Kaul Sean Murray Enggau Pengawa Dagang Besai-Besai di Kuching

Diatu kami ulih mansutka berita baka ni laki anak tuai Taib Mahmud, siku orang bebansa Kanada, Hisham (Sean) Murray benung ngemataka lalu nguasa sebengkah pengawa kontrak ti beungkus pemadu tinggi, iya nya projek ba Kuching Isthmus, sebengkah projek ti dipelanja Perintah Sarawak.

CMS Land Sdn. Bhd, sebengkah anak kompeni ti enggi Taib sebilik udah bulih ke semua 240 ekar tanah pemansang ba endur nya, udah endur nya disirap ari tanah orang di endur nya ngena chara beli-pejal ba ujung taun-taun 1990 suba.

CMS Land udah nganggarka projek nya beungkus RM2.8 bilion! Tang kami ulih ngaga jangka projek nya dikereja sebengkah kompeni ari menua luar ti enda dikelala, tang enggi raban sida Taib sebilik.

Share ba kompeni ti dipaduka ngereja projek ba endur 10 ekar nya dikuasa sereta dikemataka Premier Cottage Sd. Bhd. Pengarah Premier Cottage nya Sean Murray, sama-sama enggau anak indu Taib, Hanifah, enggau ipar iya, Gertie Chong. Tang pemegai share tunggal dalam Premier Cottage nya sebengkah kompeni ari menua luar, Pioneer City Enterprise Limited, ti ditemu nadai udah meri penerang pasal address asal sida, taja pan sida diberi kontrak ti besai bendar nya.

Kami alit ati laban ZW Group bekunsika address enggau Aberdeen Project Fascilitator Inc., iya nya sebengkah kompeni ti kala diasuh perintah ngaga Kuching Tower dalam taun 2006 suba. Pengarah kompeni Aberdeen Project Fascilitators ti mega nyadi Pengurus Projek dalam ZW Group nya benama Thady Murray. Thady Murray mega nyadi Presiden dalam City Gate Corporation, lalu siku ari sida Sean Murray sebilik, ti bekereja ke kompeni Sakto/City Gate ba indu opis sida di Ottawa, Kanada!

‘Kami sebilik nadai bedagang di menua Sarawak!’
Pekara tu belaban enggau jaku Taib empu ti madahka sida ‘sebilik nadai bedagang dalam menua Sarawak’. Ba pengawa bepilihbesai apin lama tu udah, Kepala Menteri udah nyakal tuduh bala penyakal ti endur iya ngaku bala anak iya bedagang di menua luar lalu iya empu endang nadai kala ngena kuasa iya ngemendarka sida nya bedagang dalam menua Sarawak tu empu!

Pengawa dagang sida Murray sebilik?
Chara ke sebaka mega dikena Taib nerangka baka ni sida sebilik ulih nyadi kaya raja lalu bulih reta di menua Kanada enggau di menua bukai. Kami nemu mayuh raban sida Murray tu bekereja dalam kompeni Sakto, lalu petunggal Sean empu, iya nya Christopher Murray, ti ngemataka anak kompeni Ridgeford Properties di London, meri penerang ngagai pemerita, kompeni nya endang ditumbuhka raban sida Murray (reti nya, nadai bekaul enggau Taib ti mentua Sean nya)

Bulih penguntung ba pengawa dagang di Sarawak
Ba projek di endur Isthmus, sebaka enggau ba endur bukai di Sarawak mega, semua peluang ngulihka duit endang diberi ngagai sida Taib sebilik, nengah kuasa penuh ari opis Menteri Perambu Pengawa ti dikuasa iya empu nya.

Sekeda projek ti dipelanja perintah menua Sarawak, nyengkaum ngaga rumah BCCK ti beungkus lebih RM200 juta enggau rumah opis Sarawak Energy ti beungkus RM230 juta udah sama tembu digaga. Kedua bengkah kontrak nya endang digaga nengah kompeni sida sebilik, CMS ti endur anak enggau menantu iya empu nguasa sereta ngemataka projek-projek nya.

Ba kes projek pengawa kunsi ngaga hotel, kompeni CMS udah meri penerang projek hotel nya deka digaga kompeni Isthmus Developments Sdn Bhd (49% diempu SEDC) ti ngeluarka tanah ba endur nya, tang iya ti nguasa atas 51% share nya dipegai Premier Cottage, ti enda ditemu penatai. Premier Cottage ti diempu Pioneer City Enterprise Limited, ti ukai kompeni ari menua Malaysia endang nadai meri penerang pasal sida empu ba opis Pengerejista Kompeni-kompeni!

Tu mih maya Seam Murray nerangka gaya pejalai kompeni Sakto
Projek ba Kuching Isthmus ke terubah iya diperambu digaga dalam taun 1973 lalu enda nitihka atur pemansang ba Section 47 Order dalam undang-undang tanah. Tang dalam tengan taun-taun 1990 Taib, ngena kuasa menteri iya ba Menteri Perambu Pengawa udah ngubah projek nya lal nyirap tanah ba endur nya.

Pengawa ba projek Kuching Isthmus nya ngambarka sebengkah pengawa pemansang di Sarawak ti semina ditagaka ngagai orang ti kaya-kaya aja lalu dikemataka sida Taib sebilik enggau bala kroni ti melakangka nasib orang bukai ti suntuk sereta seranta.

Ketuka penyalah makai suap
Bala orang ti kempen di serata dunya tu udah negapka pengawa sida ngansak perintah-perintah di menua-menua bukai neritka udang-undang pasal penyalah ngayahka duit belanja perintah lalu mansik Taib Mamhud bekaul enggau reta-reta sida di US, Kanada, UK enggau di Australia. Tebal agi pengawa dagang ti salah baka nya dipejalaika menantu iya, Sean Murray enggau anak indu iya, Jamilah Taib, enggau sida sebilik ke bukai. Semua kompeni nya ulih disidi ngagai sida Taib sebilik ti bepelasarka pengaya ulih ari ngeruga pengeraja asal menua Sarawak.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments