“Tangkap Taib”! – Kangau Ari Raban NGO

• 13 Dec 2011
• BM 翻译

Seraban NGO sehari tu tadi bisi udah ngansak Attorney General menua Malaysia enggau Pesuruhjaya Polis Malaysia nangkap Abdul Taib Mahmud!

Ba sepuchuk surat ti ditulis gerempung Bruno Manser Fund ti lalu disain beberapa bengkah raban NGO ari Malaysia enggau entarabansa, nyengkaum gerempung Greenpeace, minta Taib Mahmud enggau 13 iku sida sebilik ti mega nyadika “konspirator” iya “ditangkap lalu dibecharaka” bepelasarka penyalah “ngerumpak duit rayat”.
Peminta nya udah ngayanka pemayuh penerang dikena ngelaban Kepala Menteri, ti diatu benung dikelala seentarabansa siku tuai perintah ti udah kelalu balat ditinggang penyalah makai suap lalu betanggungpengawa ngerusak rampa menua di Borneo.

Penerang ti nyengala

Isi surat nya bekeringka penerang pasal penyalah makai suap Taib Mahmud enggau sida sebilik ti diatu udah terang bendar ditemu mensia mayuh, lalu penerang nya enda patut dipanggaika ngagai opis enggau bala pemesai ba Malaysian Anti-Corruption Commission (MACC) aja, ti kala udah besemaya deka bejalaika pansik atas Kepala Menteri nya kenyau ari taun siti nyin kemari.

Surat nya nyebut:
“Kami arap bendar enda chukup enti semina ninga jaku semaya ari opis MACC aja, lalu tindak ari raban polis patut diambi diatu. Diatu udah chukup mayuh bendar penerang ba penyalah Taib Mahmud enggau bala konspirator iya, lalu enti ditejuka lama agi, sida ti salah nya tentu deka ngena ruang enggau peluang ngerusak semua penerang lalu ngemba semua orang ti nyadika saksi penyalah dikereja sida lalu udah nya sida deka ngelarika diri ari menua tu”.
Surat nya, ti disukung penerang ti endang udah mayuh udah ditusun lalu diayanka ngagai mensia mayuh kenyau ari beberapa taun tu udah, lalu nyadika perintah Malaysia sereba salah deka ngambi tindak.

Enggau penuduk iya ba Aum Besai UN Ngelaban Penyalah Makai Suap, Malaysia patut enggau naka ulih ngelaban penyalah makai suap lalu bejalaika pansik dibantu bala pemansik ari menua luar. Taib diatu ditemu benung dipansik di menua Germany, Switzerland, UK enggau Kanada.

Surat nya mega bekeringka penerang dikena ngelaban Taib bepelasarka pemayuh reta tengkira iya enggau sida sebilik, sekumbang iya nyadi menteri 30 taun. Raban NGO nya mega bekeringka penerang ti madahka share sida Taib dalam lebih ari 400 buah kompeni ba 25 buah menua lalu reta tengkira ti manggai $1.5 bilion ari 14 buah kompeni-kompeni nya.

Disukung bala raban NGO ari menua Malaysia empu, Australia, UK, Germany enggau Jepun, surat nya endang nuduh pengeraja ti ditimbun nya endang semina ulih dikereja sapa-sapa orang ti mangku pengawa perintah/menteri “enggau chara ngelanggar atur/undang-undang enggau ngena chara ti salah”.

Surat nya mega enda ngelaungka sida Taib sebilik ti bukai enggau empat iku anak iya empu, ti diatu udah besai-tuai lalu ngelala kereja salah. Surat nya ngerintaika sida Taib sebilik ti bulih untung ari tanah bansa asal enggau tanah menua, nyengkaum kontrak-kontrak enggau pemendar ngulihka kayu kampung. Bala sida nya nyengkaum bala menyadi iya, anak iya enggau petunggal iya ti mega nyadi penyanding penemu pengawa dagang iya, Hamed Sepawi.

Surat nya mega nuduh kompeni ti pemadu besai di Sarawak, Cahya Mata Sarawak (CMS) ti dikemataka sida Taib sebilik enggau mega kompeni Achi Jaya ti dikemataka menyadi iya Onn Mahmud ti kala udah diberi iya pemendar ngangkut kayu ke menua tasik. Sebengkah agi kompeni, Ta Ann, ti dikemataka lalu diempu petunggal Taib, Hamed Sepawi, kala udah nerima lisin ngulihka kayu ba kampung 362,439 hektar pemesai enggau kebun bedandang besai 313,078 hektar pemesai.

Surat nya mega disukung enggau lumur-lumur enggau nama-nama sereta endur diau, endur opis-opis enggau lumur-lumur telefon sida Taib Mahmud enggau sida sebilik dikena mantu pengawa nangkap sida nya!