NAJIB DIKELESEKA MENTERI BESAI MENUA UK?

• 15 Jul 2011
• BM 翻译

NAJIB DIKELESEKA MENTERI BESAI MENUA UK?

Sehari tu tadi, orang sekali agi begempuru bebala mayuh laban deka ngeleseka pengerami ti deka digulu Najib ba Mansion House (rumah walikota nengeri London), sebengkah pengawa begempuru ti besai agi ari ti diatur kemari ba luar Downing Street. Sekali tu sida ti begelumu di endur nya ditambahka enggau bala kaban ari gerempung Amnesty International, ti kala udah mansutka jaku bantah sida ba penanggul ti nuntung bala orang ti begelumu Bersih di KL ujung minggu tu tadi. Gerempung Amnesty International endang udah bulih basa tinggi di menua UK.

Najib nemuai ke UK laban iya deka narit orang dagang ti deka beranakka puku di Malaysia, tang gempuru ti diatur rambau penemuai iya udah meri malu ke iya. Bala orang dagang enda rindu ke sebarang menua ti ngembuan rekod ngeruga pengelantang mensia ti enda tentu lalu pia mega raban rakyat ari kelas tengah ti enda lantang ati.

Enda mayuh orang ti ukai rakyat Malaysia datai ngulu pengerami ti diatur ke Najib maya nya, lalu bisi sekeda bala orang dagang sempat berandau enggau raban orang ti begempuru di luar endur nya. Siku ari orang dagang ti datai deka ngulu pengawa Najib nya madahka diri ‘bekereja ke sebengkah kompeni entarabansa’, bisi nyebut diri nemu bendar ke isu-isu penanggul pengelantang mensia di Malaysia lalu iya mega madahka kompeni iya seruran ngemataka pekara nya.

Enda dikibuhka

Serimbai enggau nya, buah kenang bala orang ti begelumu dia nyebut pengerami makai tengah hari enggau Cameron ti deka digulu Najib nya deka enda dipenyadi. Sekali ke tu bisi bekaul enggau penanggul pengelantang mensia tauka laban Menteri Besai UK nya bedau bisi awak ngelimpangka diri? Tang kedua-dua jaku sagam nya sama enda pulai ke pemanah ke Menteri Besai Malaysia!

Sekali agi, pengawa begempuru nya tembu enggau nadai sebarang penanggul lalu pengawa ti dipejalaika polis mega enda berat. Bala polis resia ari Malaysia bisi dipeda bediri semak endur nya lalu ngambi gambar bala orang ti begelumu kia. Lalu kami mega sempat ngambi gambar sida.

Nyau kelama baru Najib bisi datai ba endur nya diiring kerita-kerita Malaysia lalu iya dipeda bejalai beguai-guai nengah kerembai tikai pedani mirah. Iya mega bisi meda bala orang ti begelumu di luar lalu sempat mega ngepaika jari iya – baka ti malas sukung sida ke penemuai iya! Tang iya enda berani ngampir semak nyain autograf sida!