Menoa Penyamun!

• 20 Aug 2012
• BM 翻译

Kemari kami bisi udah mansutka repot pasal bala orang di Melikin ti angkat ngelaban pengawa ngerampas tanah temuda sida ti dikeruga kompeni kayu batang enggau kebun dandang besai ti rangka sereta tumam.
Orang di menoa nya udah diemba laban sida mantah pengawa kompeni nya ti ngerampas tanah temuda rimba sida lalu udah nya muka menoa sida nyadika kebun dandang besai.
Diatu kami ulih ngayanka repot enggau silik agi baka ni penyarut entara orang di menoa nya enggau bala apek bayat ti diupah kompeni dalam pengelama berapa taun tu, lalu diatu kami ulih ngayanka sapa bagi orang ti sama enggau bempu kompeni-kompeni ti ngeruga pendiau enggau pengidup orang di menoa nya, ke bendar iya dua iku menteri dalam kabinet Abdul Taib Mahmud!

Keruga chara apek bayat – “Sekali ke kita nyambut duit kami tu, tauka kami ngambi tanah kita enggau enda bebayar sesen!”

Bala pengarang berita ari blog Sarawak Report udah betanyaka cherita bendar ari bala orang di menoa nya laban deka nemu nama penanggul ti nekul pendiau enggau pengidup sida ngelama tu. Sebengkah ari penanggul sida nya dikeruga sebengkah kompeni ti bekereja di menoa sida, United Teamtrade Sdn Bhd. Kompeni tu udah diberi lisin nguan sementara (provisional license) ba atas tanah temuda rimba sida ba 7,300 hektar pemesai.
Baka ti suah udah pansut ba kes-kes ke bukai dulu ari tu, kompeni nya udah ngumbai lisin nguan sementara ari Opis Tanah Sarawak nya meri sida kuasa penuh atas tanah NCR, lalu ukai meri sida pemendar mai bala orang menoa nya bejuraika pengawa dagang kunsi ngena tanah sida empu nya.

Nitihka jaku penerang orang di menoa nya, ti diau kira-kira 60 batu ari nengeri Kuching lalu mega besemak enggau garis entara menoa enggau Indonesia nya, kompeni United Teamtrade nya udah nguji ngemba sida ngambika nyual tanah sida ba rega RM300 ke sehektar!
Lebuh orang di menoa nya enggai ngelepaska tanah temuda sida ketegal rega ti jauh mit ari gaji sida sebulan nya, sida diemba pengurus kompeni nya ti madahka sida, “sekali ke kita nyambut rega ari kami tu, tauka kami terus ngambi tanah kita tu enggau enda bebayar”.
Udah nyebut jaku emba nya, pengurus nya lalu mandangka lisin nguan sementara ti diterima iya ari Opis Tanah, seraya ke ngaku lisin nya meri iya pemendar ngereja pengawa ngupas temuda rimba, ti nyengkaum tanah pendam, kebun buah enggau tembawai rumah orang menoa nya.

Tang bala orang di melikin enggai diemba kompeni nya lalu sida mai penanggul sida nya ngagai lawyer PKR, See Chee How (ti mega siku ADUN) ngagai court.
Bala pengarang berita kami diterangka baka ni udah bekau nya, penyarut nyadi entara bala orang di menoa nya enggau kompeni nya nyadi. Seraban apek bayat belabuh dipeda bekesegap sebelah menoa sida ngambika dikena ngemba sida. Bala apek bayat nya nyau nirika sekat jalai ti ditengah orang menoa nya nurun ke kebun enggau umai diri empu.

Bisi mega raban apek bayat nya tama ngagai kandang rumah orang di menoa nya lalu ngujakka duku sida kena ngemba orang menoa nya. Nambah ke nya, pengurus kompeni nya mega madahka diri bisi pistol dikena iya ngemba bala orang menoa nya.

Ba sebengkah agi endur ti dikeruga raban apek bayat, siku ari tuai orang dia ti nguluka nembiak iya angkat ngelaban kompeni nya udah ditunu bala apek bayat nya kerita baru iya.
Michael Lung, ari Kampung Tanah Mawang udah tedani ninga trak Hilux baru dibeli iya enggau rega RM76,000 udah angus ditunu orang ba luar rumah iya. Iya pechaya ke laban iya ngasai ke diri nguluka nembiak iya ngelindung 200 iku orang di menoa nya ti napi pejal ari kompeni nya.
Nama pengawa YB BN sida di menoa nya, Snowdan Donald Lawan?

Tindak ari bala orang menoa nya ba pun penanggul nya, sida ngerepot pekara nya ngagai opis polis ti semak enggau sida. Sida udah ngaga mayuh repot pasal keruga kompeni kayu batang di menoa nya.
Tang repot sida enda dikibuhka polis. Polis di menoa Sarawak rindu agi nerima duit suap ti ngemendarka kompeni kayu batang enggau kompeni kebun dandang besai bekerugaka menoa orang asal, lalu ukai ngena pengelurus ngemataka pengelikun bala orang ti kena keruga.
Udah sida enda mujur minta bantu ari polis, sida lalu minta bantu pengari rakyat di menoa nya empu.
YB BN di endur sida mai penanggul sida nya siku YB ti kaya raya, Snowdan Lawan, ti endur apai iya endang nyadika kroni dagang ke Abdul Taib Mahmud.
Taja pan udah betemu enggau Snowdan, iya madahka penyarut sida enggau kompeni nya ‘mar’ bendar deka diputarka! Nya kebuah, sida lalu mai penanggul sida nya ngagai lawyer See Chee How ti udah ngarika sida ngelaban kes lalu mega ngelepaska seraban sida semenoa nya ti ditanka polis minggu nyin kemari.

Kelalu mar diputarka?

Nama kebuah penanggul nya mar diputarka Snowdan Lawan enti iya endang amat deka mantu sida ari kena keruga kompeni United Teamtrade?
Pia mega, nama kebuah mar bendar ba Snowdan ngansak raban polis bejalaika pengawa sida ba orang ti datai ngeruga menoa nya?
Saut ke pansik kitai tu mudah bendar. Kompeni United Teamtrade Sdn Bhd nya bekerugaka temuda rimba orang asal sebaka enggau pengawa kompeni bukai ba endur bukai ngelama tu, ti benung dikereja perintah Barisan Nasional ti betuaika Abdul Taib Mahmud dalam pengelama 30 taun.

Baka ti kala direpotka dalam Sarawak Report dulu ari tu pasal pengawa berampaska tanah temuda orang bansa asal, kompeni WFM Development nya sebengkah kompeni ti dikuasa Naroden Majais, iya nya siku ari orang kanan ke Taib Mahmud. Naroden mega nyadika Menteri Pemansang Dagang Kunsi dalam kabinet perintah menoa Sarawak!

Kelimpah ari nya, Awang Matusin Bin Awang Drahman nya nyadika sapit YB BN Awang Tengah bin Ali Hassan, siku agi orang kanan Taib Mahmud! Kompeni WFM Development nya bisi bekaul enggau mayuh bengkah pengawa nipu orang di menoa pesisir ngambika masuk dalam pengawa dagang kunsi enggau kompeni-kompeni ti dikemendarka perintah BN baka kompeni Hydroflow Sdn Bhd enggau kompeni Indranika Sdn Bhd. Baka ti kala ditusui kami dulu ari tu, semua kompeni tu dipejalaika ari opis ti dikuasa Naroden Majais enggau mega bala proksi dagang iya ti megai share ti mayuh ngarika iya. Naroden Majais kala madahka penanggul ngerampas tanah di menoa Sarawak nya semina cherita ‘angin’ aja. Tang kami mega kala ngayanka repot ti endur Naroden Majais (ti asal iya bekereja nyadi pengajar) nya siku pemegai share ti besai dalam kompeni Peninsular Rise Sdn Bhd, iya nya sebengkah kompeni ti nerima lisin nebang kayu di Sarawak. Nambahka nya, Naroden Majais kala didawa dalam court ketegal ditemu court nipu orang menoa pesisir bekaul enggau penyalah ngerampas tanah. Iya enggau bini iya nya dua iku orang ti megai share pemadu mayuh dalam kompeni Nirwana Muhibbah Sdn Bhd, ti ngerampas 5,000 hektar tanah NCR orang di Kampung Lebor di pelilih menoa Serian lalu udah nya semina mayar pampas RM700 ke sehektar tanah nya!

Enggau nya Naroden Majais udah ditemu salah dalam court bekaul enggau kes nya.
Lalu diatu kitai tekenyit laban siti agi kes ti dikereja iya nengah kompeni United Teamtrade ba orang asal di Balai Ringin nya.
Lalu nya pekara ti dikumbai Snowdan Lawan ‘mar’ diputarka, lebuh bala orang asal menoa nya minta bantu ari iya, laban dua iku tuai apek bayat ti ngeruga sida nya endang menteri ti tinggi agi pangkat ari iya dalam kabinet BN menoa Sarawak?
Abdul Taib Mahmud ngelama tu udah nejuka sida sebilik enggau bala bakih politik iya ngeruga menoa Sarawak semina ke guna sida empu.
Bala orang ti angkat deka ngelaban atur ti bingkuk ari menoa Melikin enggau Balai Ringin enggau di endur ke bukai di Sarawak udah mupuk-mupuk angkat laban deka ngajar bala YB BN sida, laban sida nemu pengerangka sida deka ngerusak sida empu.