Latest Stories
Sections
Sebengkah komplen di menua Switzerland dikena ngelaban bank UBS AG, laban ti udah endur nyimpan duit asil makai suap ti dikereja Kepala Menteri Sabah Musa Aman, udah dipindahka ari Opis Prosecutor Zurich ngagai Opis Lawyer Menua.
Pekara tu udah dibai ngagai ikas federal ke tinggi agi, ti nandaka kes tu udah datai ba ikas ti kelalu balat.
Kes tu udah ngujungka magazine minggu “Handelzseitung” mansutka mayuh agi penerang bekaul enggau skandal tu, ti diatu nya udah ngamahka pemanah nama bank Switzerland ti pemadu tebilang nya, ti mega tau ngerusak Musa Aman empu.
Sebengkah ari pekara ti berupai bendar ditu iya nya bekaul enggau baka ni Michael Chia udah ngena beberapa bengkah arahan juruwang beratus juta dollar dikena iya muka mayuh macham akaun dalam pampang bank UBS di Singapura dalam taun 2006.
Chia udah nyimpan lebih $20 juta dalam mata duit dollar Singapura enggau mata duit dollar Amerika ti dikereja iya dalam sehari kena ke 10hb April 2006. Semua arahan juruwang udah dikeluarka ari HSBC di Singapura lalu disain “Penyanding Penemu Ke Reta Tengkira” bank UBS AG, Denis Chua, ti bekereja ngemataka semua akaun baru enggi Michael Chia.
Bala orang ti landik ba pekara duit madahka diri alit bendar ati ngagai bala pengarang berita ba Handelzseitung baka ni bank ti tebilang baka UBS AG ulih nerima pemasuk duit ti mayuh nya enggau enda ditanya ari ni penatai semua duit nya.
Pengawa ba bank HSBC nya udah muka sebengkah jaku tanya ti tau ngerusak nama manah sebuah agi bank entarabansa dalam skandal tu.
Semua arahan juruwang baka ti udah dipansutka magazine Swiss nya udah disain Kepala Juruwang HSBC Singapura kena ke 10hb April 2006.
Kami ulih ngamatka penerang, ba hari ti sama Michael Chia udah nutup semua akaun iya ba bank nya.
Kami mega bisi nyimpan salin penyata bank ke semua akaun nya datai ke salin ti kediatu lalu semua penyata nya ngayanka penerang pasal bayar ti diterima ari kompeni-kompnei kayu batang di Sabah ti manggai bejuta-juta dollar. Sekeda ari bayar nya ditujuka ngagai bala anak Musa Aman ti benung besekula di menua Australia.
Pengawa dalam akaun-akaun HSBC dalam taun 2006 nya sebaka bendar enggau pengawa ti bisi direkod dalam akaun-akaun UBS AG sepengudah taun 2006.
Kedua-dua set akaun nya nerima pemasuk duit ti mayuh bendar ari kompeni kayu batang ti dibayar ngagai bala anak Musa Aman lalu sekeda ari duit nya endang ditemu masuk ngagai akaun Musa Aman empu.
Kami dalam Sarawak Report ulih ngamatka penerang ti madahka pengurus Denis Chua, bekereja ba dua bengkah bank tu. Kami diterangka sepengudah Denis Chua ninggalka HSBC lalu pindah ngagai UBS AG dalam taun 2006, sida HSBC bisi meresa akaun-akaun Michael Chia, lalu udah nya ngasuh iya ngapuska semua akaun nya!
Datai ba maya tu mih kami dipadahka nya Michael Chia bisi nerima mayuh bengkah arahan juruwang, ti udah nya lalu dibai iya ngagai Denis Chua, ti nyain lalu ngamatka pemasuk duit nya ngarika bank UBS AG.
Sepengudah nya, HSBC nadai didinga bebunyi agi bekaul enggau ulah sida nya.
Tang sida mengkang ngaku nagang pengawa nyimpan duit asil ari pengawa salah.
UBS AG lalu enggai nyaut semua tanya ti semakin mayuh ditanya diatu bekaul enggau pengawa ti dikereja Denis Chua, ti ngarika sida.
Enti sema UBS AG deka ngalahka diri laban sida nyau udah meda penyalah diri bisi kaul enggau Michael Chia, tu mih maya iya sida mantu pengawa raban pemansik bejalaika pansik ba penyalah ngelesapka duit tu.
Belalaika pasal nama penyimpan enda patut dikereja enti penyalah nya bekaul enggau pengawa ngeruga enggau ngerusak rampa menua Borneo di Sabah.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.