ari penguntong udah ti ngeruga bala orang ti seranta di Borneo ulih Kepala Menteri ti udu makai suap?

15 Mar 2011

PENGERINGAT ORANG DI MIRI SOH GEORGE CHAN MAKIN NYAD

This post is also available in: English, Malay

PENGERINGAT ORANG DI MIRI SOH GEORGE CHAN MAKIN NYADI!


Di Miri saritu George Chan udah ninga jako kelesey sekeda orang leboh iya nemuai ngagai sebuah market enggau kedai kupi ti ngayan ke sitak nya nyau enda rindu ke ulah enggau pendiau iya!

Siko pemacha laman kami ti datai ari menoa asal Sapit Kepala Menteri nya bisi meri kami gambar-gambar ti ngayan ke kereta George Chan enggau enggi Walikota BN Miri Lawrence Lai Yew Son, ti diengkah ke seduai peneka ati atas garis kuning enda iboh ke diri tau disaman ketegal penyalah nya!

Pemacha kami nya, ti kala udah disaman ketegal ngengkah ke kereta iya ba endor ti sama, madah ke iya suah bendar meda dua buah kereta nya diengkah ke ba endor ti sama, ti ngujong ke pemacha kami nya sempat ngambi gambar enggau mudah.

Kitai nyangka semina ulih berasai sinu ke iya. Kita nyangka enda lantang ati laban asai ke ditekul undang-undang, tang bala orang ti bejurai enggau ngaga undang-undang nyau peneka ati ngelaban undang-undang, sapa ti enda ringat? Sapa ti enda ringat enti ba moa mata kitai empu bala tuai-tuai kitai peneka ati ngengkah ke kereta sida, lalu enda mega kena saman!

Aku ti ngaga undang-undang, tang kita nitih ke undang-undang nya, ukai aku!

Nitih ke diterang ke pemacha kami nya tadi, dulu ari nya iya kala disaman laban ngengkah ke kereta iya ba endor ke sama ba Jalai Ngo Hing Kii 339-353 di Pelita Commercial Centre enggau Survey Market. Tang seninjik bendar iya sempat ngambi gambar kereta George Chan enggau Lai nya ba hari ti sama, tang tuai dua iko nya nadai disaman!

“Aku disaman sida council nya dulu, tang “tuai-tuai” kami enda ditegu. Udah nya aku lalu ngelawa opis sida council deka ngenatai ke sebana, tang sida council dia nadai engkebut.”

Pemacha kami nya lalu nerus ke cherita iya:

“Maioh amat endor engkah kereta di pasar Miri nya, tang sida (George Chan enggau Lai) rindu lalu peneka ati ngengkah ke kereta di endor ti salah. Aku bisi betanya ba atendan ti jaga endor nya, nama kebuah dua iko ‘tuai’ nya enda disaman. Saut ke didinga aku ari atendan nya “sida nya “boss”. Tu udah enda asi agi ke semoa orang, dua iko ‘tuai’ nya udah ngayan ke chunto ti jai”

Nitih ke pemacha nya baru, kereta George Chan endang udah lama amat diengkah ke dia, nyau ka lebih sejam laban iya ti ngulu aum SUPP semak endor nya!

Orang biasa deka kena ukom RM60 enti ditemu salah ngengkah ke kereta sida, tang duit ukom ti nyampau nya tentu mit amat ba orang baka George Chan, ti nyamai ngulih ke duit maioh sekumbang iya ti nyadi menteri!

Sarawak Report, enggau basa, deka nangkan George Chan enggau bala bakih iya dalam BN ti sumbong lalu ti rindu belanggar ke undang-undang, agi bisi ukom ti patut dikenangi ke sida. Ukom nya tentu deka nganti sida ba maia bepilih besai tu ila.

Ba hari nya mega, George Chan bulih kelai ti enda manah leboh iya ngabas bala orang ti ngusung market dia. Iya dipeda nguji ngayan ke diri nya siko tuai ke mensia maioh, tang maioh orang di endor nya baka ti ngayan ke bantah sida ba rega barang ti tinggi, sebengkah jako sebana enggau jako bantah ti endang enda dikiboh ke iya ti rindu ngengkah ke kereta iya peneka ati.

14 Mar 2011

YB BN NYADI TAUKAY PROJEK BESAI-BESAI!

This post is also available in: English, Malay

YB BN NYADI TAUKAY PROJEK BESAI-BESAI!

Dalam sebengkah randau enggau YB Peter Nansian, Sapit Menteri Rampa Menoa dalam kabinet Taib Mahmud ti mega wakil rakyat sitak Tasik Biru kala nulis, “aku masuk politik laban aku deka mantu rakyat … enti kita ngelawa sitak aku … semoa jalai udah bisi enggau infrastruktur pan bisi … aku selalu berunding ke baka ni aku ulih ngemansang ke sitak aku nya enggau orang dia”.

Tang utai ti enda dipeda enggau enda ditemu bala pemacha enggau pengundi-pengundi iya nya berapa penguntong ti ulih YB Nansian ke iya empu nengah projek ti besai-besai ti dipelanja ngena duit agih ari perintah menoa! Endang amat, udah iya ngasai ke diri lelak bekereja ba kabinet Taib Mahmud, YB nya deka pulai beguai-guai laban deka ngemata ke projek-projek awam ke beungkos beratus-juta ringgit dipejalai ke kompeni iya empu, Juara Beetuah Sdn Bhd, enggau lanchar.

Engka meh laban udah lelak bekereja semanjai hari, dia YB Nansian lalu enda ingat ke iya ngereja siti penyalah ti berat enti siko orang ti bekereja perintah baka iya nya ngembuan sebuah kompeni ke diri empu lalu bulih untong ari kontrak ari perintah iya empu?

Kontrak ti besai-besai sereta maioh


Peter Nansian udah terang bendar dirintai ke dalam tusun nama ba CIDB Malaysia nyadi siko pengarah dalam kompeni iya empu, Juara Beetuah, sebuah kompeni binaan ti suah bulih kontrak perintah beungkos beratus-juta ringgit! [http://www.cidb.gov.my/directory/local_contractor_details.php?cont_id=28898 ]

Nambah ke nya, alamat enggau penerang-penerang pasal kontrak Juara Beetuah baka ti ayan ba laman web CIDB endang sebaka enggau isi online Wikipedia YB Peter Nansian empu.


Pekara ti tau ngasoh kitai tekenyit iya nya pemaioh kontrak awam ti diterima iya ari perintah BN. Juara Beetuah direjista udah nerima 10 buah kontrak awam kenyau ari taun 2000 suba lalu ungkos tekumpul nya bulih RM350 juta!

Bala pengundi ba sitak Tasik Biru ti di ari ke YB Peter Nansian udah pechaya bendar ke YB sida nya siko menteri ti bebendar amat bekereja, lalu nyangka nya sida deka nemu enda semua projek nya diagih ke ba sitak iya aja!

Kompeni binaan nama nya?


Ke tebal agi kontrak nya diterima iya sechara tetutup ari perintah BN enggau enda ngira pengawa ti baka nya bisi konfik kepentingan. Reti nya, leboh maia sebengkah-sebengkah kontrak nya diagih-agih ke ngagai bala menteri BN, dia bala YB BN endang enda nemu sekali ke kompeni sida nya ulih nangkup pengawa tau ke enda. Nya kebuah sereta sida nerima sebarang kontrak, dia sida lalu beguai-guai nyerah ke kontrak soh kompeni-kompeni bukai ti endang bisi penemu nembu ke projek, baka kompeni kroni sida, Hock Seng Lee (HSL), enggau magi rega kontrak ti baroh ari rega asal. Enggau tu kami deka enchabar YB Nansian ngasoh iya nunjuk ke kami iya bisi kompeni ti amat-amat nyengala, bisi bala staff, nyengkaum iya empu, ti mega ulih nangkup kontrak bejuta-juta ringgit nya. Kami minta deka meda bala anak kuli iya ti landik nya ngereja pengawa lalu kami mega deka meda ke gaya mesin enggau perengka dikena sida bekereja.

Enti nadai tulong ari iya, kami mengkang enda ulih tetemu ke sebarang penerang begambar ti nunjuk ke iya empu ngena tupi keselematan tau ke dini-dini endor ti besemak enggau palan binaan iya! Tang, taja pan baka nya, kami semina bisi nemu sekeda sampel jako penerang ari suratberita ti ngayan ke Juara Beetuah kala udah nyadi kaban dalam konsortia enggau HSL ti endor kompeni nya deka nerima sebagi 5% ari semoa kontrak perintah kena sida bejalai ke pengawa ti enda terang dipadah ke. Pekara ti baka tu meh ti endang selalu dikereja Raziah Mahmud dikena iya ngulih kontrak-kontrak ti besai-besai ari perintah, ti udah nya lalu diserah ke iya soh kompeni-kompeni ti endang ulih nangkup kontrak nya, terima kasih ke pemanah ati menyadi iya, Kepala Menteri.

Duit jali

Ngena penerang ti mimit bendar ngayan ke pengawa ti endang bisi dikereja kompeni YB Nansian nya, kami tekenyit bendar meda pemaioh duit jali ti mujor direjista ke ba nama kompeni Juara Beetuah iya. Kompeni nya bisi 13 bengkah duit jali kenyau ari taun 2000 lalu semoa duit jali nya RM472 juta! Tang datai ke saritu, semoa duit jali nya empai tembu dibayar pulai soh bank.

Tang semoa bank ti nyali iya duit nya nyangka nya bisi pengarap ke YB Nansian ti bisi kaul ti manah enggau perintah lalu nadai ngayan ke sebarang penanggol bulih kontrak ti baru, lalu nyangka nya deka mujor bulih projek-projek kejang ke deka bepilih besai tu ila!


Duit dikena kimpin maia bepilih besai


Empai lama tu udah dia menteri Awang Tengah Ali Hassan udah nyebut pasal duit agih perintah RM5.2 billion dikena begaga ke jalai, perengka bekal ai enggau bekal kuasa elektrik nengah program NKRA. Duit agih nya endang diator baka nya dikena perintah BN ngumpan bala pengundi di menoa pesisir ti lama amat udah nganti diri ti bisi perengka ti patut bisi ba  pengidup sida dalam pengelama 30 taun dipegai perintah Taib Mahmud. Tang raban orang ti gaga agi ati iya nya bala kroni perintah BN ti deka bulih penguntong ari kontrak-kontrak nya. Berapa ungkos projek-projek nya, nya tepulai ngagai siko-siko kitai nyangka iya, ti iya ke ngenyala ila, iya nya bala pengundi ti diau di menoa pesisir meh ti deka bulih utai ti mit amat rega!

Awang Tengah udah bebula ke dawa ti madah ke BN sepeneka ati ngena duit perintah dikena ngulih ke sukong ari pengundi, tang iya mega bisi didinga nyebut:


“beguna amat bala orang Sarawak nentu ke BN Sarawak terus bekuasa ba pengawa bepilihbesai tu ila, lalu ngasai ke penyamai


Ba pengerami nya mega, Awang Tengah udah (baka ti ngelese ke orang) nyua ke cek-cek ba moa orang maioh soh bala orang ti nerima ‘pampas’ ke tanah-tanah sida ti kena sukat, dibagi lalu diambi ari sida! Awang Tengah udah ngena peluang nya minta ari orang maioh enda iboh ke ‘penemu salah enggau pemula’ penerang pasal perintah BN. Enggau nya, Sarawak Report enggau basa minta kaban-kaban politik dalam BN ngayan ke semoa bukti/pemendar pasal ‘penemu salah’ ti udah diayan ke ngelama tu nya ‘bula magang-magang’.

Kami udah ngayan ke semoa bukti/penerang kami ditu. Sida tau nyaut sekali ke YB Nansian kala nerima kontrak ti besai-besai ari perintah ti beungkos bejuta-juta ringgit nengah kompeni iya empu nya, Juara beetuah? Saut dia meh ulih kita.

14 Mar 2011

PERENING DUNYA BETUMPU BA SARAWAK

This post is also available in: English, Malay

PERENING DUNYA BETUMPU BA SARAWAK

Diatu umbak ngelaban regim pengerusak rampa menoa ti dikereja Taib Mahmud nyau makin hari makin mangka menoa Sarawak, lalu ninting hari bulih endor dalam media di menoa tasik. Beberapa siri pengawa bala orang ti ngayan ke pengeringat diri enggau bantah udah mega kala diator ba luar sekeda reta (bangunan) sida Taib sebilik di UK, Kanada enggau US, lalu bantah di sebaka mega deka diator di Australia, Austria enggau Switzerland.

Pugu surat khabar di Britain, Sunday Times sehari tu udah ngayan ke berita pasal orang ti ngayan ke pengeringat diri nya lalu tau ngaga siti simpul penemu nama kebuah maioh orang di serata dunya tu nyau mupok-mupok ngayan ke penyinu sida soh penusah enggau penanggol ti nuntong bala orang bansa asal laban pengerangka enggau pengamu sekeda menteri sida iya. Pesan nya terang bendar – kita tetap dikingat ke kami, lalu ninting hari, betambah maioh orang deka ngelaboh ke Taib Mahmud.

Kami mega ngayan ke sebengkah repot ti bisi ditulis ke dalam Sunday Times, laban kita tentu enda ulih macha tau ke meda berita nya nengah sebarang media ti ngena lisin perintah di Malaysia. Issue tu mega udah bisi direpot ke dalam surat khabar bebas di Britain enggau London’s Evening Standard beberapa hari tu udah – enggau gambar-gambar sekali.

http://www.thesundaytimes.co.uk/sto/news/world_news/Asia/article576657.ece


Berita iya

JAKO TESAU DIKENA NGELABOH KE BALA TUAI TI NGERUSAK RAMPA MENOA BORNEO

Bala orang ti ngayan ke pengeringat diri udah minta menoa Britain ngemeku ke semoa reta tengkira sekeda menteri ti udah ngerusak rampa menoa di Borneo ngena chara ngulih ke kayu enggau pengawa pemansang (Direpot: Michael Sheridan, Far East Correspondent, dikeluar ke: 13 March, 2011)

Jako tesau nya sebengkah ari pengawa ti diator dikena bala raban conservationist rampa menoa enggau bala raban penyakal ngemadu ke perintah 30 taun Kepala Menteri Sarawak ti kaya-raja nya, Abdul Taib Bin Mahmud, 74.

Kampong jerung tropic tunga ke barat-laut Borneo diatu udah rusak amat ketegal pengawa ngulih ke kayu kampong, lalu sebengkah-sebengkah bansa jelu ti jarang dipeda kitai nyau bisi ditemu udah pupus. Sungai-sungai nyau kamah laban rachun ari kilang enggau kebun sawit dandang besai, lalu angin iya pan penoh asap enggau debu. Dulu menya kampong ba Borneo tu endang palan pengeraja asal – ti endor kitai ulih meda bungai ti pemadu besai, jelu enggau burong ti nyelai, tang diatu semoa utai nya udah nadai agi. Pengerusak rampa menoa ba Borneo udah nyengala amat dipeda ba pengusut penyampau jelu mayas dalam kandang 50 taun tu. Dikena nganti kampong jerung, diatu nyau udah bisi kebun sait dandang besai dibuka dini-dini pelilih menoa. Kayu-kayu ti manah sereta tinggi rega udah ditebang magang ulih kompeni-kompeni ti bulih lisin ari Taib, lalu bisi sekeda kompeni nya endang bisi kaul ba belanja enggau sida Taib sebilik. Sida sebilik endang ditemu bisi kaul enggau kompeni-kompeni ti ngerusak rampa menoa. Tekat-tekat hidro ti besai-besai pan nyau ngenyai ke pemanah rampa menoa, tang pengeraja sida Taib sebilik nyau betambah. Raban orang asal mega nyau diburu ari menoa diri, lalu bisi sida ti angkat pindah nya nerima pampas ti mimit bendar.

Diatu sebengkah-sebengkah orang bansa asal baka bansa Penan napi tuju pengidup ti enda tentu. “Bansa Penan kena pangka dua bengkah pekara ti dikumbai orang ‘green’ energy – kuasa ari hidroelektrik enggau kuasa ‘bio’,” ko Miriam Ross, ari Survival International.

“Pekara ti balat ngasoh ati irau nya perintah Sarawak udah mansut ke penerang pasal perambu sida ti deka nambah dua kali lipat pemesai kandang kebun sawit  dandang besai datai ba taun 2020 ila.”

Di Sarawak bisi sebengkah raban orang diri sebilik ti bekuasa ari atas perintah enggau kompeni-kompeni dikena sida ngulih ke pengeraja ari rampa menoa. Kenyau ari taun 1981, rakyat udah meri mandate soh Abdul Taib Mahmud, mangku pengawa nyadi kepala menteri, menteri pekara wang enggau menteri perambu pengawa enggau pengatur pengeraja asal menoa, ti nadai dibantah sapa-sapa. Dokumen-dokumen ti difail ke di KL bisi nunjuk ke bini iya nya siko pemegang share ti pemadu besai dalam kompeni besai di Sarawak, Cahaya Mata Sarawak (CMS).

Pengeraja sida Taib Mahmud sebilik udah mega diayan ke ba dokumen-dokumen minta sarak ba bulan nyin kemari ti endor menantu iya, iya nya bini Mahmud Abu Bekir, 48. Bekir mega nyadi sapit pengerusi dalam CMS.

Bini Bekir, Shahnaz Abdul Majid benong minta pampas/gantirugi sarak £82 juta, ti endor Shahnaz madah ke diri kala kena penyati enggau diperinsa ke Bekir sechara fizikal enggau mental sekumbang seduai iya ti jadi melaki bini suba.

Bala kaban-belayan enggau bala kroni Taib mega bisi ditemu megai share tau ke nyadi kaban dalam enam buah kompeni ngulih ke kayu ti bulih penguntong nengah lisin kampong ti diberi perintah. Sekeda ari bala sida nya nyengkaum sekali petunggal iya empu ti nyadi pengerusi ba sebuah ari kompeni-kompeni nya, lalu enggau manang ula sida sebilik, iya nya Bomoh Hj Ahmad Su’ut.

Di menoa luar, Taib bisi bekaul enggau 49 buah kompeni, nyengkaum kompeni reta tengkira di Britain, Canada enggau di Amerika Syarikat, ti bisi udah ditemu bala pemansik ti bekereja ke Bruno Manser Fund ari menoa Switzerland.

Tabung Bruno Manser nya, ti ngangkat ke nama siko orang aktivis rampa menoa bebansa Swiss ti udah lenyau ari Borneo kenyau ari taun 2000 suba, udah ngasoh raban-raban ti ngelaban penyalah makai suap enggau duit haram, awak ke ‘nyidi enggau mansik lalu ngunchi semua reta Taib sebilik’.

Tabung nya mega udah minta bala pemansik FBI ngator pansik atas pemati Ross Boyert, 60, ti kala bekereja ngemata ke reta tengkira Taib di menoa US, lalu dalam nya iya mega meri sekeda penerang, ti enda lama udah nya endor iya ditemu parai dalam sebuah bilik hotel di LA, direpot ke mati munoh diri, nyengkabong pala diri ngena kambut plastic.

Nengeri London udah nyadi ke siti palan kempen Sarawak ti endor bala orang ngendoh ketegal takut diemba di menoa Sarawak empu. “Kami bisi nerima jako emba deka munoh kami,” pia ko Clare Rewcastle, siko orang ti ngemata ke pejalai laman web Sarawak Report, ti mega ipar Menteri Besai Britain ti dulu suba, Gordon Brown.

“Ba pengidup aku tu, utai ti terubah dikingat ke aku, lalu bala bakih aku ke terubah nya ari menoa Sarawak, lalu aku mansang besai ba kandang menoa ti manah rampa,” ko Clare nambah. “Maia aku nemuai ke Sarawak 35 taun udah nya, pemanah rampa menoa ti udah narit ati aku suba, diatu nyau betukar nyadi sebengkah zone penusah.”

Bala munsoh politik Taib pechaya amat diatu meh maia ti betul endor ngelaboh ke Taib. Tang perintah di KL agi beguna ke sukong Taib ba ikas parlimen dikena ngalah ke munsoh politik sida. Menteri Dalam Menoa di Malaysia kala udah madah enggau ati ti ringat ngagai Rewcastle lalu besemaia bala polis “deka ngambi tindak” atas iya – sebengkah jako emba ti dikelesay ke Rewcastle.

Perintah Sarawak lalu apin nimbal peminta ti ngasoh sida meri komen.

  • anak iban sedar

    perihatin gi urang menua tasik ka menua sarawak ka ketegal penyai taib.nama kebuah urang semenanjung nadai engkebut pun,baka ka ngembendar ka pengawa taib aja.

11 Mar 2011

ABU BEKIR – BERAPA REGA IYA?

This post is also available in: English, Malay

ABU BEKIR – BERAPA REGA IYA?

Leboh maia Abu Bekir nyau diator bebini, iya tau ngumbai diri empu orang ti bidik laban indu ti diambi iya ke bini nya endang siko indu ti bepelajar ikas MBA ba pekara belanja (finance). Sereta iya jadi enggau Bekir indu nya lalu diasoh sida Bekir sebilik nyadi siko ari raban pengarah dalam kompeni CMS. Taja pan baka nya, diatu Datin Sri Shahnaz Majid, ti udah ngeluar ke surat saman sarak, endang agi tau ngaga kira-kira ke atas reta tengkira anak Taib Mahmud nya – lalu diatu bini ti disarak ke iya nya minta gantirugi sarak RM400 juta!

Nitih ke dipadah ke bala lawyer ti landik ba ngator pechara sarak leboh ditanya Sarawak Report, bini tau minta 30% ari reta tengkira ti digumpol seduai melaki bini nya maia ke agi begulai.

Tang saman tu enda patut dikereja diatu laban diatu sida Taib sebilik baru deka ngator Abu Bekir nya bediri ba sitak Sadong Jaya, sebuah sitak DUN ti disadang sida selamat. Nambah ke nya, Menteri Besai Najib Razak mega disadang deka nemuai ngagai sitak nya kena 19 March tu ila. Taja baka nya, bala pengundi patut nemu enggau silik semoa pekara ti bekaul enggau pendiau enggau pengidup orang ti deka didiri ke sida ngari ke sitak sida nya!

Ulah enggau pendiau ti jai?

Shahnaz nya menyadi penyanyi jazz ti tebilang, Sheila Majid, dikerindu ke orang maioh, madah ke Abu Bekir kala ngemedis sereta menyati iya. Nitih ke sekeda repot iya, Shahnaz madah ke laki iya nya kala mukut iya ba pala, moa enggau ba mata; nyipak, nerajang rusok, enggau nyekak iya. Iya mega madah ke diri kala disembur Bekir ngena jako-jako ti jai sereta kamah. Pengasar ti dikereja Bekir ba bini iya nya, enda jauh bebida ari pengasar ti dikereja Sulaiman soh pangan indu iya maia dalam bar di KL dulu ari nya.

Bekir enggau Shahnaz nikah dalam taun 1992 lalu diatu bisi anak lelaki siko ti beumor 17 taun, lalu seduai dua nya nadai agi begulai enggau pangan kenyau ari 2001 suba. Shahnaz madah ke laki iya nadai pulai ke rumah agi kenyau ari 1999, lalu laki iya mega enggai mending ke jako tangkan iya, suah enda ulih kangau ngena telefon lalu regas amat begulai enggau indu-indu ke bukai. Sereta Bekir udah bebini ke dua kali, iya nya enggau siku indu balu biak ari menoa Russia, iya lalu terus ngelengka ke Shahnaz enggau anak seduai nya.

Reta tengkira


Pekara ti tau narit ati bala maioh iya nya pekara ti bekaul enggau reta iya, lalu baka ni Bekir bulih reta ti endor iya tau didiri ke nyadi wakil rakyat ba sitak baka ti diperambu BN. Shahnaz madah, Bekir ngembuan beberapa buah rumah besai enggau kandang tanah ti beribu-ribu hektar pemesai, baka ti kala dipansut ke dalam Sarawak report dulu ari tu. Bekir mega bisi tujoh buah kereta besai sereta berega mar-mar. Bini iya mega madah ke reta kunsi seduai iya nyengkaum 15 buah kompeni, ti nyengkaum Cahaya Mata Sarawak (CMS) enggau Sarawak Cable Bhd, lalu pia mega duit simpan seduai dalam KWSP enggau ASB.

Sarawak Report bisi bejalai ke pansik enggau sidi atas sekeda reta baka ti dipadah ke Shahnaz nya.

CMS


Abu Bekir nya siko Pengarah enggau pemegai share dalam CMS, sama enggau menyadi iya Sulaiman. Enti nitih ke pematut iya, CMS nya sebengkah kompeni awam ti bulih reta sida ari pengeraja asal menoa Sarawak ti maju bendar ketegal ari pemutus runding Kepala Menteri empu. Tang taja baka nya, maioh agi share dalam CMS dipegai semua sida Taib Mahmud sebilik.



Dalam repot taun 2009 CMS, dia indai Bekir, Laila Taib, nya endang pemegai share ti pemadu maioh nyentuk ke iya parai (tang diatu kami belaba ke semua share Laila dia udah dipedua entara Bekir seduai Sulaiman). Baka ni meh chara niang Laila tau bisi share ngemaioh nya, taja iya ditemu ukai asal ari orang bedagang, lalu maia iya jadi enggau Taib kelia pan nadai mega iya ditemu bebai ke pengeraja tama ngagai ruang bilik sida Taib, lalu pia mega dalam CMS iya enda kala nerang ke pemaioh share diri!


Abu Bekir enggau Sulaiman enggau mega sida sebilik ti bukai nya pemegai share ti pemadu maioh dalam Majaharta. Tiap share dia diatu berega RM3 siti-siti, lalu sebarang orang indu ti udah bulih ikas pelajar MBA ba pengawa kira-kira tentu nemu ngira sechara kasar share dia manggai RM150 juta.


Kepala menteri rindu bendar meri kontrak-kontrak ti besai-besai soh CMS dikena iya nentu ke share dalam CMS dudok ba rega ti manah. Borneo Convention Centre Kuching (BCCK) nya sebengkah ari projek CMS ti besai ti diatu udah endor ngator aum kimpin BN ba ujong minggu nyin kemari. Polisi ‘pemansang’ ti ditengkebang Taib empu endang amat meri pemansang ke iya empu enggau sida sebilik ti dalam CMS aja. Kelimpah ari ti udah mujor ngaga BCCK nya, diatu sida Taib nya benong ngator semoa pejalai pengawa ‘pemansang’ ke projek besai SCORE iya, ti deka nyadi ke ‘injin duit’ sida sebilik!

Kompeni Titanium Management ti enggi Abu Bekir udah nerima bagi tanah-tanah ti besai amat di menoa Sarawak, lalu ke semoa tanah nya dibayar ngena chara “payment in kind” (tau ke dibayar ngena sebarang chara, enggau sebarang maia, nitih ke peneka Bekir)!

Baka ti udah dipansut ke dalam Sarawak Report mega, semoa tanah ti diterima Bekir bisi 70,000 hektar pemesai, sebaka enggau pemesai sekayu pulau Singapura, terima kasih meh soh apai iya empu, Taib Mahmud, ti mega siko menteri ngemata ke pekara pengeraja asal dalam menoa Sarawak.

Udah penyarut dibai ngagai court, dia orang maioh diatu nyau nemu semoa tanah ti diterima Bekir nya endang tanah enggi orang! Apai iya, Taib Mahmud, diatu nguji ngubah undang-undang tanah, tang semoa nya nadai pemujor magang. Ba minggu nyin kemari kompeni Polar Horizon enggi Bekir udah ngeluar ke siti notis dikena ngangkat ke bala orang ari tanah NCR sida empu, tang kompeni nya nyau nyurut ke diri dulu ketegal lawyer Chee See Howe ti ngari ke bala Iban ti bempu tanah nya udah mai penyarut nya ngagai court, lalu kes nya bisi ditabor ke nengah Radio Free Sarawak enggau ba endor bukai. Bala kuncho-kuncho Bekir mega bisi madah ke orang ba endor nya ngena jako, sida enda majak ngangkat ke orang dia, taja pan sida nadai nerima sebarang notis.

Enggau betambah pemaioh penyarut tanah baka ti udah-udah nya, kami belaba ke Datin Shahnaz enda tau enda ngubah mimit rega tanah-tanah ti ditagih iya ari laki iya dalam court ila!

Reta enggau pengeraja di menoa tasek!


Mahmud Abu Bekir Bin Abdul Taib nya siko ari bala Pengarah lalu siko ari orang ti ngepun ke kompeni Sakto Corporation di Kanada, ti diatu berega bejuta-juta dollar UD.

Bekir udah nudok ke kompeni bekunsi enggau menyadi indu iya, Jamilah, enggau menyadi apai sida, Onn Mahmud, leboh maia iya baru beumor 20 taun lalu mega benong iya belajar ba kolej. Ba taun terubah kompeni nya bejalai ke pengawa, sida beranak ke puku $7 juta dikena sida meli 400 buah rumah di Ottawa, Kanada. Diatu kompeni nya bisi ruang opis, kedai enggau rumah ti besai-besai sereba moden ti berega beratus ribu dollar. Udah nya Bekir lalu mangku pengawa nyadi siko ari bala pengarah enggau pemegai share ti pemadu maioh dalam kompeni Sakti International ti didudok ke di US dalam taun 1987. Bekir nyadi presiden ba kompeni nya nyentok ngagai maia iya nyerah ke soh menyadi iya, Sulaiman, ti maia nya benong besekula ba sebuah university di San Francisco. Reta dalam Sakti International enggau kompeni-kompeni ti bekaul ba pelilih menoa nya dia berega datai ke bejuta-juta dollar mega. Baka ke udah kala dipansut ke dalam Sarawak Report dulu ari tu, apai sida, Taib Mahmud endang orang ti megai share pemadu maioh enggau chara belalai! Abu Bekir nya semina dipadu mangku pengawa dikena ngelamun apai iya, laban apai iya enda tau ngulih ke pengaya sekumbang iya ti nyadi menteri nya. Tang apai iya lalu nadai kala udah nerang ke baka ni bala anak enggau menyadi iya ulih megai lebih ari 50% share dalam semoa kompeni ngari ke iya!

Sarawak Cable

Kompeni tu, ti dikorporat ke dalam kandang 1990 suba, udah lama ngetu bejalai ke pengawa nyentok ngagai taun 2008 leboh iya enggau ngejut dipeda idup baru lalu regas udah bekau iya ngambi-alih Universal Cable (Sarawak) Sdn Bhd, ti ngaga sereta ngeluar ke kabel-kabel elektrik kuasa tinggi. Dalam Sarawak Cable dia Abu Bekir mangku pengawa nyadi Pengerusi lalu megai 36% share, lalu petunggal apai iya empu, Hamed Spawi, megai 20% share. Diatu rega share, baka ti kala udah didagang ke dalam bulan November nyin kemari, berega RM1.29. Nya alai diatu kami ulih nganggar ke 43 juta saham ti dipegai Abu Bekir dia manggai RM55 juta.

Semoa pengawa dalam kompeni nya enda tau enda dipejalai ke enggau lanchar laban meda menoa Sarawak diatu nya sebengkah menoa ti besai bendar beranak ke puku ba projek enggau sida. Ba bulan November 2010, kompeni nya diberi projek ngaga sereta ngeluar ke kabel elektrik betransmisi tinggi ti bepuku ke belanja RM98.68 juta ari Sarawak Energy Bhd, sebengkah dagang kunsi enggau Sinohydro ari menoa China!

Diatu Abu Bekir bin Taib tentu nadai penanggol mujok bala pengundi iya laban iya endang ditemu orang maioh siko orang ti pemadu kaya, sebengkah chara ti endang selalu dikena bala kaban-kaban politik BN dikena ngulih ke sukong. Bekir tentu deka nunda chara apai iya ngulur ke empat-lima ratus ringgit dikena bebeli ke undi bala pengundi. Tang, orang maioh patut berunding dalam-dalam dulu, ari ni Bekir nya bulih duit lalu sekali ke asil nya ari tanah NCR bala rakyat enggau reta menoa Sarawak. Enti saut nya “ya”, bala pengundi enda tau enda nimbang ke diri empu, sekali ke sida ngundi enggau betul dikena sida ngambi pulai semoa reta rakyat ti udah kala dirampas ari sida!

10 Mar 2011

undi tebasau! – pengamu raziah ba sitak taib

This post is also available in: English, Malay

undi tebasau! – pengamu raziah ba sitak taib


Taib udah siti kandang tanah ti amat besai ba sitak bepilih (ngundi) iya empu soh sebengkah kompeni ti dikemata ke menyadi iya empu, Raziah Mahmud! Kompeni Sawardu Plantations undah diberi tanah di pelilih menoa Balingian 8,000 hektar pemesai kandang taun 2004 – 2009. Maioh ari tanah ti dirampas nya sekeda ari kandang kampong galau Setuan Besar, di sebengkah kandang endor semak Bintulu. Sebagi ari laloh tanah dia nya endang enggi bala orang asal ti endor tanah-tanah NCR sida kena rampas!

Nitih ke penerang ari opis Pengerejista Tanah, orang siko-siko ti mutar ke semoa pekara nya Raziah, menyadi indu Taib Mahmud empu! Raziah bejalai ke semoa pengawa kompeni ti mit ari opis Kumpulan Parabena, ti endor iya enggau Taib megai maioh agi share dia. Baka ti kala udah dikeluar ke dulu ari tu, semoa pengawa kompeni-kompeni ti bejalai ke pengawa dalam opis Parabena nya ngena siti aja lumor telefon, lalu pemaioh semoa tanah ti dikemata ke sida nya tau disebut ke lebig besai agi ari sebuah pulau Singapura dalam kandang beberapa taun aja. Lumor telefon ti dikena ba opis Kumpulan Parabena ba Jalan Sungai, Kuching nya 082-423-877.


Bala raban mensia diburu baka ti udah-udah


Salinan surat ti bisi ba opis pengerejista terang amat ngayan ke bala pemesai opis nya agi ngadu ke pengawa ngeluar ke pala tanah sementara, tang peara nya terang amat enda nagang kompeni Saradu tama ngagai kandang endor tanah-tanah NCR dalam taun 2007. Kompeni nya ngerenchah jalai enggau kampong di endor nya. Bisi 4 buah rumah panjai Iban enggau beberapa bengkah tumpuk orang Melanau dituntong penanggol tu. Matek Anak Geram madah ke Sarawak Report pasal kebun mulong ba Kuala Balingian, sebengkah kandang endor ti selalu endor sida begiga ke pengidup udah dirusak kompeni Saradu.


Nitih ke penerang ari seraban NGO bansa Melanau, iya raban bansa Taib Mahmud empu, bala orang Melanau enda diasoh mantai ke sebarang serebana tau ke bepinta ke pampas, laban bala penghulu enggau tuai kampung sida endang dibaruh kuasa Barisan Nasional. Sapa-sapa orang ari bansa Melanau ti deka mantah pengawa ngerampas tanah ti dikereja Raziah deka dikumbai ‘ngelaban pemansang diator perintah’. Baka nya mega, sapa-sapa sida ti deka ngelaban gerempu PELITA (iya nya sebengkah gerempung ti dikuasa LCDA, betuai ke Taib Mahmud) deka dikumbai ‘ngelaban pengarap Islam’. Pengawa Taib ti ngeruga pengidup enggau pendiau orang ti sebansa enggau empu nya seluan enggau pengarap Islam?

Kuasa undang-undang?


Matek enggau bala sida semenoa udah kala ngaga repot ba polis pasal menoa sida ti kena pasok Saradu, ti ditemu empai ulih mayar pampas ngagai sida ke bempu tanah dia. Taja pan repot udah digaga, tang repot sida nya enda dikiboh ke polis.


Udah sida mai pekara nya soh court dalam 2008, dia bala orang kampong dia lalu niri ke empang jalai dikena nagang lipan enggau lori tama ngagai ladang Saradu ti ditumboh ke ba menoa sida, ti lalu ngujong ke penyarut nyadi entara orang kampong enggau bala pengereja pengawa ladang nya. Matek lalu ditan ke polis betuboh 10 iko lalu iya mega disimpan dala lokap, lalu didawa ba court ketegal ‘nagang’ orang tama.


“Iya (Raziah) ngerampas tanah-tanah kami lalu enggau sengaja ngujong ke kami tu merinsa”pia ko Matek


Matek, 31 taun, bisi dua iko anak, madah ke Sarawak Report sereta menoa sida dia udah ditumboh ke kebun sawit bedandang besai pengidup sida dikeruga ari maioh segi, sungai nyau kamah, ikan nyau nadai agi, tanah nyau kamah sereta berachun laban rachun enggau baja ari kebun dandang besai nya. Matek nambah ke, udah kampong sida tawas kena tebang sida nyau nadai agi endor begiga ke pemakai. Ari nya iya lalu ngiga pengawa ke nengeri ti enggau ngator kimpin bala NGO, lalu ari nengeri din meh iya bekirum ke duit belanja soh sida sebilik. Sebaka enggau nasit iya mega, bala kaban-belayan iya ti sama ari kampong nya nyau ngeleka ke pengawa bumai betaun sida, diatu sida nyau ninggal ke menoa sida laban bekuli ba orang bukai di sebelah nengeri.


Tanah-tanah emperan ti enda besai lalu kengka’ ke tinggal nya pan udah mega dirusak – gambar ari satelit ngayan ke pengamat pengerusak ti nyadi ditu. Bala orang Iban ti kiroh nan ke menoa diri napi serang bala ‘apek bayat’ lalu pia mega kena emba bala polis sekumbang pengawa bechara. Beserimbai enggau nya pengawa ‘pemansang’ terus dipajak ke. Terang amat meh semoa pengawa enggau penanggol ke orang asal nya mai penguntong ngagai sida Taib sebilik. Sebengkah kompeni ti pemadu maioh share dalam Saradu nya kompeni Organic Treasure enggi Raziah enggau laki ketiga iya, Robert Geneid.

Endang enda ngalit ke ati – Raziah mayar gaji jauh mit ari setengah gaji puku!


Serimbai enggau nya, sitak Council Negeri Taib, baka ke ngelama tu, nadai tentu meda tau ke ngasai ke sebarang penguntong ari ‘pemansang’, tang lebih agi ngasai ke penekul enggau penanggol dalm pengidup. Matek madah ke kompeni kebun dandang besai sawit enggai ngambi orang asal bekereja. Sida rindu agi ngupah bala orang kereja ari menoa Indonesia laban sida ulih mayar gaji ti jauh mimit. Ator ti mayar gaji mit soh bala orang Indonesia nya nyau digaga sebaka ba semoa kebun dandang besai sawit di serata menoa Sarawak. Munyi ti diterang ke Matek, bala orang ti kereja nya semina nerima gaji puku’ RM9 sari, lalu deka ditiki ke ngagai RM15 sari enti orang nya udah lama bekereja dia! Penyampau ti baka nya jauh baruh ari RM22 sari baka ti disetuju, enggau diletak opis Konsulat Indonesia – reti nya BN udah melakang ke penemu enggau ator ti udah disetuju ke enggau perintah ari Indonesia, sebengkah menoa ti jauh kurang ba penatai pemisi, dibanding ke enggau menoa tu ti kaya-raja ba pengeraja asal menoa. Pengawa Taib ti rindu ngambi pengereja pengawa ari menoa Indonesia ari ti beguna ke penau enggau pengelandik bala rakyat diri empu nya tau ngemalu, laban orang ari Indonesia nya enda ulih enggai nerima batang gaji ti jauh kurang ari setengah gaji puku’ baka ti udah disetuju ke!

Nadai besekat?


Sarawak Report enda lantang bendar ati meda gaya penyumbong Kepala Menteri ngaga kaul enggau orang ti sama bansa enggau iya empu, ti endang seruran milih iya nyadi ke pengari sida. Umor iya ti nyau tuai nya udah nyadi ke penanggol iya maia mutar ke pengawa ti bekaul enggau politik, sekali ke empas pengelama 30 taun iya udah bekereja nya udah ngujong ke iya ngembuan runding ti ngujong ke iya ngereja sebarang pengawa sepeneka ati ba sebarang orang? Baka ti udah ditemu enggau didinga orang maioh diatu, Kepala Menteri nya ti suah udah alah bechara k ekes penyarut tanah NCR belaban enggau orang bansa asal ti endang empu tanah. Tang iya lalu enda jera ti endor iya majak ngapil ngelaban semua kes nya. Taja pan iya baka nya, iya enda ingat, laban bisi sebengkah agi court ti dikumbai orang Court of Popular Opinion ti ulih dikena mending ke apil iya lalu ngeluar ke pemutus (verdict) enda lama agi! Kes Saradu deka didinga di Miri empat-lima ti deka daatai tu ila. Serimbai enggau nya, lawyer Dominique Ng, siko pengari ADUN Kuching, ti diambi ngari ke bala Iban ari 4 buah rumah panjai ba kes ngelaban Saradu nya ti udah ngerampas tanah udah ngaga simpul penemu iya empu.

“Pengerangka enggau pengamu sida Taib sebilik nya nadai sekat, lalu udah ngelui malu. Sida nya deka majak enchuri, lalu terus enchuri, semanjai-manjai sida iya agi ulih enchuri, nyentok ke sida dibuai ari kuasa tau ke parai!”, pia ko Dominique madah soh Sarawak Report.


Diatu terang bendar meh Taib bisi pengarap ba jako keremba “enti kita enda nyukong kami, kami pan enggai ga nyukong kita”, baka ti kala dipansut ke isan iya empu George Chan, lalu arap ke jako ti munyi nya tau mai ajih soh sitak Council Negeri iya di Balingian tu ila, lalu beserimbai enggau nya mega jako ‘umpan’ ti deka meri bala rakyat RM100 sepintu ruang bilik bka ti disemaia sapit iya Alfred Jabu Numpang. Tang dalam kandang 30 taun udah bekuasa di menoa Sarawak tu, nama utai ti udah dikereja Taib Mahmud nya ba pelilih menoa Balingian? Anang iya enda ingat, menyadi indu iya Raziah nya semina ulih ngundi siti aja, lalu bala rakyat di Sarawak diatu ukai nya majak paloi, tang majak pintar-sepintar!

  • http://sarawaknews.wordpress timchoo

    Aku sapa. Aku Taib Mut, Siko da kaban, James Mut, Aku Tim Mut.

    Pama meh wai, angka tisih bisi kena sangkung nama MUT.

    Sinu meda bangsa kitai. Lebih gi utai di temu, balat agi ati ringat. Tang nadai ulih ngubah nya. Semina bangsa kitai badu milih YB kitai ari BN. Ukau sida jai, tang sida enda ulih mutar ke pemedis rayat. Laban Taib Mut nya lebih ari tuhan. Ia enda pechaya ka tuhan, ia lebih agi pechaya ka bomoh.

    Nya aja diatu.

    Tim Mut

  • Jack

    Gaga amat bini baru taib Mahmud empu harta ya ila ti Taib nya mati…..sigi udah dirancang Raziah utai tu…..ngambi senang agi ya ngambi tanah menua Sarawak…

7 Mar 2011

PENYERUNGKAI URAS DI KUCHING – PEKARA TI NGEMALU KE MENOA SARAWAK

This post is also available in: English, Malay

PENYERUNGKAI URAS DI KUCHING – PEKARA TI NGEMALU KE MENOA SARAWAK

Leboh Taib Mahmud nguna peluang iya maia aum besai BN ba BCCK ti endor iya mantah “bala orang ti buyan enggau pandai bula” ti suah amat ngelesay ke polisi ‘pemansang’ iya, Sarawak Report mega bepeluang bulih sekeda gambar enggau video ti direkod di Kuching.

Gambar enggau video ti direkod ti bisi diterima kami tu ngayan ke sekeda gaya pengidup orang ti beserungkai lalu begumpul ke uras ti endang bepanggai pengidup sida ba palan kitar semula uras ba endor orang engkah kereta Borneo Development Corporation (BDC) Kuching ti diempu Taib! Pengawa bala orang ti ngumpul uras nya ulih diperati ke kitai ninting hari, lalu palan nya semina 150 meter penyauh iya ari opis sekretari politik Taib, iya nya Abdul Karim Hamza, ti mega bekereja enggau ati lantang nyadi Pengerusi BDC nya.

Sarawak tu menoa ti pemadu kaya dibanding ke enggau menoa bukai, lalu orang ti nguan menoa Sarawak enda maioh tuboh. Taja baka nya bebilion-bilion ringgit asil ari kayu kampong enggau minyak menoa Sarawak udah diayan ke nengah pemanah rumah-rumah bala sida Taib sebilik enggau bala orang dagang ti bekunsi pengawa dagang enggau sida sebilik nya. Tang terang amat Taib enggai bekunsi ke pengeraja ari menoa tu ti ukai sebengkah ari polisi ‘pemansang’ baka ti suah amat disebut-sebut iya maia bejako ba moa rakyat. Kami bisi meda maioh agi bala orang ti ngumpul sereta nyerungkai uras, ti benong nganti kereta datai ngagai palan nya, datai ari Skim Pengentap Pendiau Stampin – sebengkah ari skim ti endor sida kala disemaia ke pengelantang pengidup ulih BN, tang baka ke udah-udah mega, jako semaia nya enda kala nyengenda.

Ba genturong Skim Pengentap Pendiau nya bisi diagih ke maioh plot tanah ti mit-mit, lalu siti-siti plot berega RM10,000, lalu sapa-sapa ti enda tebayar ke rega plot nya, iya enda bulih pala tanah ke plot nya, taja pan iya enggau naka ulih begiga ke duit belanja tambah dikena ngaga rumah dia. Genturong nya betanah paya ti enda tau enda ditmbok dulu baru endor nya ulih meruan agi endor berumah, lalu ungkos nimbok manggai ngagai RM8,000, ti ngujong ke proses nguan endor nya tusah agi deka diulih ke. Maioh agi bala orang ti diau di endor nya begaji mit, tau ke endang nadai meruan batang gaji lalu sida ngasai ke nadai tentu peluang ulih mayar pulai rega plot tanah dia.

Sekumbang Kepala Menteri ti benong nerus ke pengawa ngerusak menoa tu ketegal ti deka ngemansang ke projek ‘pemansang’ SCORE iya, nyau ka bulih setengah juta iko orang menoa tu deka dipindah ke ngagai palan-palan pengentap pendiau ti baru, lalu bala orang nya patut berati ke repot ti diayan ke kami tu.

Enti dipeda ngena mata kasar, penanggol tu enda besai, ti endang nekul enggau nanggol beribu iko orang dikena ngawak ke pengawa ‘pemansang, tang Taib Mahmud endang enda iboh ke pekara nya, lalu iya mega bisi dipeda datai enggau penuh seregah ngagai BCCK ngena kereta besai iya, Rolls Royce.

Tambah mega anak iya ti benama Rahman Taib, siko orang politik ti kala disebut-sebut nyadi ke ganti iya, nadai datai ngagai aum BN nya laban tembu ngelantang ke ati bemain lunchur salju di menoa tasik (baka ti udah diayan ke iya empu nengah laman Facebook iya). Tang Sarawak Report ngasai ke sida patut ngeluar ke repot pasal pemedis pengidup bala orang ti begumpul sereta beserungkai ke uras nya, ke lebih agi semanjai minggu nyambut Hari Orang Indu Dunya tu.

Semoa orang ngambi bagi – orang ti indu pan enda tinggal begiga ke belanja kena ngidup ke diri


Kami ngasai ke kami patut bejalai ke pansik atas bala orang ti begumpul sereta beserungkai ke uras, ke lebih agi bala orang indu ti duduk semanjai hari nganti ba palan kitar semula di kandang nengeri Kuching.

Nuratiqah binti Abdullah nusi soh kami iya tu beumor 34 taun lalu bisi 3 iko anak ti beumor 8, 9 enggau 15 taun. Sida sebilih udah nguan palan pengentap pendiau nya tang lalu enda bulih lisi nguan sementara (TOL). Ketegal penanggol nya iya enda bulih bekal kuasa elektrik enggau bekal ai masok ke rumah iya. Leboh malam hari rumah iya semina tampak ketegal tenggau menthol ti ngena kuasa ari bateri kereta.

Sebagi ari rumah iya bisi udah rusak laban angus 3 minggu tu udah. Pekaian sekula bala anak iya abis angus magang. Laki iya enda meruan bekereja lalu sekali-dua kal mega enggau iya begumpul sereta beserungkai ke uras ba palan kitar semula nya. Mentua lelaki iya ti enda bepengerai diau begulai enggau sida sebilik. Iya nerima bantu ari opis pengelantang pendiau ninting bulan.

Nanong binti Sidek beumor 37 taun. Sida sebilik nguan palan pengentap pendiau nya mega. Iya ngidup ke siko anak lelaki 12 taun ti beumor 12 taun enggau anak indu 9 taun, ti ngujong ke iya bulih bantu RM200 sebulan. Iya udah ditinggal ke laki iya 4 taun tu udah.

Sida tiga menyanak tu diau begulai enggau apai iya, ti dirampit sakit kemi manis enggau penanggol ba jantong. Nanong kala bekereja ba kedai kopi, tang iya ngemadu ke diri laban ti enda tan ninga jako putap orang ti empu kedai nya. Iya udah ngumpul lalu nyerungkai uras ba palan nya kenyau ari taun 2008 suba.

Kiat anak Resat beumor 69 taun. Iya mega datai ari Kampung Stutong Baru ti sebagi ari Skim Pengentap Pendiau Stampin nya. Skim nya bisi 1154 iti lot tanah. Dulu ari tu Kiat kala kereja ba endor orang ngaga rumah sengelama 6 taun, tang 4 taun ke udah iya ngidup ke diri ba palan kitar semula BDC nya.

Laki Kiat bepanggai pengidup ba kerusi roda udah iya ti kena sakit stroke, ti ngujong ke sida sebilik bulih duit bantu RM60 sebulan sengelama 2 taun lalu diatu udah nadai agi diterima sida. Kiat bisi 5 iko anak ti udah besai magang; 3 iko anak lelaki ti nadai meruan kereja (siko ari sida 3 nya udu ngirup arak), 2 iko anak indu ti sama udah berumah tangga ti semina sekali-dua nyurung ke belanja mantu indai sida nya.

Enda jauh ari palan nya endang bisi genturong rumah ti besai-besai. Rumah apartment Village Grove enggi anak Taib ti benama Abu Bekir Taib pan semina 300 meter ari palan nya, lalu Bekir mega endang seruran dipeda mansa bala sida ti ngumpul enggau nyerungkai uras dia.

Pengeraja Abu Bekir nya ukai pengeraja ti ulih ngena tulang urat iya empu, tang ari kontrak-kontrak enggau konsesi-konsesi ti diberi apai iya, Taib Mahmud, ngena chara belalai.

Tang Taib ditemu enda sinu sereta siru ke bala indai-indai orang ti mar amat ngidup ke diri bepanggai ba palan kitar semula uras nya.

Betty anak Gelangyan ti beumor 22 taun baru tama ngagai raban pengumpul enggau penyerungkai uras ba palan nya. Iya mega datai ari Kampung Stutong Baru. Indai Betty ti beumor 43 taun udah enda ulih bekereja ngiga belanja laban kena serang sakit gila babi, ti ngujong ke sida sebilik mega bulih duit bantu RM70 sebulan tang diatu duit bantu nya udah diketu ke.

Betty bekereja ba kedai kopi enggau gaji RM400 sebulan dikena melanja sida sebilik enggau dikena melanja pelajar menyadi iya ti beumor 19 taun. Dikena iya ngiga belanja tambah, Betty mansar diri begumpul ke lalu beserungkai ke uras ba palan nya..

Bala orang ti begumpul ke uras ba palan nya bisi ditemu nyilih uras enggau beras ti ulih sida nyanda ba sebelah rumah enggau kedai semak palan nya, taja pan bisi uras ti meruan agi dibai sida pulai ke rumah diri empu.

Ke tebal agi bala sida ti ngelawa palan nya datai ngena bas, 5 km ari Kampung Stutong Baru. Pekara ti baka tu endang ukai ‘pemansang’ ke rakyat baka ti diseradak ke Taib leboh ti bejako ba BCCK ti endor iya mai kaban BN iya ‘ngelaban enggau naka ulih’ bala penyakal.

Hipni bin Bahdi, beumor 35 taun ti datai ari Kampung Tabuan Hilir bisi 4 iko anak; 12 taun, 6 taun, 4 taun lalu anak iya ti bunsu baru beumor 3 taun. Anak iya ti lumor 3 ke rampit sakit untak lalu nya ti udah naban ke nyawa anak iya nya ba bulan April taun nyin kemari.

Hipni nerima duit bantu elaun bala anak iya RM300 sebulan. Kelimpah ari ti melanja bini iya (34 taun) Hipni mega ngidup ke indai iya 64 taun enggau menyadi iya beumor 28 taun ti kena serang penyakit jantong beluban. Leboh maia malam Hipni ngiga belanja tambah bejual satay ti endur iya bulih urong RM25 selemai.

Pendiau enggau pengidup bala orang ti ditusi kami ditu nya sebagi ti mimit amat ari rakyat menoa Sarawak ti tinggal ari arus pemaju enggau pemansang’ 30 taun baka ti disebut-sebut BN. Di menoa Sarawak diatu bisi 10,000 iko orang ti ngentap ke pendiau diri nyadi setinggan, lalu agi maioh sida ke bukai nya udah lenyau tanah pesaka ketegal ti ngawak ke pengawa ‘pemansang’. Nyau ka semoa sida nya ngasai ke pemar ba belanja maia ngentap ke pendiau diri ba endor ti baru, lalu perintah mega nyau nadai ngayan ke penyinu ti endor bala orang nya dipinta bayar ti tinggi, lalu nadai di semaia kereja ti meruan.

Tu meh reti demokrasi ti bendar!


Enti Taib sekali agi diberi peluang bekuasa lalu endor iya deka nerus ke projek SCORE iya nya, udah tentu meh bepuloh-puloh ribu iko rakyat menoa tu deka napi pemar pengidup baka pendiau enggau pengidup bala orang ti ditusi kami di atas tu tadi. Tang, laban BN lalu enda mujor ngerejista sebagi ari tiga bagi sida nya nyadi pengundi ba endor ti baru, dia bala sida nya ila nadai peluang ngundi!

Ba siti ari genteran jako peransang ari Taib, ti endor iya nunda jako Abraham Lincoln, “Perintah rakyat, ulih rakyat, ke rakyat”. Iya ke bendar, ninting iko rakyat Sarawak diatu udah ngelala, Sarawak tu diperintah sida Taib sebilik aja, ke Taib sebilik aja lalu orang bukai endang enda diberi peluang sama enggau sida ngemata ke menoa tu!

4 Mar 2011

FILEM DIKENA NGINGAT KE NIANG ROSS BOYERT

This post is also available in: English, Malay

FILEM DIKENA NGINGAT KE NIANG ROSS BOYERT

Bala orang ti ngayan ke bantah enggau pengeringat ti begempuru ba moa opis FBI ba Abraham Lincoln di nengeri Seattle kena hari Empat 3hb March tu tadi, endang diator nyerimbai minggu bantah dunya (entarabansa) dikena mantah 30 taun penyalah makai suap ti dikereja Kepala Menteri Sarawak, Abdul Taib Mahmud. Taib ti beumor 74 taun nyadeka ngintu taun ke-30 iya udah nyadi menteri kena 26hb March tu ila, lalu iya terang bendar agi deka minta pilih ba maia ngundi ti deka diator enda lama agi.

Rumah endor opis FBI nya sebuah ari beberapa buah reta pengeraja Taib di menoa Amerika Utara ti dikemata ke beberapa iti kompeni lalu beungkos US$80 juta, ti endor Ross Boyert udah bekereja enggau sida Taib sebilik dalam pengelama 12 taun nyentok ngagai taun 2006 nyin kemari. Kompeni-kompeni nya bisi bekaul enggau sebuah reta ti besai amat di menoa Ottawa, Canada ti bisi portfolio beungkos beratus juta dollar, lalu bisi mega bekaul enggau sebengkah agi kompeni reta di London ti ngemata ke reta tengkira ti beungkos beratus juta pound. Kelimpah ari nya, sida Taib sebilik mega bisi reta pengaya di Australia lalu bisi kaul dagang di serata dunya tu.

Ross Boyert tu meh siko orang ti meri penerang soh Sarawak Report ti madah ke Taib endang orang ti beempu sereta bekuasa penuh atas semoa reta pengeraja iya. Tu meh penerang ti deka dilamun Taib, tang Ross Boyert udah ngayan ke pemendar ti disukong ngena surat-surat penerang. Ngelama tu kami selalu minta Kepala Menteri nya ngamat ke, tau ke bebula cherita enggau berita tu, lalu mega minta iya empu nerang ke baka ni iya ti mangku pengawa nyadi Kepala Menteri nya dikemendar ke undang-undang menoa tu ngulih ke reta tengkira enggau pengeraja ngelui ari patut (taja iya semina nerima gaji bulan beberapa puluh ribu aja).

Ross Boyert kala ngumbai diri empu endang pangan soh sida Taib sebilik lalu madah ke diri kala betemu enggau Kepala Menteri enggau niang bini nya, Laila Taib. Ko Boyert, Taib nya meh orang ti ngemata ke sereta bekuasa penuh atas semoa pengaya enggau pengeraja iya empu. Boyert mega enda nemu semoa rumah ti dibeli Taib nya ke bendar iya dibeli ngena duit ari asil penyalah makai suap enggau asil udah ti ngerusak rampa menoa ba menoa iya empu di Sarawak.

Tang taja baka nya, Boyert udah tekelanjor enggau chara iya empu ti nyadi pemeri berita enggau pemeri cherita pasal pengawa salah tau ke pengawa belalai Taib sebilik. Sida Taib sebilik udah ngena kuasa undang-undang ba atas Boyert ti ngujong ke Boyert nyau nyadi siko orang ti ditinggang penekul bankrap, nadai agi ruang bilik sereta nyadi orang ti seranta. Iya enggau bini iya, Jonni, bisi kala udah dikeduan sereta diemba-emba sida Taib sebilik sepemanjai ti bechara ngelaban sida Taib nya. Ba bulan Sepuloh taun nyin kemari, iya nya beberapa minggu udah iya ti meri penerang soh kami, dia iya ditemu mati enggau nyelai, lalu pemati iya dikumbai pemati laban kena bunuh ti endor pala iya dibalut ngena beg ba sebuah bilik dalam motel di Los Angeles.

Kami sempat ngerekod video Ross Boyert sebilik lalu video tu meh dikena kami masa iya. Diatu kami ngayan ke video tu dikena kami ngenang sereta ngingat ke iya ti udah berani meri kami penerang pasal pengawa enggau pengeraja salah sida Taib sebilik.

  • http://google matek

    taib mahmud mega bisi siti kilang aluminiun (PRESS METAL SARAWAK BHD) ti dilalai ke ia ba menua Balingian, jalai Balingian-Mukah. kilang nya digelar urang rumah panjai kilang maut. setegal mayuh urang udah bebadi. kilang nya mega nda ditemu perintah federal. pengudah kilang nya beroperasi semua utai tanam urang rumah panjai nadai ulih tumbuh. kebun nyiur tauka kelapa ke udah ngeluar ke asil semua mati magang. urang rumah panjai nadai ulih ngambi tindakan nama-nama, laban opis ke bekuasa udah dikempuk TAIB MAHMUD magang…..TAIB MAHMUD TU RAJA LANUN DI MALAYSIA…..HAPUSKAN KERAJAAN LANUN TAIB MAHMUD TU…..UNDI MEH PEKATAN RAKYAT BA PENGAWA BEPILIH TI DEKA DATAI..ARAM BERUBAH…………….

4 Mar 2011

SULAIMAN TI BELI’!

This post is also available in: English, Malay

Kitai ulih nyangka siko ari orang ti beberita enda datai ngulu’ aum besai BN ti diator Taib ba rumah Borneo Convention Center Kuching tu ila, iya nya anak Kepala Mentri empu, Sulaiman Taib. Taja pan bakanya, Sarawak Report ulih mansutkan pemendar ti madah ke Sulaiman ti dipetenah ke udah mati suba, diatu berita nya bula magang.

Kami tau ngumbai Sulaiman ti ngayan ke pemeli diri laban iya udah mandang ke gambar-gambar iya empu ba Facebook! Anak Kepala Menteri tu, ti rindu agi ngena nama Rahman di menoa Amerika Utara, diatu nyau dipeda bebula ke berita ti madah ke iya udah parai baka ti nyadi buah mulut bala orang di nengeri Kuching! Ari gaya baju ti dikena rangkah ti begambar ngimbai iya nya, kami ulih nentu ke Sulaiman diatu diau di Canada!

Ba sebengkah post iya dalam Facebook, ti ulih dibacha semoa 1,591 iko bala bakih Facebook iya, dia iya udah ditemu madah ke gaya pengerai diri empu, ti endor iya ditemu ngelari ke diri kira-kira lebih setaun tu udah. Ba sebengkah post dalam laman Facebook iya kena 15hb February, dia iya dipeda ngaga sebengkah jako penerang

[Ya, aku gerai sereta agi idup diatu. (Semina bala orang ti beli aja ka ngemesai ke berita angin. Idup meh enggau chara pengidup kita empu!!!)]

Kaban Parlimen ti ngari ke Kota Samarahan ti beumor 42 taun nya, nyambut penudok iya ari apai iya dalam taun 2006, endang seruran ingat ke bala pengundi iya dia enda nemu kini penunga iya! Ba sebengkah agi post iya dalam laman Facebook iya, dia iya madah ke soh bala bakih iya benung diau di Ottawa, Canada, lalu berupai bendar enda ibuh ke sitak Parlimen enggau tanggongpengawa iya ti nyadi pengari dia.

Beberapa bulan tu ke udah Sulaiman kala dipeda mindah kin-kitu di nengeri London, nyengkaum maia iya begulai makai enggau bala menyadi iya lalu enggau menyadi apai iya mega, di Soho, empai lama iya ti bisi dipeda tama ke dalam rumah sida sebilik di Hyde Park. Enti baka nya, amat bendar meh Sulaiman diatu benong ngasai ke pengelantang pengidup iya ba menoa orang. Tang iya endang nadai agi dipeda ba rumah Parlimen di Malaysia lebih setaun tu udah udah iya ti minta diri badu nyadi Sapit Menteri Dagang Temuai. Iya mega nadai dipeda di sebelah-belah nengeri Kuching, nyengkaum maia apai iya ti nikah empai lama tu udah. Taja pan iya enda nurun bekereja bejalai ke tanggongpengawa iya ti nyadi menteri, tang iya meruan nerima gaji bulan menteri iya di menoa orang! Diatu semoa pengawa iya dipejalai ke Idris Buang, siko sekretari politik ke apai iya, lalu diatu tiap iko bala pengundi iya seruran nganti diri ti betemu enggau iya lalu betanya ke bemacham-macham bantu ari iya! Enti Sulaiman nya orang ti kereja ba opis tau ke ba kedai, tentu boss iya nanya iya nama kebuah iya lama udah enda nurun kereja. Bala pengundi iya pan tau meh betanya munyi nya ba iya!

Sekumbang iya ti ninggal ke pengawa iya, Sulaiman agi ulih ngaga kaul enggau betanya berita ari bala bakih iya nengah laman Facebook, ti dikena iya mansut ke runding enggau penemu iya ke luar. Iya ngena laman Facebook nya dikena iya mantai ke sekeda randau iya ti endor iya mantah penemu orang ti ngumbai iya lari ari pengawa. Tang siko-dua ari bala bakih Facebook iya udah ngayan ke pasal penungga Sulaiman, lalu enggau nya Sarawak Report lalu ngayan ke sekeda jako randau enggau penemu Sulaiman ti dipansut ke iya ba laman Facebook iya nya.

Kelimpah ari ti ngelantang ke ati nengah Facebook, Sulaiman mega dipeda nguji nyakal berita angin ti udah ngumbai iya dirampit sebengkah penyakit ti nyelai, lalu nya udah ngujong ke iya ninggal ke pengawa menteri iya, lalu iya mega bisi meri licha mimit pasal pemendar soh bala bakih iya!

Kami deka nanya nama kebuah anak Kepala Menteri nya enda ngamat ke jako licha diri empu, lalu mansut ke pemendar nengah media ti meruan sereta menuku agi? Iya tentu ulih ngena media arus perdana ti endang dikemata ke apai iya empu, lalu ukai berupai beli’-beli’ berandau nengah laman Facebook iya? Nama reti ke bendar pasal pemendar ti ko nuan nya, uchak Sulaiman? Nuan endang siko orang ti tebilang ti udah dipilih rakyat, lalu bala pengundi nuan empu patut nemu pasal nuan, pengawa enggau penunga nuan.

Enti kaban Parlimen udah milih deka idup enggau chara enda ditekul pengawa ti berat, nama kebuah Sulaiman enda ngemadu ke diri ba sitak Parlimen ti udah milih iya, lalu ngawak ke pengawa bepilih-mit diator dikena nukar iya? Nya pan iya udah ditemu enda peduli ke tanggongpengawa diri agi, ti nyadi pengari ba sitak ti udah arap bendar ke iya suba. Apai iya empu tentu ulih ngator pengawa bepilih-mit dikena nukar iya!

Minta bantu pia?


Diatu terang bendar meh Sulaiman nyau udah suntuk runding. Sarawak Report sigi deka belaba ke ulah Sulaiman nya endang ari ator enggau asoh apai iya empu. Tau ke, engka Sulaiman nyau nangi ke apai iya, ti ngujong ke iya ninggal ke menoa tu?

Kitai sama-sama tau meragam ke Taib deka nurun ke pengawa iya ngagai Sulaiman, bedudok ari chara-chara Taib ti benong kasak-kasak ngiga sapa orang dalam BN ti patut nganti iya! Aum besai BN ba Borneo Convention Center Kuching tu ila tentu enda rami baka ti dikedeka ke semoa orang ti datai kia, engka meh Sulaiman tak ulih enggau ngenyit ngayan ke diri ba moa orang maioh maia baum nya ila!

  • orang sarawak

    Cukup Besai PENULAH taib, cda sebilik & bala "ulun2 + sapit2" ya nya ila & ti ka datai! Sigi pendiau @ untak taib sebilik gila ka mati ketegal reta dunya! BESAI & BISI BALAS PETARA ngau dik taib – ulih dik ngerakar rakyak, beambi ka tanah & beempu ka duit @ reta menoa Sarawak tapi semina siti aja, SEPUT dik taib baka mensia bala maioh, sekali sintak sekali kesuh ngujung dik PARAI ngau DOSA!!

    • http://www.ayamayaschapan.blog aya mayas chapan

      yahooo….. Taib bedosa besaiii… Taib antu kanji….. +Endang amat Taib makai darah rayat ia empu enda salah salah baka antu lemetak.

  • expriate

    Suliman nya sakit Aid kaban

  • darabunsubulan

    Patut ke enda Sulaiman nadai diau di menoa Sarawak tu???? Nyadi wakil rakyat tang nadai diau ditu. MESTI bisi something wrong ba ruang bilik sida lalu ba ia empu!!!!…..enda patut ga bala pengundi ia ba sitak ia dia agi pechaya sereta arap ke ia. Apai ia ke ka parainya meh bendar amat cover anak ia ke nyadi bedusnya!

  • darabunsubulan

    Ninga berita dalam radio pagi tadi, pedis amat ati aku. Taib ngumbai dir empai ka nyurut ke diri ari betanding laban maioh pengawa sereta perambu ia bedau tembu lalu deka dip[ejalaika ia sebedau ia ngemadu ke diri ila ko iya. Ukai perambu pemansang tang perambu ka ngaya ke sida sebilik sereta perambu ka nambah ke reta sida sebilik sereta perambu deka nerumpak reta enggau duit rakyat.

1 Mar 2011

Ketu ke penyalah makai suap ngulih ke kayu kampong! Minggu Bantah Entarabansa

This post is also available in: English, Malay

Ketu ke penyalah makai suap ngulih ke kayu kampong! Minggu Bantah Entarabansa


Sehari tu tadi tengah-tengah nengeri London udah nyadi panggau endor bala orang ngayan ke bantah sida ba ikas entarabansa, ti nyerumba Minggu Bantah Entarabansa, beserimbai enggau 30 taun Taib udah nyadi menteri. Bala orang ti ngayan ke bantah enggau pengeringat diri nya ba moa indu opis kompeni Taib iya nya Ridgeford Properties ba Central London. Bala orang ti enggau ngayan ke bantah nya datai ari pupu bansa ari Malaysia, kelebih agi ari Sarawak empu enggau mega ari Britain, ti sama bela ngenatai ke pesan jako bantah sida soh Taib. “Umbas meh pengelama 30 taun nya”! Jako-jako pesan ti ditulis ba kain-kain rentang enggau poster-poster bisi dikena maia ngayan ke bantah nya lalu pia mega siko ari sida nya ngelulu ke diri baka jelu mayas dikena ngingat ke bala pengarang berita ngambi ke meri sukong ti diguna bala orang asal di Sarawak enggau jelu-jelu dalam kampong enggau babas di Sarawak ti napi penanggol ketegal pengamu Taib!


Bantah ti ngena chara alus sereta likun nya endang diperambu sereta diator dikena ngingat ke pengelama 30 taun Taib udah nyadi menteri, dikeingat ke ninting taun kena 26hb March. Kepala  Menteri ti udah tuai bendar nya kala didinga madah ke diri agi deka minta pilih ba pengawa-pengawa ngundi ti ka datai tu ila – iya ngambi siko indu ti biak bendar nyadi ke bini kedua iya dikena ngayan ke iya nya agi regas bendar bejalai ke pengawa. Taja pan baka nya, tang dunya diatu benong meda sereta merati ke beberapa iko tuai dunya udah mupok-mupok tumbang dalam pengawa rakyat ti ngayan ke bantah sida lebih agi ba pelilih menoa di Timur Tengah, lalu enggau basa ti besai kami ngasai ke diatu Taib patut meh nyurut ke diri ari pengawa politik iya lebih agi iya empu ti udah beumor 75 taun nya sereta enda tentu bepengerai.


Rambaijako-rambaijako peransang


Sekeda lekajako ti ditulis ke ba atas kain-kain rentang enggau poster-poster endang nyayan ke penemu enggau runding sereta tinjau bala orang ti ngayan ke bantah sida soh Taib, sebengkah pengawa ti enda ulih diator di menoa Sarawak empu, tang diator di menoa tasik: “Beku ke reta-tengkira sida Taib”, ko munyi siti ari jako pesan ba kain rentang, ti tau mega dikena mandang ke reti pekara ti nyadi ba Mubarak, tuai menoa Eygpt enggau Ben Ali ari Tunisia. “Bebasa ke Hak-Hak Orang Asal”, “Selamat ke kampong Borneo”, “Selamat ke Rampa Menoa Sarawak”, “Ketu ke Pengawa Ngulih ke Kayu atas Tanah-Tanah Orang Asal” enggau “Ketu ke Penyalah Makai Suap Ngulih ke Kayu” nya sekeda ari rambaijako-rambaijako peransang ti dikenatai ke soh Taib di Sarawak saritu tadi.

  • sarawaknatives

    Tau enda iboh kitai selalu berandau ba internet tu bakih , manah agi kitai nurun sama-sama ke Kuching kena 1 mei 2011 ba mua rumah Raja Rambut Putih. Diatu meh maia kitai mandangka pemerani kitai. Iga ga kitai alah laban niang aki – ini kitai suba ke nadai sekula ??????

    Ngagai bala bakih enggau kaban di menua orang , sukung meh kami , lebih-lebih agi kita ke bekerja di office. Ni asai sepi kita ( Dayak – Iban ) , ni ngumbang peninggi pangkat ulih kita bekerja ba opis perintah ??? Sapa boss kita ?? Bakani gaya anak kita ba pelajar sekula, bisi ngembuan pemandai tauka nadai ?? Bisi kereja ti meruan sida anak kita ??

    Ti nadai , aram meh kitai sama-sama nyukung penemu Orang Baru dalam politik di Sarawak.

    CHANGE WE MUST !!!!!!