Nulong Sitak Tauka Nulong Iya Empu? – Billy Abit Joo!

Kaban parlimen ke Ulu Rejang, Bakun madahka diri “deka terus ngemansangka rakyat ba sitak iya” lima taun da agi. Tang Wilson Ugat, ti nyadi sekretari ke kepala PRS, pan madahka diri “begunaka gintir”.

Kompeni Wargana Consortium Sdn Bhd nya sebengkah kompeni ti ngereja pengawa enda nitihka utai ti disemaya Billy Abit Joo. Dalam taun 2010 Billy Abit Joo madahka Sarawak Hydro bisi ngagihka kontrak RM9.8 juta dikena meresi 60,000 tan reba kayu ba lepung tekat Bakun. Pengawa nya dikereja sebaka enggau pengawa kompeni gerempung kereja sama.

Billy Abit mega madahka rakyat di pelilih menua nya deka bisi peluang bekereja meresi lepung tekat nya enggau ngagihka perau sida empu. Ari pengawa kunsi baka nya 50% share ari untung RM9.8 juta kontrak nya deka nyadika dividen ke bala orang ti sama ngambi bagi bekereja meresi lepung Bakun nya.

Enti nya nyadi nyata sereta nyengala, kitai tau meri puji ngagai Billy Abit laban nulung raban bansa orang di menua nya. Tang jaku semaya Wargana Consortium nya nyau enda nitihka perambu asal pengawa ti deka dikereja di endur nya.

Pansik kami nunjukka nadai pengawa kunsi dikereja di endur nya. Semua pengawa meresi lepung tekat Bakun nya ditengali Wargana Consortium kediri. Dividen 50% share ti udah kala disemayaka ngagai raban orang di menua nya pan nadai mega direkod! Nitihka penerang ari siku orang bansa asal menua nya, “kontrak dia dikuasa penuh kompeni Wargana Consortium”

Enti nitihka patut, raban bansa asal ti berejista nyadika kaban dalam kompeni nya ukai semina bulih pengawa tang ulih nerima dividen penguntung ari share 50% dia.
Dalam percanggahan kepentingan ti ngemalu nya, kompeni Wargana Consortium nya dikuasa penuh kaban parlimen di menua nya, Billy Abit Joo!

Tiga iku pengarah dalam kompeni nya iya nya David Wong, Alice Sia enggau pengari rakyat ke dulu suba Nyipa Batok. Nyipa Batok nya mentua James Masing (apai Connie Bua Nyipa). Diatu pansik kami nunjukka empat iku pengarah nya mih ti megai share dalam Wargana Consortium. Kompeni bukai ti sama bisi bagi dalam kompeni nya nyengkaum Wargana Management Sdn Bhd enggau Sinaran Bakun Sdn Bhd.

Bala pemegai simpir share ke bukai dalam kompeni nya mega nyengkaum 24 iku tuai rumah enggau tuai kampung orang di Sungai Asap. Nya mih tuai raban orang ti diupah perintah BN nyadika pengari nembiak sida empu – ngiring nembiak diri empu nyukung parti BN ba pengawa ngundi tu ila! Nya alai, nama reti penguntung 50% share nya pulai ngagai rakyat menua nya munyi ti disemaya Billy Abit seduai Nyipa Batok? Nama reti consortium nya ditumbuhka bala rakyat di menua nya empu, munyi ti dikemesaika Awang Tengah?

Pansik kami mega nunjukka rakyat enggau tuai kampung tauka tuai rumah orang di menua nya lalu bedau nerima seringgit duit ti disemayaka ngagai sida.

Naka ke diatu kompeni Wargana Consortium enda ngereja pengawa ti patut dikereja sida nundaka jaku ti dipansutka kaban parlimen BN menua nya!
Kelimpah ari bulih kontrak meresi lepung tekat Bakun, Wargana Consortium mega bisi betebangka kayu dalam kandang kampung ti agi tinggal dia.

Dalam surat penerang enggau kar ti ulih kami ari Opis Kampung, beribu-ribu hektar kampung ari ulu tekat Bakun nya dikuasa kompeni nya ti dikuasa Billy Abit Joo enggau bala kroni BN iya.

Diatu bala orang di Bakun patut berunding deka nukar pengari rakyat ti ukai ngarika sida, tang ngemulaka sereta beduan sida, baka Billy Abit Joo enggau Wilson Ugat. Dulu ari repot tu, kami mega udah ngayanka sesalin surat ari Mong Dagang ti minta duit dibayar ngagai sebengkah kompeni ti dikuasa menyadi James Masing, bini Mong enggau bini Wilson Ugat, Leyta Kupa!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments