Nadai kaul enggau Michael Chia? – Kami mansut sekeda agi surat penerang

• 14 Apr 2012
• BM 翻译

Nadai kaul dagang enggau Chia? Ti baka nya mayuh amat pekara deka diterang Musa Aman ngagai mensia mayuh, nyengkaum kaul sekeda akaun Chia enggau anak Musa.
Kepala Menteri Sabah, Musa Aman mansutka jaku ti munyi nya ngagai mensia mayuh lalu bebulaka berita ti madahka iya bisi kaul enggau pengeletak lisin kayu batang, Michael Chia. Enggau tu reti nya semua beratus limpir surat penerang ti bisi dikembuan kami bekaul enggau ulah enda manah ba industri kayu batang ba Sabah, bula magang.
“Sekali agi aku madahka diri nadai kaul enggau siku mensia ti benama Michael Chia”[penerang Musa Aman 12/11/12]
Michael Chia tauka Chia Tien Foh dipeda nyadi “orang tengah” ngatur bayar kayu batang ngagai bala Musa Aman.
Siku ari orang nya iya nya, Lawyer Richard Christopher Barnes ti ditanka sama enggau Michael Chia rambau Komiti Penagang Makai Suap Malaysia (MACC) nasat kes kayu batang Sabah ba taun 2010 suba.
Maya nya raban penasat ngerampas mayuh surat penerang ari opis Barnes.
Barnes enggau Chia dipelabaka udah meri penerang lalu ngaku diri bisi bekaul enggau ngambi untung ari kayu batang lalu MACC merambu 40 iti dawa ngagai Musa, tang udah nya kes tu dipampul kaban belayan Musa empu iya nya Kepala Lawyer Bansa, Abdul Gani Patail.
Berindik ari nya kes tu enda ulih didawa taja pab bisi, enggau tu kami terus deka mantaika surat penerang ti bekaul enggau pekara tu ti bisi disimpan kami diatu.
Surat penerang ti bisi ba kami mega ngayanka Michael Chia jadi “orang tengah” ngumpul untung ari kayu batang kai Kepala Menteri.
Michael Chia mega orang dagang kayu batang lalu nyadi tukang ngumpul untung kai Musa.
Enda patut enda amat, laban surat penerang ti bisi ba kami pasal pekara tu bisi sukung sereta diterima ari bala orang dagang kayu batang ba Sabah. Buti tu mega sama baka penetap ti diterang ba kut ti ngaul Michael Chia ti ditangkap ba Hong Kong kena 2008 lebuh ti deka mai duit SG16miliun chara enda beradat ngagai Malaysia.
Siti kes ba Kut Sabah terang bendar mandangka Chia nyadi “orang tengah” antara Yayasan Sabah enggau towkey kayu batang ti ngiga lisin. Surat penerang tu diayanka nyadi buti lebuh Chia didawa nipu siku pemegai lisin batang, Agus Hassan, lalu tu nyengkaum surat penerang ari Hassan ti madahka diri dipinta mayar UMNO Sabah nengah Chia.
Surat nya mega madahka pengari ari Yayasan, Mohd Tampokong enggau ngeluarka pemendar nebang kayu batang enti chia apin tepantup ati. Agus udah nya lalu enda nyamai ati lebuh tin emu Chia ngembi penguntung ke diri empu.
Buti ba kut – surat ari pengempu lisin Agus Hassan ngagai Yayasan Sabah sebana ba Chia ti megai tanggung pengawa nyadi “orang tengah” lalu bekuasa ngetan pengawa nebang kayu batang nyentukka bayar udah diberi nengah iya. Nama kebuah orang Yayasan Mohd Daud Tampokong ngemendarka Chia nyadi “orang tengah” antara pemesai Yayasan enggau orang dagang kayu batang? Tu patut diterangka Chairman Yayasan Sabah Musa Aman.
Tang, kati alai Hassan ti diberi Musan Aman lisin kayu batang lalu Chia tau nyadi “orang tengah” dikena ngumpul penguntung kai Musa enggau UMNO Sabah? Nama kebuah Mohd Tampokong tau nitihka jaku Chia? Lalu lapa kebuah Hassan ba pekara tu enda betemu enggau kepala Yayasan Trustee Sabah Musa Aman empu?
Tu mih sekeda pekara ti patut diterangka Musa Aman. Taja pia buti baru ti ditemu kami mega bisi kaul enggai pekara nya.
MACC bisi lis ti madahka Yayasan ngembuan lisin kayu dipelalai ari – lisin kayu batang Agus Hassan siku orang nyadika pugu penawa kes penyalah ngagai Chia.
Mayuh mega buti ti ngayangka Michael Chia ukai semina orang tengah antra Yayasan enggau bala peminta lisin batang, tang iya mega bisi lisin batang kediri empu. Chia mega nemu iya bisi kes ba Kut Tinggi Singapor:
“Aku orang dagang eksport kayu batang ari Malaysia ngagai mayuh bengkah menua ngena raban kompeni baka Rimba Kita enggau Rasanmewa”[affidavit Chia Tien Foh, ba Kut Tinggi Singapor 19/12/2011]
MACC udah masukka mayuh nama kompeni kayu batang ti bisi kaul enggau Chia dalam tasat sida. Lalu nama kebuah Kepala Menteri bebulaka berita ti madah iya bisi kaul enggau Chia. Musa Aman ti nyadi Chairman Board of Trustee Yayasan Sabah sigi orang ti pun ngemendarka semua lisin kayu batang, nyengkaum iya ti diberi ngagai Chia.
Kompeni batang ti bekaul enggau Chia lalu lis tu dikeluarka MACC lalu kelimpah ari nya Sarawak Report bisi agi lis kompeni ti enda disengkaum ba lis MACC.
Lisin tu mega nyangka dikemendarka Chairman Board of Trustee of Yayasan Sabah, Musa Aman. Lisin tu diberi ngagai siku nembiak ti nadai peneleba ba dagang kayu batang lalu orang merinsa sebedau iya ti ngaul diri enggau Musa udah taun 2003 suba.
Raban ti sama – ngaul diri enggau Musa – Chia lalu tebilang idup kaya bekerita ti pemadu mar.
Kati alai Musa Aman berani madahka diri nadai kaul enggau Chia ti megai mayuh amat lisin batang lalu orang ti semina bisi kuasa ngeluarka lisin tu iya Chairam Board of Trustee of Yayasan Sabah iya nya Mus empu.
Berindik ari pengaya ari kayu batang nya dia Chia meli mayuh macham kerita nyengkaum Hummer H2, beberapa buah Lamborghini, Ferrari 430, bisi mega BMWs, Mercedes Benz enggau Toyota.
Orang dagang ti tuchi ati enda ngemudahnya deka bulih pengaya. Mayar duit injau udah chukup ngemediska pengidup sida. Tang Chia kaya ngenyit nyau deka berebak enggau Musa Aman ti ngemendarka lisin kayu batang iya.
Kepala Menteri tu mega enda tau enda nerangka kebuah iya meri lisin kayu batang ngagai nembiak ti nadai nemu utai sereta nadai peneleba ba dagang kayu batang tu, ti enda tu tau ngemedis iya.
Bermiliun ringgit dalam akaun bank Chia diterima ari towkey kayu batang.
Semua buti ti bisi ngayanka duitari untung nya dipasuk ke dalam akaun bank Chia. Lalu buti sama enggau penerang ti diulih ari sekeda orang dagang kayu batang ba Sabah.
Enggau nya mega kami ulih mandangka duit ari akaun bank Chia ti diulih ari towkey kayu batang dikena meli barang berega. Kami mega ulih netapka bala towkey tu bisi kaul enggau Chia sereta enggau lisin bukai ti dikemendarka udah lepas taun 2003.
Siti akaun Chia ditutup iya empu udah iya ti ditangkap ba Hong Kong ba taun 2008 lalu ku berita duit US$220 ribu ti bisi ba akaun nya dikena iya meli kerita Lamborghini.Kelimpah ari nya US$500 ribu ba akaun BVI Chia ba CTF International Ltd lalu ari akaun tu iya nganjung duit nya ngagai Musa.
Nampung berita nya tadi, siti agi iya nya akaun Hong Kong UBS ti dipegai Chia mega nerima bayar ba taun 2006/2007 ari kompeni kayu batang.
Pemayar bukai iya nya kompeni Borion Enterprise Ltd, bisi kaul enggau towkey kayu batang Sarawak ti tebilang lalu duit dikeluar iya nya US$4miliun ti dipindah ngagai ‘Richard Christopher’.
Chia mega bisi ditemu nyimpan sereta ngeluarka duit manggai beribu dollar US.
Berita ti ditemu kami mega netapka Richard Christopher iya nya sama orang ti beempu nama Richard Christopher Barnes, iya nya lawyer ti ditangka MACC lebuh ti nasat kes makai suap kayu batang Sabah. Richard Christopher Barnes mega lawyer ti megai pekara wang Musa Aman.

Tanya nuju Musa

Ngalitka ati lebuh ti ninga Musa Aman bebulaka berita ti madah iya bisi kaul enggau Chia.
Surat penerang tu semina mimitt aja ti dibandingka enggau pemayuh surat penerang ti bisi disimpan kami ti ngayanka akaun dipegai Chia bekaul enggau lisin kompeni kayu batang ba Sabah.
Ba tu Kepala Menteri lalu apin nyaut penerang ti udah dikeluarkan kami ngelama tu, siti ari iya, iya nya akaun UBS Hong Kong ti selalu ngeluarkan bayar ngagai anak Musa Aman ba Australia.

Sempekat mayar anak Musa
Kami mega bisi ngembuan mayuh surat penerang ti ngayangka bayar ari akaun Chia ngagai Musa sebilik.
Mulai ngagai 2005 akaun ti ngena nama Chia dipegai HSBC Hong Kong, mandang anak Musa, Mohammed Hayssam Musa ti belajar ba Perth nerima duit tiap bulan ari akaun nya.
Berebak enggau nya, akaun tu mega nerima duit nyau manggai bemiliun mata duit US ari kompeni Borion Enterprise Ltd.
Nadai kaul? Akaun Chia tu bisi danji kediri ti ngasuh iya enda tau enda meri duit ngagai anak Musa ba Australia. Lalu akaun tu mega nerima duit beratus ribu US ari Borion Enterprise. Duit tinggal US$1.7 miliun !
Nya alai enti sema Musa Aman nadai kaul dagang enggau Chia, nama kaul seduai iya? Baka ti udah diayan, anak Muasa lebuh ti belajar ba Australia kunsi akaun enggau Chia. Nya alai tit u ukai kaul dagang, nama kaul Musa Aman enggau Chia ba pekara ti baka tu dih? Tu mih pekara ti patut diterang Musa.
“Enda aku kala beleman enggau indu nya,” – ku Musa Aman lebuh ti ngenggaika berita nya lalu munyi ti nyemaka diri enggau Presiden Clinton.
Penerang ba Borion Enterprise Ltd – Kaul enggau Taib !
Lalu enggau tu nama reti kompeni Hong Kong , Borion Enterprise Ltd, ti selalu mayar duit ngagai Chia?
Towkey kayu batang Sarawak Ngui Ing Chuan ti bisi enggau beempu Borion Enterprise Ltd bisi kaul enggau kompeni Taib, Ta Ann. Ngui mega bisi kompeni Borion Enterprise Sdn Bhd enggau Borion Shipping Sdn Bhd, kompeni Malaysia tu bepalan ba Sarawak.
Taja pia pemegai syer ti besai ba kompeni Borion Group ukai Ngui, tang kompeni ti benama Silvermark Consultants Ltd.
Sapa beempu Silvermark Consultants? Towkey kayu batang anak Ting Pek King iya nya Peter Ting!
Lalu Silvermark Consultants Ltd tu diempu anak Towkey Kayu Batang Sarawak ti mega kroni Taib, Ting Pek King! ”Borion belabuh ngumpul duit ba Sabah kenyau ari iya nuduk diri ba menua nya.
Peter Ting (Ting Sie Huong) – anak tuai Ting Pek King bisi mayar duit ti mayuh ngagai akaun bank Michael Chia, nama kebuah?
Nama kebuah sida Ting Pek King sebilik mayar duit ngemayuh nya ngagai akaun bank Chia? Akaun ti dikena melanja anak Musa Aman ba Australia.
Laban Musa Aman udah bebulaka berita ti madah iya bekaul enggau Chia sereta dawa makai suap, nya alai ditau iya tau mansutka jaku bula nerangka pekara menua nya?
Siku agi orang dagang Sabah ti bekaul enggau Ting Pek King iya nya petunggal iya, Simon Ling. Simon Ling tu udah kaul diri ba pengawa dagang kayu batang kenyau ari Musa Aman mangku pengawa besai lalu iya tu mega semak amat enggau Michael Chia.
Simon Ling (Ling Ding Dieng) – Dalam lis MACC bekaul enggau lisin kayu batang Sabah.Tu nyengkaum menu aba kandang Kampung Kuamut ti dituntung penyarut lalu kar didero baru Opis Kampung ba taun 2009 ngambika iya dipeda landau agi ngambika nyamai endur nebang kayu. Kandang kampung tu nyau kusi kelimpah ari baka ti diperimba.
Bisi megaberita ti madahka Ling bejalaika tanggung pengawa nyaga mayuh bengkah kompeni lisin kayu batang nganti Chia.
Penerang ba kerejasama tu ulih dipeda kitai. Kompeni Top Merchant Sdn Bhd iya nya kompeni ti diberi lisin nebang kayu batang ba Kampung Kuamat. Lalu pemegai syer ti besai ba kompeni tu iya nya pangan indu Chia, YapSiaw Lin. Taja pia director kompeni tu iya nya Simon Ling.
Top Merchant – diempu pangan indu Chia tang dipegai Simon Ling
Berita madahka bayar ari Ting Pek King ngagai kompeni Borion Enterprise Ltd lalu dipasukka ba akaun Chia bisi kaul enggau lisin kayu batang ti diberi ngagai Simon Ling ari Yayasan Sabah sereta enggau tanggung pengawa Simon Ling ti ngatur pejalai kompeni Chia ti pemegai lisin kayu batang.
Yap Siaw Lin – Indu pangan Chia lalu nyadi pengari ba Top Merchant Sdn Bhd
Chia bisi kaul dagang enggau Borion sereta kala madahka ngagai kut kompeni tu kuasa meli kayu batang ti ditebang Rimba Kita enggau Rasanmewa, ti dikumbai kompeni iya.
Chia madahka bayar ti terima ari Borian iya nya sebengkah panjar dagang. Tang jaku nya enda nerangka pasal duti bemiliun ringgit ti dibayar ngagai bala Musa sebilik enggau Richard Christopher Barnes.
Taja baka nya orang ba bank madahka akaun Chia sigi ngayanka iya dikena masuk ke duit ari penguntung sebedau iya dibagi baru ngagai orang ti endang ditetap nerima penguntung nya.
Tu nyengkaum kompeni ti bisi kaul enggau towkey lisin kayu batang ba Sabah.
Berebak enggau tu, kami mega mantaika penerang ti madahka ngagai MACC pasa kompeni BVI iya nya kompeni Angel Face Consultants ti diempu Musa Aman lalu kompeni tu udah nerima mayuh penguntung ti dipasuk nengah akaun Citibank Singapor ti dijaga orang ti bekaul enggau Musa.
Bala penasat ari MACC enggau Komiti Penagang Makai Suap Hong Kong ngemeratka ulah tu lalu kami deka mantaika mayuh agi buti udah tu ila. Tu siti agi ti bekaul engau akaun Chia ba HSBC.
Dua bengkah bayar iya nya US$4.5miliun enggau US$4miliun ngagai Angel Face Consultancy Ltd ari akaun Chia dalam taun 2005.
Ba taun 2005 bisi US$8.5 miliun duit tinggal ba akaun Chia lalu mayuh agi duit ari akaun tu dipindah ngagai akaun Angel Face Consultancy.

Belalai

Musa Aman madah diri nadai kaul dagang enggau Chia,taja pan Chia tu siku orang dagang kayu batang ba Sabah kenyau ari 2004.
Enti nitihka ati Kepala Menteri tu tekala nya ngiar diri empu ari ti kena dawa makai suap sereta ngembi penguntung diri ari kayu batang. Enti ulih Musa udah ngaga ubah ngambika iya enda kena tinggang undang-undang ari ulah iya ngelama tu.
Tu laban Kepala Menteri Sabah mega Chairman Board of Trustees of Yayasan Sabah, ti bisi kuasa ngemendarka lisin kayu batang ari bemiliun hektar kampung. Nama kebuah?
Randau dalam Yayasan sigi enda ditemu orang lalu pemutus iya deka dipelalai. Nama kebuah?
Nadai atur ti manah tau dikena nagang orang ngena penuduk ngulih penguntung diri empu, ti megai menua kaya pengeraja asal. Enti bisi lapa Musa Aman enda ngubah iya dih?