Ya, Kami Udah Ngubah Berita Nya – Kami “Pedis Ati” Kena Kutuk BBC! ASTRO EKSKLUSIF!

Kompeni TV satelit Astro udah madahka diri ngagai Sarawak Report sida endang amat bisi udah napis lalu ngubah ripot berita BBC bekaul enggau pengawa bejalai bebala mayuh Bersih 3.0 ngayanka bantah sebedau ripot berita sida diayanka ngagai mensia mayuh di menua Malaysia!
Tambah mega Astro udah ngutuk BBC ketegal mantah sida napis sereta ngubah isi ripot berita nya!
Mensia mayuh di serata dunya udah ngayanka pengeringat sida ketegal isi berita ti dibacha pemberita BBC Emily Buchanan kena hari Enam nyin kemari bekaul enggau Bersih 3.0 nya udah ditapis kompeni Astro nya. Kami udah ngayanka baka ni bala orang di Malaysia meda berita 30 seken kurang agi ari orang bukai di menua-menua bukai, bekaul enggau berita ti sama nya.
Isi ripot berita 30 seken ti ditapis Astro nya nyengkaum siku polis dipeda nujuka senyata iya ngagai orang mayuh, enggau penerang-penerang ba jaku randau bala orang ti bisi enggau ba bantah nya kemari, ti endur sida madahka nama kebuah sida enggau orang mayuh bejalai bebala mayuh laban ti angkat ngelaban penyalah perintah ngelakar dalam pengawa bepilihbesai.
Pengawa Astro ti napis isi berita BBC nya nyangka nya sebengkah ari chara perintah BN ngayanka bala polis enggau perintah endang seruran berindik ba tanah ti betul.
Tang, bala orang ti betalatka penemu udah ngaga simpul penemu ti madahka pengawa napis isi ripot berita sepeneka ati nya siti pekara ti biasa lalu seruran dikereja kompeni penabur berita ti bisi lisin ari perintah nya.
Dalam penerang iya ngagai Sarawak Report kemari, Kepala Komunikasyen Astro, Tammy Toh madahka:
“Aku ngarika Astro, minta ngambika saut kami ba ripot berita kita pasal BBC diperatika. Astro dipinta nitihka atur penabur.
Rohaizad Mohamed, Sapit Presiden Kanan Astro mega mansutka jaku, “Astro enda tau enda nitihka atur penabur berita menua (Malaysia). Ba sebarang berita ti datai ari menua tasik, Astro bisi hak ngubah berita nya, ngambika berita nya sama sejalai enggau atur penabur berita menua (Malaysia) tu.”
Penerang ti munyi nya udah ngengkahka Astro enggau bala penyukung iya, iya nya rejim perintah BN, ti udah merintah menua Malaysia lalu seruran ngemesaika demokrasi sepengelama lebih 50 taun, diatu dipeda besukung ngelaban BBC.
Kemari BBC terang bendar madahka pengawa ngubah isi ripot berita nya sebengkah penyalah ngelanggar atur media bebas. Tang Astro terang bendar ngangkatka atur penabur berita ari atas atur media bebas ti nadai bebelah bagi baka tu suah diripotka BBC, sebengkah gerempung berita ti tebilang ba ikas entarabansa.
Tang Astro udah ngereja jauh agi ari nya. Iya ukai semina napis isi ripot berita BBC, tang iya ngereja nya nadai madah ngagai bala penuntun iya di Malaysia. Ari nya bala penuntun di Malaysia deka ngumbai ripot BBC ti udah ditapis nya bendar sereta tulin!
Kami mega bisi bulih penerang ti madahka ripot berita pasal Bersih 3.0 ti ditusi gerempung berita Al Jazeera udah ditapis sereta dibali. Tu mai reti, Astro ngembuan tanggungpengawa ngabur mata bala penuntun sida di Malaysia, tang Astro enda ulih ngabur mata peranak Malaysia ti benung diau di menua tasik!
Kami deka nemu sekali ke napis berita nya dikereja sepeneka ati ari asuh perintah BN enti berita nya dipeda ngelanggar Atur Penabur Berita Menua? Enti saut iya ya, sapa ti mutuska penemu nya lalu belalauka ketegal nama ti tau ngujungka mensia mayuh di Malaysia tau dikemulaka?
Nama utai ti ngasuh Rohaizad Mohamed ngaga pemutus penemu ti jampat dalam pengawa napis, lalu nejuka isi berita ke bukai nya enda dikachau? Sekali ke pengawa nya dikereja endur parti UMNO deka berasai gaga ke berita ti tau dipeda mensia mayuh enggau berita ti enda tau ditemu mensia mayuh? Tauka, sekali ke bisi sebengkah rintai lalau ti enda tau enda dititihka?
Sarawak Report deka majak ngulihka saut ari Astro bekaul enggau pekara tu lalu pia mega deka minta sesalin Atur Penabur Berita Menua dikena nemu baka ni ke bendar iya pengawa napis berita dikereja di Malaysia lalu nama tuju pengawa nya!
Ikas penyalah isu tu enda tau ditejuka pia aja enti iya mai pangka ngagai intergriti BBC enggau Al Jazeera ti nyadika gerempung berita bereputasi tinggi entarabansa.
Enti sema BBC besedia nejuka semua ripot berita iya ditapis dikena nyaga ati rejim ti merintah, pemanah nama iya ti nyadika pugu penabur berita bebas ti menua Britain tentu deka diujan enggau jaku tanya, laban gerempung nya endang dibayar ngena duit ari pemayar chukai di menua Britain nya!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments