30 Jan 2012

Pengari Parti Conservative UK Ngaga Video Ngelakuka Kompeni Sime Darby!

This post is also available in: English, Malay

Pengari parti Conservative menua UK, Bill Wiggin, udah besetuju nyadi siku ari pelakun dalam video dikena ngelakuka kompeni Sime Darby, udah bekau iya dipelanja kompeni nya nemuai ke menua Malaysia.

Kompeni kebun sawit dandang besai nya, ti betuaika mantan Sapit Menteri Besai Malaysia dulu suba Musa Hitam, udah ditemu nyadi penguna FBC Media, sebengkah kompeni iklan Britain ti kala ngemalu menua sida empu ketegal skandal makai suap, lalu diatu kompeni FBC Media nya udah ditagang ngerembaika sebarang berita ke menua Sarawak enggau Malaysia udah bekau kami ngayanka penyalah makai suap.

FBC Media udah bejaku begah-begah madahka sida udah mujur matih sekeda orang nyadika pengari sida mantu Sime Darby, ti benung enggau naka ulih meresi nama diri ketegal ti kala dipechat ngerusak rampa menua laban pengawa kebun dandang besai sida.

Kompeni Sime Darby bisi ngerintaika nama Bill Wiggin, siku Menteri Rampa Menua ari parti Conservative, nyadika pengari sida ngambika ulih meri penerang tauka tinjau ari sukut politik.

Sekeda ari jaku randau enggau Bill Higgin dikena Ryan Meltzer, siku pengarang berita ngelakuka Sime Darby enggau chara ti salah ba program World Business CNBC, dalam sebengkah pakej berita ti baka tukuh ripot bendar pasal minyak sawit. Sime Darby nya sebengkah kompeni minyak sawit ti pemadu besai di dunya tu ngembuan kebun dandang besai di serata pulau Borneo atas tanah rampa kampung bungas. Bill Wiggin endang nemu diri dipeguna nyadika pengari mansutka jaku ngelakuka Sime Darby awakka sida tau bulih sukung bala penguna minyak sawit di menua UK enggau di endur bukai.

Ripot ari Bill Wiggin ngarika Sime Darby berupai bendar berat sepiak lalu nadai tuju ti terang sereta bendar. Wiggin mega nadai penerang ti ngayanka iya kala udah mansik enggau dalam pasal pekara ti dikejakuka iya nya, kelimpah ari penerang ti disediaka Sime Darby empu.

Bill Wiggin udah tentu nadai mansik enggau dalam baka ni pengerusak rampa menua di Sabah enggau Sarawak udah dikeruga Sime Darby, ti benung ngeruga rampa menua dalam taun-taun ti udah.
Wiggin nya ukai semina siku orang ti dikena FBC Media bejaku ngarika Sime Darby tang mayuh agi penguna bukai ari menua Malaysia. Jayson Clay ari gerempung WWF mega bisi dalam rintai nama dalam FBC Media ti diinjau Sime Darby, dipeda baka orang ti landik becherita ke pasal pengawa nyaga rampa menua. Rintai nama dalam Sime Darby mega nyengkaum Menteri Besai Britain empu, David Cameron!

Kelimpah ari nya David Cameron mega ditemu kala ngulu jaku randau ti bekaul enggau Sime Darby ti diatur Kaban Parlimen parti Conservative Andrew Clumpsty, siku orang ti bisi nama dalam rintai nama sida Sime Darby.

Sarawak Report kala udah ngirum email nuju Bill Wiggin ba ujung taun nyin kemari betanyaka runding enggau penemu iya pasal jaku ambu FBC Media lalu minta penerang ti endur iya tau dikumbai nyadika pengari ke Sime Darby, lalu mega nanya iya pasal rekod pengawa kompeni nya atas rampa menua. Tang nyentuk ke sehari tu, kami dalam Sarawak Report lalu bedau nerima balas email ari Wiggin empu.

Kami mega bisi nanya ke pemetul jaku puji Wiggin ti ditujuka iya ngagai penumbuh sekula dalam kandang kebun dandang besai kompeni Sime Darby ti dikena meri pelajar ke bala anak pengereja pengawa ari menua luar.

27 Jan 2012

Taib Tama Ke Dalam Dunya Mimpi

This post is also available in: English, Malay

Ba minggu tu tadi, Setiausaha Suratberita Kepala Menteri, Amin Sahmat, udah mar bendar meri penerang nama kebuah sida nginsil sidang-sidang suratberita udah bekau aum kabinet, baka ti tusui Borneo Post.

Baka ni chara Kepala Menteri tau numbuhka mayuh macham kompeni lalu teulihka mayuh tanah menua, enti semina ngena gaji iya ti enda kelalu besai nya?
Perkara ti dipaumka dalam kabinet nyau dipeda enda tentu beguna enti dibandingka enggau pemayuh penyalah makai suap baka ti suah bendar udah diterangka ari puak perintah menua Sarawak!

Tang, Abdul Taib Mahmud enda tesautka semua tanya bala pemerita nya! Nya kebuah iya nginsil semua sidang suratberita sepengudah aum-aum kabinet nya. Kepala Menteri endang ditemu ngemataka semua bansa surat berita di menua Sarawak (Sarawak Tribune, ti endang enggi sida sebilik enggau Borneo Post, ti diempu pangan dagang iya). Surat-suratberita tu ukai nusui berita rama, tang semina ngemesaika berita pasal pejalai orang tuai nya kulu-kili (tang enda nyengkaum pasal aum-aum kabinet).
Taib mega udah nguji ngemanahka diri empu ti endur iya melanja ‘lalau pengawa dagang’, ti semina dikena ngelakuka pengawa dagang, taja pan ripot-ripot nya semina gerinik aja.

Investvine nya sebengkah ripot ti dikena Taib ngulihka bepuluh-puluh billion dollar ari bala orang dagang menua Arab bedagang dalam projek SCORE, ti endur perintah Sarawak nudukka pengawa gudang di tengah-tengah menua Sarawak, lalu udah nya nyadika sebengkah palan penatai pengeraja semina ke Taib enggau sida sebilik aja.
Ripot Investvine mega bisi ngayanka anak Taib ti benama Mahmud Abu Bekir ti dikumbai sida ‘pandai’. Ripot nya berupai bendar ngemesaika seraban orang ti udah ditemu balat ngereja penyalah makai suap enti dibandingka enggau pengidup orang biasa di menua Sarawak.

Sarawak Report udah kala ngayanka ripot pasal Mahmud Abu Bekir ti deka diasuh apai iya Abdul Taib Mahmud bediri di sitak Mukah, lalu sitak Kota Samarahan deka diberi iya ngagai anak menyadi iya, Ahmad Ibrahim (siku ari sida sebilik ti endang nyadi penerima mayuh tanah rampas). Kitai tau belabaka udah tu ila, tuai parti UMNO BN, Najib Razak, tentu majak enda rindu ke perambu Taib ti deka ngasuh sida sebilik bediri lalu megai perintah dalam parlimen enggau DUN di Sarawak. Pekara ti baka tu kala udah dirara Najib ba pengawa bepilihbesai apin lama tu udah. Abu Bekir kala udah puntan bejalaika projek besai-besai nengah kompeni iya Titanium Management ari apai iya empu, taja pan Bekir endang nadai pemandai enggau pengelandik ba pengawa ngaga jematan. Meda pengawa nya udah puntan, Taib lalu melanja ‘Inside Sarawak’ awakka nuliska ripot tekalih ti manah-manah pasal pemujur Abu Bekir.

Genap iku orang di Sarawak udah nemu projek nya sebengkah pemuntan ti besai. Sapa agi deka dikemulaka tauka dikelakar Taib udah tu?

Sekumbang orang tuai nya idup dalam mimpi iya empu, enggai bejaku enggau bala pemerita suratberita iya empu, lalu melanja surat berita bukai betusuika berita sengapa tempa, orang menua Sarawak patut berunding panjai-panjai maya bepilihbesai ti deka datai tu ila. Pilih mih pengari ti patut ku ati enggau runding kita, orang ti ulih ngubah pengidup kita, enggau pengidup anak-uchu kita.

19 Jan 2012

Tanah Rampas Taib

This post is also available in: English, Malay

Sekali agi raban pemansik ari gerempung Bruno Manser Fund udah muka mata dunya pasal pengawa ti dikereja Taib ba atas rayat enggau menua iya empu di Sarawak. Raban pemansik nya udah enggau naka ulih ngaga pansik atas penerang ti tiris ari opis Land and Survey baka ti kala dikeluarka kami dalam blog Sarawak Report ditu.

Ari ripot BMF nya, kitai ulih beratika enggau terang baka ni pemayuh perapasan ti ulih Kepala Menteri enggau sida sebilik ba atas tanah-tanah orang bansa asal enggau tanah-tanah ti enggi menua Sarawak empu. Bekarungka nama ‘pemansang’ Taib enggau sida sebilik udah bulih tanah tiga kali besai ari pulau Singapura, taja pan Taib kala madahka diri enda kala ‘bedagang di menua Sarawak’ ti endur iya empu endang nyadi pengarah dalam kompeni ti suah nerima nyau ka semua tanah, iya nya nengah kompeni iya empu, Delta Padi Sdn Bhd.
Nitihka penerang ari BMF, bisi 50% ari semua tanah ti diserahka ngagai sida Taib Mahmud sebilik nya diberi enggau pechuma! Nama bansa perintah ti udu bechuri tauka berampaska tanah ari rayat iya empu nya?

Kleptokrasi

Diatu Taib Mahmud bejalaika sebengkah pengawa ti dikumbai kleptokrasi, ti diinjau ari leka jaku Greek “klepto”, ti mai reti “aku ngenchuri”.
Nitihka ripot BMF bisi 200,000 hektar tanah bansa orang asal udah diserahka ngagai 31 buah kompeni ti bekaul enggau Taib Mahmud ngambika kayu kampung dia ditebang lalu dibuka nyadi kebun dandang besai. Semua kompeni nya udah mayar premium semina RM100 juta, iya nya sebagi ti mit ari untung nyual kayu kampung enggau rega buah sawit.
Ambi ke banding, baka ba iklan Onn Mahmud ti ngelakuka tanah Achi Jaya Plantations ngeletak rega RM31 juta ke seeker, ti sebaka enggau RM77 juta ke sehektar. Enggau rega 200,000 hektar ti udah dirampas Taib, semua penyampau rega nya deka nyadi RM15.4 bilion! Uji bandingka penyampau nya enggau RM3.47 juta ti diagihka perintah BN betuaika Taib Mahmud dikena nyungkak pemanah pendiau bala orang ti seranta ke taun tu!
Uji kitai beratika nama utai ulih kereja Sarawak ngena duit RM15.4 bilion mantu raban orang ti seranta di menua pesisir. Naka mih penyilap enti pemayuh duit baka nya terengkah ba jari orang ti amu baka Abdul Taib Mahmud!

Opis MACC – bingking sechara senyap

Sekali agi, penerang ti baru tu diarapka ulih dikena ngansak raban pemansik ari opis MACC bejalaika pengawa sida enggau patut.
Dalam bulan siti nyin kemari BMF bisi ngeluarka sebengkah surat penerang pasal Kepala Menteri ngagai opis MACC, ti ngayanka baka ni Taib enggau sida sebilik ngembuan share-share dalam 332 kompeni di Malaysia enggau 85 kompeni di menua tasik.

18 Jan 2012

Taib Disaman Bala Pengundi Iya Empu!

This post is also available in: English, Malay

Kepala Menteri Sarawak tentu malu bendar laban didawa ketegal ngelakar raban pengundi ti sama bansa iya empu ba court di Kuching. Perambu ti nadai kala digaga raban bansa Melanau, ti nyentuk ke sehari tu dikumbai iya taluk ke iya, udah dipansutka ba laman web Radio Free Sarawak, beserimbai enggau sekeda jaku randau pasal pengawa ngeruga enggau ngerampas tanah nitihka penerang ari gerempung Bruno Manser Fund (BMF).

“Kompeni Taib ngelakar kami”

Taib seruran madahka diri iya “nadai ngereja pengawa dagang di Sarawak”, tang Mesti Bersatu ngembuan mayuh bendar pekara pengawa dagang, nyengkaum share dalam kompeni Delta Padi Sdn. Bhd.
Penerang ari BMF bisi ngayanka Delta Padi S/B nya sebuah kompeni tunggal ti nerima tanah ti diberi ngagai sida Taib sebilik! Kompeni nya udah nerima tanah kebun dandang besai 28,000 hektar ti udah nya ngeruga pelilih menua raban bansa Melanau di Pulau Bruit enggau menua-menua ngelingi Sibu, ti dibeli enggau rega semina RM6 juta ari perintah menua Sarawak. Bala orang asal di menua nya bisi madah ke Radio Free Sarawak nya sida nadai kala udah dibayar pampas.

Tanah enda dipampas tang Taib bulih untung bebilion-bilion ringgit

Gerempung SADIA arap bendar ke sebengkah kes ba court deka difailka seraban orang asal ari menua nya dalam beberapa hari ti deka datai tu dikena ngelaban Perintah Menua Sarawak enggau dikena ngelaban kompeni Delta Padi S/B.
Raban NGO nya deka ngeluarka rintai lebih 100 iti pemendar ti dikeluarka Taib ngagai 30 buah kompeni ti endur sida Taib sebilik ngembuan share ti mayuh bendar. Ambi ke banding, kompeni Titanium Management enggi anak Taib di benama Abu Bekir, udah bulih tanah kebun dandang besai ti besai agi ari rampa pulau Singapura dalam taun-taun ti udah, ke mayuh agi nya pechuma.

Mayuh agi tanah tu diambi ari orang bansa asal taja pan sida endang bisi hak atas tanah NCR sida empu nya nitihka undang-undang. Bala raban orang asal di menua nya tekenyit bendar ati udah sida ningaka penerang ti disebut dalam RFS bekaul enggau pemayuh untung kompeni-kompeni lebuh ti nukar tanah nya nyadi kebun dandang besai.
Enti belalauka rega baka ti diletak Onn Mahmud maya iya deka nyual kebun dandang besai iya 28,000 enggau rega RM1 bilion, tanah nya deka berega RM2 bilion.
Bala orang ti bekunsi dagang enggau Taib nyengkaum sida sebilik enggau kroni-kroni iya, nyengkaum sida Hii sebilik, ti beempu hotel Pullman di Kuching.
Tuduh penyalah ngelakar tu deka ngemalu Taib ti endang udah ditemu ngembuan mayuh penyalah ti sebaka ngelama tu.
Orang ti beempu tanah bansa asal nya ukai semina nadai dipampas sida sesen, tang Perintah Sarawak mega nadai mega dibayar rega ti patut.
Rega premium ti semina RM6 juta ke tanah-tanah ti patut berega bebilion-bilion ringgit baka kes Delta Padi S/B nya terang bendar sebengkah skandal nipu.
Enggau nya bala raban pemayar chukai ke menua Sarawak udah lenyau duit ti patut dikena ngaga pemansang ke mensia mayuh ti kena rampas Taib tanah, ke penguntung iya empu aja.

10 Jan 2012

Anwar Dilepaska – Sekeda Jaku Tanya Ke Najib

This post is also available in: English, Malay

Ba pun taun baka tu, siti da agi kes dalam court BN puntan!

Terubah kemari, kes court enggi Taib lalu diatu enggi Najib, sekeda ari kes court ti tau enda ibuh dipenyadi!

Anwar Ibrahim ti suah bendar udah napi dawa, berasai tekenyit ninga pemutus court madahka iya dilepaska ari dawa ti udah manggai tiga taun diatu.
Di menua UK sebengkah kempen dikena mantah perambu penemuai Prince William enggau rani iya Kate, enti sema Anwar ditutup. Isu ti baka nya tau nyadika penanggul ti ngemalu perintah Malaysia ba mata entarabansa. Najib patut udah nemu penanggul ari pechara tu ari pun suba.

Dikena raban BN napi penanggul tu, sida iya enda tau enda ngalihka pemalu nya. Nengah media sida madahka Anwar dilepaska ari tuduh penyalah iya nya ketegal pemanah sistem pechara ti dipejalaika di menua Malaysia. Tu mega dikena ngayanka Najib manah nama ari atur perintah ti betuaika iya!

Enti ditinjau ari sukut bukai pemutus court tu mega ngayanka pengelemi Najib bejalaika ukum – sebengkah penyilap ti tusah bendar diputarka iya mega.
Diatu Najib endang ditemu nagang bala akim bejalaika ukum atas Anwar lalu tu mega nyadika jaku tanya orang mayuh nalat penegap ulah enggau pendiau iya.
Penerang dalam kes tu udah ngayanka a) Najib endang bisi bekaul enggau Mohd Saiful ngaga pemutus ngelaban Anwar lalu b) Najib udah enda madahka penerang ti bendar pasal kaul iya, laban iya endang ditemu nukar cherita iya berapa kali lebuh ti ditanya enggau dipansik.

Simpul kes tu bisi udah disediaka siku lawyer ari Australia Mark Trowell madahka tuduh penyalah Anwar nya lemi bendar lalu enda patut dipecharaka dalam court sekali-kali. Dalam rekod jalai cherita nya Najib endang enda kala betemu enggau Saiful lalu diterangka nadai bekaul enggau iya. Tang udah gambar Saiful ti betemu enggau Najib dalam opis iya lebuh maya iya agi mangku pengawa nyadi sapit Menteri Besai, iya lalu ngaku kala betemu enggau Saiful ti udah nya disebut iya betemu berandauka pasal pekara belanja sekula Saiful! Jaku tanya – nama pekara bukai ti dikerandauka Najib enggau Saiful kelimpah ari berandauka pasal belanja sekula Saiful?
Diatu Menteri Besai Najib udah ngaku meri penerang ti begilik, lalu diatu iya mega patut dipansik ketegal ngeruga Anwar bejalaika pengawa politik iya. Jaku tanya mega patut dituju ngagai raban polis enggau sistem undang-undang menua Malaysia baka ni penetap pejalai pengawa sida nya!

5 Jan 2012

Taib Matak Saman Iya – Selamat Taun Baru!

This post is also available in: English, Malay

Diatu, emba enggau keruga Taib udah padam baka api ti udah dipanjah ai! Tang nadai sapa-sapa pan tekenyit ati ninga berita nya.
Taib Mahmud kala udah nagih saman malu ngelaban Malaysiakini dalam taun 2008, mansutka pengeringat iya dalam rumah Dewan Undangan Negeri ketegal berita-berita “bula” enggau “petenah” bekaul enggau penyalah menyadi iya nerima suap ari kompeni-kompeni kapal menua Jepun ti minta lisin dikena ngangkut kayu kampung ari menua Sarawak.
Kepala Menteri Sarawak nya udah meri lisin dagang nengali ngagai kompeni menyadi iya, Achi Jaya.
Ketegal udah ditemu ngereja penyalah nya enggau chara belalai Taib bebendar amat deka nganchurka stesyen pengeluar berita internet, Malaysiakini, ti udah ngerembaika berita nya ke serata dunya.
Tang Taib udah saru bendar ngeluarka saman nya! Diatu pengerembai dunya internet udah balat bendar mansang, lalu diatu mega sekeda rejim perintah di menua Timur Tengah udah tumbang ketegal internet, lalu Taib enda dikelaungka.

Laban perintah BN udah balat bendar ngemataka court enggau sistem undang-undang menua Malaysia, dia Taib ti udah malu nya bisi bendar pengarap ke diri ulih nganchurka pengawa dagang Malaysiakini. Dunya tentu udah nemu berita ti dikeluarka Malaysiakini nya endang belalauka penerang-penerang ti amat sereta bendar ti diterima ari opis-opis chukai ari menua Jepun. Lalu Kepala Menteri Sarawak enggau sida sebilik mega ditemu ngemendarka bala kroni sida betebangka kayu kampung enggau jampat – ngambika tau jampat kaya.

Enggau kes dalam court ti baru deka dipecharaka nya lalu besenutuk mega enggau pengawa bepilihbesai ti deka diatur, Taib endang enggau naka ulih ngelamun pechara nya, enggau ni penyampau ulih iya. Sehari tu malu Taib tebantai, lalu Malaysiakini enda ibuh mayar Taib sesen.

Nambah ke nya, mensia mayuh udah dilalau pasal baka ni Taib Mahmud enggau sida sebilik tau nyadi kaya-raja enggau naka penyampat, ketegal pengawa dagang nengali, lisin-lisin pechuma enggau kontrak-kontrak besai-besai pechuma ari perintah ti diberi Taib melakangka rayat iya empu.
Sekali agi, atur ba kes saman malu, enti nuan bisi utai deka dilalaika, anang sekali-kali ngeluarka saman malu.

Taib, siku lawyer ti endang bepelajar nya udah enda ingatka pasal atur saman malu. Terang bendar iya diatu enda ingatka pemesai reti kereban internet atas media-media bechelak ti bukai enggau undang-undang media elektronik ti udah digaga rejim perintah BN ba menua-menua baka di Malaysia.
Tang diatu, taja pan iya balat bendar ringat, bala lawyer ti ngarika iya sama ngelalau iya matak saman malu iya nya laban enggaika kes dalam court nya ngachau pengawa bepilihbesai ti semak bendar nya!

Dalam reti ti bendar saman malu nya dikena nyaga nama manah orang siku-siku, lalu Taib Mahmud udah nadai nama-nama agi ti deka dijaga iya – laban rekod penyalah iya empu udah tebantai ke diri.

Enggau nya, Malaysiakini diatu tau badu nangi, rawan sereta irau napi siku orang ti pemadu kaya enggau bekuasa di Malaysia dalam pechara ba court.
Diatu, taja pan pechara dalam court nya udah tepadam pia aja, lalu pemerita ti nuliska pasal berita makai suap nya diatu udah mati, lalu opis-opis chukai di menua Jepun pan matak pechara sida ba penyalah makai suap nya.
Tang, kitai patut nemu penerang ti silik nya opis-opis chukai menua Jepun nadai nyebut duit suap nya nadai kala dibayar.
Perintah Jepun udah nemu, ngereja pengawa dagang di menua Sarawak ukai pengawa ti mudah enti sida enda dipinta mayar bemacham-macham duit suap – ba kes tu, bebayar ngagai menyadi Taib empu!

Perintah BN Malaysia ti endang ditemu merintah sebengkah menua ti lumur 3 korup di dunya tu patut nimbal jaku tanya pasal jaku bejai ti didinga sida. Ba pun randau Taib enggau Malaysiakini, sida endang enggai ke Taib matak diri ari saman malu iya empu enti sida agi dipinta Taib mayar ungkus pechara nya.
Sida mega ngenggaika chara iya matak diri enti nyema sida kala dipinta iya mayar dua-tiga ribu ringgit aja, ngambika iya ulih nyebut sida udah mayar ungkus saman malu ngagai iya.

Jaku minta ampun belalauka ubah ari bala pendakwaraya menua Jepun, udah ngujungka Malaysiakini enda ibuh mayar sesen ngagai Taib Mahmud!
Enggau tu Taib ditemu alah dalam chara iya deka bebalas … lalu pia mega iya lenyau pemanah nama iya empu!