MALAYSIA, NUAN UDAH MERI MALU!

• 13 Jul 2011
• BM 翻译

Bala orang ti begelumu nyukung Bersih 2.0 di nengeri London udah mai pengerami ba laman Belgrave, ti endur bala orang nya belabuh begempuru sebedau tengah hari ba mua opis Kedutaan Malaysia, ti betambit rat.

Pengawa begempuru nya ti penuh enggau basa udah nyadika kandang endur nya dipeda rami amat laban bala orang ti kia bebaju kuning Bersih 2.0 (diseretaka enggau gelembung getah kuning enggau replica buah pisang).

Ari KL berita didinga nyebut pasal perintah BN balat bendar nagang pengawa begempuru tu, tang di nengeri London bala sida ti begempuru ulih ngatur pengawa tu enggau nadai penanggul enggau bantah tauka tagang ari sapa-sapa.

Bala orang ti enggau begempuru nya endang tebal agi orang bebansa Malaysia, ti udah nya lalu bejalai bebala mayuh nengah jalai-jalai ti nengeri London lalu ngetu ba mua opis Pelancongan Malaysia di laman Trafalgar. Ba pengujung pengawa begempuru nya pemayuh tubuh sida dipeda betambah mayuh nyentuk ke lima ratus iku, betul-betul numbas iya pemayuh ngisi laman nya ba tengah-tengah nengeri London.

Tang gaya dia chukup likun, nadai sebarang tagang ari perintah Britain lalu bala orang pan nadai ditangkap. Bala polis London ti datai kia semina ngemata lalu ngaga simpul penemu ti madahka bala orang ti begelumu dia nya bala orang ti mereti sereta bisi basa ke adat menua nya, lalu polis mega ngemendarka sida mansutka jaku pinta sebedau sida mulaika diri ari endur nya enggau nadai sebarang penanggul. Nama kebuah pekara ti baka nya enda tau dikereja orang di menua Malaysia empu?

Sapa ti ngeruga?

Raban orang BN di Malaysia seruran meda bala penyakal sida baka bala orang ti kering penemu ba Islam lalu dipeda tau mai pengerusak ke menua baka ti dipeda di menua luar ke bukai. Tang bala orang ti bejalai bebala mayuh nya nadai ngereja nama-nama pengawa ti mai pengerusak ba endur nya.

Kain-kain rentang ti betulis ngena genteran jaku ‘ngachuk’ baka “ngenegapka public institution”; “mudah bulih enggau meri berita nengah sebarang media”, “munaska politik duit”, “kempen enda kurang ari 21 hari”, nya ukai penemu ti kering munyi ti suah disebut-sebut bala raban BN, tang enda tau enda dikira nyadi ke peminta raban orang ti bepelajar.

Pekara ti terang bendar diperatika ba laman Belgrave enggau di KL nya nunjukka perintah BN ti beumur lebih 50 taun nya udah magi raban rakyat ba ikas pertengahan enggau raban elitis ti bepelajar lalu ketegal iya endang ‘makai suap’.

Pengawa begempuru tu digulu raban orang ti bepelajar tinggi: lawyer, lutur, orang dagang enggau mayuh mega bala nembiak. Utai ti dikedekaka raban nembiak ti begelumu di London nya sebaka enggau peneka raban nembiak ti serambau enggau sida di Malaysia. Pekara ti nyata bendar nya ukai pengasar ti nyadi, baka ti digambarka orang ti kering penemu lalu ukai mega baka pengawa orang ti begedika menua barat, tang pengawa sida nya sebengkah penemu ti sejalai taja pan sida bebida pengarap, bansa lalu sida pan enda magi diri ari pangan diri.

Tu mih raban orang ti udah seati lalu selubang penemu, enda ulih diseraraka penyelai pengarap enggau bansa enggau pangan diri baka ti selalu dikemeranka raban orang BN.

Lalu pekara ti dipinta sida nya endang besepenemu enggau penemu demokrasi di Britain, menua ti endur sida begempuru bebala mayuh. Lebuh bala polis Britain datai ngagai endur nya, sida enda berupai besak tang ngampir endur nya enggau ati ti sinu sereta siru. Nadai besemburka ai, nadai ngena gas ti ngemediska mata, nadai pengachau, lalu pia mega nadai pengasar nyadi.

Salah singkang nuan Najib

Bala polis Britain nemu enti sida nyerang orang baka nya, lebuh maya orang begelumu enggau niat ati enggau ulah ti manah, sida tentu dipeda jai. Najib udah dipeda jai ketegal ngemendarka pengasar dikereja polis ba rakyat iya empu. Nya kebuah bala rakyat ti mereti lalu bebasaka undang-undang nya dipeda tau ngeruga Najib enggau BN.