BAKA NI LEN TALIF SALLEH – SIKU ORANG TI KEREJA PERINTAH/KABAN POLITIK/KEPALA KOMPENI – NGERUGA MENUA LONG TERAWAN!

• 24 May 2011
• BM 翻译

HOW LEN TALIF SALLEH -”OBJECTIVE” CIVIL SERVANT/BN POLITICIAN/TIMBER COMPANY BOSS – SWINDLED LONG TERAWAN!

BAKA NI LEN TALIF SALLEH – SIKU ORANG TI KEREJA PERINTAH/KABAN POLITIK/KEPALA KOMPENI – NGERUGA MENUA LONG TERAWAN!

Kejang deka maya bepilihbesai tu tadi, Pengarah Jabatan Perhutanan, ti bempu tanggungpengawa bekaul enggau lisin ngulihka kayu kampung, Len Talif Salleh, bisi dipeda rigang-rigang ba mua kamera bala pengarang berita ti endur iya nyukung penemu Kepala Menteri ti madahka 70% ari rampa kampung bungas di menua Sarawak endang bedau dikeruga sapa-sapa.

Iya mega madahka bisi seraban orang ti rinduka rampa menua ti dipelanja sebengkah kompeni dalam undustri luba ari menua Belanda ngayanka bantah sida pasal pengerusak rampa menua Sarawak. Baka ni ku nya, sekali ke semua orang ti ngereja sebarang pengawa ke baka nya endang ngarapka upah enggau pampas?

Len udah suah bendar ‘diayanka ba mua mayuh’ nyadi siku orang ti bekereja ba perintah, iya nya nyadi Pengarah Jabatan Perhutanan ti terit bejalaika pengawa, lalu ngemataka pekara pasal kampung di menua Sarawak, baka ti enda bekaul enggau politik. Kaul iya enggau politik nadai ditemu sapa-sapa nyentuk ke ngagai maya ngundi tu tadi dia iya dipeda bediri minta pilih!

Ba menua-menua ti enda dituntung penanggul makai suap, sapa-sapa orang ti mangku pengawa ba opis perintah ti berunding deka nyadi orang politik enda tau enda ngelekaka pengawa perintah iya dulu. Tang Len Talif ukai semina ditemu ngelanggar atur nya, tang nitihka ba laman web rasmi Jabatan Perhutanan ti dipegai iya, iya mengkang mangku pengawa nyadi kepala dia, taja pan udah beminggu-minggu iya ti nyadi YB BN udah tembu pengawa bepilihbesai!

Simpul penemu ti ulih kitai ari tu nyangka nya Taib nyau nadai agi orang ti ulih dikarapka iya nganti Len Talif, ti sebaka ulah enggau pendiau Len. Nyangka mega nadai mayuh agi orang ti besai-besai pengawa baka Len ti deka ngaku rampa kampung di Sarawak tu agi 70% bedau dikeruga!

Len Talif ngeluarka lisin ngulihka kayu ke iya empu!

Tang tu semina sebagi aja ari penyalah ti bebalutka pengawa dalam kereja Len. Asil pansik kami ngayanka baka ni iya udah mangku beberapa iti pengawa, ti meri iya peluang ngemataka pengawa orang ngulihka kayu – sebaka chara enggau ketuai iya empu, Abdul Taib Mahmud ti mangku semua pengawa ti pemadu beguna dalam perintah menua Sarawak.

Dalam taun 2008, Len Talif udah kala mangku pengawa nyadi Sekretari Tetap ba opis Menteri Perambu enggau Pengeraja Asal/Kepala Korporasyen Kampung lalu pia mega nyadi Pengurus STIDC. Nya alai, patut mega endur kami belaba ke Len Talif nya lebih ari nyadi “kaki-jari” Taib Mahmud bekaul enggau pekara pasal kampung di menua Sarawak – lalu kami pan endang ngumbai nya amat!

Len Talif mega mangku pengawa nyadi Pengarah ba kompeni Pusaka KTS Sdn Bhd, sebengkah kompeni enggi sida Lau sebilik, iya nya penyukung regas Taib Mahmud enggau BN. Sida Lau sebilik tu mega orang ti beempu kompeni penyelak suratberita Borneo Post. Nambahka nya, STIDC mega bisi megai saham ti mayuh, ti dipelaba nyadika penatai-pemisi Len ti nyadi pengarah sida.

Pekara ti baka tu terang bendar nunjukka Len Talif nya udah regas bendar ngiga pengeraja nengah kompeni ti endur iya kereja enggau nengah lisin ngulihka kayu kampung ti keluarka iya empu, ngarika Perintah.

Nerumpak bala orang di Long Terawan

Bebalut pengawa dalam kereja iya diatu udah diayanka nengah bantah bala orang di Long Terawan di pelilih menua Baram ti udah lenyau tanah temuda enggau kampung sida, lalu diatu mega sida benung angkat ngelaban pengawa orang ti ngulihka kayu kampung. Diatu mega pengawa muka kebun dandang besai sawit belabuh dikereja ba kampung NCR sida ti bulih 100,000 hektar nya, ti endang nyadika endur sida begigaka pemakai ngelama tu.

Len Talif, siku orang ti berani ngaku ¾ ari kampung bungas di menua Sarawak tu bedau dikeruga, ke bendar iya nguluka pengawa berampaska tanah orang, ngeluarka lisin-lisin ngagai Pusaka KTS ba serata menua nya dia. Enggau nya, Len udah ngeluarka lisin ngulihka kayu kampung ke iya empu ti endang bekerja nyadi Pengarah ba Pusaka KTS nya!

Kelimpah ari nya Len mega nyadi pengari Pusaka KTS bechara dalam kes ngelaban bala orang asal menua nya ti bekaul enggau lisin-lisin ti udah dikeluarka iya nya. Bala orang asal menua nya udah diburu pansut ari menua sida empu udah bekau Len enggau kompeni Pusaka KTS nanggam sempekat ngena chara belalai enggau tuai orang di menua nya dalam taun 2009 nyin kemari!

Sebengkah sempekat ti ngemalu

Bala orang asal di menua nya ringat bendar udah sida nemu sempekat ti udah ditanggam nya ti nadai dipadahka ngagai sida. Kitai sama nemu, sekumbang Len nyadi pengari Pusaka KTS, iya mega benung nyadi kepala ba Jabatan Perhutanan menua Sarawak lebuh nya.

Bala orang asal madahka kompeni nya udah ngulihka kayu kampung ari kampung NCR sida betaun-taun tu udah enggau nadai betanyaka jaku setuju ari sida, tauka mampas sida lalu polis mega enda ibuhka serebana enggau ripot sida. Tanggam sempekat belalai nya sebengkah pengawa ngulihka endur nya dikena muka kebun bedandang besai sawit, ti mega nadai mayar sebarang pampas ngagai bala orang di bempu tanah NCR dia!

Patut tauka enda Pengarah Jabatan Perhutanan ngeluarka lisin-lisin ngagai kompeni Pusaka KTS, ti endur iya mega bekaul enggau pengawa nanggam sempekat nya chara belalai? Udah tentu enda patut. Diatu terang bendar ba kitai mayuh tu, tu endang chara pengawa kompeni-kompeni kayu baka KTS bekerugaka tanah-buah orang bansa asal di serata menua Sarawak, lalu tu endang ditemu sereta dikemendarka Abdul Taib Mahmud.

Nama penyadi ba Long Terawan?

Taib udah mujur bendar ngubah chara orang bansa asal milih sapa ti patut nyadi tuai ba raban bansa diri, ti endur iya enggau perintah BN iya nentuka sapa ti patut ku ati sida nyadi tuai orang bansa asal, ti lalu udah nya dibayar sida upah ti enda besai.

Ngena tuai-tuai raban bansa asal ti dituduhka Taib, iya mudah agi ngasuh bala tuai nya besetujuka sebarang sempekat ti mar bendar diperetika ti endur sida nya ngarika nembiak diri empu.

Sebengkah agi pejurai ti enda meruan

Sebengkah surat penerang ti ditulis dalam jaku English, disain siku tuai raban bansa ti enda sah, lalu nadai belalauka lawyer, tang suah agi nya dikereja lebuh maya makai enggau ngirup ai bisa nya, enda tau didirika ba mua court. Surat sempekat ti baka nya sebengkah pengawa nipu, lalu nya pekara ti udah kala dikereja di Long Terawan.

Siku lawyer ari raban bansa orang dia, iya nya orang ti landik pasal pekara pengelantang orang asal, Abun Sui, udah meri jaku tangkan, madahka sempekat ti kabur nya lalu enda meruan, lalu nadai ngerintaika enggau silik semua pekara dikena ngelindung orang asal nya sebengkah pengawa nipu. Abun Sui madahka iya enda mujur bulih sebarang penerang bekaul enggau pelilih menua ti dipinta Pusaka KTS, taja pan kebun bedandang besai ti bulih 100,000 hektar nya udah lama diperambu deka dibuka.

“Bala kami enda mujur ngulihka salin pala tanah sementara nya”, pia ku jaku penerang ari Abun. “Surat nya patut diberi ngagai kami, tang lebuh kami minta, Jabatan Perhutanan enggai mantu kami, lalu sida madahka peminta kami nya udah enda diterima!”

Nama kebuah Len Talif nagang pengawa lawyer ti deka ngarika Long Terawan nya taja pan sida udah ngena chara ti betul ba undang-undang ngiga semua bansa penerang pasal lisin-lisin ngulihka kayu kampung ti dikeluarka ngagai kompeni ti endur Len empu nyadi pengarah ti sama nanggam sempekat enggau orang asal menua nya? Nya udah terang bendar nunjukka Len udah bejalaika pengawa iya enggau chara bebalut pengawa, sebengkah penyalah makai suap ti balat sereta tau ditinggang ukum ti berat.

Taja pan baka nya, kami mujur bulih surat penerang ari Pusaka KTS dalam taun 2009. Kompeni nya udah besemaya mampas bala orang asal menua nya RM 300 ke sehektar tanah tauka kampung NCR sida ti diambi kompeni nya! Kayu-kayu ba endur nya, ke lebih agi kayu tebelian aja, dipelabaka manggai ba rega bejuta-juta ringgit.

Diatu Pusaka KTS tetap deka neruska juluk ati sida ti deka muka kebun bedandang besai di endur nya. ‘Sempekat’ taun 2009 nya ditanggam dikena muka kebun sawit. Ari beratus-ratus ribu hektar kandang menua ti diambi nya, bala orang asal dia deka semina diagihka 200 hektar aja baka ti disebut dalam ‘sempekat’ nya. Tambah mega, sida semina deka bulih tanah nya udah buah sawit dia terubah diketau KTS ila!

Udah bekau KTS napi bantah ari bala orang asal menua Long Terawan nya, dia sida lalu ngubah chara sida. Ba taun tu sida dipeda manah agi enggau bala orang asal ari ti mayar pampas besai agi ari ti disemayaka Len Talif dua taun dulu ari nya.

Diatu, bulih setengah juta ringgit udah disemayaka ngagai bala orang asal di endur nya dikena numbuhka projek ti enda tentu terang ti deka dikena orang nanam kayu akasia (kayu machis), taja pan kayu ti bansa nya udah kala dibantah orang laban bisi bekaul enggau pengerusak pengerai. Lalu sekali agi, bala lawyer udah nangkan bala orang, madahka sempekat nya agi kabur-kabur ti endur bala orang asal ti suntuk di menua nya deka dipinta mayar belanja legal.

Siku kaban kempen, Willie Kajan bisi udah madahka ngagai Sarawak Report ti endur perintah BN benung ngulihka sukung tuai-tuai ba menua nya. Sida udah disemayaka duit agih RM 2 juta, tang Willie udah nangkan bala orang asal di menua nya, sida enda deka meda duit nya, lebih agi enti duit nya enda diberi dulu!

Terang mih diatu bala orang asal Long Terawan enggai agi nyukung BN, laban udah bekau 200 iku ari bala sida dia nyain sebengkah petisyen Willie dikena mantah sempekat enggau kompeni nya, dia tuai raban bansa dia mujur mega bulih chap jari dikena iya ngarika semua raban bansa asal di menua nya.

Tang, enggau duit belanja beratus juta ringgit, bala kompeni kayu ti udah bekunsi dagang enggau Taib Mahmud tentu enggai nyurutka diri enggau mudah baka ti dikarapka.

“Diatu sida nyau nganjung bala apek bayat tama kampung lalu nebang kayu, sekali ke besempekat tauka enda besempekat”, pia ku Willie, ti bisi mega tanah NCR dikeruga kompeni lalu enda bepampas. “Baka nya mih chara sida bekereja, sida mai bala apek bayat tama, lalu udah nya sida ngeluluka diri ukai dikereja sida”.

Pengawa ngulihka kayu kampung di serata menua Sarawak endang nadai bekaul enggau sebarang undang-undang tauka bebagi kuasa. Len Talif Salleh udah terang bendar mangku pengawa nyadi siku orang ti bekereja perintah, kaban politik enggau orang dagang sekali!