Merambu Pengawa Nerumpak – Sekeda Saut Ke Misteri Ngulihka Pengeraja Awang Tengah

Sebuah agi rumah besai di nengeri Kuching lalu mega dikena nerangka ngagai kitai penyalah makai suap ti meruan dikereja di menua Sarawak.
Orang ti bempu rumah nya Awang Tengah Ali Hassan, Sapit Menteri Perambu Pemansang menua Sarawak (ti endur Abdul Taib Mahmud empu nyadi menteri penuh) lalu udah lebih setaun digaga, diatu sida Awang Tengah sebilik pindah ngagai rumah nya.

Bala orang ti diau bekelingi di Petra Jaya udah nyangka baka ni siku menteri Sarawak, ti semina begaji RM17,000 sebulan nya ulih nirika rumah ti besai sereta mar nya?

Awang Tengah nya siku menteri ti betanggungpengawa ngemendarka semua projek ti jelan pemesai di menua Sarawak. Lalu bos iya, Abdul Taib Mahmud, betanggungpengawa ngemendarka projek ti besai agi, tang projek begagaka pasar besai-besai, genturung rumah nya diatur Awang Tengah magang.

Nyadi penganti tuai sida?

Ke bendar iya, sereta iya bulih pengawa menteri iya, Awang Tengah lalu dikerinduka Kepala Menteri lalu iya dipelabaka orang mayuh tau nganti penuduk Kepala Menteri ila.

Suah bendar bala tuai-tuai perintah bechura diktaktor nguji nurunka kuasa sida ngagai anak sida empu lalu kitai sama tau nyadang anak Taib di benama Abu Bekir nya nyadika penganti iya empu enda lama agi, laban nadai orang bukai ti landik agi nukar iya.
Tang Awang Tengah dipeda nyadika siku orang ti dikerinduka Taib neruska perambu iya ngemansangka projek-projek dalam SCORE sida.
Pengawa ti nyelai di menua Lawas

Berebak enggau nya, Sarawak Report udah bejalaika pansik ba penerang atas sebengkah kes ti kala nyadi di menua Lawas, ti udah ngayanka baka ni menteri nya bejalaika pengawa dikena iya ngulihka pengeraja ke iya empu enggau sida sebilik.

Kes nya nyadi bekaul enggau siku orang di menua nya benama Sia Tangi, enggau bala anak lelaki iya ditekanka nunu rumah opis enggau rumah anak kuli enggi kompeni Laras Jaya Construction Sdn Bhd, ti endur loji meresi ai udah dikontrakka digaga di Long Kuton, Trusan di pelilih menua Lawas.
Pengerusak nya nyengkaum dua buah lipan ekskavator enggau tiga buah lori penyampur konkrit ba tapak projek nya, lalu ukum ti tau ditinggangka ba orang ti ngereja penyalah nya, enti court tetemuka penyalah sida nya, 20 taun. Mujur bendar mega sida menyanak nadai ditemu salah lalu sida mega dilepaska.
Tang aram kitai sama-sama beratika utai ti ngemunka penanggul tu. Ba taun 2008 Sia Tangi udah mantaika serebana iya ti madahka tiga bidang tanah iya udah dirampas perintah menua dikena perintah ngaga loji meresi ai, tang bayar pampas RM473, 625.35 udah dibayar ngagai orang bukai!
Genap kali iya betanyaka pasal tanah iya nya, tanya iya enda dikibuhka bala pemesai-pemesai perintah. Court Orang Bansa Asal enggau Pegawai Daerah di menua nya nadai udah nyaut surat lawyer ti ngarika iya. Utai ti nyadika tindak balas iya, Sia Tangi lalu nagang pengawa ngaga loji nya dikereja, nyengkaum betanamka anak sawit ba tapak projek loji nya, tang udah nya semua utai tanam iya mega dirusak.

Anang kitai enda ingat, tu meh menua asal Awang Tengah Ali Hassan, lalu menteri nya udah ngumbai kes mai penanggul ke iya.
Berapa bulan tu udah, Awang Tengah udah ngena peluang iya dalam Dewan Undangan Negeri dikena iya ngutuk Sia Tangi laban kenu ku iya Sia Tangi udah nagang projek ngaga loji nya terus dikereja.

Tang dalam pengelama nya Awang Tengah enggau bala agen iya ba perintah menua Sarawak udah enggai mendingka peminta ari orang ti bempu tanah NCR dia.
Pegawai Daerah menua nya ti udah nyerahka duit pampas nya ngagai orang bukai, udah enda ngenataika diri ngagai pengawa pechara ba Court Tinggi dalam taun 2009, ti endur court nya udah merintahka pampas nya enda ulih dikena lalu peminta ari Sia Tangi nya enda tau enda didingaka.
Taja pan Sia Tangi menang dalam kes nya, tang Superintenden Agensi Pengelindung enggau Pemansang Tanah enggau Pegawai Daerah lalu enda ulih ngemetulka penanggul nya. Sida mega udah enggai nitihka pemutus court.

Sekeda orang tentu deka ngutuk pengawa sida Sia Tangi menyanak ti endur sida menyanak endang ditekanka salah, lalu enti sida menyanak nya endang amat-amat betanggungpengawa lalu dipecharaka dalam court. Tanah nya, nitihka penerang ari sida menyanak, udah dirampas ari sida lalu bayar pampas diberi ngagai orang bukai!

Laras Jaya Construction

Lalu sapa meh bala orang ti ngempu kompeni Laras Jaya Construction Sdn Bhd, sebuah kompeni ti diasika Awang Tengah maya iya mansutka jaku kutuk iya dalam aum DUN nya kemari? Orang tentu deka ngumbai bala pemegai share dia nya orang ti sama dalam kompeni Laras Jaya Sdn Bhd ti enggi kontraktor Kuo Ing Sing enggau Kueh Hoi Lai. Agi mega semua kompeni nya bekunsika alamat ti sama di Kuching.

Tang bala pemegai share dalam Laras Jaya Construction Sdn Bhd, ti bepalan di L150/5A ba Jalai Datuk Abg Abd Rahim, enda sebaka. Siku ari pemegai share dia nya Awangku Jinal Abedin Bin Pangiran Haji Jawa.

Awangku Jinal nya adi ipar Awang Tengah, siku ari orang ti ditemu mensia mayuh nyadika proksi dagang Menteri Perambu Pengawa nya!
Raban Laras Jaya patut nerangka chura pemegai share sida ti nyelai nya. Sebengkah agi kompeni ti bekunsika opis nya ngayanka kaul entara Kueh Hoi Lai enggau Awangku Jinal, ti endur, sekali tu, Awangku Jinal nyadika siku pemegai share ti enda besai dia.

Lalu, sapa meh ti bulih nama ari kaul baka tu lalu nama kebuah Perintah Menua Sarawak udah meri projek ti beungkus RM68 juta ngagai kompeni ti bisi kaul enggau Awang Tengah lalu enda nengah sistem tender tebuka,

semua nya dikereja dalam pelilih menua menteri nya empu?
Baka ni kitai deka nemu ungkus ke bendar sesebengkah projek nya enti kompeni bukai enda diberi peluang nikam tender ke pengawa ti dikereja nya, ti udah dibayar ngena duit bala pemayar chukai?

Utai ti ngasuh kitai tau irau ati nya dalam perintah ti betuaika Taib/BN, bala orang di menua Sarawak udah teleba enggau pengawa bala menteri sida ti ngereja pengawa kontrak besai-besai.

Amat berani meh Awang Tengah ngena penuduk menteri iya ngulihka projek besai ke iya empu enggau ke sida sekaban belayan! Iya mega tau dikumbai berani nirika tanda pengingat makai suap nyerumba rumah besai iya di nengeri Kuching nya!

Agi mayuh

Baka ti ditemu kitai mayuh, menteri ti ngena kuasa iya ngulihka duit nya sebengkah pengawa ti pemadu salah. Tang dalam penerang ba laman web enggi CIDB, kompeni Laras Jaya Construction Sdn Bhd udah bulih mayuh kontrak besai-besai di serata Sarawak dalam kandang beberapa taun tu!

Misteri pengelenyau duit pampas

Isu ti amat nyelai bekaul enggau duit pampas ba projek ngaga loji meresi ai di Trusan, Lawas lalu sangkal projek ti dikereja sida Sia Tangi sebilik nya udah meri malu ngagai perintah Taib Mahmud. Penyampau duit pampas ti dikemendarka perintah menua Sarawak nya besai bendar dikena nganti tiga bidang tanah endur ngaga loji meresi ai nya. Iya beungkus RM473,625.35 lalu ba maya duit pampas nya dipadahka ngagai bala orang ti bempu tanah kena ganti nya, sida mega dipinta nganjung ambu sida, ti endur Sia Tangi mega bisi sama enggau ngenataika ambu iya.

Tang semua duit pampas nya udah diberi ngagai dua iku orang ke bukai, nitihka rekod-rekod ti ditemu. Ambu ti dikenataika Sia Tangi sebilik enda dikibuhka orang, lalu iya enda diterangka ngagai sapa duit pampas nya dibayar semadi nyentuk ke ngaga maya bala lawyer iya mansik lalu nemu Pegawai Daerah menua nya udah mayar duit pampas RM73,967.50 ngagai siku orang ti benama Janny Apan, lalu RM89,651.40 enggau laluh iya RM301,006.45 dibayar ngagai siku orang ti benama Salli Agong.
Sapa meh ke bendar iya dua iku orang tu ti udah nerima pampas ngemayuh nya ari perintah menua Sarawak ke upah seduai ngerampas tanah ari Sia Tangi?

Ulih Kaban Parlimen Lawas Datuk Sum Agong datai ke mua? Nyangka iya kempang sereta berani bebulaka berita angin ti ngumbai siku ari sida sebilik bisi kaul dalam penanggul ti besai tu?
Sekali ke kaban Sum Agong dalam BN, iya nya Awang Tengah, ti datai ari sitak bepilihbesai ti sebaka enggau iya, deka bebulaka tuduh penemu madahka Salli Agong enggau Datuk Sum Agong nya nadai kaul kaban belayan enggau pangan diri baka ti disebut-sebutka mensia mayuh? Agi mega, enti siku-siku menteri udah mujur bulih pengeraja ke iya empu, dia bala sida sekaban mega deka sama-sama deka bulih penguntung!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments