BALA YB BN PATUT BELAJAR KE PENEMU PASAL DEMOKRASI ENGGAU DALAM AGI!

BALA YB BN PATUT BELAJAR KE PENEMU PASAL DEMOKRASI ENGGAU DALAM AGI!

BN udah ngeluar ke belanja ti maioh dikena nentu ke sida mengkang merintah ngena atur demokrasi ba mata dunya. Tang, enggau chara pechuma, pengari rakyat Pantai Damai, Dr Abdul Rahman Junaidi, udah mai pengamah ngagai nama demokrasi ari ti mansut ke sekeda jako ti tau ngasuh orang ba sitak iya enda lantang ati.

Jako ti dipansut ke iya, baka ti udah dikeluar ke nengah suratkabar BN, The Borneo Post, kena 28hb April ngena rambaijako “It is not fair to bite the hand that feeds you” (reti nya “Enda patut kitai ngetup jari orang ti nupi kitai”) udah dituju ke iya ngagai bala pengundi ba sitak pengawa bepilihbesai iya di Pantai Damai, ti ditemu iya bisi enda ngundi iya apin lama tu udah.

Ukai baka kaban politik demokrasi ti endang tulin, ti patut deka ngaku pengelemi diri empu lalu udah enda mujor narit ati bala pengundi iya, ti endur iya patut besemaia ngangkat ke pemanah diri empu ba maia ke bukai, Abdul Rahman Junaidi udah ngemba pengundi iya ba endur nya! Nambah ke nya, iya udah besemaia deka matak semua bansa pemeri ari perintah enti sapa-sapa ari sida dia ditemu iya udah ngundi penyakal!

“Chara ti deka dipejalai ke kami di Pantai Damai ditu … enti sida majak deka nyukong penyakal, sida patut minta bantu ari bala penyakal”, ko pengari rakyat nya.

Abdul Rahman Junaidi adalah wakil mereka, bukannya bos mereka!

Abdul Rahman Junaidi patut ingat, bala pengundi iya nya meh orang ti udah meri iya pemakai ngelama tu, nengah gaji bulan iya ti nyadi pengari rakyat ke sitak iya. Bala orang berikan ti ninga ke jako iya nya mega raban orang ti nentu ke mija makai iya seruran bisi pemakai ke diempa iya ninting hari. Nya alai, IYA patut ingat, enda tau ngetup jari bala pengundi ti udah nentu ke iya seruran bisi pemakai ke diempa.

Malu bendar ninga jako ti dipansut ke Abdul Rahman Junaidi enggau enda bepampul baka nya. Iya patut nentu ke diri bulih penuduk ti tinggi dalam raban orang ba sitak iya, lalu nentu ke bala pengundi iya patut bulih sebarang tulong enggau bantu ari perintah. Bala pengundi iya enda patut dipejal nelentang ke tapa jari ba moa orang maioh nganti pemeri ari perintah, baka ti udah dikereja iya enggau chara ti sumbong nya.

Sapa meh Abdul Rahman Junaidi ti udah enggau chara ti sumbong nyua ke bantu ari perintah ngagai bala orang berikan ti endang patut bulih pemeri nya? Sekali ke, duit nya endang datai ari kandi iya empu, nya kebuah iya patut ngembuan ulah ti sumbong baka nya? Enda patut! Duit bantu nya datai ari duit bala pemayar chukai enggau pemeri-pemeri ari orang siko-siko di menoa Sarawak, lalu enggau nya iya enda patut ngaga bala pengundi iya baka nya.

Abdul Rahman Junaidi mega enda patut bula ke bala raban orang ba sitak iya nya madah ke duit bantu perintah nya datai ari tabung parti BN. Dalam atur demokrasi, parti BN (ti megai perintah) endang betanggung-pengawa nentu ke semoa rakyat ngasai ke penguntong ari duit ti dijual sida. Pekara tu dipeda lilih agi ngagai penaluk, lalu ukai lilih ngagai kuasa.

BN patut bebasa ke panaluk, lalu ukai meda diri orang ti bekuasa


Sama sebaka enggau Abdul Rahman Junaidi, BN nya ukai tabung duit ti deka diberi sida ke bala rakyat. Iya ke bendar BN nya bepanggai pengidup ba duit bala pemayar chukai. Sida iya udah ngelimpang ke atur pejalai duit ari pengeraja asal menua tu ngambi ke penguntong nya tama ngagai kandi sida empu, lalu mimit bendar deka diasai ke ba orang berikan baka ti di Pantai Damai.

Bala orang berikan nya meh raban orang ti bejalai ke pengawa sida berambun ke nyawa, napi pemedis, dikena sida nentu ke mija makai Abdul Rahman Junaidi nya enda pungkang pemakai. Iya meh ti patut beterima kasih ke pengawa bala orang berikan nya lalu iya mega patut minta ampun ari sida ketegal sida enda bulih penguntong ti besai ari pengawa sida ti mar nya, lalu sama enggau nya mega sida endang mengkang ngarap ke bantu ari perintah taja pan enda nyengala besai.


Penyumbong ti dipandang ke Abdul Rahman dalam jako iya nya sebengkah ari jako-jako bala kaban politik BN udah tembu pengawa bepilihbesai tu tadi. Pengawa nagang pengerami Borneo Cultural Festival di menoa Sibu mega sebengkah agi chunto ti nyengenda, ari ketegal  BN ti udah alah di endur nya.


Bala YB ari BN agi kurang bendar penemu enggau runding sida ba reti demokrasi ti bendar. Sida enda mereti ke pugu penemu demokrasi nya ti endur sapa-sapa pengari ti menang ari parti ti kena pilih endang patut bisi tanggung-pengawa ngari ke SEMUA orang enggau enda bechiping atur. Ya, nyengkaum sapa-sapa orang ti udah enda ngundi sida!

Taja pan baka nya, nadai siti pan parti demokrasi deka ngereja pekara nya laban sida nangi ke diri deka lenyau sukong. Pengeringat BN udah ngemuntan ke agi pejalai sida empu, lebih agi maia DAP tama lalu madah ke diri deka ngator pengerami nya ngena belanja sida empu, lalu enda iboh ke BN ti ringat.

BN udah ngena chara ti kamah ngatur diri bekuasa dalam pengelama bepuluh-puluh taun tu udah lalu sida udah enda iboh ke atur demokrasi. Kaban politik baka Abdul Rahman Junaidi endang nemu, iya menang ukai ketegal iya udah bebendar mujok bala pengundi iya. Pemujor BN ngelama tu bepanggai ba penyalah ngemba bala pengundi, nyuap pengundi ngena duit-ringgit, magi sitak menoa, enggau maioh agi pengawa kamah. Setengah ari rakyat menoa Sarawak endang bisi hak ngundi, lalu semina sida ti diau di nengeri aja enda ulih kena emba BN. Baka nya meh chara BN ngenan ke penudok sida dalam perintah dalam pengelama 50 taun tu udah. Bala pengari BN enda patut dikumbai kaban demokrat, tang patut dikumbai diktator (iya nya perintah kukut besi), baka ti udah berupai diayan ke dalam jako Abdul Rahman Junaidi apin lama tu udah.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments