“Bini Aku Bebansa Kanada!” – Sean Murray Mansutka Penerang Pasal Jamilah Bebansa Dua!

• 12 Dec 2011
• BM 翻译

Sean (Hisham) Murray, laki anak indu Taib, Jamilah, enggau enda disengajaka iya udah madahka bini iya bebansa dua, sebengkah pekara ti enda tau sekali-kali dikereja sapa-sapa!

Ba undang-undang Barisan Nasional, orang bebansa Malaysia enda dikemendarka ngembuan dua iti passport, lalu sida dipinta nyerahka bansa Malaysia sida enti sida udah bulih bansa ba menua bukai.

Taja pan baka nya, minggu siti nyin kemari Sean Murray madahka ngagai TV menua Kanada bini iya endang udah nyadi “bansa Kanada”, taja pan Jamilah agi mengkang berejista peranak Malaysia baka ti ayan ba rejister kompeni-kompeni ti bisi kaul enggau iya di Sarawak.

Baka ti ditemu semua orang, nyadi peranak bansa Malaysia endang beguna bendar dikena sapa-sapa ti deka megai share enggau mangku pengawa nyadi pengarah ba kompeni-kompeni di Malaysia, laban nyau ka semua kontrak perintah endang minta kompeni-kompeni enda tau enda bisi ikas “bumiputera”. Kami ulih ngayanka Jamilah Taib ti beumur 51 taun nya agi ngaku diri bebansa Malaysia ba semua surat penerang dalam 87 buah kompeni iya ti endur iya nyadi pemegai share enggau nyadi pengarah. Pekara ti tau agi mai penyaru ba Jamilah nya iya agi berejista nyadi pengundi di Malaysia! Dalam sepuchuk surat Sean Murray madahka iya enggau Jamilah nadai kala mindahka anak puku dagang seduai ngagai reta seduai ti beungkus bejuta-juta ringgit di Kanada, US, Australia enggau UK.

“Aku enggau bini aku diatu udah nyadi bansa Kanada. Iya udah diau ditu 30 taun lalu kami duai enggai ditanya sebarang pengarang suratberita tauka pemerita pasal pengidup kami duai, pengawa dagang kami duai, kaban belayan kami duai tauka politik-politik di menua Malaysia … kita enda tau enda nemu, kami duai nadai bekaul enggau sebarang politik menua Malaysia, tauka bejaku ngarika Kepala Menteri (Sarawak)” [Sean Murray]

Penerang ti bebida-bida entara penerang ba mua bala pemerita enggau surat-surat penerang di Malaysia, Sean (Hisham) Murray enggau Jamilah diatu enda tau nerangka ikas bansa seduai empu. Rayat menua Sarawak enggau opis-opis perintah di Malaysia bisi kebuah nemu baka ni penuduk orang ti megai share pemadu mayuh, lalu mega ti bulih penguntung ari duit belanja projek-projek dipelanja ngena duit rayat.

Ba surat Sean Murray ditujuka ngagai sebengkah steyen TV ti besereta enggau surat penerang undang-undang mega bisi diayanka ba kacha TV. Tu nambabka agi penyaru runding pasal sepasang orang diri melaki bini nya bekaul enggau menua Sarawak.

Ba siti agi pekara dalam surat penerang nya dikena nimbal asil pansik Sarawak Report pasal kompeni Sakto di Ottawa Kanada., ti madahka kompeni nya ditumbuhka sida Taib sebilik lalu Kepala Menteri nya bisi meri duit ke puku ngagai anak iya nya. Tang, surat penerang nya ngaku Jamilah endang nadai kala bulih duit ari menua Sarawak dikena iya bedagang di menua Tasik.

Nitihka penerang ari Sean Murray, bini iya Jamilah nadai bekaul enggau pengawa dagang di Malaysia. Lawyer ti ngarika Sean Murray nuduh Sarawak Report ngembuan juluk ati politik di menua Malaysia. Tang, uji terangka nama utai ke puku dagang Sarawak Report enti iya rindu malut diri enggau politik di menua Malaysia.

Kami makin bulih mayuh agi penerang ti ngayanka kaul Sean enggau Jamilah ba perintah apai seduai, lalu dagang sida di menua Sarawak udah jauh ngerembai ke menua tasik baka ti dilalaika ngena surat ari bala lawyer seduai iya.