2 Mar 2012

Mayuh Agi Datuk Ti Kamah – Naroden Majais & Hamden Ahmad!

This post is also available in: English, Malay

Berita ti dikeluarka kami tu sepengudah kes bechara dalam mahkamah ti endur bala Iban menang ngelaban kompeni ti ngeruga kampung enggau temuda rimba sida, ti dikemendarka Abdul Taib Mahmud.

Diatu raban akim benung ngira penyampau pengerugi ti dikereja kompeni, opis Lands and Survey (ti udah ‘saru’ meri pala tanah ngagai kompeni) enggau Perintah Menua Sarawak, ti udah ngujungka penyarut nya.

Nitihka penerang ti diterima kami ti tiris ari opis Lands and Survey enggau penerang ti ditemu kami ari rekod kompeni nya, sida ti bisi kaul enggau penyarut nya endang ukai orang bukai tang bala Datuk ti kamah ari raban BN Taib Mahmud, iya nya Sapit Menteri Pemansang Pengawa Dagang, Naroden Majais enggau bini iya!

Nama kebuah opis Lands and Survey ti dikuasa Taib udah meri 4,500 hektar tanah kampung enggau kebun dandang besai ngagai kompeni Nirwana Muhibbah ngena rega ti patut?

Penerang ti ditemu kami nya nyungkak tanda tanya baka ni dua iku orang kereja perintah ti bekereja ba opis ti dikemataka Taib ulih angkat lalu bulih pengeraja ti besai bendar udah sida mangku pengawa nyadi menteri? Naroden Bin Majais belabuh bekereja nyadi siku pengajar lalu udah nya nyadi siku pemesai ba opis Pemansang Ekonomi Sarawak (SEDC).

Hamden Bin Ahmad nya siku jurukira (accountant) dalam Opis Pemansang Tanah Sarawak (SLDB) sebedau iya diberi Taib Mahmud penuduk.

Udah iya nyerahka pengawa iya ngagai Kepala Opis Kampung (Forestry Department), Len Talif Salleh, sepenembu pengawa bepilihbesai tu tadi, iya dipaduka nyadi siku Pengarah dalam kompeni enggi sida Taib sebilik, Naim Candera lalu pia mega nyadi Tukang Wang dalam kompeni kebun dandang besai sawit ti pemadu besai di Sarawak, iya nya kompeni Sarawak Plantation Berhad.

Genturung pendiau bala orang bansa asal ti besemak enggau konsesyen nya baka Long Liam, Long Julan, Long Anap, Long Palai, Long Apu, disadang deka ampuh enti sema tekat hidro Baram nyadi digaga tu ila.

Beberapa bulan tu udah kitai udah diterangka pasal pengawa ngerampas tanah ari bala orang di Kampung Lebor ti dikeruga kompeni enggi Naroden enggau bini iya. Nama kebuah Taib Mahmud udah nyerahka konsesyen ti besai amat ngagai dua iku pemesai ti bekereja dalam perintah iya, tanah enggi orang bansa asal ti seranta di Kampung Lebor, lalu udah nya seduai iya ulih ngaga rumah batu ti besai-besai ke seduai empu?

Bala pemacha blog Sarawak Report tu tentu kala udah macha penerang pasal pengeraja ti diulihka Naroden Majais ti nyadi siku ari orang ti berejista bekaul enggau konsesyen kebun dandang besai sawit ti diberi Taib. Dua bengkah kompeni ti berejista ti endur Naroden Majais bisi kaul nya baka Hydroflow Sdn Bhd enggau Indranika Sdn Bhd, ti sama bepalan di Kuching.

Mayuh macham cherita kelulu udah dikereja dua buah kompeni nya bekaul enggau ngeluarka penguntung kunsi ngagai orang bansa asal. Share ti disuaka ngagai bala orang bansa asal nya dikereja nengah kompeni-kompeni Sadong Wibawa Bhd enggau Punggur Wibawa Bhd.

Tang, kedua buah kompeni nya dipejalaika ari opis kompeni pemegai share ti besai agi, WFM Enterprise Sdn Bhd.

Bala orang bansa asal ti kena keruga orang tanah nya semina dibayar RM200 siku ke setaun!

Kedua-dua kompeni Hydroflow enggau Indranika nya 70% diempu WFM Enterprise ti mayuh agi share dia dipegai Kiong Goon Siong enggau Kiong Goon King. Kiong direjista dalam opis Lands and Survey ba palan ti sebaka, ti endur Naroden Majais nyadika orang ti tau endur betanya ngarika kompeni-kompeni nya, ti mega dipelabaka bisi megai share ti mayuh dia.

Dalam sistem belamun ti dipejalaika Taib, konsesyen kayu kampung enggau konsesyen kebun dandang besai sawit semina diberi ngagai kaban politik enggau kroni iya aja, ti endur kitai enda nemu sapa ke bempu kompeni ni. Baka ni Majais enggau Hamden Ahmad tau bulih konsesyen kayu kampung enggau kebun dandang besai sawit taja pan dulu suba seduai nya orang kereja perintah baka orang bukai?

Diatu kitai agi nganti saut ari Abdul Taib Mahmud enggau perintah BN baka ni tanah orang bansa asal tau datai ba jari bala orang ti ari parti politik ti sama enggau iya?