Mayuh Agi Pasal Kaul Daya Syukra-Samling!

• 8 Dec 2011
• BM 翻译

Taib Mahmud udah enggau naka ulih nyeliahka diri nyaut semua tanya dalam rumah Parlimen bekaul enggau penyalah makai suap sida sebilik lalu udah nya muai semua tanya nya ari rekod perintah.

Nyual rampa tanah menua ti berega RM225 juta ngagai sebengkah kompeni enggi bala anak iya empu enggau rega semina RM2 juta nya endang terang-terang penyalah makai suap.

Ingat, perintah ti betuaika Taib udah ngagihka semina RM3.47 juta dikena ngurangka pemerinsa bala orang ti kelalu suntuk ke lebih agi bansa Dayak di menua Sarawak, sebuah menua ti tebilang kaya di Malaysia dulu suba.

Pengelemi kedua Taib ti udah nyata dipeda nya iya enda nemu maya tu selalu berubah-ubah. Chara lama ti udah dikena iya nekan diatu udah enda ulih kena iya agi. YB Wong bisi ngayanka orang ti bidik ti bempu Shoreline Development Sdn Bhd, ti udah gaga bendar mayar RM2 juta ke plot tanah 90 ekar pemesai, ngarika dua buah kompeni, Plieran Sdn Bhd enggau Sarawak Land Sdn Bhd. Ba penerang pasal kompeni ngayanka Plieran Sdn Bhd nya dikemataka KBE Malaysia Sdn Bhd, ti dempu 60% Daya Syukra Sdn Bhd enggi bala anak Taib, Jamilah, Abu Bekir, Sulaiman enggau Hanifah! Sapa ti bukai sama bempu share dalam KBE Malaysia Sdn Bhd? Sida nya nyengkaum tauke kayu balak Yaw Teck Seng ari kompeni Samling enggau Wan Morshidi bin Tuanku Abdul Rahman, iya nya petunggal Taib empu, anak Abdul Rahman Ya’kub.

Diatu Sarawak Report endang nuduh Taib Mahmud ngereja pengawa ini enggau chara percanggahan kepentingan lalu mega bula. Iya udah salah guna kuasa menteri iya ngulihka tanah ke bala anak iya ti endang kaya raja. Dalam randau ba TV Taib didinga madahka bala anak kaya raja ketegal sida pandai enti dibandingka enggau orang bukai.

Taib pechaya bendar iya enda ulih ngiga chara bukai dikena mantu bala orang ti suntuk laban sida nya beli (seraya natuk-natuk pala iya empu maya iya ke bejaku nya). Kepala Menteri Sarawak pechaya bendar duit dikena mantu orang ti suntuk nya deka tebasau ngapa, laban sida orang ti beli. Engka nya kebuah iya semina sanggup ngeluarka RM3.45 juta dikena mantu orang di menua pesisir ti suntuk, lalu meri RM200 juta ke bala anak iya ti pandai-pandai ba pengawa jual-beli tanah chara makai suap.

Nya mega nyadika kebuah Taib selalu mejal, nyuap enggau nipu dikena iya menang ba ninting kali bepilih-besai.

Plieran Sdn Bhd (dempu raban Yaw bekunsi enggau bala anak Taib) enggau kompeni Sarawak Land Sdn Bhd ti megai share ke mayuh dalam Borsamulu, sebuah palan Pesaka Dunya ti kala charut ketegal Raziah Mahmud ngerampas rampa menua nya ari bansa Berawan enggau Penan. Plieran Sdn Bhd mega bisi bejalaika dagang enggau Raziah enggau Robert Geneid ba mayuh pengawa dagang di Miri. Sekeda dagang nya nyengkaum Miri Properties dan pemansang Marriott Hotel Miri.
Senutuk enggau nya, Plieraan Sdn Bhd mega pemegai pemadu mayuh share dalam anak kompeni Samling, Lingui. Sekali agi Taib dituduh bebalutka pengawa menteri iya enggau pengawa dagang enggau makai suap.

Baka ti kala udah dikeluarka Sarawak Report, petunggal Taib, iya nya Hamed Sepawi, bomoh iya Ahmad Suut enggau petunggal iya empu Wan Morshidi Tuanku Abdul Rahman, ketiga-tiga iku nya pemegai share pemadu besai dalam indu kompeni Samling, Samling Global, kelimpah ari raban sida Yaw sebilik! Baka ni chara sida nya tau bulih share ti mayuh ba sebengkah kompeni kayu kampung ti pemadu besai di dunya tu? Sekali ke sida nya kelalu pandai, tauka Taib empu udah salah guna kuasa iya meri sida lisin ngulihka kayu enggau chara belalai ngagai raban sida Yaw enggau Samling?

Terima kasih sereta tabi puji ke kuasa penuh Taib ngulihka pengeraja ke sida sebilik enggau ke bala kroni iya nengah pengawa dagang ti salah di Sarawak.