Angkat Lalu Dirika Hak-Hak Kita – Pemenang Ke Orang Di Sebangan!

Sehari tu bala Iban di menua Sebangan berami ketegal sida udah mujur sereta menang ngelaban Taib enggau perintah Barisan Nasional di menua Sarawak.
Bala sida tu bisi hak-hak ba kandang menua sida empu tunga ke utara nengeri Kuching.
Tang, menyadi Taib ti amu, iya nya Raziah Mahmud, enda ulih nagang pengamu diri empu enggau chara ngeruga sereta betebangka kampung ba kandang menua nya.
Nya alai dalam taun 2010 suba Raziah enggau bala pengarah bukai dalam kompeni Quality Concrete udah beduan bala orang di Sebangan enggau chara ngerampas tanah temuda rimba, ngena chara ti suah dikena sida beberapa dekad tu udah.

Raziah enggau bala pengarah kompeni nya udah betemu enggau pemesai-pemesai dalam Opis Kampung enggau Opis Tanah, minta bala pemesai dia besetuju meri sida ‘ Lisin Ngarau’ dikena sida betebangka kayu dalam kandang menua di Sebangan dia.
Enggau chara meri Lisin Ngarau nya tadi perintah menua Sarawak udah ngelepaska tanggung pengawa lalu meri tanah NCR dia ngagai bala kroni BN nebang kampung lalu muka kebun sawit dia.
Enggau nya bala pemesai ari opis-opis perintah nya tadi lalu ngeluluka diri udah meri pemendar ngagai kompeni Quality Concrete nebang kampung, tang nya pan enti sema orang di menua nya bepuas ati lalu besetuju nanggam sempekat.
Tang, lebuh kompeni-kompeni baka Quality Concrete tama ngagai kandang menua dia, sida mandangka lisin ngarau nya ngagai orang dia lalu ngeluluka diri udah diberi perintah ngambi kampung enggau tanah temuda di endur nya.
Lalu, enggau penuduk Raziah Mahmud ti nyadi siku ari pengarah dalam Quality Concrete, sida andal sereta arapka kuasa ari Kepala Menteri mengkang di belakang sida nyukung pengawa sida ti ngerampas tanah di kandang menua nya.

Raziah Mahmud enggau bala bakih pengarah iya endang nadai nganti jaku pemutus ari bala tuai kampung di menua nya sebedau sida belabuh nebang kayu. Utai ti terubah ditemu bala orang di menua nya, iya nya penatai bala tukang tumbang enggau lipan ngagai kandang kampung sida lalu nirika kem dia!

Lebuh bala orang di menua nya belabuh mantah, dia bala lawyer ti tinggi rega lalu datai deka nyaup sida mutarka penanggul nya, lalu madahka kompeni kayu nya bisi ‘pemendar’ nebang kayu dalam kampung nya, lalu bala orang kampung dia nadai guna nyakal pengawa nya agi, laban kompeni Quality Concrete nya disukung perintah.
Agi mega, sapa ulih nyangka ulih ngelaban kompeni enggi menyadi Taib ti tebilang, Raziah Mahmud nya, ti ngemataka bomoh beratika semua tindak enggau pejalai Kepala Menteri ti udah tuai bendar nya!
Tang kompeni Quality Concrete mega udah nguji nipu bala orang kampung di Sebangan nya. Ninting ruang bilik diberi sida RM250 ke pampas tanah sida ti kena ambi Quality Concrete nya!
Raziah Mahmud tentu enggai meli sepasang kasut berega RM250 (£50UK/$80US), ti kelalu murah ba iya!
Tang semua duit ti ulih Raziah nebang kampung nya ulih manggai ngagai beratus juta ringgit. Iya tetap deka majak nipu bala orang di menua nya, lalu mega enggau serak tubuh sida ti dudi agi!

Enggau nya kitai tentu enda alit ati enti Taib Mahmud seruran madahka bala orang di Sarawak pasal pengawa pemansang ti lubah bendar, laban sida sebilik ti rangka nya endang nadai meri pulai utai ti patut enggi orang nya!
Tang diatu sida Taib sebilik enda tau enda ngadang napi bantah ti balat. Sekeda bala orang ti udah kelalu merinsa sereta putus pengarap di menua Sebangan udah tekelanjur nerima duit pampas RM250 ari Raziah, lalu ngelepaska tanah temuda sida. Tambah mega polisi Taib endang udah nentuka pengidup sida nya suntuk ari pun.
Taja pan sekeda sida bisi udah nerima pampas nya, bala sida ti bukai ti mereti ke diri udah kena tipu baka nya lalu angkat deka ngetanka tanah waris sida.
Sarawak Report udah kala dikangauka sida nemuai ke Sebangan lalu diterangka baka ni pengerusak menua sida laban dikeruga kompeni kayu batang enggau pengawa muka kebun sawit di menua nya. Baja kimia enggau rachun ti dikena ba kandang menua kelalu mayuh ti udah ngujungka ai sungai di menua nya enda selamat agi dikena besehari-sehari.
Jelu babas, ikan enggau burung mega majak punas lalu semina tinggal mimit aja kampung puang ti ulih endur sida begigaka lauk, nya pan semina beberapa hektar aja ti ba atas munggu-munggu ari belakang rumah sida.

Jaku serbana sida endang enda didingaka Raziah Mahmud ti udah begela orang dagang multi-jutawan nya.

Tindak ke terubah dikereja Raziah enggau laki kedua iya nya nangkap bala orang ti disadang sida nguluka bala mayuh ngenataika bantah. Nicholas Mujah, siku pemesai ari gerempung SADIA enggau Numpang Suntai, siku orang ti udah bekereja enggau Shell, udah ditekanka nyadi tuai pengawa bantah nya. Seduai iya udah begumpulka belanja dikena mai pekara nya ngagai court lalu sida diarika Baru Bian, siku lawyer hak asasi mensia, ti mega nyadi tuai PKR Sarawak.
Lalu, sepengudah penusah angus ti nyelai nyadi ba kem kayu batang enggi kompeni Quality Concrete, dia bala polis lalu datai nangkap Nicholas Mujah enggau Numpang Suntai, nyadika pun suspek ba penusah nya.
Seduai ditangkap lalu ditekanka, taja seduai endang nadai ba endur nya maya penusah angus nya nyadi.
Taja baka nya, dua iku lelaki nya tetap enda surutka chara kamah dikena ba atas seduai. Seduai udah ngemeranika diri angkat lalu nirika hak sida semenua dia lalu enda takutka jaku emba orang ti udah ngeruga menua sida dia.

Enggau pemansang pekara internet enggau pemayuh ripot ti ditusui Radio Free Sarawak, chara orang ti beduan nya diatu udah ulih ayanka ke serata menua Sarawak, taja pan dulu suba kes ti baka tu enda ditemu mensia mayuh
Diatu senyata enggau chara kamah BN udah nikal lalu makai tuan iya empu.
Bala majistret udah ngelepaska Nicholas Mujah enggau Numpang Suntai, lalu enda lama udah nya court udah nentuka kompeni Quality Concrete nya salah, lalu nagang sida majakka pengawa nebang di kandang menua di Sebangan nya.
Lalu sehari tu, Court di Kuching udah nirika kes tu ti dikenataika bala orang asal dikena ngelaban Menua Sarawak enggau Opis Tanah laban ti udah ngemendarka penyalah ngerampas tanah temuda rimba NCR dia.
Enggau ati ti gaga, menyadi indu Numpang, iya siku ari Pemacha Berita dalam stesyen radio internet, Radio Free Sarawak, iya nya Christina Suntai bisi mansutka jaku:
“Kes tu patut nyadika peransang ke orang bukai ti udah dikeruga menua ngambika dikena sida ngelaban lalu nirika hak sida ba tanah NCR sida lalu nyadika siti ari chara dikena ngenanka kampung kitai ti berega”, lalu iya mega meri terima kasih iya ngagai semua orang ti udah nyaup enggau mantu sida ngelama tu.
Bala orang di Sebangan udah ngamatka diri udah angkat nirika hak sida dikena sida nyaga diri ari kena keduan orang ti rangka. Sida di Sebangan nya mega tau nyadika chunto seraban orang ti kering ati ngetanka waris diri empu di menua Sarawak

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments