Rumah Besai Bejuta Ringgit Enggi Masing

Penguntung ari ti mangku pengawa menteri? James jemut Masing nya siku ari menteri ti bisi rumah besai ti enda ditemu ari ni pun penatai duit dikena ngaga

Rumah besai enggi bala kaban politik ke Abdul Taib Mahmud nya sebengkah ari jaku tanya ti enda ulih saut sapa-sapa di menua Sarawak.

Baka ni ko mayuh bala menteri enggau YB BN ti ngepunka pengawa sida dalam politik ari orang biasa, tang ke pengujung iya sida ulih idup dalam pengeraja, taja pan gaji menteri ti diterima sida ukai nya besai bendar?
Undang-undang menua tu nadai nagang sapa-sapa orang ti endang udah kaya bediri minta pilih. Tang, nadai siku orang ti udah dipilih nya tau nyalahguna kuasa sida nugungka pengeraja. Nya nyau sebaka reti enggau penyalah makai suap ti benung ngerusak menua Sarawak ba maya ke diatu.

James Jemut Masing, siku tuai bebansa Iban ti nyadi tuai dalam parti politik PRS, nya siku orang kanan dalam serakup BN betuaika Taib ngarika parti UMNO ti benung bekuasa di menua Sarawak, nya tau nyadika chunto ti manah.

Tang kami bisi hak betanya ari ni penatai duit iya ti mayuh nya dikena iya ngaga rumah ngemesai nya di nengeri Kuching?

Rumah besai di nengeri Kuching

Sida Masing sebilik diatu nguan rumah ba atas sebidang tanah dua ikar pemesai betentang enggau Jalan Ong Tiang Sui dalam pengelama lebih kurang sepuluh taun tu udah sida sebilik pindah ari rumah Semi-D ti jelan iya pemesai ba Lorong 17 ba Jalan Stampin.

Baka ni pengawa iya ti nyadi menteri ti begaji RM8,000 sebulan nya ulih ngujungka iya ngaga sereta diau dalam rumah ti besai sereta mar rega nya?

Tapak endur rumah besai nya dikelingi pagar bedinding batu ti tinggi lalu rumah besai iya nya mega dikelingi kebun bungai ti manah nya berega manggai RM2 juta enti dipansik ari rega ba maya diatu?

Bala temuai ti kala nemuai ngagai rumah Masing bisi nusui baka ni pemesai enggau pemanah rumah iya nya ti bisi dua buah ruai ti besai lalu disikap enggau mayuh bilik ti besai-besai ba atas mega. Bala temuai nya madahka lantai rumah Masing nya dilapik ngena karpet lalu diisi ngena perabot kulit ti berega mar-mar.
Ari ni penatai duit dikena Masing ngaga rumah ngemesai nya?

Menteri Pemansang Tanah Sarawak

Jaku saut ngagai tanya bekaul enggau pengeraja Masing engka nya ulih ditemu kitai ba pengawa iya ti nyadi Menteri Pemansang Tanah dalam cabinet perintah menua Sarawak, ti endur pengawa opis menteri iya nya ‘ngemansang’ tanah-tanah NCR. Tuju enggau juluk ati opis menteri iya ngansak semua orang ti bisi tanah NCR ngambika nukar tanah sida nyadika ladang sawit lalu mega dikena mantu kompeni masuk dalam pengawa kunsi.

Chara baru’ – sebengkah ‘pengawa kunsi’ ngansak orang ti bisi tanah NCR ngambika nyerahka tanah sida nyadika ladang sawit

Masing suah didinga ngansak orang di menua pesisir ngemansangka kampung enggau tanah NCR sida nyadika ladang, taja pan pengawa nya nyau magi tauka nyirap tanah ari sida empu ti bisi hak nya. Taja pan diatu udah bulih sejuta hektar semua tanah udah dibuka nyadi ladang sawit, tang Masing majak minta awakka sejuta hektar agi dikemansangka datai ba taun 2020 ila.

Tang penguntung enggau asil ti diberi ngagai orang ti bempu tanah NCR diatu agi mar bendar deka ditukuka tauka ditentuka. Udah betaun-taun sida nyerahka tanah NCR sida tang sida semina nerima mimit aja asil ari ‘pengawa kunsi’ enggau kompeni ladang nya lalu mayuh agi sida nya nadai udah nerima nama-nama asil tauka sebarang pampas udah sida nyerahka tanah enggau kayu kampung sida ti berega tinggi nya.

Duit Suap!

Masing enggau Mong – dua iku pengari rayat ti udah ditemu nerima duit suap udah magimagi tanah NCR enggi bala rayat seduai empu

Sama enggau nya, Masing udah ditemu nguji ngulihka pengeraja ke iya empu ba sebengkah pengawa iya ti ‘magi-magi’ tanah NCR enggi bala pengundi iya empu!

Sarawak Report kala mansutka berita bekaul enggau penyalah baka ni Masing enggau sapit iya Mong Dagang nguji ngulihka bejuta-juta ringgit duit suap ari pengawa nanggam sempekat ‘pengawa kunsi’ enggau kompeni ti minta deka ngereja tanah NCR sida. Masing enggau Mong udah minta repik rega RM1,000 ke seikar tanah NCR ti dibuka kompeni ba tanah 70,000 ikar pemesai ari kompeni ti bisi ati deka ngereja pengawa nya, sebengkah pinta betulis ba notis ti disain Mong empu udah nya!

Kaul Masing dalam ‘pengawa kunsi’ nya diarika kaban iya empu ti dinamaka nyadika penerima duit suap iya nya.
Baka nya meh penguntung ti tau ngasuh nuan ulih ngaga sereta meli sebuah rumah besai, taja pan Masing suah didinga bebulaka pemujur iya nguji ngulihka duit suap bejuta-juta ringgit nya!

Lawyer ari penyakal See Chee How ti benung ngarika rakyat ti benung napi penusah ti datai ari sitak bepilibesai diarika Masing udah nganjung saman sida, laban ‘pengawa kunsi’ ti dibai Masing nya udah dipeda baka ti mejal sida, taja pan lebih 50% ari semua sida ti bisi tanah NCR di endur nya udah nyakal perambu Masing enggau Mong nya.

Diatu udah enam taun tang nadai siku ari sida ti masuk dalam ‘pengawa kunsi’ udah dibayar penguntung ari pengawa pemansang ti dipajakka Masing taja pan Masing empu endang udah bulih untung ari pun pengawa nya!

Rimbunan Hijau – kompeni ladang ti pemadu besai di Sarawak ti mega nyadika pun penatai duit ke James Jemut Masing?

“Aku dibayar ngena cek ari kompeni Rimbunan Hijau”! ko siku kontraktor ti udah ngaga rumah ke Masing

Enti Masing nadai nerima sebarang duit suap ari sempekat ‘pengawa kunsi’ ngena tanah NCR ba raban bansa iya empu nya, ari ni penatai duit dikena iya ngaga rumah ngemesai nya?

Kami mega kala mansutka berita baka ni lisin-lisin nebang kayu tebelian enggau AP pemendar dikena nyual kerita diberi ngagai bini iya. Sida mega sama bisi nerima kontrak nengah kompeni sida empu ti endur bini iya nyadika siku pemegai share pemadu mayuh dia.

Semua penguntung tu diulih sida ari perintah menua Sarawak, ti enda patut diberika sida ketegal pemanah kaul sida enggau Abdul Taib Mahmud.

Pemeri penerang ke kami nyengkaum siku kontraktor ti enggau ngaga rumah besai Masing udah nerangka ngagai kami baka ni siku menteri baka Masing nya tau ulih ngaga rumah ngemesai nya. Sida udah ngamatka penerang madahka sida nerima bayar ngena sekeping cek ari sebengkah kompeni kayu batang enggau ladang sawit pemadu besai di menua Sarawak, Rimbunan Hijau!

Rimbunan Hijau nya sebengkah kompeni ti regas bendar muka tanah NCR nyadika tanah ladang sawit di menua Sarawak.

 

 

 

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments