‘Pemeri Ari Petara’ Ke Lihan Jok

• 19 Mar 2012
• BM 翻译

Pengari rakyat ari parti BN ke dulu suba, Lihan Jok, kala didinga mansutka jaku puji ngagai bala pengundi ba sitak ti diarika iya, madahka Tekat Baram nya “pemeri ari Petara”.

Sapa ti dikumbai Lihan Jok nya Petara?

Tekat Baram nya digaga jari mensia, ti deka didudukka atas rampa menua ti digaga Petara. Rampa menua deka dirusak projek ti besai baka nya. Nya alai, mensia ti dikumbai Lihan Jok nya ‘petara’ nya, tuan iya empu, Abdul Taib Mahmud.

Taib ti benung merintah menua Sarawak enda salah-salah baka kepala samseng raban mafia, enggau bala YB iya endang bisi bendar pengarap, Tekat Baram nya ila deka ngisi kuchik sida ngena pengeraja.

Baka ni? Dikena ngaga Tekat Baram nya Taib merambu deka nginjau duit ti mayuh bendar ti disemayaka Menua Sarawak. Ari duit jali nya, Taib ulih magi duit nya ngagai kompeni iya empu, baka Cahya Mata Sarawak (CMS), ngambi ke dikena ngaga tekat hidro nya ila.

Taib mega deka magi kontrak-kontrak ngagai kompeni-kompeni bala kroni politik iya, ti endang ditagaka iya ngumbuk bala rakyat majak ngundi BN lalu nyukung pengawa ngaga tekat ai nya.

Kami bisi tetemuka penerang ti madahka siku ari kroni politik Taib ti benama Lihan Jok. Rakyat ti kala diarika Lihan nya deka ngiga belanja (ari rega kampung enggau temuda rimba sida) ti kena keruga Lihan dikena ngaga tekat Baram ti berega bebilion-bilion ringgit nya!

Kar ti diulih kami ari Opis Kampung bisi ngayanka enda kurang ari lima bengkah konsesyen nebang kayu belian udah diberi ngagai bini Lihan Jok enggau siku agi sida sebilik ti benama Peter Jok. Kayu belian nya sebengkah kayu kampung ti tinggi bendar rega lalu kayu bansa nya nyau majak lus ari menua Sarawak. Enti nitih ke patut, kayu belian nya endang enda tau ditebang tauka dijual.

Kelimpah ari Lihan Jok, Taib mega bisi “ukui pengasu” di Baram, ti endang dikarapka iya ngulihka sukung rakyat di Baram ngambi ke pengawa nebang kampung kena ngaga Tekat Baram dipejalaika.

Siku ari “ukui pengasu” Lihan enggau Taib nya benama Temenggong Pahang Deng Anyie ti kala didinga kami ngarika nembiak iya nyukung BN enggau kroni kayu kampung sida. Taun nyin kemari Temenggong Pahang bisi mega didinga ngarika nembiak iya meri terima kasih ngagai kompeni kayu kampung, KTS, laban nyukung projek ngaga Tekat Baram! Ari sukung iya nya, Temenggong Pahang lalu bulih bagi “pemeri ari Petara”, nengah kompeni sida empu, bulih bejuta-juta ringgit kontrak menua Sarawak.
Kompeni ti ko kami nya benama Setegap Jitra Sdn Bhd, ti kala bulih kontrak-kontrak enda kurang ari RM15 juta ari menua Sarawak! Nya kebuah Temenggong Pahang bebendar ngayanka sukung iya lalu matak nembiak iya nyukung BN, nyukung kompeni KTS, lalu pia mega muji Jacob Sagan!

Diatu kami minta Lihan Jok nya ngelepaska diri ari pengawa dagang kamah iya, laban iya ti kala nyadi Kepala Pengajar, lalu nyadi pengari rakyat, lalu udah nya nyadi orang dagang enda kala bulih kontrak ngena chara ti beresi nitihka undang-undang menua nya.

Dua bengkah agi kompeni ti bisi kaul enggau Lihan Jok nya Baram Wawasan Enterprise Sdn Bhd enggau Yutako Sdn Bhd. Kompeni Baram Wawasan Enterprise nya ngereja pengawa narit rakit kayu kampung ti udah ditebang, tang kayu ditebang sapa? Kayu ditebang KTS? Lihan Jok enggau Temenggong Pahang patut nemu meri saut nya. Baka nya mega kompeni Yutako, bekaul enggau pengawa muka kebun sawit dandang besai, lalu sapa orang ti nyadi kaban dalam kompeni nya? Nya mega Lihan Jok enggau Temenggong Pahang patut nemu nyaut. Kami belaba ke munyi nya, laban alamat opis dua buah kompeni nya sebaka.

Nya alai, kami minta bala orang politik nya enda tau enda madah ngagai bala rakyat sida pasal konsesyen ti ulih sida ari pangan BN sida. Sida pan seruran majak ngasuh rakyat sida nyukung lalu ngundi BN!