Cherita Sengapa ari Taib!

• 7 Dec 2011
• BM 翻译

Kepala Menteri Abdul Taib Mahmud enggau Menteri Besai Malaysia Najib Razak udah kala ngemesaika polisi pengawa dagang baka ti dikeluarka bala raban Oxford Business Group. Laman web enggi Kepala Menteri empu mega enggau sumbung ngaku raban pemerita Oxford Business Group nya ngeluarka penerang bekaul enggau pengawa dagang ti silik pasal menua Sarawak. Tang enda mukai-mukai pengeluar repot ti diberi tanggungpengawa ngaga semua repot nya siku pengeluar majalah kamah, The Daily Sport ti kala udah dibuai ari pengawa ba pun taun tu tadi. Peter Grimsditch udah kala dibuai ari kereja udah iya ngelancharka berita sukan ‘Porn King’ bekaul enggau David Sullivan dalam taun 1988.

Taib udah ngelancharka sebengkah repot ‘Country Report’ ti udah digaga raban Oxford Business Group dalam bulan Sepuluh ba hotel Pullman, lalu pengawa nya berupai bendar nadai temu tuju. ‘The Report Sarawak’ dilancharka baka sebengkah repot ti betul-betul beobjektif lalu udah nerima puji ari bala orang ti datai ngulu pengawa nya kemari. Kami mega minta bala orang dagang meresa pansik enggau repot dalam Sarawak Report tu ngambika sida tau bulih penerang ti setipak.

Najib enggau bala menteri pengawa dagang iya udah mega besetujuka pekara-pekara ti dikemesaika raban Oxford Business, baka penemu ti dipansutka siku pemesai OBG ti agi biak bendar maya ditanya bala pemerita ari Bernama pasal polisi pengawa dagang makro Malaysia, enda salah-salah iya dipeda kelalu landik ba pekara nya.

Ambi ke banding, Pengurus Menua ke OBG, Daniel Moore ti agi biak bendar nya lebuh iya ti ditanya Bernama rambau repot pasal Budget, bisi didinga meri puji ke Model Ekonomi Baru laban tuju model nya dikena meransang kompeni-kompeni nyadika sebengkah injin pemansang menua. Ba sebengkah penerang, Moore bisi mega didinga ngelantangka ati Najib madahka menua Malaysia patut nyukung pemansang dalam dagang temuai, pengawa bank Islam enggau barang-barang halal.

The Report Sarawak 2011 ngundan jaku-jaku randau enggau bala kroni Taib sereta enggau sida sebilik aja! Sida nya nyengkaum Taib empu, pangan dagang enggau petunggal iya empu, Hamed Sepawi, ipar iya empu, Robert Geneid, Jabu, Masing, Awang Tengah, pemantu pengawa dagang iya Richard Curtis ari CMS, Pengurus Sarawak Energy Bhd Torstein Dale Sjotveit.

Jaku-jaku puji ti dipansutka raban OBG nadai meransang mimit ba pengawa dagang naka ke diatu. Raban nya semina didinga belunjakka penerang ti endang bisi di menua Sarawak.

Seraban pemansik kami ari Sarawak Report bisi bejalaika pansik atas indu opis Oxford Business Group ti ngumbai diri udah suah ngeluarka bemacham-macham repot enggau penerang kenyau ari 1994. Raban tu nadai bekaul enggau menua Oxford empu tauka Universiti Oxford ti tebilang nya. Bala pemansik kami mega nemu OBG nya nadai ruang opis, taja pan bala sida kadang-kadang “bisi dipeda tama pansut” ari endur nya.

Pugu ke OBG, Michael Benson-Colpi bisi ditemu bekaul enggau beberapa bengkah kompeni, nyengkaum St James Partnership, diatu udah dipadamka, Oxford Business Group (Reports) Limited, OBG Reports Limited, Oxford Business Group (London) Limited enggau Oxford Business Associates LLP, semua nya ditumbuhka iya dalam taun 2010.

Dalam Country Report ti dikeluarka, jaku puji iya endang dituju ngagai menua-menua ti benung mansang dalam pengawa dagang taja pan repot iya enda tentu tampak sereta nyata. Iya patut diterima dalam dagang iya empu, tang rayat Malaysia enggau Sarawak patut nemu iya dikena Taib enggau Najib ngelakuka nama seduai empu kelimpah ari ti muji-muji polisi pengawa dagang lalu ukai dikena meresa tauka ngabas pemanah pengawa dagang.