taib betemu buku’ di tebedu

• 16 May 2011
• BM 翻译

taib betemu buku’ di tebedu

Sarawak Report bisi bulih mayuh gambar enggau berita ti silik pasal penyarut di pelilih menua Tebedu di Serian dikereja bala orang asal ti ngelama tu endang ditemu tinggi basa sereta taluk ngagai undang-undang.

Penyarut tu nyadi kira-kira dua minggu tu udah, lebuh pengawa ngerampas tanah ti dikereja Taib Mahmud ba sebengkah kandang kampung bungas di menua nya.

Bala tuai-tuai kampung di endur nya udah dipejal lalu tu meh ke terubah iya semua perengka enggi kompeni kayu batang dirusak sida di menua nya. Bala pekereja kompeni nya, tebal agi bala orang ti datai ari menua luar udah dulu ngelarika diri.

Baka ti udah direpot, pengeringat sida nya nyadi udah ngujungka sida ngerusak lalu nunu 4 buah lori pengangkut kayu, lipan enggau 5 buah rumah endur bala pekereja kompeni nya diau dalam kem kayu batang nya.

Sebatang andau ti dikena kompeni nya ngangkut kayu batang udah mega dirusakka. Gambar-gambar ti diterima kami bisi ngayanka pemalat pengerusak ti dikereja enda kurang ari 500 iku bala orang kampung ti datai ari 10 buah kampung bansa Bidayuh di menua nya.

Siku pengari orang di menua nya udah nusui ngagai Sarawak Report nya sida ngereja pengawa nya ketegal lama udah natka ati ti ringat enggau kena keduan kompeni ti ngulihka kayu kampung di menua sida dia.

“kami udah enggau naka ulih nagang kompeni nya tama ngagai menua kami, tang sida enda ibuhka jaku rara kami”, ku pengari kampung nya nerang.

Nambahka nya, ba beberapa bulan tu udah, bala pengari ari semua kampung ti napi penanggul nya kala udah ngaga dua iti ripot polis dikena sida nagang penama orang luar ngagai menua sida nya, tang polis mega enda ibuhka ripot nya. Bala orang kampung nya mega kala udah nulis mayuh bendar surat nuju upis-upis perintah ba ikas perintah menua tu empu enggau ba ikas perintah persekutuan, tang nadai mega disaut.

Nitihka penerang ari bala orang kampung, surat mega bisi ditujuka ngagai Sekretari Politik ke Kepala Menteri, Sekretari Politik ke Menteri Besai, Menteri-menteri Rampa Menua, Tuai Upis Kampung, Tuai Upis Pengerai enggau mega ngagai Michael Manyin seduai Richard Riot enggau bala pengari perintah ke bukai. Tang siti pan surat nya nadai disaut orang.

Ari ketegal ti enda ibuhka penanggul nya ari pun, penanggul nya nyau nyadi balat agi, lalu kelimpah ari nya, kenyau ari pun nya suba bala orang kampung udah ngasaika pemedis ketegal ti ngena ai sungai ti udah kamah laban telusur pengawa ngulihka kayu ari ulu menua sida nya. Bala orang kampung mega ringat bendar laban udah asa ati laban jalai ti disemayaka perintah digaga ngena nama ‘pemansang’ semina ngetu beberapa ratus depa ari kampung sida tang lalu limpang tama ke babas tuai ti endang ditagaka dikena kompeni nya nganjung lori enggau lipan dikena sida kereja.

Diatu, penyarut udah balat nyadi ari ketegal pemutus Kepala Menteri empu. Bala polis udah diansak tama ngagai kandang endur nya dikena nyaga pengelikun dia. Tang, udah pengawa ngulihka kayu di menua nya ngetu, diatu nyau pulai ngagai pemutus perintah baka ni chara sida mutarka penanggul enggau penyarut nya ke ujung agi.

Pengerangka Taib

Sebaka enggau penanggul-penanggul ke bukai di Sarawak, penanggul di Tebedu nya nyadi ari ketegal pengamu Abdul Taib Mahmud.

Semina dalam bulan nyin kemari Taib Mahmud bisi udah ditanya pengarang berita TV nengah sebengkah laman web ti dipelanja perintah BN Sarawak, ti endur iya ngaga penerang madahka 70% ari rampa menua di Sarawak mengkang enda ditebang!

Jaku randau nya ti endang dikeluluka endang dikena besangkal semua penemu bala orang ti rinduka pemanah rampa menua ti ngumbai 90% ari rampa menua di Sarawak udah ditebang – lalu dipelabaka udah manggai 95%.

Baka ti kala didinga kitai, jaku ti munyi nya mega kala udah dipansutka petunggal iya empu ti mega nyadi ke proksi dagang iya, iya nya Abdul Hamid Sepawi ti madahka “nyau ka semua rampa kandang menua di Sarawak udah ditebang abis kurang sekali”. [Hamid Sepawi – 2006 Apllication of Planted Forest Licence, Pengerusi Ta Ann]

Pekara ti terang bendar nya endang bepanggai ba Kepala Menteri ti udah tuai umur nya ti mengkang ngenanka kuasa nyentuk ke ngagai maya iya tembu nebang semua kayu ti berega tinggi dikena iya ngisi kandi iya empu. Sarawak Report udah kala ngeluarka ripot ti silik pasal penerang ari beberapa iku orang dagang ti beserebanaka kala meri duit suap ti mayuh dikena sida mayar Kepala Menteri dikena ngulihka lisin ngulihka kayu kampung. Baka ni ku kes di Tebedu nya, enda bebida enggau kes makai suap ba endur bukai?

Kayu kampung ti berega beratus juta ringgit

Kandang kampung bungas sepemesai 4,125 hektar di pelilih menua Tebedu nya udah dikemendarka awakka ditebang ari asuh Menteri Pengeraja Asal enggau Perambu (ti dipangku Taib Mahmud empu), nya endang laluh ari semua rampa menua ti agi tinggal ti besemak enggau garis entara menua enggau Indonesia.

Kandang menua nya bisi mayuh bendar bansa kayu tebelian ti berega tinggi, iya nya sebansa kayu kayu ti majak lenyau ketegal ditebang Taib Mahmud ngelama tu. Nitihka penerang ari siku pengari di menua nya, Dr Christopher Kiyui ti kala bediri berebutka kerusi DUN ngarika parti PKR ba pengawa bepilihbesai apin lama tu udah, madahka kayu tebelian nya jarang bendar ditemu, lalu ari nya rega kayu nya tau manggai beribu-ribu ringgit.

Baka ti udah kala ditemu ngelama tu, pengerusak rampa menua deka meri penguntung ti setengah ari semua penguntung nya ngagai Taib , lalu bala orang di menua nya empu nadai bulih sebarang utai semina ngemataka sereta ngasaika pengerusak ti ngelingi sida.

Nama pekara dikereja di Sarawak

Ba sebengkah jaku randau dalam TV bedau tentu lama tu udah, Taib Mahmud udah ngaku lalu madahka semua pengawa ngulihka kayu kampung enggau pemansang di Sarawak dikereja enggau naka penyimat! Nya kebuah, diatu kitai sama-sama beratika atur pengawa ti endur iya udah ditemu kitai ngeruga laluh rampa menua ti endang dikumbai bansa Bidayuh nya tanah NCR sida.

Taib Mahmud udah belabuh ngatur singkang iya ba taun 2009 ari ti meri lisin nebang kayu ba kandang kampung bungas di Tebedu nya kena 15hb Oktober ngagai sebengkah gerempung wang turu pelajar ti dikuasa perintah, iya nya Yayasan Sarawak. Yayasan Sarawak didirika  dalam kandang taun 1970 enggau tuju dikena mantu nembiak menua Sarawak ba pelajar sekula sida, lalu diatu gerempung nya dikuasa penuh Taib Mahmud. Tang taja baka nya, bala orang di menua Tebedu nadai dipadahka pasal pengawa ti deka ngulihka kayu dia.

Udah dua belas hari lisin ngulihka kayu kampung dikeluarka, iya nya kena 27hb Oktober 2009, dia sebengkah kompeni ti ngatika diri ti benama Alliance Bahagia Sdn Bhd udah didirika ulih dua iku orang dagang, Tiong Ngie Kiang enggau Ho Tion Soo (siku orang dagang bejual pekakas berumah).

Tang, beberapa iti rekod bisi ngayanka, kena 3hb May 2010 kompeni Allaince Bahagia bisi udah nerima siti Sempekat Ngulihka Kayu Kampung enggau Kuasa Attorney ari bala pengarah Yayasan Sarawak nyadika “pun kontraktor nebang kayu kampung ba kandang endur ti udah diberi lisin”!

Enggau penerang nya, Sarawak Report deka nemu, bisi tauka nadai sebarang pansik dipejalaika Yayasan Sarawak enggau Upis Kampung ti tau dikena sida ngemendarka kompeni Alliance Bahagia nya ngulihka kayu kampung, lalu bisi tauka nadai sebarang pemutus ari Upis Rampa Menua ti bekaul enggau pangka pengawa ba rampa menua ke kandang endur nya?

Enti sebarang pansik udah dipejalaika di endur nya, nama kebuah pemutus pansik nya enda dikeluarka ngambika bisi diperesa bala orang mayuh?

Tambah mega, nama kebuah bala orang di menua nya empu enda dipadahka pasal penama kompeni nya ngagai kandang endur sida?

Ba bulan June 2010 dia mayuh bendar perengka kompeni Alliance Bahagia udah dianjung tama ngagai kandang endur nya lalu ngerusak rampa menua ti direnchah sida ti udah nya lalu ngamahka ai sungai, tang bala orang di menua mengkang enda nemu!

Sarawak Report deka nanyaka ikas bala pengarah dalam Yayasan Sarawak ti ngumbai diri bekereja ngati kediri lalu enda patut bekaul enggau pengawa ke baka nya, ari gaya siku-siku sida ti mangku pengawa pengarah dia. Kami dipadahka pengerusi dalam Yayasan Sarawak nya adi ipar Kepala Menteri empu, Adenan Satem ti mega nyadi Menteri Pemadah dalam perintah menua Sarawak! Kaban bukai ti ‘tuai agi bulu’ nyadi siku ari pengarah dia iya nya bini Sapit Kepala Menteri Alfred Jabu, iya nya Empiang-Jabu, lalu kelimpah ari nya Setiausaha Negeri Sarawak bisi mega nyadi kaban pengarah dalam Yayasan Sarawak nya. Ari gaya ti diperatika ditu, semua kaban ti nyadi pengarah ba Yayasan Sarawak nya endang bisi kaul dalam pengawa politik tauka bekaban enggau Kepala Menteri Taib Mahmud, tauka bepanggai ba Taib ba kereja rasmi sida.

Ba bulan September 2010 kompeni Alliance Bahagia udah ngereja sebengkah pengawa ti salah enggau bala tuai-tuai orang di kandang menua nya, nengah atur perintah ti dipejalaika Taib. Sebedau nya Taib udah ngemendarka undang-undang dikena ngapuska atur demokrasi milih bala tuai-tuai lalu nukar atur ti diatu ngagai atur milih bala tuai-tuai ti dikerinduka sida, ti mega dibayar gaji ti enda besai ulih perintah menua.

Kompeni nya, ti udah bulih pemendar ari Yayasan Sarawak, YB Manyin enggau Taib empu udah mai bala tuai-tuai raban bansa orang di menua nya ngaga sebengkah sempekat chara belalai. Sempekat nya udah melakangka hak bala orang di kandang menua nya lalu enda mayar sebarang pampas nitih ke patut baka ke suah dikereja di serata menua Sarawak.

Kelima-lima iku bala tuai kampung , ti enda tinggi ikas pelajar, di kandang menua nya, udah dikangauka berandau enggau bala pengari kompeni nya enggau bala lawyer sida mega. Sida tuai kampung lima iku nya dipinta nyain surat-surat sempekat ti ngemendarka kandang kampung bungas menua sida ditebang kompeni nya. Sida lima endang enda diterangka enggau silik pasal sempekat nya, lalu sida mega enda diberi kompeni nya peluang betemu lalu betanya ba bala nembiak-redak sida empu baka ti dikereja nitihka adat asal sida empu.

“Surat sempekat” nya digaga ngena jaku English lalu semua tuai kampung nya endang enda meretika sebarang pekara ti bisi dia. Laban sida lima nya ti endang ngumbai diri kaki-jari perintah, nya kebuah sida lalu besetujuka peminta kompeni udah sida ninga kompeni nya bisi mampas mimit ke pemujur randau nya. Sida enda nemu diri udah ngelepaska sebengkah kandang rampa kampung bungas ti berega beratus juta ringgit ngagai kompeni.

RM50 ke siku? Lalu sida pan enda mega meda nya!

Taib Mahmud, Yayasan Sarawak iya, enggau kompeni Alliance Bahagia udah mayar RM50 ngagai raban orang di menua nya laban tuai sida udah besetujuka kampung bungas di menua sida diambi orang kayu, lalu bala tuai kampung nya mega udah nyadika jamin kompeni nya mutarka semua penanggul enggau nembiak-redak diri empu enti sema bisi nyadi jemah ila.

Taja pan udah dibayar pampas, bala nembiak-redak sida nadai meda duit ti diberi ngagai bala tuai-tuai kampung sida. Baka ti dipadahka kompeni nya ngagai sida, duit pampas nya nyadika bayar “ex-gratia” ketegal ke pemujur pengawa maya nya.

Diatu Sarawak Report bisi nyimpan salin surat sempekat nya ti madahka semua tuai kampung nya udah diberi tanggung-pengawa mutarka sebarang penanggul entara sida empu enggau bala nembiak-redak sida! Reti nya kompeni udah ngelepaska diri ari ti bekaul terus enggau bala orang di menua nya – semua nya udah diatur ngena bayar RM50 ke siku!

Sebengkah pengawa tipu ti nyengala

Taja baka nya, mujur bendar bala orang di menua laban sida deka diarika Baru Bian, siku lawyer pengelantang mensia ti mega nyadi pengari PKR ti udah menang ba pengawa bepilihbesai apin lama tu udah. Baru kala menang mayuh kes bekaul enggau NCR ngelaban perintah Taib Mahmud beberapa bulan tu udah. Ari ketegal ti suah kena dawa nya, dia Taib Mahmud udah bebendar amat ngemba bala akim ti becharaka kes-kes NCR nya lalu iya mega deka nentuka bala akim  nya dibuai ari pengawa sida. Tu ukai chara ti betul dikena ngalus sereta mutarka penanggul enggau serebana orang mayuh.

Rambau pengawa bepilihbesai tu tadi pengari BN Michael Manyin mega bisi didinga ngemba bala orang di kandang menua nya ti endur iya deka mutuska bekal kuasa elektrik ngagai menua nya enti sida di menua nya enda nyukung iya! Manyin mega ditemu bisi nyuap bala orang di endur nya ngena dua iku jani lalu meri duit suap RM 30,000 (sebengkah penyampau duit ti enda setipak enggau rega pemayuh kayu kampung ti ambi ari kampung bungas sida dia).

Nitihka penerang ari Dr Christopher Kiyui, mayuh bendar bala orang di menua nya ti beumur 40 semina nemu nama diri nadai ayan ba rejister nama pengundi ba maya ti ngundi nya kemari! Manyin udah menang 4,000 iti undi bebanding enggau 2,000 itu ba endur nya, ti endur agi mayuh bala orang menua nya endang apin berejister nyadi pengundi.

Ketegal ti suah udah melakangka undang-undang menua tu, Taib diatu dipeda nyau mupuk-mupuk nyadi pemerintah diktator (tuai bekukut-besi). Penyarut ti dikereja bala orang di Tebedu nya udah nunjukka sida nyau udah enda ulih natka diri kena tekan penanggul ngelama tu. Sida di Tebedu, baka ti udah dikereja rakyat ti menua bukai numbangka tuai sida empu, udah milih chara ti penudi, iya nya ngena chara kasar sereta ganas.

Tu mih pengawa ti dikereja bala orang ketegal penanggul ti dibai Taib ba dua minggu tu udah: ba pun iya, bala orang menua nya udah angkat lalu ngayanka peringat diri ba mua bala tuai sida, ti udah ditemu sida kala nyambut duit pampas udah ti nyual hak sida ba tanah NCR sida dia.

Laban ti takut kena pejal bala nembiak-redak diri empu, dia bala tuai kampung dia lalu ngelarika diri lalu minta bantu bala polis, lalu udah nya polis lalu nganjung bala sida empu bejaga ba kandang menua dia

Sekumbang bala penyaga penglikun nya bejaga ba kandang endur nya, dia kira-kira 500 iku orang di menua nya lalu mansang nuju kem kompeni kayu nya, ti udah dulu ditinggalka bala anak kuli ngelarika diri, lalu udah nya bala orang kampung nunu semua perengka ti tinggal nya.

Nama agi utai dikarapka Abdul Taib Mahmud? Nama kebuah iya mengkang majak deka ngemataka tauka merintah menua tu ti lama udah dirusak iya, ke penguntung iya empu? Menua-menua di serata dunya udah nanya, nama kebuah perintah Malaysia lalu enda engkeretik ba pekara tu, ti endang patut diputarka sida?