Kompeni Enggi Sapit Kepala Menteri Sarawak Bulih Kontrak Perintah Setengah Bilion

• 6 Mar 2012
• BM 翻译

Ba minggu nyin kemari kami udah ngayanka baka ni kontrak perintah ti manggai RM100 juta udah diserahka ngagai dua buah kompeni, Dema Tega, enggi siku Menteri Perintah Besai Jacob Sagan enggau Embun Pelangi, enggi Naroden Majais, siku ari orang kanan Taib Mahmud.

Sekali tu kami ngayanka baka ni sebengkah kompeni enggi raban Sapit Kepala Menteri Alfred Jabu sebilik bulih kontrak ti endur sida bisi kaul ngulihka kontrak ti besai amat.

KACC Construction Sdn Bhd bisi nerima kontrak ti manggai SETENGAH BILION RINGGIT ari wang turu perintah dalam kandang kurang lebih sepuluh taun tu udah.
Kompeni tu sebengkah kompeni pengawa kunsi entara sida Jabu sebilik enggau State Secretary Mohd Morshidi Abdul Ghani enggau Fadillah Yusof, iya nya siku kaban parlimen BN ari sitak Petra Jaya ti mega nyadi Sapit Menteri Sains.

Bala orang ti megai share dalam kompeni nya Jennifer Jabu enggau petunggal iya empu Robert Lawson Chuat, lalu pia mega menyadi State Secretary Mohd Taufik Abdul Ghani enggau Fadillah Yusof empu.

Siku agi ari raban sida nya, Bustari Yusof mega bisi nerima konsesyen ngulihka kayu kampung ti besai lalu mega nyadika pengari Taib Mahmud dalam pengawa dagang iya.

Nama kebuah kontrak-kontrak ti besai-besai nya mudah bendar diberi ngagai bala bakih politik, kaban menyadi, anak enggau petunggal Taib Mahmud? Nyangka nya kini kebuah rumah Alfred Jabu diatu nyau semakin besai sereta manah bendang-bendang dipeda? Siti agi jaku tanya, baka ni pengelandik Jabu dalam pengawa ngaga projek besai-besai, taja iya ditemu orang semina bisi pelajar ba pengawa betanam-betupi aja?

Konsesyen-konsesyen ke bukai ti udah diulihka sida Jabu sebilik nya nyengkaum kebun sawit dandang besai ti dikereja Herba Aromatics, ti dikemataka bala anak iya empu, Gerald Rentap Jabu enggau Barbara Jabu begulai enggau YB Robert Lawson Chuat mega. Semua tanah ti dikereja kompeni Herba Aromatics Sdn Bhd nya endang tanah NCR enggi orang Betong. Pampas ti udah diterima sida ari ti udah ngelepaska tanah temuda sida nya semina RM500 sepintu, taja pan ungkus semua tanah nya bejuta-juta ringgit.

Beserimbai enggau nya mega, SALCRA ti endang diasuh muka kebun sawit dandang besai betuaika Alfred Jabu. Pemeri setengah billion ringgit ngagai kompeni KACC Construction nya mega sebengkah penatai pemisi ti diagihka ngagai siku ari kroni Taib, iya nya Mohd Morshidi Abdul Ghani, State Secretary menua Sarawak.
Sarawak Report kala udah ngayanka baka ni Mohd Taufik Abdul Ghani nerima kandang tanah ti besai bendar nengah kompeni-kompeni Derawan Sdn Bhd enggau Sahua Enterprise Sdn Bhd. Sekali agi, nengah kontrak-kontrak perintah ti manggai setengah billion ringgit nya ngayanka baka ni perintah Taib Mahmud ngatur penatai pemisi di menua Sarawak.

Nengah konsesyen enggau kontrak ti besai-besai ti diberi ngagai bala menteri iya empu enggau sida sebilik nyengkaum bala kroni nya mih chara Abdul Taib Mahmud ngenanka penduduk sida dalam pengawa politik lalu nya mega ngujungka iya empu betambah kaya-sekaya.