GAMBAR-GAMBAR TI TAU NGASUH KITAI IRAU ATI!

GAMBAR-GAMBAR TI TAU NGASUH KITAI IRAU ATI!

Sarawak Report udah bulih beberapa iti gambar ti bekaul enggau peti-peti undi ti udah diserungkai lalu dikachau baka ti udah nyadi maia pengawa bepilihbesai apin lama ti udah di sitak Senadin. Ba pengawa bepilihbesai nya penyalah ‘makai-suap’ enggau bebeli ke undi di menoa Miri udah ulih diayan ke.

Pengari PKR, Dr Michael Teo, ba pun lemai maia ti ngitung undi endang dipeda jauh dulu ba pemaioh undi dibanding ke undi pengari BN, tang enda mukai-mukai leboh pengawa ngitung undi benong dikereja dia palan pengitung undi nya lalu putus kuasa elektrik, lalu ba maia kuasa elektrik udah pulai manah baru, dia pengari BN-SUPP udah dikira menang, lebih 58 undi maioh ari undi Dr Teo. Enggau nya Dr Teo mutus ke runding diri deka mai kes tu ngagai court ngambi ke dipechara.

Enti Dr Teo nerus ke julok ati iya nya lalu belaban baru, iya bisi maioh bendar penerang dikena nyukong jaku serebana enggau bantah iya. Siti ari chunto nya ba undi pos ti udah ngayan ke penyampau kertas undi pos bisi 103% lebih ari semoa kertas ti udah dikeluar ke. Dr Teo mega ngeripot pasal 20 iti ari semoa kertas undi ti enda dipulai ke. Baka ti dikelulu ke, 1,134 iti ari semoa undi nya lilih ngagai SUPP lalu semina 58 iti aja pulai ngagai Dr Teo – lalu enggau nya PKR semina bulih 5% ari 20% ke semoa undi pos nya.

Malam nya, Returning Officer, Chai Ko Het, enda ngemendar ke semua undi dikira kedua kali, taja pan bida undi semina 0.4% aja. Atur pengawa bepilihbesai terang bendar madah ke, enti bida undi mimit ari 2%, semua undi nya tau dikira baru. Tang Chai Ko Het udah terang bendar ngari ke pengari SUPP. Bala pekereja SUPP mega ditemu dikemendar ke tama ngagai beberapa bengkah palan endur muai undi, iya nya sebengkah pekara ti ngelanggar atur ngundi, ngambi ke mudah endur sida nentu ke bala pengundi amat bisi ngundi laban sida udah mayar duit penulu sebedau ngundi, lalu udah tembu ngundi bala pengundi nya deka dibayar baru! Tu endang sebengkah chara sida meli undi.

Baka ni gaya gambar-gambar ti udah diayan ke ba laman tu? Semoa gambar nya nerang ke pekara ti nyelai udah nyadi kena hari Satu, iya nya dua hari udah tembu pengawa bepilihbesai, ti endur penyarut Senadin udah nyadi, siko wakil PKR bisi dikangau ke sama-sama enggau siko wakil ari BN, ngambi ke bisi ngemata ke semoa peti undi ti bisi bekaul enggau penyarut nya, ti dikemata ke siko sapit returning officer.

Wakil PKR ti dikangau ke ngagai opis nya, seninjik bendar bisi mai kamera iya, lalu sempat mega endur iya ngambi sekeda gambar ti nyelai-nyelai bekaul enggau peti-peti undi di endur nya. Pengawa ti berandau enggau ngambi gambar nya mega sama dipesetuju ke entara wakil PKR, wakil BN enggau sapit returning officer. Ba maia nya bisi 8 iti sarung surat bechura mirah ti endur nyimpan keretas undi ti disimpan dalam peti-peti undi plastik, lalu dibungkus ngena plastik bechura kuning, enda ditutup enggau manah lalu mega nadai sebarang tandatangan.

Tambah mega, bisi 4 iti ari peti-peti undi nya enda ditutup enggau manah. Bisi dua iti peti enda ditutup enggau betul ti dipelaba ke ngambi ke mudah dibuka baru. Dalam sebengkah agi peti undi di endur nya, sarung surat ti bechura mirah enda dibuka enggau manah lalu keretas-keretas undi dia mega enda disimpan enggau kemas!

Leboh maya wakil PKR nya benung kiroh ngerikot gambar ti bekaul enggau kelai pengawa nipu maia ngundi nya, enda mukai-mukai sapit returning officer lalu mansut ke sebengkah jaku penerang ti nyelai. Iya udah ngasuh orang ti bekereja di endur nya ngeluar ke semoa keretas undi ari peti-peti undi, iya nya ti diterima sida ari 40 bengkah palan ngundi, ngambi ke disimpan ke dalam sebuah kambut!

Nama kebuah sapit returning officer nya, ti bekereja enggau kepala returning officer Chai Ko Het ti enda datai maia nya, udah ngena pemutus iya empu ngelaban ator-ator pengawa bepilihbesai baka nya?

Enti Dr Teo deka majak ngelaban kes nipu maia bepilihbesai tu, iya tentu nemu diri endang ngelaban ator court ti dikemata ke perintah Taib ti enda beresi, berat sepiak sereta enda lurus nya.

Taja pan perintah udah bebendar amat nipu ba pengawa bepilih besai nya kemari, tang bala penyukong parti penyakal udah mujor bendar bulih 45% ari semoa pemutus undi. Penyampau ti besai baka nya udah terang bendar ngayan ke rakyat udah berasai enda puas ati ba perintah ti betuai ke Taib enggau BN ti sama bela enda beresi, enggau enda lurus.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments