BBC Ringat Ke Ripot Berita Sida Pasal Bersih 3.0 Ditapis! - EKSKLUSIF

• 24 May 2012
• BM 翻译

Gerempung berita ti tebilang entarabansa BBC London udah ngeluarka sebengkah penerang pasal iya ti minta diterangka enggau lengkas nama kebuah ripot berita iya ditapis lalu dibali Astro, sebengkah stesyen TV satelit di Malaysia.
Sesalin ripot ti udah ditapis Astro nya udah diayanka sereta ditaburka dalam laman Youtube kenyau ari ujung minggu tu tadi, ti ngayanka ripot nengah Astro nya enda sebaka enggau ripot ti diayanka ba menua bukai di serata dunya tu.
Penusui berita tebilang BBC, Emily Buchanan udah ngeluarka ripot berita dua minit pasal pejalai raban mensia mayuh ti nyukung pejalai Bersih 3.0, nusui enggau silik utai ti nyadi sehari nya. Tu nyengkaum ripot-ripot bulletin ti dikeluarka BBC World.
Tang, ripot sengelama 30 seken iya bisi ditemu kena tapis ba versyen ti dipandang Astro di Malaysia, ti nyengkaum siti ari ripot BBC nya ngayanka pengasar siku polis ti nepan motosikal nujuka senapang iya ngagai bala orang mayuh.
Dua agi insiden ti bukai nya dipadamka Astro nyengkaum jaku randau pemberita BBC enggau bala orang ti nyukung pejalai Bersih 3.0 nya kemari ti minta pengawa bepilihbesai diatur enggau enda bebelah bagi.
Udah bekau Sarawak Report madahka pekara tu ngagai BBC kemari, gerempung berita nya bisi madahka diri ringat ke ulah Astro nya.
Dalam undang-undang penabur enggau pengerembai media, sapa-sapa enda tau ngubah isi ripot berita ti ngeluarka berita nya, lalu penerang ari BBC nya madahka pengawa Astro deka dipeda ngelanggar kontrak sida:
“BBC minta saut ti jampat udah iya nemu ripot berita iya ditapis lalu dibali menua Malaysia.
Ripot pasal bantah orang ngelaban perintah udah dibali Astro sebedau ripot nya diayanka ba kacha TV Malaysia.
BBC udah minta Astro nerangka nama kebuah ripot berita iya dibali.
Pengari BBC madahka: “Berebak enggau Minggu Berita Bebas Sedunya, kami ngutuk pengawa Astro ti nagang berita kami ngambika ditemu orang mayuh enggau nadai bebelah bagi.”

Diatu BBC mengkang nganti jaku saut ari Astro pasal pekara ti udah nyadi bekaul enggau pejalai Bersih 3.0 nya.
Ari gaya ti dipeda, Astro lama bendar deka ngeluarka saut sida ngagai BBC, diumbaka cuti bansa di Malaysia enda lama agi.
Tang kualiti bali ba ripot berita BBC nya dipeda dikereja bala ti orang ti endang landik ngambika raban orang ti bekuasa dipeda ngereja pengawa enggau betul. Enti pengawa ti baka nya ditemu majak dikereja Astro, dia pemanah nama perintah BN deka nyadi kamah.

Astro, ti nyadi arus TV satelit tunggal udah diberi lisin penabur berita ari perintah BN, lalu orang ti bempu stesen TV nya, Ananda Krishnan, endang ditemu nyadika siku orang dagang ti pemadu kaya lalu bisi kaul enggau parti UMNO ti megai perintah di menua Malaysia.
Kejang deka bepilihbesai tu Astro bisi ditemu meri enggau chara pechuma pirin satelit nyadika upah ngagai sekeda rumah panjai di menua Sarawak, dikena perintah UMNO-BN ngayanka propanda enggau runding perintah.
Bali ba ripot berita BBC nya udah ngayanka Astro endang berupai bendar setanah enggau UMNO-BN.
Bedau lama tu tadi, Astro mega ditemu bisi napis sereta mali ripot berita ari gerempung berita ari Timur Tengah, Al Jazeera, ti diripotka pemberita sida, Harry Fawcett!

Pejalai bantah Bersih 3.0 diatu udah muka mata dunya nya Malaysia udah ngleuarka belanja ti besai dikena iya meresi nama diri nyadika sebengkah menua ti dipeda manah lalu bejalaika adat demokrasi dipegai perintah BN, nya sebengkah pengawa ti ngemalu.
Nama pemutus penemu kitai ba pengawa salah Barisan Nasional ketegal Astro udah mantu iya napis sereta ngulah berita ti dikeluarka dua bengkah stesyen berita tebilang di dunya, ti udah ngujika diri deka meri berita ti amat sereta bendar ngagai bala penuntun sida?
Nama agi atur pengawa ti manah agi patut dikereja Bersih dikena meresi pemanah nama menua Malaysia?!