Pemula Musa Aman Dikusaika Bank UBS Menua Swiss Dalam Penerang Court!

Kepala Menteri Sabah, Musa Bin Aman, kala ngumbai Sarawak Report bula udah kami ti nuliska repot ngayanka surat-surat penerang bekaul enggau pekara wang ti endur pengari iya Michael Chia udah nulung iya ngelesapka duit ulih ari penyalah makai suap beratus juta dolar US ari asil pengawa ngulihka kayu batang.
Tang diatu kami deka enchabar Musa Aman awak ke iya ngumbai bank UBS AG ari menua Swiss nya mega bula, laban diatu bank nya udah muka siti kes court di menua Singapura ti ngamatka repot ti ditulis kami nya besereta enggau surat-surat penerang!
Ba penerang besumpah sida, bank UBS AG udah nerangka sekeda duit nya udah dibayar ngagai anak lelaki Musa Aman ari sekeda akaun bank ti dikena nyimpan duit ulih ari makai suap pengawa ngulih kayu batang.
Diatu bank UBS AG udah ngamat sereta ngemendarka semua bayar ti direpot kami nya endang amat magang. Tambah mega surat-surat penerang ari bank nya tulin magang.

Chia Tien Foh (tauka, dua bali nama iya, Michael Chia) udah meri penerang besumpah ngagai court di menua Singapura, mega ngamatka repot kami nya, ti endur iya udah nyadika pengari ba penyalah makai suap nya.
Michael Chia ti udah ditangkap ketegal nguji deka mai SG$16 juta ari menua Hong Kong dalam taun 2008 suba, udah ngaku ba mua court nya ti endur iya madahka diri orang ti dipaduka ngemataka pejalai semua akaun nya.
Dawa tu udah ngamatka penerang ti endur Michael Chia endang bisi kaul terus enggau Musa Aman, taja pan Kepala Menteri nya udah bebula penerang nya.
Baka ti udah direpotka kami suba, pansik ti dipejalaika raban ICAC Hong Kong udah nemu duit ulih ari pengawa makai suap nya dipindah-pindahka nengah mayuh akaun dalam bank UBS AG di menua Swiss lalu ba pengujung pemindah duit nya dipasukka nengah pengari Musa Aman, iya nya lawyer Richard Christopher Barnes, ke dalam sebuah akaun ti endang enggi Musa Aman di menua Zurich.
Beratus juta dolar udah dipindah-pindahka ngagai mayuh bengkah akaun, enggau chara dikena ngelamun nama bala orang ti meri suap ari asil lisin kayu batang ti dikeluarka Yayasan Sabah. Ditu kami ulih ngamatka penerang ti madahka Musa Aman nya orang ti nerima duit suap laban iya endang orang ti nyadi chairman dalam yayasan nya.
Kes ba court di Singapura nya udah meri malu ngagai bank UBS AG nya. Siku sedagar kayu batang, ti muka mayuh bengkah akaun madahka diri enda dikibuhka udah bank UBS nerima jaku perintah ngasuh ngusungka dua iti akaun iya lalu mindahka semua duit dia ngagai sebengkah akaun enggi bini Michael Chia.
Sedagar kayu batang nya udah minta pampas ari bank UBS AG lalu mega ari bini Chia ti benama Yap Loo Mien, ti nerima semua duit ari dua iti akaun Hong Kong ti udah dipuangka udah bekau Michael Chia ditangkap.
Bisi kira-kira USD$2 juta dalam akaun nya lalu salin surat penerang nya bisi ba kami ti ngayanka USD$15 juta udah dipindahka dalam dua taun.
Nitihka penerang ti digaga raban pemansik ICAC Hong Kong, bisi madahka duit ti mayuh bendar ari CTF International Ltd udah ditemu dipasukka ngagai sebengkah agi akaun UBS AG (A/C231117) ti dikemataka lawyer Richard Christopher Barnes.
Akaun tu endang dikemataka ke Musa Aman lalu duit dalam akaun tu udah dipindahka terus tama ngagai akaun Musa Aman di menua Zurich (N/A21020209)!
Tang, nyerumba nya, surat-surat penerang ari bank bisi ngayanka bala anak Musa (maya nya benung belajar di Australia) ulih ngeluarka duit ari akaun kompeni Zenique Investments Ltd ke guna sida empu.
Sebengkah agi bayar udah digaga ngena akaun Zenique Investments Lts ngaga siku pengereja pengawa dalam Yayasan Sabah ti nyadi orang tengah Yayasan Sabah enggau bala sedagar kayu batang, Mohd Daud Tampokong.
Mohd Daud Tampokong, dalam sebengkah dawa court disebut nyadika siku orang ti madahka sedagar kayu batang nya lisin ari Yayasan Sabah enda tau enda dirundingka nengah “orang tengah” Michael Chia, nerima USD$85,000!
Sedagar kayu batang, Agus Hassan, udah mansutka dawa udah iya ti madahka Michael Chia nguna penuduk iya nyadi orang tengah dalam Yayasan Sabah dikena ngemba lalu ngulih duit makai suap tambah ke guna iya empu ti patut dibayar ngagai Musa Aman empu dikena ngulihka lisin kayu batang.

Musa Aman ti nyadi chairman dalam Yayasan Sabah enda tau enda bempu tanggung pengawa ngagai orang mayuh nerangka baka ni iya nyadi penerima bejuta-juta ringgit nengah lisin kayu batang.

Baka nya mega iya enda tau enda nerangka enggau silik baka ni jarin akaun iya ti dikemataka Michael Chia udah dikena mayar bala anak Musa Aman enggau pemantu sida, Imbarine Bin Bujang.

Sida Chia sebilik endang bisi kaul lama enggau Kepala Menteri, taja pan penerang baru ari Musa Aman empu bebula iya bisi bekaul enggau sida. Apai Michael Chia empu udah nengali monopoli ngangkut kayu batang ngena barge.

Diatu, penerang ari Michael Chia enggau bini iya udah nambahka penyai nama Musa Aman dalam kes tu.
Ba penerang besumpah seduai iya, Michael Chia enggau bini iya udah meri penerang ti madahka seduai endang orang ti bempu kompeni-kompeni lalu mega semua akaun bank! Michael Chia mega madahka akaun UBS udah dipuangka ari asuh iya, laban bank nya udah nemu iya mih orang ti berejista bempu kompeni-kompeni nya!

Sarawak Report udah minta UBS AG ngaku sekali ke surat nya dikelala raban ICAC Hong Kong, ti madahka duit dalam akaun Barnes nya disimpan ngarika Musa Aman, mega disediaka Denis Chua.

Nengah email iya empu Denis Chua, ti diserahka ngagai court, mega bisi nyediaka penerang dikena nyukung penemu belung Michael Chia ti ngumbai iya ngemataka akaun resia nya.

Ba beberapa iti email entara Denis Chua enggau UBS AG udah nerangka Denis chua, ti nyadi penyanding penemu nya, udah madahka Chia nyadi klien ti bendar.

Musa enda tau enda nerangka nama kebuah lisin kayu batang udah dibayar ngagai akaun iya ti mega endur anak iya nerima belanja sekula sida. Lawyer Bansa ke menua Malaysia, Abdul Gani Patail mega enda taun enda nimbal tuduh tu, nama kebuah iya enda nawa kaban iya empu, Musa Aman.

Semina rejim perintah ti pemadu korup aja deka enda ibuhka penerang ti dikeluarka baka tu. Nambah ke nya, bank UBS AG mega deka nyadi sebengkah bank entarabansa ti nyimpan duit kamah bala orang politik ti makai suap, baka Kepala Menteri Sabah ti empu tanggung pengawa ngerusak rampa menua Sabah kenyau ari iya megai perintah ari taun 2003 suba.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments