SEATI KE MENUA SARAWAK

• 18 Jul 2011
• BM 翻译

SEATI KE MENUA SARAWAK

Tumu pagi tu tadi di pulau Tasmania, seraban bala nembiak ngayanka bantah sida udah angkat mantah pengawa kompeni Ta Ann enggi sida Taib Mahmud sebilik.

Sida nepan sebuah kapal ti udah diisi enggau batang kayu ti ditebang kompeni Ta Ann ari kampung bungas sida, udah nya sida lalu niki ngagai menara kren lalu nanchang diri dia.

Lalu sida minta jaku bantah sida nya didinga enggau terang. Sida ukai semina mantah lalu ngenanka kampung puang sida dikeruga bala Taib Mahmud di rangka nya, tang sida udah nunjukka sida mega ngayanka diri udah seati enggau rakyat di Sarawak.

Kempen di menua pulau Tasmania ti mantah Ta Ann nya sebengkah ari tanda nunjukka pengerembai penemu orang mayuh di serata dunya tu ba Taib Mahmud. Bala orang asal di Sarawak nya orang ti keterubah ngasaika pemerinsa ketegal pengerangka enggau pengamu Taib udah bekau iya mupuska kampung bungas sida. Udah menua Sarawak nyau lus kayu kampung, iya enggau raban kroni iya lalu ngerembaika pengawa sida ngiga kayu di menua luar. Diatu menua Tasmania udah angkat ngayanka bantah sida ti ngulihka kayu kampung nya.

Kompeni Ta Ann dikemataka petunggal Taib, ti mega nyadika proksi iya empu, Hamid Sepawi, ti mega beempu sepetiga ari semua share dalam kompeni Ta Ann. Sekeda bala pemerati berasai alit ati nama kebuah kompeni ti kaya nya bulih pemendar ari perintah menua Australia beranakka puku ba dagang kayu di Tasmania, sebengkah pengawa dagang ti udah lama sereta nyau deka padam diatu.

Mayuh jaku tanya udah didinga nama kebuah perintah menua Australia agi deka mayar kompeni Taib ngeruga rampa kampung puang sida? Raban ari The Green Party lalu enda bulih saut ti nyemetak.

Tang, Ta Ann kala besemaya sida semina nudukka gudang kayu-ramu ti semina ngereja kayu ti diambi ari kampung ditanam baru lalu enda bepanggai ba kayu ari kampung bungas menua Tasmania ti berega tinggi. Tang nitihka bala orang ti rinduka pemeresi enggau pemanah rampa menua, sida kala ninga sebana bala pengurus gudang ti madahka kayu ari kampung ditanam baru nya enda chukup lalu nya udah ngujungka sida ngulihka kayu ari kampung bungas.

Kaul politik ti rapit dikena ngelindung pengawa Ta Ann

Taja pan sida napi bantah ti balat ari rakyat menua Tasmania enggau rakyat menua Australia, tang kompeni Ta Ann enggi Taib majak bulih lindung enggau jamin politik dikena sida betebangka kayu. Taja pan industri kayu di menua nya sebengkah industri ti lama lalu enda patut dipejalaika agi, tang agi bisi peminta ba kayu kampung ti ngujungka kampung bungas menua nya majak dikeruga.

Ari nya dia bala orang ti ngayanka pengeringat diri udah angkat mantah tang lalu ditapi raban orang ti bekuasa di menua nya ti ngena chara kasar sereta besenyata. Bala tukang tumbang mega endang diasuh bekasar enggau raban orang ti mantah, mayuh agi bala sida nya raban nembiak. Bantah sida ti enda kasar nya udah dikumbai bantah ti ganas sereta kasar.

Nyadika timbal ba bantah raban orang ti ngayanka pengeringat diri, dia bala orang ti bekuasa di menua nya udah nutup semua kandang endur ti ngelingi pengkalan penyangkai kapal ti bulih 50 meter pemesai bungkur ngambika raban orang ti mantah nya enda ulih datai ngampir semak. Tu sebengkah chara perintah menua nya dikena nagang sapa-sapa orang ti datai semak mantah pejalai kapal Ta Ann angkat ari pengkalan menua nya.

Bantah ti diatur sehari tu tadi nya sebengkah kelai ti nunjukka, taja pan pengkalan penyangkai kapal nya dijaga, tang raban nembiak ti ngayanka pengeringat diri nya mujur niki ngagai kapal Ta Ann.

Raban sida nya, mayuh agi orang indu udah ditangkap lalu diperesa. Perintah menua nya mega ngerampas semua filem kamera sida lalu ngaga sida baka orang salah lalu ukai rakyat biasa ti ngarika rakyat sida empu.

Pekara ti ngasuh irau ati nya makin bantah ti baka nya tisekat enggau ditagang, kaul entara sida nya makin rapit lalu pia mega raban orang asal di Sarawak pan deka betambah kering. Pengawa kompeni-kompeni ti ngerusak semua sekat ba jalai kompeni enda ngasuh semengat orang bansa asal nya lembut, tang deka nambahka pengering sida ti lama udah lenyau tanah enggau rampa menua.

Baka nya mega, chara tagang perintah ba raban nembiak ti mantah nya deka ngeringka agi semengat sida, ti udah meda gaya pengeraja Taib ulih iya ari ti ngeruga kampung bungas menua sida.