Taib Enda Bemunyi Bekaul Cherita Rayat Bakun Di Sungai Asap – Sapa Agi Deka Arapka Perintah BN?

• 30 Aug 2012
• BM 翻译

Udah kami ti ngeluarkan berita ari TV Dateline ari menua Australia ba minggu nyin kemari bekaul enggau sereban bala orang ti tanggul laban tekat ai Bakun, perintah BN Sarawak ti betuaika Taib Mahmud lalu besetuju deka ngamatka semaya sida ngagai bala orang Bakun ti udah dipindahka ngagai pengentap pendiau ti baru sida di Sungai Asap.
Enggau nya, pesan nya udah chukup terang bendar. Enti kita deka ngereja pengawa begulai enggau sebengkah perintah baka perintah BN, kita enda tau enda angkat ngelaban sida nya, laban enti kita enda baka nya, kita tentu deka kena empa lalu ditejuka ngenatka pemerinsa nya kediri.
Tipu ba lebih 10,000 iku raban bansa ari Bakun ti udah ditengelamika rampa kandang menua sida ketegal tekat ai nya sebengkah chunto pasal penusah ti nuntung raban mensia. Bala raban orang di menua Batang Ai mega udah ngasaika kena tuntung penusah ti baka nya, lalu beratus-ribu iku da agi deka kena tuntung penanggul ari ketegal projek ngaga 12 buah agi tekat ai hidro baka ti benung diperambu Taib Mahmud, taja pan projek ti baka nya enda dipeguna.
Bala raban orang di Bakun nadai pilih bukai, kelimpah ari ti nurutka atur mindahka sida ngagai palan pengentap pendiau baru di Sungai Asap nya. Sida udah disemayaka mayuh bengkah pampas dikena nganti pendiau lama sida ti ditengelamka ai tekat Bakun nya baka rumah baru, pengawa, bayar pampas, tanah endur betanam betupi enggau pengeraja bukai asil ari kuasa elektrik hidro nya. Ai ti beresi enggau kuasa elektrik ti pechuma nya seruran disemayaka ngagai sida tiap kali bala orang politik enggau raban birokrat BN bejalai ngagai menua sida, ngambika sida nerima program pindah ngagai palan pengentap pendiau ti baru di Sungai Asap.

Palan pengentap pendiau di Sg Asap – bala orang ari Bakun dipinta mayar perintah rega pendiau ti baru bepuluh ribu ringgit sepintu
Sereta sida datai di menua baru sida di Sungai Asap dia sida meda gaya enggau tukuh rumah panjai baru ti disediaka sida nya baruh bendar kualiti. Nya baru sida nemu diri udah kena tipu. Bala pemesai ti bekereja mutarka pengawa di Sungai Asap madahka sida ti baru pindah kia patut mayar pulai rega ke rumah baru sida nya ngena rega ti jauh tinggi ari penyampau pampas ke pengelenyau menua lama sida di Bakun. Sapa entara sida ulih mayar pulai RM50,000 ngagai perintah ke rumah ti jai bendar gaga nya?
Kelimpah ari nya, bala orang asal ti ditanya TV Dateline madahka sida disemayaka Taib Mahmud lima ekar tanah ke sepintu ruang bilik enti sida udah datai di Sungai Asap ngambika bisi endur sida beridup, tang semaya nya enda dikamatka perintah Taib. Bisi mega sekeda raban orang diri sebilik bisi tetemuka tanah baru ke diri empu, tang perintah mega mengkang enggai meri sida surat pala tanah.

Kini ke penungga duit asil bejuta-juta ringgit ari pengawa nebang rampa kampung enggau rampa tanah temuda ti nyau bulih mesai pulau Singapura ti udah ampuh laban tekat ai Bakun nya?
Nama kebuah duit asil ngulihka kayu batang ba kandang menua Bakun enda dikena mayar pampas ke bala orang ti diasuh pindah ngagai palan pengentap pendiau ti baru, ngambika sida bisi duit dikena mayar rega menua baru sida, niri sepital enggau sekula, matih sida ngereja pengawa ti baru enggau ngatur pengawa bukai ti baru baka ti disemaya Taib enggau raban BN iya suba?
Kini penunga semaya ke “pemaju enggau pemansang” ti udah disemayaka perintah BN ba sida ngelama tu?
Kami nemu penunga semua duit asil ari menua Bakun tiap kali kami meda gaya pemesai rumah enggau gaya pengidup raban menteri BN enggau kroni sida. Ke bendar, projek Bakun ukai dikena mantu ngurangka penyeranta rayat di menua Sarawak.

Udah sida ngasaika pemedis nguan menua baru sida di Sungai Asap, mayuh agi sida udah mulaika diri ngagai segang ai ti ngampuhka menua lama sida, ti diatu digaga melepung ba sebelah tebing tasik Bakun ti besai bendar nya.
Cherita pasal pemerinsa sida, enggau isi cherita bukai ti diayanka ba TV menua Australia nya udah ngerak perintah Taib Mahmud ari ‘peninduk’ sida ti chukup jenak ngelama tu.
James Jemut Masing nya siku ari raban menteri BN ti dipaduka perintah Taib nyadi Pengerusi ke Jawatankuasa Penempatan Semula Empangan Bakun ti diberi tanggungpengawa ngatur pemindah orang Bakun ngagai palan pengentap pendiau ti baru di Sungai Asap. Dalam jaku penerang iya kemari iya madahka perintah menua Sarawak agi tetap enggau penemu sida deka mayar pampas ke semua orang rumah panjai ti tanggul laban lepung tekat ai Bakun, lalu deka nagih ari sida nya bayar ke rega menua baru ti deka endur sida datai.
Tang diatu, keno ko James Masing, perintah udah lunggar agi penemu lalu bekaul enggau peminta bala rayat Bakun nya. Iya madahka penemuai ti penudi Menteri Besai Najib kejang pengawa bepilihbesai taun nyin kemari udah ngubah atur bayar rega menua baru di Sungai Asap. Najib udah ngasuh Opis Perintah Besai nulung orang di Bakun 50% ari rega ke udah ditetapka Perintah Sarawak nya.

Tang, jaku gerah ari James Masing nya udah ngayan sebengkah agi skandal! Duit ari Perintah Besai nya endang udah diberi ngagai Perintah Sarawak sebedau pengawa bepilihbesai dalam bulan April taun 2011 nyin kemari, tang diatu 18 bulan udah nya, duit ari Perintah Besai nya agi mengkang disimpan Perintah Sarawak!
James Masing udah teleba bendar enggau chara-chara tuai iya Taib Mahmud nya. Taib merambu deka mansutka penerang pasal duit ari Perintah Besai dikena iya ngulihka undi ba dua kali bepilihbesai nya! Duit pampas ari Najib taun 2011 nya deka disebut iya baru ba bepilihbesai ti deka diatur tu ila, engka nya urung taun 2013 ila! Nama kebuah bala orang Bakun ti udah lama nganti duit pampas nya majak ditejuka nganti dua taun endur duit nya deka diberi ke sida ke endang udah patut bempu duit nya, taja pan Perintah Besai Najib udah nyerahka duit nya dua taun ke udah?
Kada enda Taib nya nyau udah suntuk belanja tauka iya deka ngena duit nya nyuap bala pengundi iya nya ila?
Dua belas taun udah ti diasuh pindah ninggalka menua lama sida, bala orang ari Bakun agi mengkang nganti semaya BN Taib dikamatka. Lalu diatu, udah Taib ti dikelesayka laban kelalu suah besemaya puang, sapa ti agi deka arapka sida?
James Masing patut belalauka jaku penerang ari bakih politik iya, Senator Idris Buang lebuh ke ditanya pengarang berita TV Dateline minggu nyin kemari. Idris Buang madahka pampas ti ditanka lalu enda dibayar tau nyadika sebengkah penyalah ba undang-undang! Tang nama kebuah agi mayuh kes penyalah raban BN ngerampas tanah di menua Sarawak lalu enda dipampas?

Bala orang Bakun patut belajar ari pengilap enggau penyaru sida ti udah nganti pampas dalam pengelama bepuluh-puluh taun taja pan dalam kandang maya nya, BN udah mayuh bendar bulih penguntung. Orang Bakun diatu patut angkat ngelaban ari ti begempung enggau raban parti penyakal enggau raban lawyer sida dikena nagih hak sida ba utai ti endang enggi sida taja pan enda mayuh.
Diatu mega sida enda patut agi arapka atur Taib Mahmud endur sida ngenataika pinta enggau tanya sida.
Diatu perintah Taib deka nguji nagang sebarang orang Bakun pulai ke menua lama sida enggau chara nguan jelatung, ketegal sida ti udah ngasaika pemedis idup di Sungai Asap. Perintah BN deka terus nagang raban bansa Ukit pulai ke Bakun lalu nagaka menua ari ulu tekat Bakun nya kandang menua ti enda tau dipasuk sapa-sapa agi. Ulih perintah ti baka tu terus dikedekaka kitai ti udah endur sida naburka jaku semaya puang ngelama tu?