28 Feb 2012

‘Dato’ Kamah’ Ari Baram Bulih Besai Agi Ungkup!

This post is also available in: English, Malay

Diatu kami mansutka mayuh agi penerang pasal pengawa dagang ti bisi kaul enggau penyalah makai suap ti dikereja Dato’ Jacob Sagan, Sapit Menteri Pengawa Dagang Entarabansa enggau Pengawa Gudang Malaysia.

Terima kasih ke komen penemu enggau kenang ari bala pemacha kami, diatu kami udah ngelala enggau silik sapa iya, bini iya, menyadi iya enggau ipar indu iya, ti benung ngulihka penguntung bejuta-juta ringgit ari pengawa kontrak perintah!

Kontrak Pengawa Beungkus RM63 juta!

Penerang ti diterima kami ari bala pemacha kami mega ngayanka YB Jacob Sagan bisi bekaul enggau sebengkah kompeni pengawa kontrak ti benama Dema Tega Sdn Bhd, ti deregister lalu bepalan di Kuching, Sarawak.

Kompeni Dema Tega diarahka bini YB Jacob Sagan, Winnie Jolly, menyadi iya empu Peter Usang Sagan enggau ipar iya Roseline Binti Andrew Gayu. Enggau nya, Winnie Jolly tentu iya siku bini menteri ti sikar sereta landik nangkup mayuh bengkah pengawa. Tu nyengkaum pengawa iya ngundang bala pengundi di sitak ti diarika laki iya, penemuai iya enggau laki iya ke menua tasik bejalaika pengawa perintah, ngintu ruang bilik sida sebilik lalu ngemataka kompeni-kompeni kayu kampung lalu mega ngemataka projek-projek beungkus bejuta-juta ringgit ari perintah besai!

Penanggul iya diatu, bala orang ti mangku pengawa nyadi menteri endang enda patut bekaul terus dalam pengawa kontrak ti dipelanja perintah. Ba penemu kitai mayuh tu, ulih enda kini kompeni Dema Tega tu nangkup pengawa kontrak besai-besai lalu pengawa ti dikereja sida setipak enggau belanja ti dibayar ngagai sida, sereta besemekih ngulihka kontrak enti sema kontrak dikeluarka sechara tebuka, tauka sida deka ngasuh orang bukai (sub-contract) ngereja pengawa ngarika sida?

Nyerumba tu, ruang komen kami nyau majak dikena bala pemacha meri kami penerang pasal pengawa dagang ti dikemataka perintah dipejalaika menteri. YB Jacob Sagan mega dipadahka bisi lisin nyual minyak Petronas di negeri Kuching!

Jaku Tanya Ngagai Najib

Dipeda kitai, YB Jacob Sagan nya siku orang ari raban bansa asal ari Baram, tang iya mega siku menteri ba Perintah Besai, ti deka minta pilih ngarika Barisan Nasional ba pengawa bepilihbesai tu ila. YB Jacob Sagan mega ngarika Perintah Malaysia bejalaika pengawa perintah ke menua tasik ba ikas entarabansa. Penyalah pengawa makai suap ti benung dikereja YB Jacob Sagan nya ditemu orang di serata dunya, lalu tau meri malu ke menua Malaysia enggau menua Sarawak empu. Nya alai, diatu baka ni penemu sereta tindak Najib enggau raban pemansik MACC ba penyalah ti benung dikereja YB Jacob Dungau Sagan nya?

Beserah Ngagai Bala Pengundi

Taja pan parti BN deka ngelakar dalam pengawa bepilihbesai ti deka datai tu ila, YB Jacob Sagan deka dipeda bediri ngena peluang ti penudi iya laban bala pengundi iya diatu udah ngelala iya, enggau nama pengawa iya kelimpah ari ti mangku pengawa nyadi menteri. Dalam pengelama bebulan-bulan tu, mayuh orang udah saru runding nama kebuah perambu deka ngaga tekat hidro Baram majak dipejalaika. Diatu orang udah nemu, penaluk YB Jacob Sagan udah dijual ngena kontrak besai-besai ngagai Taib Mahmud dikena majakka perambu ngampuhka kandang menua Baram.

27 Feb 2012

Taib Bulih Baru Ba SCORE!

This post is also available in: English, Malay

Nyerumba bala Ukit ti ngentapka pendiau diri ba gigi ai segang tekat Bakun ti ngampuhka rampa menua enggau temuda rimba sida, Abdul Taib Mahmud udah berumbang-rumban mutarka pengawa dagang dikena nambahka pengeraja ke iya empu ari kuasa elektrik Tekat Bakun.

Mayuh bengkah sempekat pengawa dagang udah ditanggam, semua nya diatur dikena nguntungka kompeni sida Taib Mahmud sebilik, nyerumba penatai bala orang dagang ari menua tasik ti deka beranakka puku dagang di Sarawak.

Nadai siti kontrak-kontrak nya dibuka ngena atur tender tebuka, tu nyengkaum sempekat dagang enggau kompeni-kompeni O M Holdings enggau Asia Minerals sereta mega enggau ‘dagang kunsi’ enggau kompeni Rio Tinto Alcan. Pekara ti narit ati kompeni-kompeni ari menua tasik nya beranakka puku dagang di menua Sarawak nya ungkus kuasa elektrik ti murah amat ari Bakun, lalu pia mega chukai dagang ti mit ti udah disemayaka Taib, enti kompeni-kompeni menua tasik nya beranakka puku dagang di kandang menua SCORE (sebengkah kandang pengawa gudang ti diperambu Taib).

Ungkus kuasa elektrik ti murah mai reti penguntung ti mimit ngagai tabung bala orang ti penchen ari pengawa (ingat, tabung penchen nya udah dipejal mansutka belanja dikena melanja projek ngaga tekat Bakun), lalu ngujungka untung ti besai pulai ngagai kompeni-kompeni ti bejalaika pengawa dagang dalam kandang menua SCORE, ti mega mai penguntung ke Taib Mahmud empu.

Chukai dagang ti mimit mai reti penguntung ti mit mega ke menua Sarawak betaun-taun ti deka datai tu ila.

Kompeni-kompeni enggi sida Taib sebilik deka bulih penguntung ti besai ari chukai ti mit, laban sida bedagang nyerumba kompeni-kompeni ti besai-besai ari menua tasik ba pengawa ngelebur besi!

Pekara tu udah ngujungka Sarawak Report mansutka jaku tanya nama kebuah Pesuruhjaya Tinggi ari menua Australia, Miles Kupa, udah dipeda kiruh bendar nyukung sereta mantu pengawa dagang ti penuh enggau penyalah makai suap nya.

Kami udah kala mansutka berita pasal pengerindu Miles Kupa ba pengawa Taib Mahmud ti nanggam sempekat dagang enggau kompeni Rio Tinto Alcan ba beranakka 60% puku dalam pengawa dagang bebilion-bilion dollar dalam pengawa gudang pengelebur besi.

Taib udah ngemendarka kesemua projek nya ngagai kompeni RM2.00 ti enggi sida sebilik, iya nya CMS, ti udah nya deka meri penguntung bebilion-bilion ringgit enti sema Rio Tinto Alcan meli share dia! Beribu-ribu iku orang di menua Australia deka lenyau pengawa enti sema Rio Tinto Alcan nyadi mindahka palan pengelebur besi sida ari Australia lalu tama ke menua Sarawak!

Kami ulih ngayanka baka ni Miles Kupa udah nyukung kompeni O M Holdings ari menua Australia, ti udah nanggam sempekat dagang enggau kompeni CMS enggi Taib, awakka sida bulih pemendar bejalaika pengawa dalam SCORE.

O M Holdings ngena anak kompeni iya, O M Materials (Sarawak) Sdn Bhd besetuju bedagang kunsi enggau CMS (80% O M Holdings, lalu 20% CMS) awak ke nirika palan pengelebur besai ti beungkus US$450 juta di Samalaju.

O M Holdings nya ke bendar iya sebengkah kompeni ti bepalan di Singapura lalu ditumbuhka di menua Bermuda. Tang nama kebuah Miles Kupa deka ngiruh diri ngarika chairman iya, Ngee Tong Low nanggam sepekat pengawa dagang nya?

O M Holdings ngembuan kaul ti rat enggau menua China, diatu benung bebendar deka ngulihka share ngena pengeraja asal Sarawak, lalu deka nguasa pengawa ti baka nya ari ti meri duit jali dikena begagaka mayuh agi tekat hidro elektrik ke projek SCORE enggi Taib!

Pengawa palan pengelebur besi enda terang deka meri penguntung ke orang Australia enggau orang Sarawak empu. Pengawa dagang nya deka ngeruga sereta mai pengerusak ngagai rampa menua taja pan meri penguntung ti mayuh ngaga bala orang ti bisi bekaul enggau dagang nya ari sida ti ulih ngena kuasa eletrik ti murah ari tekat Bakun.

27 Feb 2012

Dibeli Ngena Kayu Belian! MP BN Nyual Rakyat Sitak Baram

This post is also available in: English, Malay

Batang sungai ti diuan rakyat di pelilih menua Baram udah dijual MP sida empu, iya nya Sapit Menteri Pengawa Dagang Enggau Gudang ba ikas Perintah Federal, YB Jacob Sagan!

Sarawak Report udah nerima mayuh penerang ti madahka Jacob Sagan nyukung tuan iya, Taib Mahmud merambu deka ngampuhka kandang menua di sitak Baram enggau chara dibeli ngena dua iti lisin nebang kayu belian.

Tekat Baram ti diperambu nya deka ngampuhka kandang menua 400 kilometer pesegi kampung lalu mindahka 20,000 iku orang bansa asal ari sitak nya, nyengkaum rumah iya empu di Long Anap. Bala orang ti semenua enggau Jacob Sagan nya nadai nemu kuing pengawa Jacob Sagan ti nyukung perambu ngaga tekat hidro nya, ti deka ngerusak sebengkah ari kampung tropic ti agi tinggal lalu nyengkaum mega pendiau orang bansa asal dia.

Kar-kar nya nunjukka penerang ngayanka Jacob Sagan udah nyerahka dua iti konsesyen nebang kayu belian ti berega tinggi dikereja dalam sitak iya empu!
Konsesyen ngulihka kayu ti standard jarang bendar nyengkaum kayu belian, sebengkah kayu ti nyau majak pupus lalu berega tinggi.

Kar-kar kami mega ngayanka kaul entara semua konsesyen ngulihka kayu belian dalam sitak Baram nya, ti mungkur rampa kampung bungas lalu besereta nama kompeni-kompeni enggau lumur-lumur lisin sida.

Kompeni-kompeni ti mujur bulih konsesyen nya Winjac Sdn Bhd enggau Milisha Holdings Sdn Bhd.

Kar-kar ti besai agi ngayanka dua iti konsesyen nya beduduk ba tengah-tengah pelilih menua Baram, semak entara menua enggau Indonesia lalu enda jauh ari menua asal Jacob Sagan empu di Long Anap.

Ungkus konsesyen nya bejuta-juta ringgit, munyi ti dipadahka bala orang ti landik ba pengawa nya. Enti nitih ke pematut iya, duit ulih ari konsesyen nya dikena melanja sekula, jalai alun, kuasa elektrik, pam ai, pekara pengerai enggau elaun-elaun bukai. Tang, bala orang di menua Baram agi mengkang diau dalam penyeranta lalu agi kurang ba perengka ti diguna.

Penerang madahka sekeda ari orang ti ngembuan share dalam Milisha Holdings Sdn Bhd nya Jacob Sagan empu enggau bini iya Winnie Jolly!

Pekara tu ngujungka kami minta saut ari Taib Mahmud enggau Jacob Sagan nama kebuah seduai iya enda bejalaika undang-undang enggau betul sereta patut. Kebuah pia, laban meri konsesyen chara besalam ngagai kaban MP dalam parti politik ti sekunsi dalam perintah nya sebengkah penyalah makai suap lalu ngembuan percanggahan kepentingan ngagai pengawa menteri ti dipangku nya.

Udah tu ila kitai deka nemu berapa pemayuh pengundi Jacob Sagan nemu pasal konsesyen kayu belian iya ti mai penguntung bejuta-juta ringgit, terima kasih ke opis Menteri Perambu Pengawa enggau Pengeraja Asal ti dipegai Abdul Taib Mahmud.

Udah nya kitai patut nemu berapa penyampau dibayar Jacob Sagan ba konsesyen besalam ti udah diterima iya bekaul enggau rampa menua enggi bala pengundi iya empu ari perintah BN ti betuaika Abdul Taib Mahmud?

Tang naka ke diatu, laban Taib mengkang ngelalaika semua pekara bekaul enggau konsesyen kayu kampung, kami nadai bulih penerang berapa penyampau dibayar Sagan, enti bisi.
Diatu terang bendar penaluk ati Jacob Sagan ke tuan iya, udah dibeli ngena kayu belian!

Laban iya udah dibeli ngena kayu belian, Jacob Sagan enda ulih ngulihka utai ti patut ke bala pengundi enggau rakyat ba menua iya empu.

Nya alai, enti Taib majak deka ngampuhka menua sida, ngerusak semua pengidup di menua nya lalu muru semua kaban belayan iya ngagai palan pengentap pendiau ti baru dibayar pampas ti enda setipak, Jacob Sagan mengkang nyukung Taib.

Enti enda nyukung Taib, Jacob Sagan enggau bini iya enggau sida sebilik tentu deka lenyau konsesyen kayu belian lalu idup semina ngena gaji menteri iya RM12,000 sebulan.

22 Feb 2012

Pemaju Enggau Pemansang?

This post is also available in: English, Malay

Diayan ditu nya sekeda ari gamal rampa menua ti nguji disalam perintah BN, nagaka zon enda tau dipasuk sapa-sapa, dikena sida nagang raban NGO enggau bala penulis berita tama ngagai kandang endur ari ulu tekat hidro Bakun.

Tang, bala pengereja pengawa ari Bruno Manser Fund (BMF) udah ulih rembus mudik lepung Bakun lalu ngambi mayuh gambar bekaul enggau pengerusak rampa menua, ti diatu udah ditengelamka ai sama pemesai pulau Singapura ba tengah-tengah menua Sarawak.

Tu mih keterubah iya kami meda raban bansa Ukit, ti mengkang nguan kandang rampa menua sida empu taja ampuh ketegal segang tekat hidro Bakun nya.
Taib disadang lantang bendar ati meda pengeraja belabuh datai ari Bakun tama ngagai kompeni-kompeni iya empu, baka ti bekaul enggau sempekat nudukka kilang pengelebur ari menua tasik ti keran bendar deka ngena kuasa elektrik ti murah.

Tang mimit bendar kelai ti dipeda bekaul enggau asil udah diasaika raban orang asal ti bempu rampa menua ti udah kala ditebang kompeni Ekran, iya nya sebengkah kompeni enggi bala anak Taib ti bekunsi enggau kroni sida, Ting Pek Kiing.

Taib udah ngansak enggau pejal bepuluh-puluh ribu iku orang asal pindah ninggalka menua sida ngagai pengentap pendiau baru ti enda meruan di Sungai Asap lebuh iya nebang kandang menua Bakun lalu udah nya digagaka iya tekat hidro lumur dua pengambis besai di dunya tu.

Jaku semaya Taib baka ti ulih ngemanahka agi pendiau orang asal di endur nya, nyerumba ‘pemaju enggau pemansang’ sama singkang enggau pemansang dunya diatu. Sida disemayaka kuasa elektrik enggau bekal ai beresi ti enda bebayar, tang datai ke sehari tu dua bengkah utai nya lalu nadai nyadi nyata. Mayuh orang asal di endur nya mega nadai pengawa bebatang dikereja, lalu sida mega enda tetambangka bas dikena nganjung bala anak sida nurun ke sekula. Ari nya, putar penyeranta sida lalu agi mengkang ba sida.

Siku tuai raban bansa orang asal ti mengkang tinggal di ulu Bakun udah nerangka ngagai raban BMF, madahka sida deka ngaga rumah panjai baru ba tanah ti tinggi agi enda jauh ari menua lama sida.

Ngena kuasa elektrik ti murah ti dikuasa ari tekat Bakun, perintah BN udah ngaga tekat nya ngena tabung duit penchen orang ti udah badu kereja ba perintah, diatu Taib udah belabuh minta kompeni-kompeni ari menua tasik ngaga kilang pengelebur di Sarawak.

Ba tiap iti kontrak ti dikeluarka iya, Taib deka nentuka kompeni CMS iya nerima untung ti besai. Ba repot-repot ti dudi ari tu, Sarawak Report agi deka numpuka tinjau enggau randau ba penyalah makai suap.

Ingat, Tekat Bakun nya semina Serenggat ari 12 Renggat dalam perambu projek SCORE Taib Mahmud, ti endur iya deka muru bepuluh-puluh ribu iku agi orang asal ari menua enggau temuda-rimba sida empu.

  • wong terusu

    Nya meh ulah mensia laban kelalu rangka. Indah baka red indian di usa, aborigines di australia, endang ethnic cleansing in the best kind in this century. Sapa agi enti enda bansa ke enda berkuasa nyai mangsa. Naka pemedis ati meda brita tu.

  • Apai Vinna

    Aku enda setuju orang luar bisi masuk champur ba hal kitai.Ba aku,sida tu "bisi undang ba sepiak batu".Uji peda ba menua sida empu.Nadai agi kampung puang baka ba menua kitai ditu.Kitai tu empu meh ke patut ngaduka diri.Enti ngarapka Bruno Manser enggau tulung ari wang turunya,nya nadai guna.Tu baka ke ngadai menua diri ngagai orang bukai.Kekadang pemansang enda ulih nyeliahka kitai ari nebang,nyungkur sekeda tanah dikena ngidupka diri.Ke manah,semua utai tu pulai ke penguntung rayat lalu ukai siku-siku orang tauka lebih jai agi ukai orang ari menua bukai.

20 Feb 2012

Pelukis Kartun Zunar Bekempen Di Menua UK!

This post is also available in: English, Malay

Bala orang mayuh ti benung bejalai lalu mansa sukut ‘Malaysia’s Speaker’ ba laman Trafalgar Square di London berasai bendar teperindang meda lalu meratika kartun-kartun ti dilukis pelukis ti ‘manchal’ ari Malaysia di London ba ujung minggu tu tadi.

Zunar ngelukis di Malaysia baka pengawa ti dikereja beberapa iku pelukis kartun ti tebilang di menua UK enggau di menua bukai ti enda ditagang undang-undang, lalu ti endang dikena nyeniri bala orang politik. Di menua UK empu, Menteri Besai David Cameron enda ulih enda malu ke gamal diri ti dilukis baka siti kondom ari ketegal penerang ti dipansutka iya empu bekaul enggau seks. Pekara baka nya tau bendar ngasuh orang ketawa, lalu orang politik mega enda lantang ati.

Di menua Malaysia perintah BN enda rindu dilukis orang neladan utai bukai, lalu pengawa baka ti dikereja Zunar nya dikumbai sida tau mai pengerusak ke menua enggau bansa, sebaka enggau pengawa raban soldadu penyelawai.

Najib dilukis baka siku orang lelaki ti lembut, pemesai iya setengah ari bini iya Rosmah ti dilukis lebih bekuasa ari iya!

Ari ketegal ‘pemanchal’ Zunar, iya udah ditangkap malam hari lalu ditutup dalam tujuh buah rumah tutup sechara bepindah-pindah ngambika bala kaban iya enda nemu dini endur raban polis nutup iya! Udah nya polis berunding deka nanka iya ngena undang-undang pengasut lalu iya dituduh deka angkat ngelabuhka perintah.

Baka selama mega, ulah enggau pengawa bala apek bayat BN nya udah mangkung pala sida empu. Sida ti nangkap Zunar nyau udah ngasuh nama Zunar tampak agi. Zunar nyau majak berani agi ngelukis semina besenyataka pen keramat iya empu.

Ba bulan-bulan sebedau tu Zunar udah bejalai di menua Eropah lalu diatu iya datai di London ngayanka asil kereja jari iya empu ti disukung bala raban NGO baka Freedom Of Speech, Article 19 ba Free World Centre ba jalai Farrington, London.

Iya bejadika pengawa mandangka asil kereja jari ngagai seraban bala orang ti rinduka kartun minggu nyin kemari lalu mansutka jaku ti madahka sebarang perintah ti enda tan ati diketawaka sapa-sapa, kelai perintah nya deka labuh. Bala orang mayuh ti datai ngulu pengawa iya nya ketawa magang.

Abdul Taib Mahmud mega enda dikelaungka Zunar. Taib dilukis iya nyemaka gamal patung Sphinx di menua Ejip lalu mega nyemaka gamal kedua Tun Mahathir. Tang kartun Zunar ti penudi nya kemari mandingka Taib baka ti belanda puang lalu nadai temu tuju. Taib belanda rauh-rauh ngemesaika retorik pemansang iya, tang diatu menua Sarawak udah nadai agi pengeraja asal laban udah kena keruga iya, iya dipeda baka sebengkah kuasa ti mupuk-mupuk padam!

17 Feb 2012

Skandal SALCO – Baka Ni Taib Merambu Ngulihka Bebilion-Bilion Ari Bakun!

This post is also available in: English, Malay

Raban orang diri sebilik ti udah dipindahka ari kandang menua Bakun tentu deka nemu baka ni Abdul Taib Mahmud enggau sida sebilik merambu deka ngulihka penguntung bebilion-bilion ringgit ke sida empu ari kuasa elektrik tekat hidro Bakun, ti semina bepukuka share RM2.00 aja!

Kami ulih ngayanka baka ni SALCO (Sarawak Aluminium Company Sdn Bhd). sebengkah kompeni ti udah diberi lisin ngaga kilang pengelebur aluminium di Samalaju, ti deka dipejalaika ngena kuasa elektrik ti murah ari tekat Bakun, nya endang enggi kompeni sida Taib Mahmud sebilik, CMS.

Kompeni SALCO nya udah ngaga sempekat bedagang kunsi enggau kompeni besai entarabansa, Rio Tinto Alcan begulai enggau CMS, sepengudah dua buah kompeni nya nanggam sepekat dalam taun 2007 dikena mansik pengulih beranakka puku dagang ba projek pengelebur besi aluminium nya.

Dalam taun 2008, dagang kunsi ti udah ditanggam nya bulih lisin pengawa gudang ari perintah besai lalu sida nanggam sempekat enggau kompeni Sarawak Energy Bhd, dikena ngulihka pemendar ngena kuasa elektrik. Diatu kilang pengelebur aluminium nya nyadika pugu pengawa gudang ba kandang SCORE baka ti dikemesaika Taib Mahmud ngelama tu.

SALCO tu ditemu kami diempu Rio Tinto Alcan (60% share) enggau CMS (40% share).

Nitihka pansik kami ba pekara kompeni, pansik kami ngayanka SALCO nya semina bisi dua iti share, ti diagihka siti-siti share semina seringgit aja, kedua-dua nya sama enggi kompeni Samalaju Aluminium Industries Sdn Bhd.

Kami ulih ngayanka kompeni Samalaju Aluminium Industries Sdn Bhd nya endang diempu sebengkah agi kompeni ti ngena nama Samalaju Industries ti 100% diempu CMS! Tang, ba pun minggu tu tadi pengari kompeni Rio Tinto Alcan madahka kompeni sida nadai bekaul ba pengawa dagang di menua Sarawak.
Ari ketegal kompeni sida Taib sebilik CMS nya ti endang ukai kompeni pengelebur besi aluminium, dipeda nyelai bendar enti Perintah menua Sarawak enggau Perintah Besai di KL nulung anak kompeni iya SALCO ngena lisin awakka neruska pengawa kilang pengelebur iya!

Pengari Rio Tinto Alcan bisi udah ngamatka jaku ngagai Sarawak Report madahka kompeni entarabansa nya bisi ati ba share 60% ti disemayaka dalam SALCO, enti sema sida ulih ngena kuasa elektrik enggau murah nitihka pinta sida.

Tu mai reti kompeni Rio Tinto Alcan deka meli 60% share dalam SALCO enggi Taib Mahmud sebilik. Tu mih sebengkah sempekat ti digiga Taib enggau menantu iya, Robert Geneid, ba sebengkah aum enggau Rio Tinto di Kuching bulan nyin kemari (repot ba ayan ba Borneo Post).

Uji peratika penguntung ti deka pulai ngagai CMS, enti sema Rio Tinto Alcan nyadi meli 60% share ba projek besai pengelebur besi aluminium nya!
Sekeda ari pemegai share nya tentu iya agi ngena nama niang bini Taib, iya nya Laila, lalu dientudika empat iku bala anak iya.

Ingat, Taib udah beranakka puku dagang semina ngena puku RM2.00 aja. Lalu nama kebuah CMS sanggup bebagika share 60% ngagai Rio Tinto Alcan ngena rega ti murah?
Iya ke bendar, enti sempekat ngena kuasa elektrik ulih dikena murah ari Sarawak Energy Berhad (ti dikuasa petunggal Taib empu, Hamed Sepawi), kompeni CMS tentu deka bulih untung bebilion-bilion ringgit ari puku RM2.00 dalam dagang kunsi enggau SALCO!

Diatu Taib udah ditemu kitai udah melakangka atur tender tebuka, lalu enggau nya Perintah Menua Sarawak nadai bulih penguntung ti nyengala ari lisin enggau premium. Lalu baka ngelama tu, semua kompeni pengaga projek udah nadai peluang nyadi kontraktor indu, tang semina bejalaika pengawa nyadi sub-kontraktor ba CMS.

Kitai mega enda tau enda ingat duit dalam tabung Pension Service, baka ti udah dipinta bala menteri enggau chara pejal, deka dikena beranakka puku dalam tekat Bakun ngambika projek nya enda tengelam, ketegal kompeni-kompeni dalam menua Sarawak empu agi kakang ati ba pengawa nya. Rio Timto Alcan bisi udah mansutka penerang ti madahka sida deka nagaka 4,700 iti pengawa puang ba projek sida nya ila, tang naka ke diatu, nadai siku orang di menua Sarawak udah tulihka pengawa ba kilang Pressmetal nya.

Ke penudi iya, nama penyadi ba bala pengereja pengawa ke Rio Tinto Alcan ti di Tasmania?

Rio Tinto Alcan endang udah didinga deka nyual projek sida di Tasmania, laban dipelabaka sida udah tetemuka menua bukai ti murah agi endur bejalaika pengawa!
Taib Mahmud empu benung dipansik Suruhanjaya Pencegahan Rasuah Malaysia (SPRM) perintah besai menua iya empu ketegal udah kelalu mayuh penerang pasal penyalah makai suap ti dikereja iya ngelama tu.

Diatu kitai nemu orang ti merambuka projek nya endang Taib Mahmud enggau menantu iya empu Robert Geneid (siku orang ti nyadika juru-runding dalam pengawa ngaga sempekat bedagang kunsi dalam SALCO) ngambika ulih nyadi kaya-sekaya.

Nya alai, betul tauka enda kompeni-kompeni entarabansa baka Rio Tinto Alcan madahka diri deka matak diri ari menua Tasmania laban ti deka bedagang kunsi enggau siku orang baka Taib di menua Sarawak?

16 Feb 2012

Udu korup! – Tu Mih Maya Nanya Kaul Menua Tasik Nyukung Taib

This post is also available in: English, Malay

Sehari tu tadi, kempen di menua tasik numpuka timpai sida ngagai menua Sarawak – lalu nyengkaum semua kompeni ari menua tasik ti endang dikangauka beranakka puku dagang bekaul enggau perintah Taib Mahmud ti benung udu makai suap.

Di menua Switzerland gerempung Bruno Manser Fund udah tembu bejadi kempen mai nagang begagaka tekat hidro mayuh agi ti disadang tau mai pengerusak ti besai ngagai menua Sarawak. Pengawa raban BMF tu dibantu raban NGO ti bukai.

Kempen-kempen ti baka nya udah ngempung mayuh raban NGO ti ngembuan pengirau ati ti sebaka senentang kaul projek-projek entara Australia enggau perintah Taib Mahmud ti udu makai suap nya.

Kompeni Ta Ann udah ditemu bejualka produk ti dikumbai sida “eco-wood” enggau ‘kayu tanam’, tang iya ti bendar nya, semua produk nya digaga ari kayu kering ti datai ari kampung bungas menua Tasmania nya empu!

Udah kami nyayanka penerang pasal pengawa dagang Ta Ann ti salah nya, asil jual kompeni nya udah tendu ngagai 50%, ti ngayanka orang bukai ukai bejai pengawa kami ti nyerungkai resia ti disalam kompeni nya, tang pedis ati ke iklan Ta Ann ti palsu nya.

Udah nya mega kompeni Ta Ann dipelabaka deka ngaku penyalah sida empu ketegal udah mai penyaru ke bala penguna produk sida. Nengah program Radio Tasmania, pengari kompeni Ta Ann, Greg Hickey bisi didinga ngaku penyalah kompeni nya ti ngayanka iklan bula pasal ‘kayu tanam’ di menua Jepun.

Kaban Parlimen menua Tasmania ti ngatika diri Paul Hariss udah nguluka sebengkah kempen mai muka rampa kampung di menua nya ti dikereja kompeni Ta Ann. Kami deka nanya, nama tuju enggau juluk ati Paul Hariss ba kempen iya nya.

Ta Ann udah madahka diri dituntung pengerugi di menua Tasmania kenyau ari sida belabuh ngereja pengawa di menua nya. Berebak enggau Ta Ann ti dituntung pengerugi, kompeni Hydro-Tasmania udah majak ngulihka penguntung bejuta-juta ringgit nengah kontrak dalam program ngaga tekat hidro elektrik ti udu nerima jaku bantah di Sarawak, ti endur mayuh raban NGO ngeluarka jaku bantah sida sehari tu!

Hydro-Tasmania ditemu bisi pengingin deka bulih kontrak besai-besai ngaga ke semua 12 iti tekat hidro elektrik di serata menua Sarawak baka ti diperambu Taib Mahmud ngelama tu.

Ba pengawa kompeni Hydro-Tasmania di Sarawak, ukai semina orang di Sarawak aja deka dituntung penusah lenyau kereja. Bala orang di menua Tasmania mega deka lenyau kereja enti kompeni Rio Tinto Alcan badu agi beoperasi, ari ketegal kompeni Rio Tinto ti bisi ati deka muka kilang ngeleburka aluminium di Sarawak. Pengawa bepindah-pindah endur nya sebengkah chara kompeni besai-besai baka Hydro-Tasmania enggau Rio Tinto Alcan nya ngiga ungkus gaji pengereja pengawa ti murah, lalu undang-undang pasal kualiti pemeresi angin ti enda terit.

Dalam repot ti dudi ila, Sarawak Report mengkang agi deka nanya kaul kompeni Australia enggau perintah Taib Mahmud di Sarawak.

13 Feb 2012

Raban Bansa “Penan” Nya Tau Disemaka Baka Jelu Pinan! – Pemesai Ari Malaysia Ngemediska Ati Orang Di Menua Tasik

This post is also available in: English, Malay

Tu mih keterubah iya bala orang di UK tegepang sereta alit ati ninga penemu ari Pesuruhjaya Tinggi Malaysia ti bekereja di UK, Datuk Seri Zakaria Sulong. Kebuah pia laban iya kala udah mansutka jaku ti enda bepampul, enti nya amat munyi ti ditusui suratberita Borneo Post. Zakaria Sulong endang ngintaika penemuai raban penulis berita ari Sarawak (ti endang dipejal bekereja ba palan berita ti dikuasa Taib Mahmud, baka Borneo Post) mechat pengawa raban NGO ti seruran nusui pasal penanggul ba pengelantang mensia enggau penanggul ba rampa menua di menua Sarawak.

Pekara ti mit?

Zakaria Sulong bisi didinga mutapka pengawa raban NGO ti rindu bendar ngemesaika “pekara-pekara mit, baka jelu pinan enggau raban bansa Penan di Sarawak”! Sehari tu tadi gerempung Bruno Manser Fund udah ngayanka pengeringat sida bekaul enggau penanggul ti nuntung bansa Penan enggau raban bansa orang asal ti bukai, lalu ngumbai jaku Zakaria nya udu mechat siti-siti raban bansa asal.

Enggau nya gerempung BMF nya udah minta Datuk Seri Zakaria Sulong badu mangku pengawa iya nyadi Pesuruhjaya Tinggi.
Diatu udah mayuh gerempung enggau orang siku-siku ngelala penanggul ti nuntung pengelantang mensia, lalu nyerumba nya mega, penanggul ti nuntung raban bansa orang asal baka bansa Penan di Sarawak, ti endur bala tukang tumbang udah ngerusak pendiau sida dalam kampung.

Gerempung-gerempung tu nyengkaum Bruno Manser Fund, Survival, Greenpeace, Borneo Project, Friends Of The Earth, Fern, Rainforest Alliance enggau mayuh agi gerempung ti baka nya di menua Malaysia baka Brimas, Suhakam enggau parti-parti ari Pakatan Rakyat.

Raban bansa Penan nya sebengkah ari raban bansa orang asal di menua Sarawak ti udah dikeruga pendiau ba rampa kampung sida. Baka raban bansa bukai, bansa Penan mega lenyau tanah NCR dirampas kompeni kayu ti udah bulih lisin dibeli ari Taib, tang sida nadai nerima sebarang pampas, lalu nadai mega meda ‘pemansang’ ti disemayaka ari asil nyual kayu enggau penumbuh kebun sawit bedandang besai dalam menua sida.

Nambahka nya mayuh mega repot bekaul enggau penyalah masung raban orang indu bansa Penan nya.

Dibandingka enggau jelu

Nya alai, nama jaku dipansutka Taib dikena nimbal repot indu ti udah kena pasung nyengkaum sida indu ti beumur 10 taun? Taja pan udah bisi raban pemansik ari menua Malaysia empu endang ngamatka semua dawa penyalah pasung nya, tang Taib mengkang nagang pengawa mansik penyalah nya.
Nyangka nya Taib seruran ngumbai raban Penan Kristian ti diau nguan kampung nya sebaka enggau raban jelu. Nyerumba penemu nya mega menteri James Masing ti setanah enggau Taib, maya iya ditanya bala pengarang berita ari UK iya nya BBC Television bekaul enggau siku nembiak indu bansa Penan ti udah kena pasung lalu dipalu bala tukang tumbang sampai luput, madahka pekara nya ukai pekara ti besai, laban ku iya bansa Penan nya endang sebengkah bansa ti “tumu bulih laki ba umur ti agi biak bendar”!

Tu mih entara sekeda pekara ti dikemesaika raban NGO, tang dikumbai Pesuruhjaya Tinggi ari menua Malaysia nya “pekara ti mit”!
Dalam jaku iya ti direkod Borneo Post, Zakaria Sulong endang ngaku cherita-cherita ti baka nya deka mai penanggul ngagai menua Malaysia.
Kuasa Pemendar

Kuasa raban NGO bepegai ba pengawa nusui berita ti bendar. Tang di menua Malaysia suratberita baka Borneo Post endang ditagang nusui berita-berita ti bendar lebih agi berita-berita ti bekaul enggau penanggul nuntung pengelantang mensia enggau pengerusak rampa menua.

Surat-suratberita di menua Sarawak semina betusuika pasal pejalai Kepala Menteri enggau pasal mimpi-mimpi iya bekaul enggau ‘pemansang’ enggau projek SCORE iya.
Surat-suratberita nya ditagang nusui sebarang berita ti tau ngemalu Kepala Menteri.

Surat-suratberita semina dipeda balat ngemesaika berita pasal siku nembiak Malaysia ti kena keduan ba sebengkah penyarut di nengeri London lalu nadai ngayanka penyinu bekaul enggau penanggul ti nuntung bansa Dayak dalam menua Sarawak empu.

Nama kebuah penanggul ti nuntung bansa Dayak enggau nembiak indu Penan ti udah kena pasung nya tau enda sebaka pemalat pangka iya?
Zakaria Sulong udah nuduh raban temua NGO Borneo Post ti seruran nusui pasal penusah enggau penanggul di Sarawak, ngembuan “agenda belalai” sida empu. Tang agenda pasal Taib enggau bala tukang tumbang ti ngerusak rampa menua enda tentu ditemu mensia mayuh.

‘Jelu Pinan’

Nama reti utai ti dikumbai Zakaria Sulong nya “jelu pinan” ti dikena iya ngela bansa Penan? Baka nya chara iya deka ngelakuka dagang temuai di menua tu? Iya udah kelalu ngemaruhka raban bansa nya lalu pia mega mechat pemanah rampa menua di Sarawak.

Beratus-ratus bansa jelu siga ti dalam pengelama 30 taun idup dalam kampung jerung diatu nyau dituntung pengusah lus lalu sekeda jelu ti udah dipinan dalam zoo pan enda tentu tan idup, ti dipandangka ngagai raban temuai. Perintah BN Malaysia rindu bendar ngeluluka diri ngembuan penyinu enggau pengiru ke jelu mayas, ti pendiau jelu nya udah dirusak laban ngawakka pemansang pengawa kebun bedandang besai dikereja. Nya mih ulah BN baka ti ditusui Zakaria Sulong.

Ba penemu iya jelu mayas nya, baka bansa Penan ti dituntung lapar pungkang nya semina “pekara ti mit” lalu baka “jelu pinan”.
Siku Pengari Menua?

Nya alai, sapa ti patut serebana ke pasal pengiruh raban NGO, enti enda Datuk Zakaria Sulong nusui cherita bendar pasal pengurang pengidup enggau pendiau bansa Pen
Anang mih kitai muai iya ari pengawa iya, tang kitai patut majak nanya ke penemu enggau runding iya!

13 Feb 2012

Jaku Minta Ampun Ari BBC Ngenanka Sarawak report, Tang Baka Ni Tekat Bakun?

This post is also available in: English, Malay

Penusui berita Barisan Nasional, baka suratberita Borneo Post, udah enggau naka ulih bejai Sarawak Report enggau ke semua asil pansik kami, ti udah ngayanka penyalah pengawa makai suap di belakang pengerusak rampa menua enggau kampung di Borneo enggau penanggul ti balat nuntung raban bansa asal.
Kami dikumbai ngembuan “agenda besalam” lalu dituduh ngeluarka penerang-penerang ti bula belalauka “pun penerang ti enda ulih dikarapka dikena nuliska berita enggau tuduh ti salah”.

Baka ti kala udah dipansutka kami, servis FBC Media kala dikena Abdul Taib Mahmud ti mayar sida datai ke USD$5 juta ke kontrak naburka berita setaun, lebih agi dikena nimbal berita-berita ti dikeluarka kami. Pekara tu udah nyadika penerang dikena kami ngayanka enggau silik agi penyalah pengawa makai suap Taib Mahmud. Enggau nya, sapa bagi pun penatai berita ti tau dikarapka, sida BBC tauka Borneo Post? Ba sebengkah pengawa minta ampun ke serata dunya ti udah dikeluarka empat kali (hari Enam tu tadi) lalu dipelabaka bisi dipeda enda kurang ari 300 juta iku peninga, BBC udah ngaku pun penatai berita iya nya ari FBC Media ti dibayar Abdul Taib Mahmud enggau Mohammad Najib Razak dikena seduai naburka propaganda bula dalam program berita sida.

BBC nemu diri ngeluarka berita bula ari ketegal kami ti ngeluarka penerang pasal pengawa nyelai FBC Media nengah Sarawak Report (ti udah nya diberi kami ngagai suratberita The Independent di menua UK) ti madahka opis Menteri Besai Malaysia bisi mayar FBC Media RM94 juta dikena ngemanahka nama Barisan Nasional enggau industri minyak sawit Malaysia, nengah program berita, ngayanka FBC Media endang ngeluarka berita baka nya ngagai BBC, CNBC enggau CNN. Opis Pegemata Pejalai Media di UK, Ofcom, diatu benung mansik pekara ti baka tu. Tang BBC udah jampat madahka penyaru diri empu ti endur sida tepejuh meda pemurah bayar naburka berita ti dikeluarka FBC Media bekaul enggau berita-berita ari menua Malaysia, lalu udah nya, Sarawak.

Program-program berita ti semina berega RM5!

Senutuk enggau nya, ari ketegal integrity berita sida ti nyau majak pudar, ke terubah iya FBC Media madahka diri nadai ngaga kereja ke Taib enggau Najib. Nitihka penerang raban lawyer FBC Media, iya nya kompeni Peter Carter Ruck, FBC Media “enda kala ngereja pengawa ke sebarang perintah, nyengkaum perintah menua Malaysia”!
Jaku sida FBC Media nya belaban bendar enggau surat-surat penerang ti diayanka Sarawak Report, nyengkaum slaid PowerPoint ti digaga FBC Media.

Enggau nya, lebuh kitai berandauka integrity tauka pengamat berita, agi kitai deka arapka berita ti ditusui sida Borneo Post, FBC Media enggau media-media bukai ti dikemataka perintah Malaysia, tauka kitai arapka berita ti ditusui Sarawak report enggau BBC?

Jaku-jaku tanya ngagai sida CNBC enggau CNN

Sarawak Report bisi penerang ti madahka CNBC ukai semina nerima berita ari FBC Media ba rega ti murah, tang sida minta bayar ari FBC Media laban ngena program sida, World Business, naburka cherita enggau berita klien sida. Enti nitihka pematut, CNBC mayar FBC Media, tang CNBC ti minta bayar ari FBC Media ti manggai RM10 juta! Berebak enggau nya CNN agi nguji enda begunaka penerang ti nusui pasal penyalah makai suap pemacha berita ti dikerinduka sida, John Defterios, ti kala bekereja nyadi Presiden dalam FBC Media.

Tekat Hidro Elektik Bakun

Enggau nya, maya kitai berandauka pasal integrity sesebengkah repot ti deka ditusui orang, sapa bagi ti patut dikarapka kitai, BBC enggau Sarawak Report tauka Borneo Post, ti kala udah ngumbai Sarawak report nusui berita bula pasal pengawa ngaga tekat hidro elektrik Bakun?
Kami kala ngeluarka penerang dalam format video ti diterima kami ari siku staff ti bekereja di Bakun, ti madahka pengirau ati diri meda chara pengereja pengawa ngaga tekat nya enggau chara ngelimat belanja, nyengkaum nyampur ai ngagai simen dikena ngaga tukuh tekat nya.

Sarawak Report nadai kala ngumbai tekat nya tau runtuh lalu nganu nyawa, lalu kami mega nadai penerang dikena ngamatka berita angin ti madahka bisi ayan rekah ba simen ti udah tembu gaga dia.

Kompeni Hydro-Tasmania

Kompeni Hydro-Tasmani majakka diri bisi pengerindu deka ngaga mayuh agi tekat ti diperambu Taib Mahmud dikena iya ngampuhka menua Sarawak dalam beberapa taun ti deka datai tu dikena iya meri kuasa elektrik ngagai projek besai iya, ‘Score’.
Lalu, di menua Tasmania empu, kompeni Hydro-Tasmania mega disukung seraban orang politik ti nyukung pengawa kompeni Ta Ann betebangka kayu di menua nya, lalu ngujungka napi jaku bantah orang di menua nya. Kompeni Ta Ann nya enggi petunggal Taib Mahmud, Hamed Sepawi.

Enti ba orang ti beratika pekara tu udah ngayanka pengirau ati sida ba kaul sida Taib sebilik enggau menua Tasmania, patut kitai arapka kompeni Hydro-Tasmania nya sebengkah kompeni ti landik dikena kita nguji penan enggau penakal tekat ai Bakun ti digaga sida?

Kitai patut begunaka penerang ti betul sereta amat, ukai mantah sengapa berita ti ditusui belalauka penerang.

9 Feb 2012

Skandal Dalam Sarawak Club – Main Ti Ngelakar!

This post is also available in: English, Malay

Enggau Taib ti majak deka ngikis RM3.47 juta, kenu ku iya, dikena mantu bala orang ti suntuk di menua Sarawak, iya ngumbai manah bendar enti iya ngelepaska tanah ti berega RM30 juta ngagai bala kaban dalam Sarawak Club.

Sarawak Club ti di Kuching nya semina ngambi orang ti kaya-kaya di Kuching nyadi ke kaban. Dalam 2004, maya pemeri tanah perintah nya diserahka ngagai kelab nya semina dikena bala kaban kelab nya ngemanahka padang golf ba kelab nya.

Pansik kami ngayanka penerang ti madahka kuasa ngatur pengawa ngemansangka kelab nya endang betulang-belakangka bala kroni enggau sida Taib sebilik.
Ambi ke chunto, Presiden kelab nya, Abdul Aziz Hussain nya ipar Abdul Taib Mahmud empu. Aziz ditemu tebilang landik dalam pengawa politik enggau pengawa dagang, lalu udah kala bekereja nyadi State Secretary enggau nyadi Kepala dalam kompeni Sarawak Energy.

Sama mangku pengawa tinggi dalam kelab nya, Datuk Amar Abdul Ghani nya siku agi kaban Abdul Taib Mahmud mega! Ari ti meri duit tunai ngagai projek ke kelab nya, perintah Sarawak (ti endang tentu iya mansa jari Taib) udah sepenemu meri kelab nya sebidang tanah menua ti bulih 62 ekar pemesai semak enggau padang golf nya awak ke dikemansangka.
Ngelama tu tanah padang golf nya disewa ari UNIMAS.

Penemu ti nyelai nya, ngambi ke kontraktor ti udah dipilih tuai dalam kelab nya bejalaika projek, ti deka dibayar kelab nya lalu udah nya bala tuai-tuai dia tau bulih untung ari pemansang atas tanah dia ila.
Sarawak Club endang udah bisi RM12 juta diagihka sida lalu sida patut udah nyual sekeda ari tanah sida dikena mayar laluh RM24 juta ngagai Liang Court tauka nginjau duit ari endur bukai.

Tang laban penemu enggau pengawa tu dikereja bala kroni Taib nya kebuah projek nya enda dikereja ngena chara tender tebuka lalu semina milih Liang Court ti endang udah ditetapka sida empu. Liang Court nganggarka ungkus pengawa nya RM24 juta, tang udah mai sida besaum penemu ngena chara ti nyelai ti endur sida deka bulih duit tunai enggau mega bulih bagi ba tanah berega ti ulih sida nya.
Bisi sekali lebuh kontraktor ti belabaka tanah nya enda nyadi diberi perintah menua, sida lalu minta ngubah sempekat ti ngeletak kelab nya patut mayar rega tambah RM8 juta, ti ngujungka rega baru nya nyadi RM20 juta.

Penerang-penerang pasal penyarut tu udah ayan nengah surat-surat court, laban Sarawak Club enggau Liang Court ti benung belaban deka nembuka sempekat nya.
Reti nya abis kurang RM42 juta udah dipelanja dikena mayar ungkus pengawa ti semina berega RM20 juta. Orang mayuh pan alit ati mega, sapa ti bempu tanah nya lalu kini penunga lebih ari penguntung nya?

Naka ke ditemu kami, tanah nya udah disirap lalu dibagi-bagi ngagai 90 buah plot rumah. Pekara nya tau dipeda ba opis pengerejista tanah. Siti kebuah orang mayuh berasai enda puas ati laban opis Lands and Survey (ti betuaika lalu dikemataka Taib Mahmud empu) mengkang enda nitihka atur ti betul ngeluarka rintai nama sapa-sapa ti bempu plot-plot nya.
Bala orang ti meli tanah nya dia tentu deka dipesalahka enti sida ngembuan sangka ngagai sebarang sempekat ti disalam dikena ngeluarka tanah nya, ti jauh bendar berega ari ungkus ngemansangka padang golf nya.

Kitai sama deka nemu, nama kebuah seraban orang ti tinggi pelajar dalam komiti ti ngemataka Sarawak Club nya nejuka bala kontraktor ngulihka untung ti besai bendar ari ngereja pengawa ti murah dia?

6 Feb 2012

Tama Nengah Lubang Jerumat – Ibrahim Mahmud

This post is also available in: English, Malay

Jaku silup orang tuai madahka pengeraja di dunya tu enda ulih dibai kitai tama ngagai dunya pemati.

Tang taja munyi nya mayuh bendar gaya idup orang dulu kelia bisi ditemu nyimpan pengeraja nyadika baya dibai orang ti mati. Tang kubur ulih disengkubang lalu bala penyengkubang nya mih orang ti untung nabanka reta ti ditanam begulai enggau bangkai orang ti mati nya.
Pengeraja Ibrahim

Ibrahim Mahmud, baka sekeda bala bakih sama kereja iya ti bukai patut penchen enggau ati lantang. Tang enti menyadi iya, Taib Mahmud nyadi tuai menua ti enda makai suap, duit penchen Ibrahim endang patut numbas ke diempa iya. Pansik Sarawak Report udah ngayanka baka ni Taib nulung niang menyadi iya nya nugungka pengeraja maya iya agi idup menya. Pengeraja Ibrahim nya endang bepelasarka pengidup rayat Sarawak.

Kami dalam Sarawak Report mega kala ngayanka baka ni Taib udah salahguna kuasa menteri iya ngerampas tanah menua enggau tanah NCR ti udah nya diberi iya ngagai Ibrahim enggau rega ti murah bendar.

Kompeni Masretus

Sebengkah ari dagang belalai bekaul enggau tanah nya dikereja nengah kompeni Masretus Plantations. Penerang ti tiris ari opis Lands and Survey ngayanka baka ni Taib udah nyerahka pemendar ngambi tanah-tanah NCR di Sungai Retus, ngagai kompeni Masretus enggi menyadi iya empu, Ibrahim, enggau bayar premium semina setengah juta ringgit dalam taun 2008. Nadai mayuh pemesai polis ulih ngereja pengawa baka nya dikena sida nambahka belanja sida. Nyau datai ba maya orang ti nguan kandang menua Sungai Retus nemu tanah sida udah diambi Taib lalu diserahka iya ngagai menyadi iya, court madahka sida udah ngelui timpoh endur mansutka bantah sida!
Tu mih chara Taib Mahmud nambahka pengeraja sida sebilik lalu mai penyeranta ke bala rayat di menua iya empu.

Amgreen Plantation

Nengah kompeni Amgreen Plantation mega niang Ibrahim Mahmud nugungka pengeraja iya enggau sida sebilik. Sarawak Report kala udah ngayanka penerang ti silik baka ni Taib udah nyerahka 5,000 hektar dikena iya ngeluluka diri mantu ngisi tabung Yayasan Sarawak, ti endang patut dikena mantu raban nembiak sekula nampung pelajar sekula sida. Nya mih kebuah ba pun iya, kompeni nya diberi nama Sarawak Foundation Plantations! Taja pan chara baka nya dipeda manah ngagai guna mensia mayuh, tang Taib endang deka nentuka share ke besai agi dalam Sarawak Foundation Plantations nya pulai ngagai Ibrahim. Penerang ti tiris ari opis Lands and Survey mega ngayanka baka ni Taib ngarika perintah minta bayar premium semina RM3.7 juta ke semua konsesyen ke 5,000 hektar tanah ari Ibrahim nengah kompeni Network Jaya.

Ibrahim enggau pangan dagang iya semina mayar premium kurang ari RM2 juta ngagai perintah, ti udah nya dijual sida baru enggau rega RM20 juta. Ari nya sapa raban orang ti rugi, lalu Ibrahim nyadi kaya raja? Udah tentu raban orang ti rugi nya bala orang ti empu tanah ti udah kena rampas, nembiak sekula enggau bala pemayar chukai di menua Sarawak.

Sarawak Pulp Industries

Agi mayuh bendar chara meri pengaya ke menyadi diri empu baka ke Ibrahim enggau sida sebilik ti bukai. Sebengkah chara ti ditemu nya nengah projek Sarawak Pulp Industies.

Sarawak Pulp Industries udah diberi lebih 10,000 tanah kebun bedandang besai enggau rega premium ti mit tang dijual baru enggau rega bepuluh-puluh million ringgit!
Sarawak Pulp industries mega dipaduka ngaga kandang industri ti besai bendar rampa, Simalajau Industrial Park, ngena duit bantu ari perintah. Orang ti diasuh ngereja pengawa dia nya kroni Taib, Ting Peck King. Sekali agi, pemegai share ti mayuh ari konsesyen enggau kontrak nya ukai orang bukai, tang Ibrahim Mahmud.
Kelimpah ari Ibrahim ti bisi megai share dia, anak Taib empu, Hanifah, enggau menantu iya Anisa, bini Sulaiman.

Cats Radio

Sebengkah ari chara Taib Mahmud mujur ngelamun diri nabanka pengeraja ti dirampas iya ari rayat enggau menua Sarawak nya enggau chara ngemataka perengka penabur berita, baka suratberita enggau stesyen pemanchar radio ti ngatika diri. Ngena chara nya orang di menua Sarawak enda nemu cherita enggau berita ti bendar pasal pengawa salah ti dikereja iya enggau sida sebilik. Ambi ke chunto, Cats Radio, bulih lisin penabur ari Taib. Cats Radio diempu Kristal Harta. Lalu Kristal Harta nya diempu kompeni Hanib Corporation ti dikemataka anak indu Taib ti benama Hanifah bekunsi enggau menyadi iya Ibrahim Mahmud.

Tang nyerumba pejalai radio ngatika diri enggau surat-suratberita ti dikemataka Taib, orang mayuh diatu benung dibantu internet macha lalu mendingka berita ti bendar pasal sida Taib sebilik … nengah laman Sarawak Report enggau stesyen radio internet, Radio Free Sarawak, ti endang enggai minta lisin ngena chara makai suap ari perintah menua Sarawak ti betuaika Abdul Taib Mahmud!

3 Feb 2012

Kaul Raban Hii Enggau Asia Plywood Enggau Raban Taib

This post is also available in: English, Malay

Penerang ari dalam industri kayu-ramu bisi ngayanka pugu pengeluar kayu ti ditemu dalam skandal Asia Plywood, nya sebangkah raban orang diri sebilik ari menua Sarawak ti bepalan di Miri, iya nya raban Hii.

Asia Plywood ti nyewa kilang kayu ti besai ‘Tegas Kesuma’ ti bepalan di Tanjung Manis, nya sebengkah industri kayu papanlapis ti pemadu besai di Malaysia.
Kami ulih ngayanka penerang pasal kilang kayu Tegas Kesuma nerima bekal kayu ari kompeni Fonsen Timber Sdn Bhd, iya nya Fonsen Holdings, anak kompeni enggi raban sida Hii sebilik.

Sida Hii sebilik bulih pemendar ari pangan dagang sida iya nya Kepala Menteri Sarawak Abdul Taib Bin Mahmud, nebang kayu kampung puang ba kandang endur di Bintulu, ti endang udah ditagaka nyadi kebun sawit bedandang besai.

Taib ti endang ngeluarka pemendar ngulihka kayu kampung di menua Sarawak nya endang betanggungpengawa ngeruga kampung puang dalam pengelama 30 taun ke udah. Dulu ari Taib empu, nya aya iya Abdul Rahman Ya’akub, kala udah dibantah iya ketegal ngeruga kampungpuang ti enda ulih diganti di menua Sarawak!
Semua kayu ramu ari menua Sarawak enda kala bulih sijil pemendar ari opis Forest Stewardship Council (FSC) di menua UK laban cara Taib ngulihka kayu ari kampung nya enda betagang.

Ambi ke chunto, sebengkah ari kompeni kebun dandang besai ti pemadu besai ti Sarawak, Delta Padi, endang seruran bulih pemendar nebang kayu ari Kepala Menteri nya. Kompeni dikemataka sechara bekunsi raban sida Hii sebilik enggau kompeni Mesti Bersatu, sebengkah kompeni enggi sida Taib sebilik!
Sebengkah agi kompeni ti bisi ngaga kaul enggau Taib sebilik nya Kingwood Inns enggau Kingwood Travel Services Sdn Bhd. Tu sekeda ari chara Taib nugungka pengeraja iya enggau sida sebilik nengah chara makai suap bekaul enggau Hii sebilik.

Dulu ari berita tu kami kala ngayanka baka ni Taib ditemu mantu ngisi tabung Prince Albert ari menua Monaco ba sebengkah pengerami ngayanka fesyen Islam. Maya nya Prince Albert nerima selambar chek 100,000 euro disuaka bini Menteri Besai Malaysia, Rosmah Mansor, tang iya ke bendar duit nya diberi sida Hii sebilik disuaka nengah Taib Mahmud!

Sekeda agi kaul dagang Taib enggau raban Hii baka ti ditemu diatu nya dalam kompeni Bormill Wood (Trengganu) Sdn Bhd ti dikemataka Jamilah enggau sida Hii, enggau Sarawak Company Sdn Bhd ti dikemataka siku agi menyadi iya, Tufail Mahmud enggau raban Hii.

Lalu baka ni pengawa kontrak kunsi entara adi indu iya Raziah Mahmud enggau sida Hii ba pengawa ngaga jalai pintas Padang Penyangkai Bilun di Miri? Baka ti kala udah ditulis kami dulu ari tu, Taib udah nyerahka kandang tanah ti besai bendar ngagai menyadi iya nengah kompeni-kompeni sida, Kumpulan Parabena enggau Miri Properties (ti endur Taib bisi share nengah kompeni Mesti Bersatu). Udah nya Raziah lalu bejalaika projek ngaga jalai pintas nya ngena chara sub-kontrak ti dikemataka kompeni Rich Venture enggi sida Hii sebilik!

1 Feb 2012

Skandal Asil Kayu Sarawak Mangka Menua UK!

This post is also available in: English, Malay

Dua ari beberapa buah kedai di Britain udah ditemu nyarutka runding bala penguna sida bekaul enggau asil kayu “eco-friendly” baka ti udah diripotka dalam suratberita Daily Mail, sebengkah kompeni suratberita ti tebilang di UK. Kami ulih ngayanka baka ni kompeni B & Q enggau Wickes, dua bengkah kompeni ti tebilang ba pengawa dagang perengka rumah digaga ari kayu, ti udah ngumbai diri bulih asil ti tau dikarapka.

Tang ke bendar, agensi Forest Stewardship Council (FSC) nadai udah ngemendarka kayu ari menua Sarawak dijual di menua UK, laban pengamu enggau pengawa ngeruga kampung bungas ti dikereja Kepala Menteri Taib Mahmud enggau bala kroni dagang iya.

Kedai nya sebengkah ari beratus-ratus buah anak kedai di serata menua UK tebilang bendar nama, diatu dipelaba deka didawa ngena undang-undang pekara dagang menua Britain ketegal mai penyaru ke bala penguna sida.

Skandal nya bekaul enggau sebengkah kompeni ari Malaysia benama Asia Plywood Company ti diiklanka nya sebengkah kompeni penyual pengambis besai kayu meranti enggau papanlapis kampung tropika di Malaysia.

Semua papanlapis dalam kedai nya bisi chap Asia Plywood Company enggau chap pemendar ari opis FSC. Kelimpah ari nya papanlapis nya bisi pelekat ti madahkah asil kayu nya “digaga ari pemendar menua pengeluar”.

Kompeni B & Q enggau Wickes udah ngelamun asil ti dikemendarka FSC ti bukai ngiga chara nyual asil sida. Tang, rega murah ti diengkahka ba papanlapis ti berega tinggi nya udah ngasuh raban orang ti landik pasal asil kayu alit ati lalu belabuh mansik papanlapis. Asil pansik sida ngayanka papanlapis nya endang digaga ngena kayu meranti tulin – ti sebaka bendar enggau asil kayu diangkut kompeni Asia Plywood Company nengah pengkalan Tanjung Manis.

Orang ti bekuasa ngemataka pengawa dagang kayu di Britain nya lalu enggau jampat narit pulai lesen enggau pemendar sida ari Asia Plywood lalu belabuh bejalaika pansik sida.

Opis FSC mega madahka sida udah narit pulai semua chap pemendar ba semua asil Asia Plywood Company, reti nya, kompeni nya enda tau ngengkahka chap opis FSC agi.
Taja pan baka nya Asia Plywood Company mengkang enda ngasi ke rara ari FSC, taja pan sida FSC nemu bala penguna di menua nya deka ditipu.

Enti Asia Plywood mabak pelekat FSC ari semua papanlapis sida, kompeni B & Q tentu deka lenyau bala orang ti meli asil kayu sida nya!
Tindak ti jampat diatu enda tau enda diambi dikena nagang bala kroni Taib Mahmud majak nyual mayuh agi asil kayu kering Sarawak ti berega tinggi ngagai menua UK.