Randau Ruai Sarawak Enggau TV Australia

• 22 Aug 2012
• BM 翻译

Stesyen penabur berita TV entarabansa Australia, Dateline udah mansutka berita dalam pengelama setengah jam pasal penanggul-penanggul ari pengawa ngulihka kayu batang ti enda beatur-atur di menua Sarawak enggau perambu gila Abdul Taib Mahmud ti deka ngaga 12 buah agi tekat ai hidro elektrik di serata menua nya. Pengarang berita stesyen nya, David O’Shea udah nemuai ke menua Sarawak dalam pengelama beberapa hari laban ngambi gambar, video enggau penerang-penerang bukai di Sarawak lalu mega betanyaka berita ari bala orang bansa asal ti dituntung penusah ketegal rampa menua sida ti ampuh laban ai tekat Bakun nya.

Pengarang berita nya mega bisi nemuai ngagai genturung pendiau orang bansa asal ti dituntung penusah kena keruga bala apek bayat ti bekereja ke kompeni-kompeni kayu batang ba tanah temuda enggau kampung sida.
Penanggul enggau penusah ti baka nya nyau udah teleba diasaika raban orang bansa asal ti merinsa-mensena di Sarawak, lalu diatu serebana sida nyau ulih didinga nengah radio internet, Radio Free Sarawak. Tang ba orang di menua Australia pekara ti nuntung orang bansa asal di Sarawak udah ngasuh sida berasai tekenyit ati sereta ringat, laban kampung sida empu mega kena keruga enggau chara ti sebaka.

David O’Shea udah ngayanka pemerinsa bansa Ukit di Bakun ti udah dituntung penusah ampuh menua lalu diatu mayuh agi sida nguan rumah jelatung ari ulu tekat Bakun. Iya bisi mega betanyaka penerang bekaul enggau penusah pengidup sida ketegal rampa menua sida ti udah dikeruga kompeni kayu batang baka kompeni Ta Ann, sebengkah kompeni enggi petunggal Taib Mahmud iya nya Abdul Hamed Sepawi.

Udah nya, ba penerang ti nangkanka nya, iya udah enchabar Hamed Sepawi seduai Idris Buang, iya nya pengari kekompeni Sarawak Energy Berhad, ngena jaku tanya nama kebuah perintah TaibMahmud di Sarawak keran bendar deka ngaga mayuh agi tekat ai ti enda dipeguna enggau nadai betanyaka runding ari orang mayuh sereta mega nadai ngaga pansik silik ba pangka projek nya ke rampa menua?

Sarawak Report mega bisi ditanya iya pasal penyalah makai suap ti dikereja sekeda orang di belakang projek ngaga tekat-tekat ai nya ti ba pengujung iya udah ditemu mai pengerusak rampa menua ti balat bendar di menua Sarawak. Tang Abdul Taib Mahmud empu enggai ditanya, taja pan David O’Shea udah suah bendar minta deka berandau enggau iya. Sekali ke Taib nyau nangi sereta takut napi jaku tanya ari bala pengarang berita ari menua luar ti enda ulih tagang iya?

Kaul pengawa dagang enggau menua Australia?

Australia diatu benung napi jaku kutuk ari mensia mayuh laban bekaul dalam pengawa di menua Sarawak udah sida ngaga kaul enggau Hamed Sepawi enggau menua Tasmania. Berita ti baka tu suah udah dipansutka dalam Sarawak Report dulu ari tu. Dalam taun 2008, kompeni Ta Ann enggi Hamed Sepawi udah nanggam sempekat enggau menua Tasmania ba pengawa ngulihka kayu batang ari kampung bungas menua nya, taja pan mayuh agi kampung bungas menua nya ditagaka nyadi kampung ti dikemataka. Penanggul tu mega udah ngasuh bala orang ti rinduka pemanah rampa menua ari menua nya ringat bendar laban Hamed Sepawi udah bejaku bula ngumbai asil kayu ti dijual sida nya bansa kayu “eco-wood” (mesra alam).

Mayuh agi asil kayu sida nya dijual ke menua Jepun, tang diatu mega bisi penerang ti madahka kompeni Ta Ann nya udah dikutuk bekaul enggau sebengkah skandal ti nuntung Lumba Olimpik London ti endur kompeni Ta Ann udah nyual asil kayu ti dikumbai iya “eco-wood” dikena ngaga geladak endur bemain basket ball. Ari skandal nya, kontrak enggau indu kontraktor ari menua Jepun ti udah ditagaka ngaga geladak ke palan lumba di London nya udah diasuh badu ari kontrak nya.

Berebak enggau nya, pengawa Hamed Sepawi ke bukai kelimpah ari ti nyadi pengerusi dalam Sarawak Energy Berhad iya mega dipaduka nanggam sempekat enggau Hidro-Tasmania ti nulung Taib Mahmud merambu pengawa ngaga tekat-tekat hidro ke bukai, ti deka ngujungka bepuluh ribu iku orang bansa asal dipindah ninggalka menua lama sida, lalu ngerusak pemanah laluh rampa menua enggau batang sungai di menua Sarawak.
David O’Shea udah mujur nyerungkai sekeda ari penerang ti bebalut dalam kaul pengawa industri ari menua Tasmania enggau industri di menua Sarawak ti endang ditemu bisi kaul enggau penyalah makai suap asil ari runding enggau penemu korup enggi Abdul Taib Mahmud.