Latest Stories
Sections
Sarawak Report bisi tetemuka surat-surat penerang bekaul enggau kempen ti dipejalaika kompeni kebun sawit bedandang besai, Sime Darby dikena sida ngambi siku pakar ekonomi ti pemadu tebilang di dunya tu nyadi ke ‘duta’ ba kompeni nya.
Jeffrey Sachs nya siku professor ba sebengkah universiti di New York ti kala dirintaika nama iya ba majalah Time nyadi ke siku ari 100 iku orang ti besai bendar pengaruh di dunya tu.
Penerang ti ditemu kami ngayanka kompeni Sime Darby udah nyewa FBC Media awakka ngayanka Sachs ngelakuka pengawa bekebun bedandang besai sida.
Ambi ke banding, ba iklan dalam suratkabar Herald Tribune Sachs ditemu meri puji ngagai perintah Malaysia enggau kompeni Sime Darby dalam taun 2008 ketegal pemanah pengawa sida ba pengawa bekebun bedandang besai. Besereta enggau nya mega Sime Darby dipuji-puji ketegal sebengkah projek ba zon pemansang Iskandar.
Sime Darby, ti dikemata penuh perintah Malaysia nya sebengkah kompeni ti pemadu besai di dunya ti bejalaika pengawa bekebun bedandang besai, lalu dandang kebun sida di Malaysia udah balat ngeruga rampa menua di Sarawak ba pelilih menua pegai Miri enggau Bintulu.
Pengawa Sime Darby ti pemadu baru dikereja sida iya nya pemindah sida ari Sarawak ngagai menua Liberia di Afrika ti endur sida belabuh nanam 47,000 hektar ti endur orang bansa asal di menua nya angkat ngelaban sida laban kompeni nya beambika tanah bansa asal orang menua nya.
Di menua Sarawak, raban orang asal ti seranta ti bisi tanah nya ke dirampas perintah tanah endur beridup, ukai perintah ti meri tanah endur rakyat bekebun. Semina sekeda orang aja di Sarawak nemu cherita tu baka ti ditusui FBC Media. Pansik Bank Dunya ba pengawa bekebun bedandang besai di Sarawak ngayanka pengawa baka nya udah ngujungka rakyat Sarawak empu nyadi seranta ketegal ti lenyau tanah diambi kompeni-kompeni besai baka Sime Darby.
Penerang ari pansik kami mega ngayanka Professor Sachs nya siku ari raban orang ti dikena Sime Darby ngemanahka nama kompeni nya empu.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.