21 Apr 2011

Kepala Penchuri ngelakar pengawa bepilihbesai!

This post is also available in: English, Malay

Kepala Penchuri ngelakar pengawa bepilihbesai!


Ba pengujong minggu nyin kemari, sekeda bala orang udah ngereja sebengkah pengawa enda salah-salah baka raban penchuri ti tama lalu ngelumpoh ke semua perengka di menoa tu, lalu udah nya melakang ke peneka rakyat Sarawak ti maioh agi.

Bala sida nya udah ngatur pengawa sida baka orang ti merambu pengawa ngerampas istana, ti nyengkaum sida diri sebilik, bala dukun sida enggau bala orang ti talok ke sida ti sama udah ngelakar ba pengawa ngitung undi. Udah nya enggau enda mukai-mukai sebedau pukol 10.30 malam nya, sebedau tembu pengawa ngitung undi ti penudi, sida udah mai Kepala Menteri niki opis Tuan Gabenor ngambi ke iya ngangkat sumpah malam nya, taja pan penyarut ba pengawa ngitung undi bedau temu pengujong.

Enti bala orang ti merambu pengawa nipu nya ngumbai diri udah ngereja pengawa nya enggau chara ti betul ba mata adat menoa tu ke Taib, sida iya saru penemu. Semoa rakyat Sarawak endang nemu, pengawa ti dipangku Taib baru nya sebengkah pekara ti bekaul enggau nipu lalu bala penyukong iya udah suntok bendar penemu sereta putus pengarap dikena sida ngelamun pengaya bebillion-billion ringgit ti udah dirumpak sida ari menoa tu.

Sarawak endang udah berubah, sekali ke sida rindu tau ke enda!

Bala orang maioh ti begempuru ninga ke cheramah ti bisi udah diator lalu penyampau mensia nya maioh sereta enda disadang, baka ti diatur di serata Sarawak udah terang bendar nunjuk ke bala pengundi di Sarawak endang deka ke ubah.

Pengawa cheramah ti pemadu besai dalam cherita lama menoa Malaysia tu udah diator di Kuching lalu terang bendar ngayan ke pengasai ati tiap iko orang ti mending ke cheramah nya, taja pan sida diemba raban penerit undang-undang FRU ari asoh Taib tang sida puntan nagang orang ti datai bebala maioh nya.

Tang, cheramah-cheramah ti diator BN berupai bendar puntan. Diatu Sarawak udah berupai bendar deka berubah, lalu tiap iko rakyat iya nemu pekara tu. Taib empu pan nemu mega pasal pekara tu.

Peneka bala rakyat ba tengah nengeri ti besai-besai ti endor Taib enda berani nipu, lalu nya kebuah raban penyakal mujor bendar numbang ke BN.

Tang Taib nipu ba endor bukai, lalu ditemu bebendar amat deka menang ba pengawa ngundi tu enggau chara salah guna kuasa iya ba atas bala rakyat iya ti idup seranta. Menteri Besai Najib Razak mega ditemu bisi bekaul lalu patut nerima jako kutok enggau jako bantah ari entarabansa laban iya udah ngemendar ke penyalah makai suap dikena BN sekumbang pengawa ngundi tu.

Najib Razak endang patut dikutok lalu dibantah. Sarawak Report udah dibai raban pemerati politik ti bukai ti benong berati ke penyalah ti chukop ngemalu dalam cherita lama politik Malaysia, lalu ngeripot penyalah nipu nya ngagai Komisyen Pengemata Pengelantang Mensia di UN di menoa Geneva, lalu kami mega deka meri semoa penerang ti patut ditemu UN nya.

Kami deka mansut ke semoa penerang

Taib, laban ke tebilang nipu ba pengawa bepilihbesai, lalu nya kebuah iya nyadi ke perati bala orang, lalu semoa pengawa iya ke sekali tu udah direkod kami. Diatu kami benong begumpol ke semoa macham penerang enggau ripot pasal pengawa iya enggau bala BN iya. Kami deka minta pengawa bepilihbesai dikereja baru ba maioh kerusi ti udah dipetanding ke nya kemari.

Sehari tu tuai PKR, YB Baru Bian ti siko ari tiga iko kaban PKR ti udah menang, taja pan udah napi pekit ti balat, udah ngaku endang bisi pengawa nipu dikereja ba maioh endor. Taja pan baka nya, penyakal agi ulih menang 41% ari ke semoa undi di Sarawak – sebengkah pemujor atas 21% kerusi dalam DUN Sarawak!

Baka ni chara pengawa nipu dikereja?

Taib ngena adi ipar iya Gertie nyadung duit ngagai bala pengundi!

Kami udah nerima penerang-penerang pasal adi ipar iya empu, Gertie Chong (iya nya balu niang Arip bin Mahmud) nya siko ari orang ti diasoh iya nganjung duit dari Sibu dikena beduan lalu ngemba bala pengundi.

Gertie ditemu udah nyerah ke duit ngagai bala pengereja pengawa ke parti PBB ngambi ke bisi diagih-agih RM1000 ngagai ruang bilik orang ti endang lama udah ditinggang penyeranta, lalu maioh ari sida nya bepanggai ba ai ujan ti ditani sida ke guna sida besari-sari.

‘Pemansang’ baka ti ditebah Taib udah ngujong ke sungai ti endur bala rakyat iya begantung idup udah kamah – lalu enggau nya, tentu sida deka ke Taib nya alah ba pengawa bepilihbesai ti baru tembu tu tadi.

Tang ipar iya Gertie udah nyuap bala pengundi RM1000 ke sebuah ruang bilik! Enti ba pengawa bepilihbesai ti dulu ari tu, bala rakyat disuap ngena semina RM50 aja! Tang serak tu penyampau suap udah niki lalu tu ngayan penalok orang ba iya nyau kurang bendar.

Bekaban enggau Shin Yan

Ari ni penatai duit nya? Duit nya datai ari kompeni Shin Yan. Kompeni nya sebuah kroni ngulih ke kayu kampong enggau bekebun bedandang besai ti endang bepanggai ba lisin enggau konsesi ari Taib, ti udah ngujong ke taukey iya, Ling Chiong Ho siko orang ti bejalai ke tungkang di Sibu, ti kala bekereja enggau kompeni Achipelago Shipping enggi Onn Mahmud beberapa taun ti udah, diatu udah nyadi siko orang ti begelar multi-jutawan.

Nya kebuah, Shin Yan enda tau enda mantu Taib ba pengawa bepilihbesai. Seagi-agi Taib bekuasa, seagi nya bantu Shin Yan diguna iya – bantu ti dikumbai betul ke bala samseng. Perati ke ba konsesi enggau lisin kebun bedandang besai ti diterima sida ari Taib, nengah pejalai pengawa ti belalai ba opis Taib.

Shin Yan nya pemegai share ti pemadu maioh dalam Sarawak Oil Palm Berhad, ti sebengkah kompeni dagang kunsi enggau perintah Sarawak. Ngena runding enggau penemu ti pintar Taib udah netap ke kompeni nya bejalai ke dagang ngati ke diri lalu nyadi sebengkah kompeni awam dalam taun 1990 lalu Shin Yan udah dikemendar ke meli lebi ari 37% share dia. Belaboh ari nya Sarawak Oil Palms udah ngemesai ke agi pemaioh tanah sida ngagai 65,000 hektar, ti endor 35,000 hektar udah ditanam pun sawit di menoa Sarawak.

Gerald Rentap nya anak Sapit Kepala Menteri Alfred Jabu (ti bisi mega share dalam Sarawak Oil Palms) mega nyadi siko ari bala orang ti megai share ba SOP. Kelimpah ari Rentap, menyadi Taib empu, Onn Mahmud mega bisi sama megai share nengah pengari iya, Shea Kin Kwok ti udah kala ditemu bekaul enggau skandal ngangkut kayu ke menoa Jepun ti dipechara ke dalam court menoa Jepun.

Tang konsesi enggau lisin ti diterima Ling Chiong Ho nya jauh besai agi ari nya. Surat-surat penerang baka ti disimpan dalam opis Pengerejister Tanah baka ti udah dipansut ke dalam Sarawak Report dalam bulan March bisi ngayan ke  enda kurang ari 75 iti lot udah diserah ke ngagai maioh bengkah kompeni ti dipejalai ke Ling Chiong Ho nya.

Danum Jaya Sdn Bhd,  Linau Mewah Sdn Bhd, Mazama Plantations Sdn Bhd, Shin Yan Oil Palm Sdn Bhd, Sarawak Oil Palm Bhd, Dataran Danum Sdn Bhd, Danum Sinar Sdn Bhd, Dataran Seping Sdn Bhd, Linau Sinar Sdn Bhd, Selangau Plantation Sdn Bhd, udah bulih tanah enggau rega ti mimit bendar.

Bisi kira-kira 90,000 hektar tanah udah diambi di Belaga lalu dibuka Taib dikena ngaga tekat hidro-elektrik Bakun. Shin Yan kala udah dikutuk bala raban NGO laban bulih lisin enggau konsesi ba endor nya enggau enda bebasa ke pengelikun enggau pengelantang raban bansa asal nguan menoa nya.

Nengah opis pengerejister tanah kami mega bisi tetemu ke kandang endor ngaga kebun dandang besai ti diterima Shin Yan  ti diperambu endor ngaga tekat-tekat Baram (13,000 hektar) enggau Murum (16,500 hektar).

Lalu sitak bepilihbesai Balingian enggi Taib pan enda dikelaung ke mega.

Ling Chiong Ho udah bulih maioh bendar untong ari konsesi enggau lisin di kandang menoa Mukah enggau Bintulu.

Enggau nya, duit ti dikena Taib nyuap bala pengundi endang datai ari pengawa iya enggau kroni iya ti beambi ke tanah-tanah orang bansa asal nya empu! RM1,000 nya maioh amat ba bala orang ti suntuk enggau seranta. Tang duit ti nyampau nya tentu nadai reti enti Taib udah ngemansang ke tanah-tanah orang dia enggau chara ti enda nyiping sida lalu dikena nentu ke sida tau bulih penguntong ari tanah-tanah sida empu nya!

Gertie ti pengerampas tanah


Gertie nya siko ari orang ti megai maioh share dalam maioh kompeni kroni ke Taib. Iya mega bisi share ti maioh dalam Jaya Tiasa bekunsi enggau Taib ti udah nya lalu nyual kompeni nya ngagai Tiong Hiew King ari Rimbunan Hijau Group. Gertie mega siko ari raban pengarah lalu megai saham enggau Taib dalam kompeni Mesti Bersatu (ti bisi share ba Royal Mulu Resort) enggau Miri Properties (ti bisi share ba hotel Marriot Miri), entara sekeda ari kompeni-kompeni nya. Kelimpah ari nya Gertie enggau Taib mega bisi share dalam Lanco Plantations.

Gertie endang tau dikait ke ba maioh pengawa dagang enggi sida Taib Mahmud ti benong ngasai ke pengelantang ari pengawa politik di menoa Sarawak, tang pekara ti ngaul Gertie ba mantu Taib ba pengawa bepilihbesai tu tadi ukai utai ti tau ngasuh kitai tekenyit – iya ke bendar, RM1,000 nya ukai penyampau ti besai ba Gertie, enti dibanding ke enggau penguntong ulih sida ari pengawa dagang sida ke ila-ila.

Samseng Taib ngena chara samseng ngulih ke pemenang dalam pengawa bepilihbesai


Sarawak Report tetap deka begumpul ke penerang ti bekaul enggau chara Taib enggau BN iya ngulih ke sukong bala pendundi dalam semoa sitak dalam kandang beberapa hari tu. Tang ripot kami ngagai UN deka nyengkaum pekara-pekara ti dirintai ke kami ditu:

- Kerusi bala pengari endang udah ditentu ke sekeda orang aja ti ulih dikuasa iya. Di menoa pesisir bisi 470,000 iko orang bansa asal enda ulih ngundi ari pemaioh 2.5 juta iko rakyat menoa Sarawak. Ko Taib, pengawa ngerejister sida nya mar amat dikereja laban sida nya diau pepar lalu jauh di ulu sungai. Taja pan iya munyi nya, iya mudah amat ngulih ke kayu kampong ari kandang endor ti diuan bala orang asal nya!

- BN ngena chara ti kamah dikena sida bulih 77% kerusi dalam DUN semina ngena 55% undi aja, lalu nya ti ngujong ke sida dikumbai ‘simpanan tetap’ di menoa Sarawak. Bala Pakatan Rakyat semina mujor bulih 41% undi (taja pan udah ditipu) semina bulih 21% ari penyampau semoa kerusi dalam DUN.

- BN rindu besemaia sereta ngemesai ke projek-projek, nyengkaum Menteri Besai empu, ti sama-sama enggau ngator kempen. Pengawa ti baka tu endang ‘makai suap’ lalu mega sebengkah jako emba ke bala pengundi ti deka ngujong ke bala pengundi enda diberi sebarang utai enti sida ditemu enda ngundi BN.

- Salah guna undi pos. Semina raban orang ti bekereja ba perintah aja tau ngundi nengah undi pos, lalu sida nya endang dipejal ke ngundi BN magang. Undi pos mega dikena nguntong ke sebengkah-sebengkah sitak, lalu ukai ari endor ni penatai siko-siko pengundi nya. Undi pos ulih mega dikena nambah ke dua kali lipat pemayuh undi siko-siko pengundi, ambi ke banding, undi ari bala sedadu, udah nya bala sedadu nya tadi lalu dianjong pulai ngagai menoa diri ti endor iya diasoh ngundi baru (kali kedua)! Ngeluar ke undi pos semina ba maia ti suntok sereta tekul dikena nambah ke tally undi BN, ti endang sala ba undang-undang.

- Ngena raban samseng dikena ngemba bala pengundi awak ke ninggal ke palan endor ngundi.

- Salah guna ba SPR, nyengkaum pengawa nukar palan endor muai undi, ti jauh ari pendiau bala pengundi. Ngelalai ke peti undi, ngambi ke bala agent enda nemu sekali ke peti undi udah diserungkai, enggau ngenan ke Form 14 ti dikena ngamat ke peti undi. Madam ke suis lampu lalu ‘ngitung’ undi dalam petang.

- Nyekat sereta mutus ke arus telefon binching awak ke bala penyakal enda ulih meri berita ngagai pangan diri pasal pekara ti benong nyadi ba hari ti ngundi nya.

- Nyuap bala pengundi ngena duit sehari sebedau pengawa ngundi. Meri duit mimit dikena ngamat ke kad pengelala lalu udah nya mayar laloh enti bala pengundi endang amat-amat udah ngundi pengari BN! Ari pemesai suap ti tinggi ba pengawa ngundi sekali tu, udah nyata bendar BN udah enda dikerindu ke rakyat.

Senadin – sebengkah kes tipu udah direkod dalam cherita lama pengawa bepilihbesai di Sarawak

Bisi beberapa iti chunto ti disereta ke enggau penerang pasal pengawa samseng BN, tang ba minggu tu ila, Sarawak Report deka nganjung kes Senadin tu ngagai UN. Uji peda laman web tu:

http://www.youtube.com/watch?v=TyiSfJ0DzVM&feature=player_embedded#at=24

- PKR udah dulu 1000+ undi semak pengujong pengawa ngira undi.

- Tang enda mukai-mukai semoa lampu dalam stadium lalu padam

- Penanggol kuasa elektrik nya lebih sejam lalu bala SPR majak ngira undi lalu enggau enda disadang-sadang undi tau betambah.

- Pengari ari SUPP lalu ditetap ke ‘menang’ enggau majority ti mimit 58 iti undi udah ti ditambah enggau undi pos.

- Undi ‘rusak’ 158 iti pulai ngagai PKR.

- Bala pemesai SPR mengkang enggai ngitung ke dua kali, taja pan kes nya endang patut diitung ke dua kali.

Enggau chara tu, undi bala orang 20,000 iko ti udah datai begelumu ba cheramah PKR udah enda dikibuh ke, bebanding enggau pemimit bala orang ti ninga ke cheramah ti dipejalai ke George Chan.

Tetap enda sah


PR udah bebendar amat napi pengawa bepilih besai ke sekali tu. BN ari ikas perintah persekutuan udah mega bebendar ngena maioh macham chara dikena sida nentu ke Taib Mahmud ngenan ke kuasa sida. Najib endang deka ke Taib nyurut ke diri, tang iya agi ngiga chara baka ni ngasoh Taib badu. Sekumbang maia bekempen, Najib kala didinga madah ke Taib deka nyurut ke diri udah tembu pengawa bepilih, baka semaia-semaia iya enggau raban BN ke dipansut ke sida ngelama tu, iya nya semaia ti seruran baling. Taib nya enda sah. Iya empu nemu tu, Najib nemu lalu rakyat Sarawak pan nemu. Dunya mega deka nemu.

20 Apr 2011

PENGAWA BN TI NGELAKAR NENGAH RUANG SIBER!

This post is also available in: English, Malay

PENGAWA bn TI NGELAKAR NENGAH RUANG SIBER!

Baka ti kala didinga kitai, orang ti pengelakar nya endang ukai orang ti pandai sereta landik. Iya mega siko orang ti burok lalu ikas ulah enggau pendiau iya baroh bendar. Nyau kelama-lama – iya enda ulih tampak lalu deka puntan. Orang ti penipu deka suah agi besemak lalu enggau naka ulih nunda pengawa orang ti dikerindu ke iya lalu iya mega nemu orang nya endang jauh lebih pandai sereta landik ari iya.

Diatu BN nyau ngena chara ngelakar nengah ruang siber ti enda deka meri empas ngagai bala pengundi ti endang mupok-mupok ngenyauh ke diri ari sida!

Diatu BN dipeda nyau nemu diri sida iya benong napi penanggol laban pemaioh penerang pasal pengawa kamah sida ti diayan ke datai ke ujong taun siti nyin kemari. Ari ketegal ti bisi kereban internet sida ngasai ke diri enda tau enda bekereja bebendar agi taja pan ngelama tu sida lantang bendar bekuasa atas media-media penabor berita baka radio, TV enggau suratkabar dikena sida ngelakar orang. Diatu meh maia sida berasai tanggol laban mar sida deka nyangkal jako dawa enggau tudoh orang pasal pengaya ti salah enggi Kepala Menteri Abdul Taib Mahmud.

Ba pun iya kemari, sida udah diau jenoh. Tang udah jako telai bala orang nyau nyadi inggar-seinggar, ari nya sida BN lalu angkat ngesai ke diri dikena sida napi penanggol ti udah nyadi. Menteri Besai Najib Razak kala udah nangkan Kepala Menteri enti iya “enda mujor ba perang siber” iya mega deka alah ba pengawa bepilihbesai. Ari jako nya, BN lalu berupai besak nyedia ke diri napi perang siber, tang sida udah ngupah beberapa iko orang ngereja pengawa nya ke sida. Datai ke jam diatu, sida udah kelalu laun. Kenyau ari tengan bulan March lalu nyentok ke beberapa hari tu kejang deka bepilihbesai tu, BN Sarawak berupai bendar besak deka ngator diri napi perang siber, enggau chara begaga ke maioh bengkah laman web, tang udah nya dipeda baka ti ngemesai ke agi pengawa ‘makai-suap’ ti udah ngasoh sida nyadi kaya.

Chara-chara kamah enggi BN

Nya alai, ulih enda kini BN alah beperang ketegal penyumbong sida? Baka ni agi chara sida deka ngelalai ke semoa penerang ti udah diayan ke ngagai orang maioh lalu ti udah tegap dalam runding bala rakyat?

Utai ti udah dipeentaroh ke BN ngelama tu iya nya duit, sebengkah utai ti ba runding sida ulih dikena mutar ke semoa macham penanggol enggau penekul. Ari runding sida ti baka nya, sida ngena maioh amat duit dikena melanja perang siber sida nya. Nya kebuah, timbal sida ngagai semoa bansa tanya ti diayan ke dalam Sarawak Report, kitai sama merati ke penumboh maioh bengkah laman web, enda salah-salah baka penumboh kulat sepengudah ujan, ti dikereja raban sida betuai ke Ketua Penerangan Pemuda PBB, Abdul Aziz bin Adenan, iya nya anak Adenan Satem, ti mega anak petunggal Taib Mahmud.

Semoa laman web ti digaga sida nya enda salah-salah baka suratkabar Borneo Post ti jampat ngasoh bala pemacha leju macha pasal propaganda BN ba genap lambar suratkabar nya. Tang, pengawa ti ngasoh Aziz andal ati iya nya sebengkah laman ti digaga iya ti benama Sarawak ReportS. Munyi ko jako sema sekeda orang, ‘pengawa ngelakar nya sebengkah chara dikena masu moa diri empu’, lalu nya meh kebuah iya nunda laman web kami nya ti endor iya ngarap ke temuai ti macha isi dalam laman web nya ngumbai diri udah tama ngagai laman web enggi kami tu.

Pengawa BN ti nunda laman web kami tu endang tebilang amat dikena bala orang ti deka ngelakar dalam pengawa dagang nengah internet. Sida iya ngarap ke bala orang deka saru leboh maia ngiga sebengkah-sebengkah barang, ambi ke banding, injin basu, tentu deka ngiga laman web kedai ti endang tulin, tang sapa-sapa ti enda bidik deka tetemu ke laman web pengelakar ti tiru nya.

Tang enda mukai-mukai pengawa bebendar enggi Aziz ti ngaga Sarawak ReportS, laban bala pemacha tentu deka ngiga cherita ti sebaka, bala pemacha ti endang seruran tama laman web kami tentu deka diayan ke propaganda BN ti berupai amat – ukai berita ti dikedeka ke sida! Uekk!!

Tang, BN majak melanja ke duit ba pengawa-pengawa tu. Udah sida iya puntan, enda ulih nunda pengelebat temuai tama laman web kami, sida lalu mayar kompeni iklan Google awak ke nama laman sida duduk ba ikas pemadu tinggi lalu mudah ditemu sapa-sapa ti deka ngiga laman kami. Enggau chara nya laman sida dipinta bayar ke tiap kali orang tama ngagai laman sida nya.

Ba pengawa sida ti deka ngelamun penyalah diri nengah laman web sida empu nya, sida udah ngupah siko orang ti benama Todd Ash ari kompeni Easy Internet Marketing di Scotsdale, Arizona, USA (ti mega nyadi ke pengkalan kompeni Sterling Pacific, sebengkah kompeni ti nguasa pasal reta-tengkira ke kompeni Samling enggau enggi Taib).

Pengawa ti ngelaku ke pasal kereja-kereja iya, udah ngayan ke sapa Todd Ash nya ti bendar, ti suah ngumbai diri jutawan lalu suah didinga ngemba sebarang sapa ti mantah skim-skim jampat kaya iya, nyengkaum ngena ai ke ganti minyak petrol ke kereta, lalu nyentok ke pengawa bedagang ti bekait-kait. Uji peda laman iya ditu: http://toddash.com/

Nyedia ke diri deka beperang

Nitih ke gaya ti diperati ke semoa chara tipu enggau kelakar BN udah puntan magang. Beserimbai enggau nya, laman kami, Sarawak Report udah ‘ditiki’ bala pemacha enggau temuai ti enda disadang pemaioh, tang kami chukop sinu meda laman web ti digaga Abdul Aziz enda tentu ditiki temuai, lalu komen dalam laman iya nya pan, enti bisi, semina siti-dua aja (nya pan sida enda berani mega ngayan ke komen ti ditulis bala temuai sida).

Diatu, nyau datai ba minggu ti pengujong, kejang pengawa ngundi deka dipejalai ke di menoa Sarawak, BN udah nyerang laman kami sepenapat-inat, ngena chara serang ti besai agi ungkos, ti endor sida arap ke laman web kami tu enda ulih angkat agi! Kenyau ari beberapa minggu tu udah, Sarawak Report endang selalu ngasai ke diri bisi penanggol, ti nagang bala orang ti deka muka sereta macha isi dalam laman web kami tu. Kenyau ari 24 jam ti udah, chara serang sida udah ditambah ke balat agi.

Nitih ke penerang ari kompeni server ti endor kami ngengkah ke laman web kami tu, BN ditemu udah ngena sebengkah senyata ti dikumbai orang DDOS, ti endor sida ngupah robot-robot dikena nimbak server kami ngena  repik-repik software ti maioh bendar ti dikarap ke sida tau ngujong ke server kami tu padam terus. Chara serang ti baka tu mega kala dikena orang bukai ngerusak ke server WikiLeaks ti tebilang.

Chara serang ti baka tu semina ulih madam ke pejalai sebengkah-sebengkah laman web dalam beberapa jam aja, lalu ba maia nya, bala orang ti kena serang nya agi sempat mindah ke palan diri ngagai endor bukai, tang chara serang ti baka tu tau disema ke kitai baka serang anak mit! Kasih kita, BN, badu agi kita nyabak. Udah kita besai sereta tuai agi ila, kita deka nemu reti demokrasi ti bendar, lalu kita mega deka ngasai ke diri patut bemain enggau enda nyiping pangan diri, lalu nimbal jako bantah orang, ngena jako ti patut, ukai ngena chara ti kasar, mantap ari belakang, tau ke, baka serang anakbiak ti mit. Dikena BN empelas moa diri empu, sida iya ditemu udah melanja maioh amat duit dikena sida bekirum ke SMS dikena sida nangkan bala penyukong sida ngambi ke nemuai niki ngagai laman web sida (ti enda tentu ‘berapa’ nya)!

Julok ati diri

Beserimbai enggau nya mega raban kami dalam Sarawak Report endang ngaku diri teperindang meda gaya ulah enggau pendiau bala sedadu siber BN kenyau ari minggu-minggu nyin kemari. Tuju ati sida udah ngemuas ke tuju ati orang bukai ti nulong sida ngator serang sida.

Kitai sama nemu, semoa macham isu ti benong ngelingi pengawa bepilihbesai Sarawak tu sebengkah empas ti balat ba raban orang ti rebak dudi ila, tang dalam kitai ti bebendar ngereja pengawa kitai, bisi mega kitai bulih penemu ti baru-baru lalu kitai mega berasai teperindang.

20 Apr 2011

tekat bakun tau nganu nyawa! – penerang ekslusif pasal pengawa bekelimat!

This post is also available in: English, Malay

tekat bakun tau nganu nyawa! – penerang ekslusif pasal pengawa bekelimat!

Sarawak Report bisi nerima penerang ti amat ngenyit ke ati pasal pengelikun Tekat Bakun!

Nitih ke berita ari pemeri penerang kami, ti disereta ke iya enggau surat-surat penerang, gambar-gambar enggau sekeda video, udah diserah ke ngagai kami ulih siko orang Quality Controller ti kala udah bekereja enggau kompeni pengaga Tekat Bakun, ti madah ke pengirau ati diri pasal pengelemi Tekat Bakun ba senentang pengelemi tukoh tekat nya baka ti udah dikereja kompeni Sinohydro dikena ngelimat ungkos ngaga tekat nya.

Video ti penoh sensasi nya terang bendar ngayan ke bala pengereja pengawa benong nambah ke ai ke dalam lori enjin penyampur simen sebedau simen nya dipam masuk ngagai chuan tekat nya. Nitih ke penerang ti diterima kami, pengawa ti nambah ke ai nya endang patut ditagang, lalu pengawa ngemata ke mar dipejalai ke ketegal tubuh ti enda chukup, lalu ngujong ke pengawa nya diteju ke baka nya aja.

Baka ti udah ditemu, bala kontraktor ari menoa China nya bejalai ke pengawa sida ari tekan Perintah Malaysia nyentok ngagai taun 2009 dikena ngenyampat ke agi penembu projek nya, udah tekat nya napi beberapa penanggol ti ngelubah ke projek nya.

Pemuntan pengawa ba Quality Control nya ari runding ti ‘enda iboh’

Bakun diisi ai kenyau ari bulan Oktober nyin kemari lalu peninggi ai nya diatu udah datai ba ikas 15 meter baruh agi ari ikas maia iya patut penoh. Sebengkah kandang endor ti diisi ke ai nya bulih mesai pulau Singapura diatu udah penuh, lalu tekat tu endang ari ulu bepuluh ribu ruang bilik orang, nyengkaum kandang menoa Sibu.

Taja pan tekat nya dipeda udah tembu baka nya, maioh orang nyadang tekat nya deka nyadi sebengkah projek Gajah Putih ti enda ditemu guna ke bendar. Diatu semua pekara ti bekaul enggau tekat nya nyadi ke tanda tanya laban bepelasar ke chara tekat nya digaga.

Penanggol ti besai, nitih ke pemeri penerang kami, nya pemuntan bala Quality Controller ti enda ulih bejalai ke pengawa sida nitih ke ator ti betul.

Penyampau bala sida Quality Controller ti diambi bekereja ba tekat nya suba enda chukop lalu enda setipak enggau pemesai rampa kandang endor tekat nya didudok ke. Ari nya pengawa orang ti deka ngelaban ator ba nakar barang ti dikena ngaga tekat nya enda ulih dikemata ke enggau silik.

Sebengkah-sebengkah tekat enda tau enda digaga nitih ke ator pengawa ti udah dikira silik, kelebih agi ba pengawa nyampur simen ke guna dia. Pemanah simen ti dikena deka nentu ke penegap enggau pengelikun ba tukoh tekat nya.

Nitih ke penerang ari pemeri penerang kami nya, bisi dua bengkah pengawa ti salah ti sengaja dikereja leboh maia ngaga tekat nya. Terubah, bala kontraktor suah ditemu nukar gred simen ti tinggi sereta manah enggau gred ti kurang pemanah dikena sida ngelimat ungkos.

Kedua, leboh maia konkrit pra-champur nya dibai tama  ngambi ke dipam masuk ngagau chuan-chuan dalam tekat nya, dia bala pengereja pengawa bisi ditemu nyampur ai ke dalam simen  awak ke mudah dipam pansut ngagai chuan. Konkrit ti dichampur ai enggau enda betul takar semina deka ngelembut ke penegap simen nya. Enti iya tepeda ke pengawa salah maia nya iya suah ngerara, tang laban penyampau tuboh sida ti baka iya nya enda maioh nya alai simen ti dianjong ngagai tapak tekat nya ukai bansa ti manah ke penegap tukoh tekat.

Pemeri penerang kami nya bisi bekirum ke kami gambar enggau penerang bukai ti maioh, ti terang bendar ngayan ke ator pengawa ti salah ti endor bala pengereja pengawa suah bendar nambah ke ai ba champur konkrit.

Quality Controller nya madah ke pekara ti dikamat ke bala pakar pengaga’ tekat, sebarang ubah ba champur simen deka ngelemi ke penegap tukuh konkrit, lalu tau ngujong ke sebengkah projek nya nganu nyawa mensia maioh.


Bala boss ‘enda ibuh’

Pemeri penerang kami nya madah ke iya suah bendar ngeripot penanggol nya ngagai bala tuai-tuai iya dalam kompeni Sinohydro ti endor iya bekereja nya, nyengkaum maia sida ti bisi baum tiap pagi sebedau nurun bekereja. Tang ripot iya nya suah ke enda dikibuh ke bala boss iya.

Melakang ke pekara pengelikun nya pengawa ti tau mai penanggol ti besai agi ngagai tekat Bakun.

Dalam beberapa bengkah pansik kami, kami bisi tetemu ke penanggol ti enda tau diteju ke baka nya aja ba tekat Bakun nya.

Dr Andy Hughes ti nyadi pengari ke British Dam Society madah ke Tekat Bakun nya sebengkat tekat ti bekulit ke simen lalu isi iya dalam nyin batu ti gerah. Ba lubuk ari ulu tekat nya dilapik ke ngena singkap konkrit ti disambung-sambung.


Tu meh maia kitai bejalai ke pansik!

Udah beberapa taun Sinohydro enggau bala kontraktor sida melakang ke pekara pengelikun ti suah diripot ke bala Quality Controller ti enda maioh tubuh nya. Diatu tekat Bakun nya udah tembu, tekat nya pan udah diisi ke ai lalu cherita iya pan udah mega dipansut ke.

Tu ukai semina isu-isu pengelikun ti bekaul enggau projek ngaga tekat Bakun nya. Sebedau tekat nya digaga suba, kandang menoa ti deka endor nudok ke tekat nya ditemu enda tegap enggau kukuh, lalu penegap tanah di endor nya deka lemi agi enti penyampau ai ditambah ke. Renyang tanah ti mit-mit bisi kala udah direkod ba endor nya tang pekara nya enda dikibuh ke.

Bepuluh-puluh ribu orang diau nguan menoa-menoa ari ili tekat nya, nyengkaum nengeri Sibu. Enggau penemu ti enda ibuh ke semoa repot leboh ti ngaga tekat nya suba, pengelikun mensia maioh tentu deka dituntung penusah ti balat ila.

Sehari tu Sarawak Report sekali agi kena serang bala sedadu siber. Tu endang dikereja bala orang ti irau sereta nangi ke semoa penerang ti dipansut ke kami dalam laman tu. Ditu kami deka nangkan bala orang ti patut ninga sereta patut bejalai ke pengawa enggau atur di menoa ti endor sida bekuasa nya, belurus sereta ngemetul ke  semoa macham isu ti udah diayan ke kami ditu, lalu ukai seruran nguji deka mampul mulut kami.

8 Apr 2011

SULTAN ARI BINTULU ENGGAU PADANG BILUN DI BINTULU!

This post is also available in: English, Malay

SULTAN ARI BINTULU ENGGAU PADANG BILUN DI BINTULU!

Bala orang dagang di Bintulu benong nganti peluang diri bulih sebengkah kandang endor ti besai bendar ba tengah-tengah menoa nya ti benong nyadi ke padang penyangkai bilun ti lama.

Kandang menoa nya endang tanah awam, lalu pengelepas tanah nya dikuasa Kepala Menteri, ti nyadi Menteri Perambu enggau Pemansang Pengeraja Asal, ti mega nyadi Menteri Pekara Belanja, siko orang ti bekuasa ba menoa iya empu, Bintulu.

Enti dikemata ke perintah ti lurus sereta tampak, tanah ti berega tinggi nya tentu iya deka dijual sechara lelong ngena chara tebuka lalu syarat-syarat iya deka dilekat ke sama ke penguntong mensia maioh ti nguan kandang menoa nya.

Tang, penerang ti tau ngemedis ke ati, taja pan endang disadang bala pemacha laman Sarawak Report tu, kami bisi nerima sebengkah penerang ti madah ke Kepala Menteri udah nyerah ke selampor kandang menoa nya ngagai sebengkah kompeni ti dikerindu ke iya, ti mega endang kompeni sida sebilik – Naim Candera.

Diserah ke enggau rega ti pemadu baruh!

Pansik ti dipejalai ke kami ba Opis Pengerejista Tanah di Bintulu udah ngayan ke penerang pasal tanah ti besai rampa nya bisi dua iti plot 11,852 hektar enggau 2,841 hektar pemesai siti-siti iya, udah diserah ke enggau chara belalai ngagai kompeni Naim Candera ba bulan November 2008 nyin kemari.

Sewa tanah ba dua iti plot nya semina RM88,890 enggau RM3,409 ke setaun (enggau nadai begunakan timpoh lebih 60 taun ba surat pala tanah nya).

Rega premium tanah nya semina RM4 juta leboh maia pengawa bejual-beli dipejalai ke lalu direjista ti deka ngemudah ke Naim Candera bulih penguntong datai ke beratus-juta ringgit.

Pemeri penerang ngagai Sarawak Report madah ke leboh pengawa bejual-beli tanah nya dipejalai ke, dia sebengkah pemutus penemu ti pintar bendar udah dipesetuju ke, ti endor sebatang jalai pengangkat-penyangkai bilun, iya nya sebengkah awak enggi perintah Persekutuan, udah diperambu deka ditukar nyadi jalai dua-arus nuju palan nya.

Enggau nya, chara bebayar ke premium udah mujor bendar diseliah ke, ti endor rega ti bendar tanah nya mega enda dikiboh ke. Kedua iti plot nya, baka ti udah diletak dalam surat-surat perambu pengawa nya endang ditaga ke dikena ngaga palan dagang enggau genturong rumah, lalu kedua bengkah perambu nya mega diserah ke ngagai Naim Candera.

Siko orang ti udah nyadi perancang bandar, ti mega kaban dalam Lembaga Kemajuan Bintulu (ti kala mega nyadi siko ari raban pengarah dalam kompeni Naim Candera), iya nya Sylvester Ajah Subah, madah ke iya nemu enggau silik baka ni atur pengawa nya dipejalai ke, lalu nya meh kebuah diatu iya kempen nyadi pengari penyakal PKR ba sitak pengawa bepilih kandang menoa Dalat dalam pegai menoa Mukah. Iya mega udah nerang ke ngagai kami, iya nya pengelurus enggau penampak ba ator pengawa ngereja pengawa atas kandang menoa nya endang enda dikibuh ke:

“Orang bukai pan bisi ati deka ngambi bagi ngemansang ke kandang menoa nya. Tang, pekara nya mudah bendar. Perintah (Taib) endang udah bisi orang ti dikarap ke bejalai ke pengawa ngemansang ke menoa nya, iya nya orang ti endang dikerindu ke Kepala Menteri empu. Kompeni orang nya endang dikerindu ke iya, lalu bekaul rapat enggau iya mega”.

Bala orang ti dikerindu ke Taib

Hamid Sepawi nya siko orang ti rapat bendar kaul enggau Kepala Menteri, ti mega endang petunggal Taib. Hamid bekereja sama-sama enggau Hasmi bin Hasnan ti bejalai ke maioh bengkah pengawa dagang ti bekaul enggau pengawa kontrak enggau bekebun bedandang besai-besai di serata menoa Sarawak.

Kedua iko orang tu ti nyadi kaban dalam lembaga bala pengarah, lalu seduai mega endang bisi lebih ari setengah ari semoa share ba kompeni Naim Candera nya!

Seduai nya mega udah kala dirintai ke entara 30 iko orang ti pemadu kaya di Malaysia, nitih ke pemaioh share ti dipegai seduai dalam semoa kompeni ti dikuasa sereta dikemata ke seduai. Tang pengaya seduai nya tau dikumbai kitai endang datai ari kontrak enggau lisin ti suah udah diterima seduai iya ari Taib Mahmud.

Maioh bala pemeri penerang ke kami ari Sarawak deka madah ke dua iko orang tu endang nyadi ke pengari ke Taib – ti endor Taib ngelalai ke pengawa dagang iya empu. Dua iko tu mega endang ditemu penatai enggau asal ruang bilik. Seduai iya endang enda dikelala sebedau Taib nyadi menteri, tang udah nya, pengidup seduai lalu angkat baka ti kena ajih!

Kitai merati ke Hasmi bin Hasnan. Penerang pasal iya baka ti ditemu dalam kompeni Sarawak Plantation (iya nya sebengkah kompeni dagang kunsi ti bulih penguntong udah ti nerima lebih ari 50,000 hektar tanah Menoa ti diperambu ke Taib nyadi pengawa berswasta) madah ke pasal Hasmi, berumor 54 taun, nya udah kala nyadi siko pemesai ti kala bekereja dalam Opis Tanah enggau Penyukat, nyentok ngagai maia Taib baru nyadi menteri dalam taun 1981 ti endor iya ngator pejalai opis nya nyadi ke sebengkah opis ti beguna amat ba iya dikena iya beambi ke tanah-tanah di serata menoa Sarawak.


Hasmi nya nyadi Pengerusi Eksekutif dalam kompeni Sarawak Plantation ti sama enggau Pengarah iya, Hamid Sepawi, megai 30% ari semoa share dalam kompeni nya ti datai ari tanah-tanah enggi perintah menoa ti kala dikuasa Lembaga Kemajuan Tanah Sarawak.

Hamid Sepawi mega siko orang ti seruran kiruh bejalai ke pengawa awam enggau pengawa iya empu.

Dua iko orang tu udah puas ngasai ke pengelantang idup atas lisin-lisin kebun bedandang besai enggi sida empu ti besai bendar, lalu Hamid mega dipadu ke nyadi Pengerusi ba kompeni SESCO, iya nya sebengkah kompeni dagang tunggal ti ngeluar ke kuasa elektrik dalam menoa Sarawak.

Hamid Sepawi mega siko ari orang ti megai pemadu maioh share dalam sebengkah agi kebun bedandang besai enggau kompeni ngulih ke kayu kampong, Ta Ann – ti endor iya megai sebagi ari tiga bagi semoa share ba kompeni nya, ti kala udah nerang ke reta sida bulih RM1.5 billion taun nyin kemari lalu udah bulih untong RM72 juta. Kami ulih belaba’ ke Hamid tentu deka ngenang pemanah budi petunggal iya empu, Taib Mahmud, ba semoa lisin enggau kontrak ti diterima iya nengah Ta Ann, ngena chara belalai ti endor Kepala Menteri endang seruran nentu ke sapa ti patut nerima nama-nama.

Dua iko orang tu endang dikena Taib ngelalai sereta ngemata ke reta tengkira Taib, baka orang bukai ti kala diayan ke kami ditu pasal pengawa ngemata ke reta tengkira iya di menoa Amerika Utara.

Agi maioh projek ke Naim Candera

Pengerembai pengawa tu ukai semina ngemedis ati sekeda orang dagang di Bintulu enggau chara Kepala Menteri ti seruran nyiping orang bukai ba maia ti ngeluar ke kontrak ngagai Hamid enggau Hasmi.

Di Kuching mega, bisi didinga jako bantah ari bala orang dagang ti nadai peluang ngambi bagi leboh sebidang tanah ti besai enggi perintah menoa Sarawak udah diserah ke ngagai Naim Candera ngambi ke dikemansang ke enggau chara dagang, lalu sekali tu mega rega tanah nya baruh bendar.

Tanah perumahan perintah ti besai 14 hektar nya udah diserah ke ngagai Naim Candera enggau rega RM20 juta aja, ti dikumbai bala orang dagang ti bukai, semina sebagi ti mimit ari rega ti patut iya.

Pekara tu meri reti ke kitai nya, ukai semina bala orang dagang ti bukai enda dikiboh (baka ti ngelama tu) ari ti sama-sama berebut ke kontrak ti manah-manah, tang duit bala pemayar chukai perintah mega dibasau ngapa, laban semina mimit aja duit ti ulih ari pengawa nyual tanah awam nya. Tang, dalam kandang beberapa taun ti deka datai tu, enti Barisan Nasional agi diasoh mengkang bekuasa, penguntong nya deka pulai ngagai Naim Candera ba maia sida deka belaboh ngereja pengawa di endor nya.

Sub-kontrak enggau Tekat Hidro Bengoh

Maioh bendar penguntong pulai ke Naim Candera, taja pan kompeni nya suah ditemu ukai pugu kompeni ti deka bejalai ke semoa projek ti diterima sida. Maioh amat duit nya. Ambi ke chunto, apin lama tu udah, sebengkah pengawa ti deka dikereja sida Taib sebilik ti nguji deka ngulih ke duit enggau chara muntang, iya nya ngena chara sub-kontrak ba pengawa ngaga Tekat Bengoh ngagai Naim Candera ba rega RM310 juta. Sereta udah bulih kontrak nya, Naim Candera lalu meri pengawa nya enggau chara sub-kontrak ngagai sebengkah agi kompeni ti benama Synohydro ba rega RM140 juta, lalu nyimpan laloh RM165 juta duit bala pemayar chukai nya ke dalam kandi Taib enggau bakih iya ti megai share dalam Naim Candera!

Maioh amat penguntong pulai ngagai sida Taib sebilik dikena sida mayar pampas bala orang di menoa nya empu ti dipindah ke lalu ninggal ke tanah pesaka sida, ti endor sida ngawak ke pengawa ngaga tekat ai nya, lalu ngujong ke rampa menoa nya dia rusak!

7 Apr 2011

PENANGGOL PASAL PENYAKIT AIDS DI MENOA SARAWAK

This post is also available in: English, Malay

PENANGGOL PASAL PENYAKIT AIDS DI MENOA SARAWAK

Iya udah nyadi ke buah kenang orang maioh di menoa Sarawak tu dalam lebih ari setaun tu udah. Diatu, bala sida sebilik udah meri penerang lalu ngamat ke berita ngagai Sarawak Report pasal anak lelaki Kepala Menteri, Rahman Sulaiman, benong kena rampit penyakit ti tau munoh nyawa iya empu, AIDS.

Sebaka enggau orang maioh ti bukai ti ngena runding ti betul, kami mega berasai sinu ke sida sebilik. Sebarang sapa orang siko-siko ti betul runding mega enda ngambi mudah pasal penyakit ti balat tau ngachau runding orang ti endang ngenat ke diri, lalu maioh orang deka enggau naka ulih sama-sama nagang penanggol tu nuntong sida iya.

Tang, enggau penemu sains perubat ti sereba baru dikena napi penyakit tu, dia bala orang ti kena serang penyakit AIDS tu ulih niti jalai pengidup baka orang bukai ti gerai nyamai lalu enda irau ke diri mati tumu.

Tang, tu meh ketegal ti nyata Rahman Sulaiman udah mutus ke runding iya empu ninggal ke menoa Sarawak lalu ngentap ke diri di Britain, ti endor, sekali dulu suba, kami bepeluang ngambi gambar iya ti benong deka tama ke dalam rumah sida sebilik. Sida sebilik udah kala nusoi ngagai kami pasal Sulaiman ti selalu ngasai ke diri kena tekan lalu berunding ke pekara ti enda manah ba iya empu, tang diatu, ngena ator perubat ti sereba baru, iya ulih niti jalai pengidup ti gerai nyamai.

Ba penerang ti dikeluar ke kami dulu ari tu ti endor kami ngayan ke sekeda laman Facebook Sulaiman ti niti pengidup ngelantang ke ati di menoa tasik. Iya kala didinga madah ke bala pangan iya endang gerai nyamai, nyengkaum beserebana ke jako bantah orang pasal iya empu ti enda ditemu orang penunga, lalu enda agi bejalai ke pengawa menteri iya ti nyadi Kaban Parlimen.

Tang, baka ni ko pemidik bala orang ti dirampit AIDS ti bukai di Sarawak?

Tang pekara ti ngasoh kami irau iya nya pasal penanggol ti bendar di menoa Sarawak enggau di Malaysia. Ba maia ke diatu, udah bisi beribu-ribu iko rakyat menoa tu kena rampit penyakit tu, lalu iya ke bukai nya agi kurang mereti ke penyakit tu enggau dalam, sekali ke sida nya enda diterang ke enggau silik, tau ke diberi ator perubat ti murah sereta bansa ti lama.

Nitih ke pansik kami, menoa ti kaya enggau pengeraja asal ari tanah enggau tasik tu seruran ngagih ke belanja ti mimit bendar dikena ngintu bala orang ti kena rampit penyakit AIDS tu, enti dibanding ke enggau menoa-menoa Afrika ti jauh seranta ari menoa Malaysia, enggau Sarawak tu.

Maioh orang enda nemu, dalam maioh atur ti ditetap ke Opis Menteri Pengerai, dia bala lutor di Malaysia semina diasoh meri bansa ubat ti dikumbai orang ubat mono-therapy (agen tunggal) ngagai bala pesakit sida. Di serata dunya tu, pengawa perubat ti baka nya udah ditemu enda semitan lalu mega dikumbai besiping. Tang ubat bansa nya berega semurah RM20-30 ke siko pesakit ba sebulan, iya nya jauh baruh ari ikas agih belanja ti dikemata lalu ditetap ke perintah. Tang nimbal penerang nya, di menoa Malawi enggau Thailand ti ditemu tinggi ikas penyuntok mensia, perintah sida benong enggau naka ulih ngiga belanja dikena ngulih ke ubat bansa triple-therapy (ti mega dikumbai orang “Highly Active Antiretroviral”, tau ke disebut kedut, HAART), ti diatu udah ditemu semitan taja pan ungkos perubat nya manggai RM320 sebulan, tau ke RM3840 ke siko pesakit dalam setaun.

Ungkos perubat ti nyampau nya udah lebih ari ti ulih dipelanja bala orang bansa asal ti diau di menoa pesisir (nitih ke penerang bekira-kira taun 2008 ti nunjuk ke lebih 50% pesakit HIV ti baru kena rampit nya bala bini orang ti enda bekereja) endor ngulih ke perubat bansa HAART.

Enti penerang bekira-kira pasal kes-kes HIV ulih ditemu enggau mudah (taja pan bala lutor pechaya ke penerang bekira-kira ke tinggi ari nya), ator pengawa ti meri perubat triple-therapy enggau pechuma, selamat sereta semitan ngagai bala pesakit di Sarawak, ungkos iya semina beguna ke belanja ari perintah menoa Sarawak RM430,080 dalam setaun. Penyampau tu jauh bendar mit enti dibanding ke enggau belanja dikena perintah nyewa sebuah ari 27 buah bilun helicopter baka ti diperintah ke Kepala Menteri Taib Mahmud dikena sekumbang musim kempen enggau ngundi tu! Kelimpah ari nya, penguntong RM1.2 billion ti ulih ari bank UBG enggi sida Taib Mahmud sebilik udah sida nyual share sida dalam bank RHB ngagai gerempong wang turu KWSP dalam taun 2007, disadang ulih dikena melanja program ngubat bala pesakit HIV di Sarawak dalam kandang dua setengah ribu taun agi!

Bala kaban politik BN tentu ngumbai ungkos perubat bala pesakit AIDS nya masau duit perintah, lalu ngumbai pengelenyau nyawa bala pesakit nya jauh murah. Bala sida ti endang udah kaya nya, lalu dipeda mujor dalam pengidup sida, baka ti jai ketegal sanggup neju ke orang ti nat ke pemedis ti endang datai ari menoa ti sama.

Enggau nya, kitai tentu enda alit ati udah kitai nemu Rahman Sulaiman udah ninggal ke menoa Sarawak tu ke menoa UK laban deka ngulih kea tor perubat ti semitan agi ti ditemu endang ulih dibayar ngena duit sida empu. Tang pekara ti ngenyinu ke ati iya nya, nadai siko ari sida sebilik ti kaya-raja udah ngayan ke pengasih enggau penyinu sida ngagai bala pesakit bukai di Sarawak ti sebaka enggau Rahman Sulaiman!

Baka ni pengawa ngulih ke kayu kampong tau nyadi ke jalai masok AIDS ke Sarawak

Mensia maioh tentu enda nemu, polisi menoa Sarawak ti meransang pengerembai pengawa ngulih ke kayu kampong udah nyadi ke pintu masok penyakit AIDS ngagai kandang menoa pesisir di Sarawak, nyengkaum penyakit ti berampit ba orang ti beleman enggau chara ti salah.

Nitih ke penemu bala lutor ti landik ba penyakit tu, jako randai sida enggau bala pengereja kayu kampong ti ditemu udah kala beleman enggau indu di menoa luar, endang disadang tau ngemai penyakit AIDS nya tama ke menoa pesisir di Sarawak.

Bala lutor udah betalat ke penerang bekira-kira ti dikeluar ke Opis Pengerai menoa Sarawak pasal penyakit nya, laban, ko sida, penerang nya digaga mungkor menoa Malaysia. Nitih ke penerang ari Dr David McCoy, siko Pakar Pengerai Mensia Maioh ti ngembuan penemu ti dalam ba penanggol tu:

“Penanggol pengerai ba mensia maioh baka HIV/AIDS nyangka dikumbai biasa ba raban orang bansa asal udah sida ti dipindah ke pendiau, ketegal ti ninggal ke menoa lama sida. Kitai tau meda chunto penanggol ke baka tu ba menoa-menoa bukai di dunya tu. Di menoa Sarawak, bisi penanggol-penanggol bukai ti nambah ti bai kem-kem ngulih ke kayu kampong tu, ti udah nambah ke penyampau serang seks ba raban orang indu enggau kes masong orang indu ari raban orang bansa asal. Tu meh sebengkah ari pekara ti ngangkat ke penyampau kes-kes HIV”.


Pekara ti bendar baka tu meh ti nagang bala tuai-tuai BN di Sarawak ari ti ngemendar ke pansik ti patut dipejalai ke dikena ngamat ke serebana kes masong orang indu enggau anakbiak sekula raban bansa orang asal ti dikereja bala pekereja kompeni ngulih ke kayu kampong. Serang-serang ti baka tu, enti enda dipansik lalu diputar ke enggau betul tau bendar nambah ke kes pemati ti nyelai dalam raban orang bansa asal ketegal ti kena rampit penyakit ti tau munoh nyawa tu.

Bala lutor ti udah berandau enggau kami madah ke Opis Menteri Pengerai patut ngayan ke penerang ti bendar sereta tegap dikena nentu ke ikas ti bendar kes-kes penyakit AIDS dalam menoa tu lalu ngayan ke pengawa nagang penyakit ti tumu nya endang beguna bendar.

Penanggol dirampit penyakit AIDS


Tu meh reti maia kitai ti berandau ke pasal penanggol AIDS di menoa Sarawak. Iya nya, semoa pemesai tau ke tuai menoa, enggau Kepala Menteri empu, ti endang ngasai ke penanggol tu nengah tuboh anak iya empu, patut ulih ngiga chara tau ke penawar enggau ator perubat ti pemadu manah!

  • apai mas

    Kati TM, AJ enggau JC aja ka … mensia ti pemadu landik megai menua di Sarawak tuk …? Dini anembiak redak ke bukai deh …? Nama guna/tuju nirika universiti ba menua Sarawak ngelama tuk …? TM, AJ, GC anang ngemaluka mua diri empu, anang ngemaluka anembiak graduates ari Sarawak … ngasaika diri sida aja k pandai ngatur menua … Uji saut …

5 Apr 2011

naban ke duit pansut ari menoa sarawak

This post is also available in: English, Malay

naban ke duit pansut ari menoa sarawak

Ba minggu nyin kemari, ngena jako ti bula, Taib Mahmud udah madah ke nengah jako randau video pasal iya enggau bala anak iya seruran nyeliah ke diri bejalai ke pengawa dagang dalam menoa Sarawak.

“Aku seruran nyeliah ke diri enggai ke kena kutuk orang maioh. Enti aku bedagang dalam menoa tu, orang deka ngumbai aku salah guna kuasa aku dikena aku nambah ke pengaya aku, nya alai, kami menyanak bedagang di menoa luar.”

Tang kami tetap deka ngayan ke penerang dikena ngemba iya. Kami bisi bulih penerang-penerang ti bekaul enggau penguntong bebillion-billion ringgit ti udah ditaban ke iya pansut ari menoa Sarawak tu dikereja bank sida sebilik. Semoa penguntong nya datai ari pengawa sida sebilik ti bedagang dalam menoa tu enggau dalam menoa Malaysia.

Bank-bank enggi sida Taib sebilik – pengawa dagang sida ari kuasa iya.

Ambi ke chunto, aram kitai meda penerang ti bekaul enggau UBG Bank (dulu suba dikumbai orang Bank Utama), ti enggi kompeni sida Taib sebilik, CMS, nyentuk ngagai bulan November taun nyin kemari. Pengerusi UBG Bank nya anak iya empu, Abu Bekir, lalu sapit iya nya menantu iya empu, Syed Ahmen Alwee Asree, iya nya laki anak iya, Hanifah binti Taib.

Nengah dua iko orang tu (anak enggau menantu iya tu), UBG Bank udah bulih untong datai ke bebillion-billion ringgit. Uji pansik enggau naka penyilik ba penerang kami ditu (entry dalam jako English tu), lalu perati ke semoa utai ti udah dijual sida. Ba bala orang ti ngumbai kami tu mansut ke penerang ti enda betul sereta nyengala, nya bala orang ti enda mujor muatturun Repot Taun ti pemadu pelasar enggau semoa macham jako gerah ari internet. Pengawa ti mantah kami munyi nya semina tau ngujong ke sida enda ulih meri sebarang sakal penemu ti seruran ngumbai kami tu bula.

Ba rekod-rekod tu, ambi ke banding, nyentuk ke taun 2007 suba, UBG Bank ti kala megai sebagi ari tiga bagi share enggau kesemoa 60% share dalam bank RHB ti pemadu besai di menoa Malaysia! Nya alai, berapa semoa penguntong nya pulai ngagai sida Taib sebilik? Belalau ke semoa macham pengawa jual-beli ti dipejalai ke sida dia, kitai deka bulih penerang ti diguna kitai.

Ngambi duit sida pulai – ni penyampau iya?

Dalam taun 2007, baka ti ditemu kitai, sida Taib sebilik udah nguji deka ngulih ke duit sida ari share dalam RHB, laban sida meda, dalam pengelama tiga bulan beturut share sida dia bisi pengusut. Beserimbai enggau nya mega Taib ditemu enda mujor ngengkah ke kangau bida iya nitih ke peneka ati iya empu!

Tang sida Taib Mahmud endang bala orang ti bidik lansik, laban sebengkah gerempong awam bisi nyadi ke penyelamat ke pengerugi sida, ti udah besetuju deka meli share sida ti udah kusut nya. Gerempong nya Kumpulan Wang Simpanan Pekerja (KWSP). KWSP nya sebengkah gerempong orang ti bekereja ti pemadu besai di menoa Malaysia, lalu dikemata ke sebengkah raban orang politik enggau tuai-tuai ti tebilang dalam pengawa dagang.

KWSP udah ngeluar ke duit RM1.4 billion enggau chara tunai ti dibayar ngagai bala pemegai share dalam UBG enggau sida Taib sebilik ke share sida ti dalam RHB. Duit nya endang datai ari tabung dikena mayar penchen orang ti udah bekereja, ti dibayar tama ngagai akaun-akaun bank sida Taib sebilik.

Sekeda penerang ti besibil ari pekara ti endor Taib bebula jako dawa kami baka ti dipansut ke dalam video jako randau iya nya “nawa iya bebalut ke pengawa (konflik kepentingan)” enggau “salah-guna kuasa dikena iya nambah ke pengaya iya” bedagang dalam menoa Sarawak enggau Malaysia!

Beserimbai enggau nya mega, bala orang ti tebilang di menoa tu ti nyadi kaban ngemata ke Lembaga KWSP nya pangan politik Taib ti mangku pengawa nyadi Setiausaha Kerajaan Negeri Sarawak, Y.B Datuk Amar Mohamad Morshidi bin Abdul Ghani, baka ti dipansut ke kami ba minggu nyin kemari, nyadi ke siko orang ti bisi bekaul ba pengawa ngerampas tanah bala orang asal. Nama kebuah Morshidi enda mulai ke semoa tanah ti udah diserah ke Taib ngagai iya – ti udah dipelanja ngena bejuta-juta ringgit duit bala orang ti udah penchen perintah?

Kelimpah ari nya, KWSP mega dipinta iya nyelamat ke projek Tekat Hidro-elektrik Bakun. KWSP udah ngagih ke RM5.75 juta dikena nambah ke duit puku dikena nembu ke projek gajah putih nya, lalu sekali agi dikena ngidup ke pengawa dagang kunsi lalu nambah ke penguntong kompeni besai CMS enggi sida Taib sebilik, nengah bemacham-macham kontrak ti besai-besai.

Lalu Taib mengkang ngaku nadai bedagang dalam negeri Sarawak tau ke di menoa Malaysia tu, lalu enda bebalut pengawa? Nya sebengkah penerang ari iya empu ti enda masuk akal enggau runding!

Maioh agi duit ari UBG

Udah iya mujor nyual share RHB lalu bulih untong, UBG lalu bulih pemanah ke bukai mega. Iya bulih pemanah ari dua bengkah kompeni, Putrajaya Perdana Sdn Bhd, enggau Loh & Loh Corp Bhd, ti lalu udah nya ngeluar ke share ti baru ngagai sebengkah ari kompeni persendirian, Majestic Masterpiece ti udah ngangkat bagi sida ari RM800 juta ngagai kira-kira RM1.5 billion.

Beserimbai enggau nya mega UBG udah enda iboh ke ator ti diletak Pasaran Saham ti ngasoh abis mimit 25% ari ke semoa share dalam kompeni awam ti udah dipasok ke dalam rintai nama kompeni-kompeni, enda tau enda mudah dibeli bala orang bulai ti deka beranak ke puku, lalu ukai dipegai kompeni-kompeni ti ngemata ke kompeni nya. Ba jako-jako gerah ti dipansut ke Pasaran Saham dalam taun 2010 ti udah madah ke UBG udah ngelanggar ator nya laban 90% ari share dalam bank nya dikemata ke CMS enggau pangan kunsi dagang iya, Majestic Masterpiece. Seninjik bendar Bursa Saham Malaysia udah ngemendar ke timpoh nya dilanjar ke!

Nama pemanah ari ti ngambi dua bengkah kompeni nya ulih UBG ba taun 2008? Menoa Sarawak udah bebendar amat meri kontrak ti besai-besai ngagai sida beberapa bulan tu udah!

Ba pun taun 2010, suratkabar The Star udah mansut ke berita ti madah ke baka ni kompeni Loh & Loh udah mujor bulih siti ari kontrak besai menoa tu iya nya kontrak ngaga jalai ti beungkos RM2 billion, ti diberi Kepala Menteri! Projek nya bekaul enggau projek ngaga RM645 juta jalai ke Tekat Hidro-elektrik Murum, ti benong digaga diatu (nya sebengkah agi projek gajah putih ti deka mai pengerusak ngagai rampa menoa ti besai bendar kandang di Sarawak lalu mega dikena nambah ke pengeraja Taib).

Kompeni Putrajaya Perdana, ti diambi UBG, udah mega bulih kontrak besai-besai, terima kasih ke pemanah ati Kepala Menteri. Kompeni nya diasoh ngaga indu opis Sarawak Energy Berhad (SEB) di Kuching. Sebedau nya, kontrak asal nya diserah ke Taib ngagai CMS ba ungkos RM232 juta. Tang udah nya CMS nyerah ke kontrak nya ngagai kompeni Putrajaya Perdana, nengah UBG enggau ungkos RM231 juta.

Dua bengkah kontrak beungkos bejuta-juta ringgit udah diberi iya ke kompeni-kompeni enggi sida sebilik dalam timpoh beberapa bulan udah ti diambi sida! Mengkang nadai kelai iya bejalai ke pengawa dagang ‘dalam menoa tu’? – Baka ni ko Taib agi ngumbai kitai tu tambap magang?


Sekumbang Taib meri kontrak-kontrak ti besai-besai ngagai kompeni-kompeni sida sebilik nya, iya empu bisi ditemu nguji deka ngulih ke untong ari UBG. Beberapa bengkah aum udah diator endor berunding ke pengawa deka nyual semua share CMS dalam bank UBG nya, lalu pia mega share dalam Majestic Masterpiece ngagai sebuah agi kompeni ti benama PetroSaudi.

PetroSaudi International nya sebengkah kompeni ti benong bepalan di menoa Arab Saudi ti bisi ati deka beranak ke puku’ ari ti meli semoa share UBG lalu nyadi ke kompeni persendirian. Kompeni nya mega kala bejanji beranak ke puku’ enggau maioh dalam pengawa dagang kunsi enggau Perintah, ti ba pengujong iya, enda nyadi-nyadi dalam kandang taun 2010. Kompeni PetroSaudi nya dikumbai bisi kaul enggau anak raja Arab, ti bepalan di menoa Arab Saudi.

Tang, Opis Rekod Kompeni di menoa UK bisi nusoi cherita ti nyelai agi. Opis nya madah ke PetroSaudi International nya baru udah dikorporat ke kena 18hb February 2010, lalu menoa asal kompeni nya di United Kingdom! Kompeni nya bisi maioh opis di Arab Saudi enggau di nengeri Geneva di Menoa Switzerland, tang penatai kompeni nya endang senutok enggau runding Taib Mahmud ti deka naban ke bebilion-bilion ringgit ari UBG di Sarawak lalu nyual semoa share nya ngagai sebengkah kompeni ti bepalan di menoa luar ari Malaysia.

Dalam pansik kami, kami bisi nemu opis-opis kompeni PetroSaudi nya ba 1 Curzon Street, Mayfair di London lalu sida ngena ruang-ruang opis ba sebengkah rumah ti endang disewa Asset Management, iya nya sebagi ari Swiss bank UBS.

Sebengkah agi penatai pemisi ti maioh bendar

Ari ti ngambi-alih anak-anak kompeni UBG ti baru nya, lalu meri kontrak ti besai-besai dalam menoa Sarawak, muntang bendar endor mujok PetroSaudi International ngambi alih bank awam nya, ngena pegai share 90% ti ba jari dua bengkah kompeni nya (taja pan iya belaban enggau ator Bursa Saham Malaysia), pulai ngagai jari sida empu.

Semina ba 1hb November 2010 pengawa meli share ba CMS enggau Majestic Masterpiece udah diator PetroSaudi International. Pengawa bejual-beli nya beungkos RM466 juta.

Penyampau ti baka nya udah nyadi ke semoa penyampau kira-kira RM2 billion udah ulih sida Taib sebilik ari pengawa dagang bank semina dalam kandang beberapa taun aja. Jual-beli nya udah bekaul enggau duit ari dalam tabung bala orang ti penchen lalu dikena ngaga kontrak menoa Sarawak ti meri penguntong ke kompeni-kompeni Taib dalam kandang maia ti berunding nya.

Baka ni ko Taib tau ngaku sereta ngumbai diri enda bejalai ke pengawa dagang di Sarawak laban iya enggai ke dikutuk orang bebalut ke pengawa iya? Mudah bendar diperagam kitai – iya endang UDAH ngena penudok iya ti nyadi Kepala Menteri nya ngulih ke pengeraja ke iya empu. Lalu pia mega udah nagang semoa bansa media ari ti mansut ke repot pasal pengawa dagang iya nya.

3 Apr 2011

NAGANG PENGAWA NIPU MAIA BEPILIH! – LAMAN DALAM SARAWAK REPORT DIKENA NGEMATA KE PENGAWA NGUNDI!

This post is also available in: English, Malay

NAGANG PENGAWA NIPU MAIA BEPILIH! – LAMAN DALAM SARAWAK REPORT DIKENA NGEMATA KE PENGAWA NGUNDI!

Diatu semakin maioh cherita enggau berita pansut nyerumba pengawa ngundi ti deka diator di Sarawak. Kena hari Minggu tu, siko pengereja pengawa ke PR, ti bepalan di Kuching, udah diburu pulai ngagai menoa iya empu di Semenanjung Malaysia udah bekau iya ti kemisi enda lama.

Duit mega bisi ditemu disadong ba rumah-rumah panjai ulih menteri ti lama udah enggau BN, lalu pia mega enggau bekutak-kutak beer. Pengawa berami mega bisi diator opis Election Commission, lalu kitai bisi ninga raban sedadu bisi diasoh nemuai ke rumah-rumah panjai ukai semina dikena mantu bala orang di rumah panjai, tang tuju ke bendar dikena ngemba bala pengundi.

http://election.sarawakreport.org/

Sapit Kepala Menteri George Chan mega ditemu udah ngenyarut ke runding rakyat enggau chara ti meri surat-surat pala tanah ti endor iya ngumbai diri udah mujor ngaga ke sida surat ti udah dianti sida bepuluh-puluh taun. Tang iya ke bendar, George Chan nya meri sida surat bersyarat, ti semina sementara aja – bala rakyat ti nerima surat nya udah diterang ke, sida deka bulih pemutus ti bendar UDAH TEMBU pengawa ngundi ila, lalu nya alai sida enda tau enda ngundi BN!

Tagang pengawa nipu nya!

Pengawa nipu? Nama reti nya? Reti nya bala kaban BN diatu nyau udah takut sereta irau bendar ke diri alah, ENTI sida ENDA ngemba, ‘nyuap’ enggau salah guna penudok menteri sida ti ngasoh pengundi milih sida. Tang disadang bisi bala sida endang tentu deka alah.

Dikena mantu pengawa nagang tipu lalu ngayan ke pengawa salah BN, kami udah ngaga sebengkah laman dikena kitai ngemata ke pengawa ngundi dalam Sarawak Report tu. Tu meh peluang kita ngayan ke pekara ti amat bisi nyadi semak kita, lalu tau dikena kita nangkan pangan diri enggai ke sida ulih panjok BN.

Enggau nya, kena meh semoa kamera  enggau telefon binching kita dikena ngerekod semoa pekara ti nyadi nya. Udah nya engkah ke dalam laman kami ditu ngambi ke bisi dipeda orang maioh!

Kami mega tekenyit ninga sebengkah berita basal tipu BN ti ngelulu ke diri deka meri tiket tambang bilun ti deka diberi ngagai bala pengundi Sarawak ti bekereja di Semenanjung. Nya semina siti chara tipu BN dikena sida ngulih ke lumor kad pengelala (I/C) – lalu udah nya BN ngumbai diri ulih ngena penerang ari kad pengelala nya dikena nyunting ngari ke bala orang Sarawak nya ila!

Diatu, kami udah ngepun ke pengawa tu, lalu minta kita ngemujor ke. Tekan ditu (http://election.sarawakreport.org) dikena kita nemu pengerembai berita lalu nagang pengawa tipu.

  • darabunsubulan

    heran ati aku….nama kebuah semua utai dipenyadi alu digaga maia kempen belama.udah abis bepilih ila nadai ga sida BN rancak bejalai ke pengawa macham-macham. Nyata amat pengawa sida ia semina deka ngelemi ke ati rakyat ngambi ke ngundi sida. Taktik kotor amat sida ia tu. Hipokrit memagang!!!!….

  • Betong baru

    Aku eran, alit ati & amat tekenyit meda tudah Jabu nyau miring sebedau hari ngantung nama. Kebuah pia:

    1. Laban Jabu tu orang ka ndang udah lama terbilang & tenama nyadi wakil rakyat kitai sitak Layar ka ditemu bepengarap KRISTIAN. Bah nama hal nya miring deh??

    2. Laban ari pengawa iya ka mai orang miring nanda ka Jabu tu enda nemu, enda ngelala rakyat dalam sitak Layar laban iya semina ngayan ka moa diri di betong maia bepilih aja. Kebuah pia laban enti iya amat bepegai ke konsep ‘rakyat didahulukan’ baka ka disebut-sebut sida, enda patut iya enda nemu majority kitai di Betong tu nadai megai pengawa miring agi laban kitai udah bisi pengarap. Uji pansik ba regista gereja (e.g., Gereja St. Augustine etc.), nyau ka semua kitai di rumah panjai Iban di betong tu udah megai pengarap KRISTIAN.

    3. Pengawa miring tu semina dikerja maia aki ini kitai suba, maia Jabu agi biak (e.g., penggal ke terubah iya bediri!). Kemaia ari tu kitai sembiang, ukai miring. Minta bala kaban tauka orang ke bekempen ka Jabu madah/nerang ka iya halt u, kasih ka iya

    4. Laban Jabu tu ngelama tu tampak rita orang ka bempu ‘self confident’ ka tinggi sampai kadang-kadang dipeda kitai ‘arrogant’. Pengawa iya ka miring tu meri tanda ka kitai iya nyau nadai tentu pengarap ke diri empu (takut alah pelaba aku) nya alai nyau ngesah semengat aki ini kitai nulung iya maia bepilih tu. Kasih

    Nya aja dulu randau ditu. Aku agi ka berunding ka pengawa Jabu ti balat ndar ngalit ka ati tu.

  • http://rumahpanjai.site50.net nqis

3 Apr 2011

BALA PANGAN DALAM POLITIK LALU PIA MEGA DALAM PENGAWA DAGANG!

This post is also available in: English, Malay

BALA PANGAN DALAM POLITIK LALU PIA MEGA DALAM PENGAWA DAGANG!

Siko agi menyadi Taib Mahmud ti sama ngerampas tanah! Mohammad Ali bin Mahmud nya mega siko kaban Dewan Undangan Negeri Sarawak ti ngari ke sitak Muara Tuang dalam parti PPB.

Tang Mohd Ali ditemu bebendar amat nguji ngelalai ke kaul iya dalam pengawa ngerampas tanah. Nemu tau ke enda iya, pengawa nya salah ba undang-undang menoa tu lalu enda patut dikereja orang ti mangku pengawa perintah, taja pan iya begela menteri?

Maioh rekod ti bukai ba opis pengerejister tanah ngengkah ke nama enggau lumor telefon baka ti dipinta iya. Taja pan baka nya, Mohd Ali bisi saru mimit laban udah ngengkah ke lumor telefon bendar iya ba kompeni Tebaruk Abadi, ti direjister dalam taun 2007 lalu direkod udah bulih kandang tanah 5,000 hektar pemesai di pelilih menoa Sri Aman, dikena muka pengawa bekebun sawit bedandang besai.

Pengawa ti nguji ngelamun nama diri nya udah ditemu. Lumor telefon ba rekod nya sebaka enggau lumor dalam laman web ti dikena ngelaku ke iya ti ngari ke orang maioh! Baka nya mega, alamat kompeni Tebaruk Abadi nya ditemu sebaka bendar baka ti dalam laman web nya, iya nya Mohd Ali Holdings Sdn Bhd.

Pangan politik ti mega pangan dagang kunsi

Tang ukai semina Mohd Ali aja ti bulih penguntong ari kompeni Tebaruk Abadi, iya nya sebuah kompeni ti udah mujor bulih tanah-tanah ti endor muka kebun sawit bedandang besai beberapa taun tu udah. Pangan dagang kunsi iya, Mohd Asfia bin Awg Nassar nya speaker DUN Sarawak, mega bisi megai share ti maioh dalam kompeni nya. Dua iko kaban politik nya sama nyadi kaban dalam Lembaga Kebajikan ke pelilih menoa Kota Samarahan, ti mega bekaul enggau pengawa dagang.

Sama enggau iya dalam pengawa dagang nya, bini iya empu, Datin Fatimah, ti endor Mohd Ali megai 13,000 iti share ke sida Taib Mahmud sebilik. Tang Ali seduai Asfia nya endang pangan ti rapit amat kaul enggau pangan diri. Asfia bisi rumah ti besai bendar. Nya dikena ngayan ke pengaya enggau pemujor pengidup di Sarawak bekaul bendar enggau pengelandik – pengelandik begulai enggau sida Taib Mahmud sebilik.

Penyalah ‘makai suap’ dalam penyalah ngerampas tanah


Baka berita ti kala dikeluar ke kami dulu ari tu, penyalah ‘makai suap’ nya ti dikena Taib Mahmud bejalai ke polisi-polisi ngerampas tanah di menoa Sarawak. Enggau tu, Barisan Nasional Sarawak dipinta mansut ke penemu sida empu pasal Sarawak nya endang amat beguna ke ‘pemansang enggau pemaju’. Sida BN Sarawak mega bisi hak sida mansut ke buah runding diri pasal pekara ti dikena sida ngulih ke dua bengkah utai nya, “pengawa magi tanah enggau chara ti kasar” ba tanah-tanah NCR nya endang patut dikereja – taja pan polisi ti baka nya udah kala diperintah ke enda betul dalam court.

“Kami ulih meda utai tu, laban, sida ti patut bejalai ke polisi-polisi enggau ati ti lurus, tang sida udah nyerah ke tanah nya enggau chara belalai ke guna sida empu!”

Enti Taib endang amat lurus ati deka ngemansang ke tanah-tanah di Sarawak ke pemanah enggau penguntong bala rakyat iya, iya patut nyual tanah sida nya enggau rega lelong ti betul sereta tampak. Asil ari bejual ke tanah-tanah nya lalu tau dikena ngaga jalai, perengka ti diguna ke bukai, lalu ngurang ke ikas penyeranta bala rakyat iya.

Enti nitih ke patut, tanah-tanah nya dikemansang ke enggau naka penyiru sereta bebasa ke pemanah rampa menoa enggau orang ti diau dia.

Tang Taib enda ngereja utai ti baka nya. Iya udah nyerah ke semoa tanah nya enggau rega ti mimit bendar nengah chara ti belalai ngagai sida sebilik, bala pangan dagang iya enggau pangan politik iya. Udah nya sida deka nyual tanah nya baru ba rega ti bejuta-juta ringgit ngagai kompeni-kompeni ti endang besedia deka muka kebun bedandang besai enggau chara ti kasar sereta rangka. Pengerangka kompeni-kompeni nya ti ngujong ke orang asal ngayan ke bantah sida, tang lalu ditekup bala gangster ti diupah bala kroni Taib Mahmud.

Taib Mahmud udah ngereja pengawa baka Raja jai, ti selalu ngumbai pengeraja asal bumi Sarawak enggi iya magang lalu sepeneka ati ngayah ke utai. Tang Sarawak ukai enggi iya. Ngelama tu rakyat udah arap sereta pechaya ke iya, tang Taib udah enda ibuh ke nya. Iya ngerampas tanah, lalu ngerusak rampa menoa sida rakyat iya lalu enda ibuh ke penanggol ti nuntong sida, amat meh pengawa iya nya pulai ke penguntong iya empu.

2 Apr 2011

BALA ORANG INDU TI BEPANGKAT

This post is also available in: English, Malay

BALA ORANG INDU TI BEPANGKAT

Sekeda ari bala orang indu ti bisi masok dalam pengawa muka kebun sawit bedandang besai di menoa Sarawak, nitih ke rekod-rekod dalam opis pengerejister tanah. Bala sida tu endang bisi kaul ti manah enggau orang ti benama di Sarawak.

Ambi ke chunto, Datin Theresa Toyat, ti endang bekaban enggau Kepala Menteri, nya bini Setiausaha Negeri Sarawak ti dulu suba, lalu pia mega Ketua Pegawai Eksekutif (CEO) ba sebengkah kompeni ti ngemata ke pejalai projek SCORE, Wilson Baya Dandot. Wilson nya siko orang bekereja ba perintah ti kala mangku pengawa ti pemadu tinggi enda tau enda nyeliah ke diri ari bebalut pengawa (konflik kepentingan), nya kebuah sebengkah kebun sawit bedandang besai enggi iya di pelilih menoa Baram din, direjister ngena nama bini iya, Theresa.

Theresa mega siko indu ti beempu sebengkah kompeni penuchi, Saredah Sdn Bhd (ti endor alamat kompeni nya dikena kompeni Amazing Green). Saredah nya kompeni ti bejalai ke pengawa nuchi enggau meresi, lalu suah bendar mujor bulih kontrak nuchi enggau meresi bangunan enggau opis-opis perintah!

Ari nya, kitai tentu mudah bendar ngelala, nama kebuah maioh bala orang di Sarawak enda lantang ati laban ti nadai bulih peluang bulih kontrak baka nya enti orang nya enda bekaban diri sebilik enggau sida Taib Mahmud sebilik, tau ke bala kroni sida! Ambi indu ti tebilang ba pengawa bekebun bedandang besai di menoa Sarawak, Raziah enggau Eliah Geneid, ke chunto – anak enggau anak menyadi Taib empu!

Bala anak indu Tun Rahman


Siko agi orang indu ti bisi kebun sawit bedandang besai nya Fatimah Abdul Rahman. Nitih ke rekod dalam opis pengerejister tanah, Fatimah bisi kandang kebun ti besai amat di pelilih menoa di Sri Aman.

Fatimah nya anak indu Kepala Menteri ti dulu suba, ti mega Governor, Tun Rahman Ya’kub, ti udah bebaik baru enggau anak buah iya, Taib Mahmud, lalu diatu nguji deka ngangkat ke siko agi anak indu iya, Norah ke penganti Kepala Menteri Taib ila!

Norah nya siko kaban parlimen ba Perintah Persekutuan ke sitak Tanjung Manis, ti endor Taib merambu ngaga sebengkah endor industri ti besai serta hab dagin halal entarabansa.

Tu diperambu udah Kepala Menteri muka sebengkah kandang endor kampong kayu bakau ti besai 77,000 hektar, ti dikumbai iya ‘kandang endor betanam-betupi ti manah’.

Ari ti nyampur ke pengawa politik enggau pengawa dagang, Taib udah ngasoh Norah nyadi Pengerusi Eksekutif ba industri Tanjung Manis, iya nya sebengkah kandang endor projek ti dipelanja perintah menoa Sarawak.

Ari nya, nama kaul entara dagang nganti kediri, inisiatif menoa enggau ruang bilik Taib di Sarawak? Tang enti kitai berati ke, nadai (patut) bekaul, laban enti kitai mukul telefon ti direjister ngena nama Fatimah, baka ti ayan dalam rekod ba opis pengerejister tanah, kitai deka disambung terus ngagai opis kompeni Tanjung Manis Halal Hub Sdn Bhd, ti endang dikemata ke Norah!


Bala dukun mega!


Apin lama tu udah, kami kala ngayan ke berita ti bekaul enggau kuasa indu di menoa Sarawak, iya nya sebengkah kuasa ari Dukun Stella, ti kala dipadu ke nyadi penyanding penemu ke Taib. Enti sebarang sapa bala pemacha deka nemu nama kaul dukun nya enggau sida Taib sebilik, kami mega bisi ngayan ke gambar sida sebilik ti diambi sida dalam taun 2003. Dalam gambar nya semina Stella aja ti ukai orang diri sebilik enggau sida Taib nya. Gambar nya diambil sebedau Stella nyura buk iya burak, ti ngujong ke iya digela’ orang ‘dukun bebuk burak’!

2 Apr 2011

SKANDAL DALAM SALCRA – NERUMPAK RAKYAT TI MERINSA DI SARAWAK

This post is also available in: English, Malay

SKANDAL DALAM SALCRA – NERUMPAK RAKYAT TI MERINSA DI SARAWAK

Enti kitai sama berati ke ikas pengulih pengawa iya ti nyadi Pengerusi SALCRA, enggai nyadi mega kitai ngasoh Sapit Kepala Menteri Alfred Jabu nya ngintu kedai bedaja ke buah, anang agi ke ngasoh iya ngemata ke pengelantang pendiau enggau pengidup beratus-ribu ruang bilik orang asal di menoa Sarawak.

Jabu udah terang bendar ngerari ke beratus-juta ringgit. Tang seagi-agi iya enggai ngeluar ke penerang pasal penatai belanja ti standard, nadai siko orang deka nemu kini penunga semoa duit nya!

Pekara ti ulih diperati ke ba pendiau Jabu nya rumah besai iya bediri degi-degi enggau naka pemanah ti digaga iya ngena duit ti enda ditemu penatai. Nya alai, sekali ke Jabu nya siko pengurus ti enda nemu bekereja, tau ke siko penchuri pandai?

Leboh maia skandal ti ngemalu ke baka tu nyadi ba tengah-tengah Perintah BN di Sarawak, orang asal ti bisi tanah NCR nya meh ti ngasai ke pemerinsa dalam pengidup sida, taja pan sida udah masok skim SALCRA ti ngereja tanah-tanah NCR dikena ngaga kebun sawit bedandang besai. Sida udah dibai masok skim nya kenyau ari 30 taun tu udah, lalu sida mega agi ngemesai ke dividen ti diterima sida ba ‘dagang kunsi’ ti dikemata ke Jabu.

Udah mansau lalu tau diketau


Kitai tentu enda ulih berunding ke ator ti manah agi ari ator ti udah dipejalai ke SALCRA, kenu nya, dikena ngangkat ke pemanah pendiau orang di menoa pesisir (kelimpah ari ti dikereja kompeni-kompeni baka enggi Taib ti diatu maioh agi sida nya udah ditemu salah ba court).

Ba program nya, perintah menoa udah ngeluar ke, lalu meri surat pala tanah ngagai bala orang asal ti bisi tanah-tanah NCR, tang sida mesti deka besetuju ngasoh SALCRA ti dikemata ke perintah, ngereja tanah sida nya.

Reti nya, sida dipajak ke ngelepas ke tanah-tanah sida ngambi ke dikereja Jabu, dikena malas pemanah budi Jabu ti udah ngaga ke sida surat pala tanah, lalu pia mega disemaia ke diberi dividen asil ari tanah sida.

Nama kebuah nadai repot pekara belanja ke orang maioh?


Ba SALCRA, bala orang ti empu tanah-tanah NCR ti dikereja nya nadai sebarang ator dikena ngelindong sida. Enti ba kompeni-kompeni awam ke bukai sebarang sapa orang tau beranak ke puku’ dipinta ulih undang-undang awak ke ngeluar ke repot taun ti diperesa bala auditor. Tang Jabu, taja pan iya ngemata ke lebih 20,000 ruang bilik ti masok skim SALCRA, bedau kala ngeluar ke sebarang repot pekara belanja enggau penatai pemisi gerempong nya! Reti nya, penguntong gerempong nya ti bendar endang enda ditemu sapa-sapa, kelimpah ari Jabu empu enggau bala raban Lembaga Pengarah iya.

Diatu, Jabu udah bulih 48,000 hektar pemesai semoa tanah NCR dikena SALCRA (maioh agi tanah-tanah nya diatu udah bisi pun sawit ti benong ngeluar ke buah), lalu Jabu mengkang bedau ngeluar ke sebarang repot ti bekaul enggau penatai belanja SALCRA. Pekara ti ngenyinu ke ati nya bala orang ti empu tanah NCR ti dikereja SALCRA enda dibai nyadi raban Lembaga Pengarah, tau ke dibai nyadi pemesai-pemesai ti ngemata ke gerempong nya, tau ke sebarang chara sida tau bulih penerang pasal penatai pemisi gerempong nya.

Dividen nya semina lumor-lumor ti dijengkau Jabu ba angin aja!


Bala orang ti empu tanah udah diasoh nganti-senganti lalu seruran ngarap ke dividen dichelak ke dalam bup akaun bank sida, lalu mega seruran ngumbai penyampau dividen nya ulih dikena sida idup besari-sari.

Pansik kami bisi nunjuk ke bala orang asal ti masok skim SALCRA suah agi ti enda lantang ati! Bisi sekeda ari sida nya madah ke diri lalu bedau kala meda utai ke dikumbai orang duit dividen beberapa taun tu udah, lalu bala orang ti bidik agi nya udah nerima duit dividen tang semina ulih dikena sida idup dalam kandang seminggu aja.

Pekara ti balat agi enda manah nya, Jabu seruran ngena peluang ngeluar ke dividen dikena iya ngegap bala pengundi iya, awak ke orang ngumbai duit nya sebengkah tulong penyinu ati ari perintah, ti endor duit nya endang duit bala orang ti empu tanah tang dibayar iya enggau naka pemimit.

Bala orang ti masok skim SALCRA suah bendar ditangkan ngambi ke puh nganti dividen nya dibayar ngagai sida dalam kandang beberapa hari tu agi, kejang pengawa bepilihbesai tu ila. Kami deka belaba ke semoa orang ti nerima duit dividen nya ila deka dipejal ngundi BN! Parti BN endang lama udah ditemu seruran ngena chara mejal bala pengundi ngena duit sida empu.

Penguntong 100%


Jabu udah mansut ke sebengkah penerang taun tu ti endor iya deka nyua ke bayar ti dikumbai ke sebengkah rekod SALCRA ba penguntong sida ti bepenyampau RM74 juta, kejang pengawa bepilihbesai tu ila, ti endor iya madah ke bayar nya bulih dua kali lipat ari taun nyin kemari.

Nama reti bayar nya baka ti disebut Jabu? Kitai sama nemu bayar ari SALCRA nya 100% ari semoa penguntong SALCRA ti ulih ari ator skim nya lalu enda tau enda dipulai ke ngagai semoa orang ti masok skim nya ketegal sida udah nyerah ke tanah sida.


Nitih ke lumor-lumor baka ti disebut Jabu nya, mudah bendar kitai deka ‘nyukat’ gaya pengawa ti dikereja Jabu ti nyadi pengurus besai ba Salcra nya, ti endor iya ngemata ke  kebun sawit ti bulih 48,000 pemesai. Sarawak Report udah bulih sebengkah chara ngaga kira-kira ti mudah amat dikena manding ke penguntong 100% ti disebut iya nya, enggau pengulih sebengkah kompeni kebun komersial IOI ti pemadu besai di dunya tu. Ari banding penguntong SALCRA enggau IOI, dia kami meda utai ulih SALCRA nya balat ngenusah ke ati – ti endor SALCRA nya tau disema ke sebengkah gerempong bekebun dandang besai ti pemadu enda mujor dalam dunya tu, ba sebarang sapa orang ti deka beranak ke puku’ ba sida.


Semina satu ari sepuluh penguntong ari pengawa bekebun komsersial


Penguntong RM74 juta ari kebuh ti bulih 48,000 hektar nya tau disebut kitai sebengkah pengawa ti puntan. Lalu ba taun nyin kemari kami dipadah ke SALCRA semina bulih untong setengah ari taun tu, reti nya SALCRA semina bulih RM35 juta aja!

Enti dibanding ke, kami minta kita berati ke penguntong kompeni IOI dalam Repot Taun sida ke taun 2010 tu tadi dikena kita mansik penguntong SALCRA baka ti disebut Jabu nya. Kompeni IOI madah ke sida mujor bulih penguntong operasi sida taun 2010 bulih RM11,488 ke tiap hektar tanah ti endor sida bekebun nya. Tang enti kita magi dividen RM74 juta enggau 48,000 hektar ti dikemata ke Jabu nya, kita deka meda penguntong nya semina RM1,541 – iya nya sepuluh kali kurang ari penguntong kompeni kebun komersial, baka ti ulih sida IOI!

Enti Jabu deka betegal ke penanggol ti datai ari duit jali enggau pemansut belanja ba pengawa bukai ti renchit-renchit nya, sapa-sapa pan tau ngumbai saut nya mapap.

Chara kira-kira iya:

Kebun komersial bulih RM11,488 ari sehektar tanah, tang SALCRA ti dikemata ke Jabu semina bulih RM1,541 ari sehektar [taun 2009]

Kebun komersial bulih RM13,347 ari sehektar, tang SALCRA semina bulih RM729 ari sehektar [2008]

Ari lumor-lumor nya tadi, kita tau meda kompeni IOI udah mansut ke penerang sida ti mujor ngulih ke asil lebih ari 25 tan ari tiap sehektar kebun sida nya, tang SALCRA ti dikemata ke Jabu nya semina ulih mansut ke asil 14 – 15 tan ke setaun. Nama kebuah?

Maia ningkil ke Pengerusi enggau raban Lembaga Pengarah iya sekali?


Enti sema SALCRA nya sebengkah gerempong kebun komersial, udah tentu bendar bala orang ti megai share dia minta diator ke sebengkah Aum Besai Emergency, lalu minta Pengerusi sida, baka Jabu nya, badu mangku pengawa iya!

Tang laban Kepala Menteri Taib Mahmud nya endang selalu ngari ke sapit iya nya, ti lama bendar udah ngasai ke pengaya ketegal mujor nan ke bala pengundi Iban dalam BN. Leboh sida mengkang dalam BN, bala pengundi Iban nya patut udah ngasai ke pengelantang dalam pengidup sida ti datai ari tanah-tanah sida, tang pekara ti amat-amat nyadi ba sida diatu nya sida idup merinsa, taja pan bala menteri BN seruran nangkan sida ngasoh sida nganti enggau sabar ke ‘pemansang’ datai ngagai sida.


Tang nama agi utai ti dikarap ke sida nya? Nama kebuah Jabu semina bulih penguntong ti mimit (RM1,500) ari sehektar tanah, taja pan kompeni IOI mujor bendar ngulih ke RM11,488 ari sehektar? Tau ke, kini penunga pengelenyau bepuluh ribu ringgit nya? Reti ti ko kami ditu, kini penunga RM10,000 ti lebih nya ke diulih ke ninting taun ke tiap hektar tanah ti dikemata ke SALCRA? Ngena penyampau ti baka nya (RM10,000 setaun) ulih bendar dikena ngangkat ke pemanah pengidup bala orang (ari 20,000 ruang bilik) ti seranta, lalu maioh agi sida nya semina bisi sehektar-dua tanah NCR.

Enggau ator pengawa SALCRA ti manah sereta meruan, bala orang ti masok skim nya tentu ulih idup lantang agi ti endor sida bulih entara RM10 – 20,000 setaun, lalu ukai bepanggai pengidup ba empat-lima ratus – tau ke pemeri ‘buah jari’ kejang deka bepilihbesai tu ari Jabu, enggau semina RM1,500 ke setaun nya! Nama kebuah sida mengkang ngarap sereta nganti enggau sabar?


Kini penunga RM500 juta nya lenyau?


Ditu, kami deka nanya siti tanya ba Jabu – Sekali ke iya nya siko pengurus ti pemadu iya puntan ba dunya tu, tau ke iya nya endang udah ngenchuri duit nya? Seagi-agi iya enda ngeluar ke Repot Taun bekaul enggau penatai pemisi SALCRA, iya tentu agi dibantah sapa-sapa. Kami tau ngaga simpul penemu ti ngumbai Jabu ukai pengurus ti landik, lalu iya mega udah ngenchuri duit ti maioh!


Tingkil ke iya nya!

Taja pan maioh agi bala orang ti empu tanah NCR ti dikereja dalam skim SALCRA nya nadai dilindong enggau enda bulih sebengkah-sebengkah hak, tang sida nya bisi hak ngundi. Nya meh kebuah Jabu diatu suah dipeda kiroh bendar niki rumah panjai lalu nyua ke  duit RM500 dikena iya meli undi sida! (Anak lelaki iya mega ditemu kami nyadong beer bepeti-peti ngambi ke dikena ngenyarut ke runding bala pengundi apai iya, Jabu.)

Bala orang ti masok skim SALCRA nya patut udah mereti diatu, Jabu nya meh orang ti berutang ba sida, bepuluh kali lipat kurang agi penyampau ti patut diterima sida, ari penguntong. Sida iya patut udah meda duit ti ngemaioh nya lalu didarab enggau 30, sebedau sida berunding ngasoh iya terus ngemata ke pengidup sida dalam 5 taun ti deka datai tu ila. Sida enda patut neju ke ai beer nya nagang sida ngator singkang ti betul … laban, ba maia ngundi tu ila meh, sida ulih ningkil ke Jabu

  • ari Tebalau Nanga ,l

    nang sigi amat nya jabu nang nipu .utai tu lama daj nyadi ba menua kami di layar..kelebih agi maia bepilih…abis semua rumah panjai ditiki ,di beri duit ,nyau begaga ke kem…asoh jabu…nya meh tudah rakyat nyau tegelay laban ka udah ngirup beer free ko jako…..jabu selalu meri kami duit rm50 siko…mesti ngundi ia…..bangkai Jabu………..daha tu ila alah nuan Jabu ….tulah nuan Jabu …kelalau nuan ngaga kami rakyat ..tanah temuda rimba abis ko diempu nuan magang…jako ja manah depan rakyar ..tang ari belakang jai.siti agi pengawa Jabu ti datai ngagai menua kami….ia maioh ank ikan di bai dalam kambut plastik…udahnya lalu dilepas ka ia ba layar…bah nama guna nya…uji tak pegong gaga ba belakang bilk nda ga manah…nya nunjuk ka jabu tu baka runding baya di ai layar..sema jako ikan ka di lepas nya meri baya makai ukai meri rakyat…bangkai nuan jabu…………kami minta nuan jabu ngudur jadi menteri….alah nuan sekali tu …kmmi ari layar meri sokong padu nagagi parti SNAP…ia nya Mr Joe Unggang….idup SNAP….

1 Apr 2011

JULUK ATI BARU SIDA BN!

This post is also available in: English, Malay

JULUK ATI BARU SIDA BN!


Bala penulis blog Barisan Nasional udah bejako enggau chara ti sumbong madah ke State Secretary ke menoa Sarawak, Mohd. Morshidi bin Abdul Ghani, udah ngirum ke sepuchok surat ngagai suratkabar The Sunday Times di menoa UK ti endor iya ngeluar ke jako penerang ti madah ke “kampong jerung ujan [Sarawak] enda rusak” lalu “lisin-lisin ngulih ke kayu kampong udah dikeluar ke nengah proses-proses ti terit lalu ukai pemeri ari Kepala Menteri”.

Tang, kami ulih ngayan ke ditu sida Morshidi sebilik nya endang seraban orang diri sebilik ti kala bekaul enggau penyalah ngerampas tanah di menoa Sarawak! Ukai semina nya, tang sida sebilik mega dipinta mayar premium tanah ti chukop murah ke kandang tanah ti besai sereta luas (pemeri ari Kepala Menteri)!

Tanggong pengawa ba orang ti kereja perintah ti bepangkat tinggi


Morshidi nya siko orang ti pemadu tinggi pangkat orang ti bekereja ba perintah lalu iya enda patut bebalut ke politik enggau pengawa iya. Tang, iya endang ditemu orang siko pangan rapat ke Taib lalu ari nya iya jampat bendar ‘engkasak’ ngenan ke bos iya udah ninga repot ari suratkabar The Sunday Times ti nusoi pasal pengerusak rampa menoa di Sarawak minggu nyin kemari.

Ngena chara nunda jako Taib ti tau ngasoh kitai geli ati, Morshidi nyebut “70% rampa menoa sekayu Sarawak agi dibap kampong jerung” (tu sebengkah chara dikena nerang ke semoa kampong di Sarawak nya kampong bungas), sebengkah penerang ti dikumbai bula ulih bala orang ti landik pasal rampa menoa ti tebilang ari menoa tasik.

Pekara ti ngasoh ati kitai alit iya nya menyadi Morshidi, Mohd. Taufik bin Abdul Ghani, udah bulih sebengkah kandang tanah ti bulih 14,000 hektar pemesai enggau pala tanah berega semina RM110,000 aja! Nadai penyalah bebalut pengawa (konflik kepentingan) dia?


Nitih ke rekod-rekod tanah, Taufik udah diberi tanah ti bepala beikas 60 taun! Tu siti ari penerang pasal pemurah ati State Secretary menoa Sarawak ke menyadi iya! Kitai tentu deka alit ati baka ni “proses-proses ti terit” munyi ko Morshidi leboh maia pengawa nyerah ke nya, “lalu ukai pemeri ari Kepala Menteri”. Nyangka Morshidi nya enda tau enda sekali agi ngirum ke surat ngagai The Sunday Times dikena iya nerang ke enggau silik pasal reta-reta pechuma nya ari Kepala Menteri?

Rega bendar surat-surat pala tanah nya udah ulih diterang ke


Pansik kami nunjuk ke rega ti bendar ke tanah-tanah ti diserah ke ngagai menyadi State Secretary nya, laban ke-dua buah kompeni Derawan Sdn Bhd enggau Sahua Enterprise Sdn Bhd nya  (dipejalai ke ngena alamat opis enggau lumor telefon ti sebaka enggau enggi Morshidi) udah dijual ngagai Austral Enterprise, iya nya anak kompeni ke Sime Darby.

Kompeni Austral udah mujor meli dua buah kompeni nya dalam kandang taun-taun 1990 enggau rega RM15.5 juta. Enggau nya, sida Abdul Ghani sebilik udah mujor bulih untong RM15 juta ari tanah-tanah nya, lalu sida mega mudah bendar mayar premium RM110,000 ke tanah-tanah nya ngagai Perintah Menoa Sarawak!

Sarawak Report nudoh ke penemu ngagai semoa rakyat enggau pengundi di menoa Sarawak ngambi ke sida ringat ketegal pengawa ngenchuri ti dikereja baka nya, ti udah diator chara belalai nengah Opis Lands and Survey, ari asoh Kepala Menteri ngari ke sida Morshidi nya sebilik.

Mantu ngemai pengerusak ngagai rampa menoa di Sarawak


Dalam surat iya nuju suratkabar The Sunday Times nya, State Secretary ke Perintah Menoa Sarawak nya madah ke pengerembai enggau pemansang industri sawit “enda tau ngasoh ati kitai takut”. Leka jako ti munyi nya nunjuk ke iya baka ti enda ibuh ke pengerusak rampa menoa laban industri nya.

Tang diatu, kitai berasai patut endor kitai ngayan ke sebengkah berita pasal kompeni Derawan Sdn Bhd ti bekaul enggau sida Morshidi sebilik udah kala diukom RM20,000 ba bulan Oktober nyin kemari ketegal sida ti ngaku diri salah muai uras berachun ari kilang sida ke dalam sungai.


Pengerusak rampa menoa ti datai ari pengawa bekebun sawit bedandang besai nya sebengkah penanggol ke rampa menoa ti nuntong orang di menoa Sarawak. Ai irup ari sungai nyau kamah sereta berachun lalu munoh semoa bansa utai idup dalam ai lalu pia mega ngasoh tanah tusor.


Sapa ti untong?


Enggau nya, sekali agi dunya ngelesei ke bala orang ari BN ketegal ti mansut ke penerang ti enda ulih diterima akal. “Pengaya ti berupai” munyi ti disebut State Secretary Perintah Menoa Sarawak nya tau dikena nyemaka ke rakyat ti dibayar gaji RM15 sehari bekereja ba kebun sawit bedandang besai, dibanding ke enggau sida sebilik ti bulih RM15 juta ulih ari nyual tanah-tanah bepala, ti udah diterima sida ari Taib Mahmud ti murah ati nya!