Jaku Saut Najib Ngeruga Penuduk Musa Aman!

• 24 Jun 2012
• BM 翻译

Bala pengarang dalam dewan parlimen udah enggau naka penyimat milih leka jaku lalu nuliska sekeda saut ngagai jaku tanya ti nyelai.
Kaban parlimen MP Chua Tien Chang udah betanya ngagai Menteri Besai baka ni gaya pejalai pansik raban Malaysian Anti-Corruption Corporation (MACC) bekaul enggau skandal ngelesapka duit ti dikereja siku peranak menua Sabah, Michael Chia, ti dikelala nyadika orang kanan ke Kepala Menteri Sabah, Musa Aman.
Musa Aman udah kiruh bendar bebula ke penerang ti madahka iya enda ngelala orang ti benama Michael Chia lalu sebarang jaku dikena ngumbai iya baka nya seruran dikumbai iya bejai pemanah nama iya.
Diatu kitai sama beratika isi saut ti dipansutka Menteri Besai Najib Razak nya:
“Raban MACC udah bejalaika pansik sida atas kes Michael Chia ti dikaitka enggau Kepala Menteri Sabah. Pansik nya udah tembu lalu repot udah mega diserahka ngagai opis Lawyer Bansa ngambi ke diperesa lalu pemutus deka diambi” [Najib Razak, saut betulis kena 21/6/2012]

Enggau saut ti munyi nya Menteri Besai udah ngasuh penuduk Kepala Menteri Sabah nya teguyat.
Kelulu Musa Aman ketegal bebula semua jaku tuduh diatu nyau enda tegap laban jaku saut tuan iya empu.
Ari nya teserah ngagai rakyat di menua Malaysia empu pechaya sekali ke enda ngagai Kepala Menteri Sabah, tauka Menteri Besai Malaysia!

Enggau jaku penerang dikena nulak iya, berupai bendar Musa Aman dipeda bingking laban agi mengkang mangku pengawa iya ti nyadi Kepala Menteri nya.
Diatu iya patut meri komen dikena iya ngamatka penerang ti madahka iya endang bisi kaul dalam pansik ba skandal ngelesapka duit menua beratus juta dollar ari asil ngulihka kayu batang.
Tang iya disadang takut ngayanka diri lalu nyangkal jaku tuduh ari Menteri Besai, taja pan ngelama tu iya udah didinga ragak bendar ngumbai Sarawak Report mantaika surat-surat penerang ti ditempa sengapa!
Lalu, ukai semina Najib Razak aja ditemu bejimat-jimat milih leka jaku ti ditujuka ngagai Musa Aman.
Penerang ti sebaka mega kala dipansutka raban orang ti bekuasa di menua Switzerland, ti kala ditemuai raban pemansik ari Hong Kong ti deka mansik akaun duit simpan Musa Aman di Zurich, ti endur semua duit kamah iya disimpan.
Jaku saut ti bejimat ti dipansutka opis Lawyer Bansa Swiss dikena nyaut tanya siku pengarang berita mega bisi bekaul enggau pengawa nyelai Musa Aman nya.
Saut ti mudah nya udah ngamatka Musa Aman endang beduduk ba puak skandal nya, baka ti ayan ba jaku tanya nya!

Enti diperatika enggau betul-betul, enti sema Najib Razak muai semua menteri dalam perintah BN ti ditemu makai suap sekumbang bekereja, semina mimit aja raban menteri nya deka tinggal megai perintah. Tu meh utai ti patut dikereja semua orang ba maya bepilihbesai ti deka diatur tu ila.
Tang enggau penampak Musa Aman dalam kes tu, Lawyer Bansa menua Malaysia, Abdul Gani Patail mega dipeda teguyat. Baka ti kala didinga kitai ba bulan-bulan ti dulu ari tu, raban pemansik ari opis MACC udah bejalaika pansik sida lalu nyerahka repot sida nya ngagai opis Lawyer Bansa ngambika kes nya dipecharaka, tang repot sida MACC nya lalu mengkang ditagang.
Lawyer Bansa Abdul Gani Patail nya kaban belayan ti semak bendar enggau Musa Aman. Gani mega udah mayuh bebalut dalam kontroversi makai suap. Degree kelas ketiga ti dikembuan iya nya endang enda patut ditangkin iya ba penuduk iya ke diatu.
Nya alai, leka jaku saut ti udah dipilih Najib enggau naka penyimat nya nyau meri tekan ngagai Abdul Gani. Menteri Besai udah meri tanggungpengawa bejalaika dawa ngagai Abdul Gani. Tang enti Abdul Gani enda bejalaika tanggungpengawa iya enggau patut, iya tau dipesalahka.
Lalu diatu bisi siku da agi orang politik ti beprofil tinggi bisi dikaitka enggau skandal tu. Menyadi Musa empu, iya nya Anifah Aman ti nyadi Menteri Menua Luar Malaysia, lalu Sarawak Report mega kala nuliska repot baka ni iya bulih bagi dalam asil makai suap di Sabah begulai enggau menyadi iya nya.

Diatu Najib udah ngasuh beberapa iku raban orang ti tuai-tuai dalam perintah iya berasai malu sepengudah iya mansutka jaku saut nya. Tu mega laban iya empu berasai ringat lalu ngasaika penyalah diri empu mega tebantai.
Pameli Musa Aman ti udah bebendar amat ngeruga rampa kampung di menua Sabah lalu udah nya nguji deka ngelalaika asil ti mayuh bendar nya.
Diatu raban orang ti bekuasa menua Swiss benung napi pansik atas pengawa bank UBS AG menua sida ti bekaul dalam penyalah nyimpan duit asil makai suap, lalu penerang nya mar bendar deka dipelalaika agi.
Tang, baka ni gaya penyamun ti pemadu jai, Kepala Menteri Sarawak, ti udah dalam kandang 30 taun berampaska tanah temuda-rimba orang asal lalu nyerahka semua tanah rampas iya nya ngagai sida sebilik enggau bala kroni iya? Iya ti udah nebang kampung bungas lalu bulih penguntung ari penyalah nya lalu meri bejuta-juta dollar rega kontrak ngagai kompeni-kompeni sida sebilik enggau bala bakih politik iya?
Tu meh maya jaku tanya patut dipansutka pasal penerang bekaul enggau pengawa ngerusak rampa menua di Sarawak ngena penyalah makai suap, lalu nama kebuah jaku tanya ba pansik raban MACC ba atas iya – sekali ke Lawyer Bansa Abdul Gani Patail endang agi nagang pechara nya dipejalaika?