Mealu-alu bau but ba Sabah! Surat Penerang Bank Ngayanka Anak Musa Aman Bebalut Enggau Duit Kamah – Eksklusif Bansa

Surat penerang ti dibantaika Komiti Penagang Makai Suap Malaysia (MACC) mandangka buti ti tegap ngagai Kepala Menteri Sabah, Musa Aman bisi kaul enggau pengawa ngulih untung ari kayu batang, tang bisi orang madah iya dipelalai orang kuat dalam politik.

Aman endang enda ngakuka tuduh ti madahka iya bisi bekaul enggau towkey kayu batang Michael Chia, ti kala ditangkap laban ngembuan duit SG$16miliun enggau enda beradat lebuh deka mai duitnya ngagai Malaysia ari Hong Kong dalam 2008.

Taja pia, Sarawak Report udah teulihka surat penerang ti dipelalainya ari bala penasat Komiti Penagang Makai Suap Hong Kong (ICAC) enggau MACC ti ngaul Kepala Menteri Sabah

Chia anak iru Musa Aman

Michael Chia, ti endang ngaku diri anak iru Aman, megai tanggung pengawa ti mai penguntung ngagai Kepala Menteri, ku bala orang dalam.
Ku sida, belabuh ari Aman dipaduka mangku penuduk, Chia lalu berengkah bejalai betemu enggau orang dagang kayu batang sereta merambu ngulihka mayuh agi lisin kayu batang ti besai, tang taja pia iya enda tau enda bebagi enggau orang ti patut diuntung lalu dibayar nengah iya laban ti bekaul enggau Musa Aman.
“Tampokong diasuh nitihka jaku Chia,” ku berita. Reti nya Menijer Kampung Yayasan Sabah, Mohd Daud Tampokong, udah diasuh Chairman Board Trustee, Musa Aman bekerjasama enggau Chia lebuh datai maya ngeluarka lisin kayu batang.

Yayasan Sabah megai kuasa nyaga bemiliun hektar kampung ti agi tinggal, lalu tanggung pengawa yayasan tu iya nya ngalau nyaga sereta ngibun kampung ngambika nguntung menua enggau menisa mayuh.

Ba tu, orang ti pemadu besai pangkat ba menua nya ti mega nyadi kepala Yayasan Board of Trustee, ti diberi kuasa enda betatak nyaga pengeraja asal menua nya.
Ulah ti baka tu endang tau ngujungka pengawa makai suap tau nyadi, lalu kami ngembuan buti ti ngayanka Aman enda ngelepas peluang diri ba tu.

Bau akaun bank nyau mealu-alu

Pengerindu Chia ba pengidup suba enda ulih diading. Ku kaling iya “Iya tau melanja $2k kena meli chawat”!

Lebuh ti ditangkat ba Hong Kong, Chia benung minching gumpal duit keretas Singapor SG$10,000 siti-siti, Chia dipelabaka mai masuk duit chara belalai lalu disangka kena melanja pengawa bepilih ti tau bendar ngujungka makai suap.

Akaun Bank ti bekaul enggau duit nya lalu ditan ICAC ba pengelama tiga taun, lebuh ti nasat kes tu dia sida lalu minta bantu Kepala Lawyer Bansa, Abdul Ghani Patail ngambika sama besaup ngiga buti ari raban ti bekuasa ba Malaysia.

Berebak enggau nya MACC lalu berengkat bejalaika pengawa nasat kediri empu sereta naban selori surat penerang ari opis Michael Chua sereta bala kaban dagang kayu batang iya nyengkaum bala towkey kayu batang ti bukai baka Andrew Lim enggau Admond Looh.

Bala penasat udah tetemuka Chia bisi megai mayuh bengkah akaun bank baka ari HSBC, Singapor enggau Swiss Bank UBS ti bepalan ba Hong Kong.
Kami bisi salin surat penerang ari bank nya ti ngayanka Musa Aman selalu ngambi duit ari siti akaun bank nya.

Akaun tu dibuka ngena duit Australia, dipelabaka laban nembiak tu belajar ba Perth Australia. Duit nya dipindah Imbarine Bujang ari akaun ari asuh Musa Aman kena nyaga nembiak nya maya ti belajar ba Universiti ba Perth

Enda ulih Musa ngelalaika ulah iya enggau Chia, lebih agi Chia selalu ngeluar duit ari akaun ti dipegai Chia enggau bala iya empu.
Mohammed Hayssam Musa enggau Hazem Mubarak Musa, seduai tu endang suku juru Kepala Menteri. Sarawak Report bisi ngibun surat penerang ari akaun tut i ngayanka sida bulih untung ari ulah tub a 2006 enggau 2007.

Bayar mega bisi diberi ngagai kompeni reta tengkira Australia, Riverstar Investment Pty Ltd, kena mayar sua rumah nembiak tu ba Perth.
Duit kena mayar siwa rumah nya mega diambi ari akaun ti sama.

Surat penerang ti diibun kami bekaul enggau akaun USD$ ba bank ti sama iya nya UBS Hong Kong bank ( bepalan ba Singapor) ngayanka chara duit nya dipindah dikena mayar siwa nya. Buti kami iya nya duit ba akaun tu diulih ari siti kompeni batang ti megai lisin ari Yayasan Sabah.
Chia empu mayar ngagai anak Musa
Enti nyema Kepala Menteri tu nguji ngelalai kediri nerima duit tu enda mih ulih, laban buti ari surat penerang bank ti dikembuan MACC udah nampak amat ngayanka Chia empu selalu meri duit ngagai anak iya lebuh ti apin muka akaun UBS ba 2006.

Bayar nya dipasukka dalam akaun bank iya empu.

Duit nembiak nya dipasukka dalam akaun Bank Chia empu ba 2005 – Nama kebuah ?

SG 85,000 bayar ngagai Mohammed Tampokong!

Surat penerang ti diulih kami mega ngayanka Menijer Kampung Yayasan Sabah, Mohd Daud Tampokong (diasuh bekerejasama enggau Chia) mega nerima sekeda bayar ari akaun ti dipegai bala Chia, maya tu iya diberi ari akaun siti kompeni iya nya Zenique Investment Ltd, British.

Nyadi diayu utai ti ngalitka ati iya nya kati siku pemesai perintah ti nguasa kampung ba Sabah tau nerima duti ari kompeni SD85,000 ari kompeni nya?
Patut enda tu diterang? Nama kebuah Menijer Kampung Yayasan Sabah nerima bayar a SG85,000 ari kompeni nya ba November 2006?
Buti tu tegap amat ngayanka tuduh ti madahka Michael Chia bulih penguntung ari kompeni kayu batang ti dipegai Yayasan Sabah ti dikemendarka Mohd Daud Tampokong udah Chia lalu meri duit nya ngagai Musa enggau menijer kampung nya..

Musa Aman diatu agi nyauhka diri ari tasat tu, dataika iya enda tau enda meri penerang kena nyakalka pekara tu.
Ngetanka kuasa disebilik enggau kaul politik? Kepala Lawyer Bansa, Abdul Gani Patail
Nitihka berita, naka kediatu, Kepala Menteri tussah deka didawa laban iya bekering ba Kepala Lawyer Bansa Abdul Gani Patail ti ukai semina semenua tang ngembuan kaul diri sebilik ti rat.

Kami mega bisi ninga berita ti madahka penasat ICAC Hong Kong bisi betemu enggau orang ti bekuasa ba Malaysia ba 2008 laban deka ngemanjaika kes Michael Chia ti kena tangkap.

Taja pia, Kepala Lawyer Bansa enggau nyainka surat penerang ti mai kerejasama antara Hong Kong enggau Malaysia ba kes tu. Gani mega didinga bisi betemu enggau timbal iya ba Hong Kong maya tu suba laban minta nutup kes nya.

Tiga taun udah nya Hong Kong lalu ngelepaska akaun Chia ti udah kena tan lalu kes Chia ditutup ketegal nadai kerejasama ari Malaysia.

Duit bemiliun ringgit dalam akaun tu dikemendarka dikeluar ba ujung taun siti tu kemari lalu mayuh ari sekeda duit nya dianjung ke Sabah lalu disadang dikena meli bala pengundi ngambika ngundi UMNO/BN lebuh maya pengawa bepilih ti deka datai tu ila.

Pemutus tasat MACC sereta penerang ti diulih ari penguntung ba kayu batang Sabah mega ditan.

Bala penasat Malaysia ti bejalaika pengawa bekaul enggau kes tu, belabaka enda kurang ari 40 iti dawa ulih dikenataika ngagai Kepala Menteri udah ti ngambi penerang ari mayuh bengkah kompeni kayu batang ba menua nya. Taja pia Kepala Lawyer Bansa ngena kuasa iya ngetanka kes tu.

“Penerang enggau semua buti ba pekara tu agi mengkang ba atas meja”, ku berita
Minggu tu tadi Sapit Komisioner MACC, Mohd Shukri Abdull madahka diri ensiban ati ketegal mayuh kes ti bisi buti ditanka Kepala Lawyer Bansa ngena jaku ti madahka enda chukup buti.

Sarawak Report diatu nerima mayuh buti ba pekara tu lalu deka dikungsi enggau mensia mayuh udah tu ila ngambika mensia mayuh tau berunding kediri lalu mutuska penemu taja pan Kepala Lawyer Bansa enggau mai kes nya ngagai kut.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments