Taib Terus Ngulihka Pengeraja Bebilion-bilion Agi Ari Pengerusak Rampa Menua Sarawak!

Sukung menua Australia ngagai projek SCORE Taib Mahmud makin sehari makin mayuh nerima jaku tanya.
Diatu jaku pesan ari pengawa nya makin nyadi terang-seterang. Enti kitai deka ngaga kaul dagang enggau Taib Mahmud, kitai tentu deka dibalut penyalah makai suap lalu bekaul nerumpak bala orang bansa asal di Borneo.
Tu meh maya Miles Kuppa patut berunding dua-tiga kali?

Pengeransing Miles Kuppa dulu ari tu ngelakuka ‘dagang’ Australia dalam projek SCORE udah mai asai malu ngagai bala orang ti panjai runding di menua nya empu ti irau bendar ati ke pengerusak rampa menua enggau nerumpak pengeraja asal ti dikereja Taib atas rayat iya empu.
Agi mega Kuppa terus meransang perambu kompeni Rio Tinto Alcan ti deka ngaga kilang ngelebur besi aluminium, taja pan kompeni besai nya udah madahka diri enda nyadi neruska perambu sida. Pemutus runding sida Rio Tinto ti enda nyadi nya ari ketegal repot kami ti madahka kompeni CMS ti enggi sida Taib sebilik nya megai 100% share atas kompeni SALCRA ti udah diberi lisin, ti endur kompeni Rio Tinto disadang deka beranakka puku $2 billion dollar!

O M Holdings Ltd

Kuppa mega gaga bendar ati meda kaul O M Holdings dalam SCORE, sebengkah kompeni, kenu ku iya, endang beasal ari ‘Australia’, ketegal kompeni nya ti dirintaika dalam bursa Sydney. Tang ke bendar, kompeni nya sebengkah kompeni ti direjista di menua Bermuda lalu mayuh agi kaul enggau menua China.
Nya alai, nama kebuah Kuppa ransing bendar ngelakuka pengawa ngaga kilang ngelebur besi di tengah-tengah kampong puang Borneo, ti deka dipejalaika ngena kuasa elektrik ti murah ari Tekat Hidro Bakun?

Diatu mayuh bendar orang madahka pengirau ati diri ke repot pengerusak ngagai rampa menua ti datai ari kilang ti bansa nya di menua Sarawak. Perengka dikena ngeleburka besi nya diempu kompeni Pressmetal bepalan di Mukah diatu udah nyengala bendar mai pengerusak ngagai pengerai mensia enggau rampa menua ti bekelingi dia.
Lalu kompeni O M Holdings tentu enda ulih nyediaka pengawa enggau ngenataika pengidup ti meruan ngagai bala orang ti diau di menua nya (nyengkaum bala kuli ari menua Australia empu) enti dibandingka enggau Pressmetal – i.e. endang nadai sekali-kali. Nya alai, nama pengawa sida ngelama tu?

Endang mayuh agi penguntung ke Taib Kediri!

Nama kebuah Kuppa enda mantah penyalah makai suap ti nyadi dalam projek ti udah puntan ngaga kaul enggau Rio Tinto, terima kasih ke pengerangka enggau pengamu Taib ti udah bebendar amat ngulihka pengeraja ke iya empu di menua Sarawak?

Bala pemesai dalam kompeni O M Holdings endang sigi nemu ‘main kamah’ ti diatur parti BN. Enti kompeni nya sanggup nirika kilang ti ngenataika pengamah ke rampa menua enggau ngerusak pengerai bala orang di Sarawak, sida iya deka ngisi kuchik Taib Mahmud.

Kami kala ngeluarka repot ti ngayanka ba singkang sida ti keterubah dia sida meri share ti mayuh ngagai kompeni sida Taib Mahmud sebilik ba dagang kunsi nya. Anak kompeni sida ti benama O M Material (Sarawak) Sdn Bhd bisi 20% diempu CMSB!

Udah nya kami ngeluarka repot madahka baka ni O M Materials meri mayuh agi duit suap ngagai Kepala Menteri nengah kompeni KKB Engineering Sdn Bhd. KKB Engineering nya semina nyadika kompeni menyarung dikena ngulihka kontrak bulih RM70 juta ari O M dikena muka kandang rampa menua lalu nirika kilang dia.
Atur nya semina sebengkah kontrak ti endur O M meri enda ngena tender tebuka ba rega pemadu baruh ngagai sapa-sapa, lalu baka ti disebut kami, KKB Engineering Sdn Bhd mega diempu CMSB!

Patut meh Taib rindu bendar ke projek SCORE!

Sekumbang bala orang di Mukah ti merinsa mensena udah diarahka nganti penguntung datai ari projek SCORE, ti udah balat bendar ngerusak rampa menua sida enggau pengidup sida, dia Taib terus ngulihka penguntung beratus-juta ringgit ke iya empu!
Mudah bendar nerangka reti pengerindu iya ke projek SCORE nya!
Apin tentu lama dulu ari tu Taib kala didinga nyebut “aku bisi duit lebih ari ti ulih dipelanja aku”. Iya ti rangka sereta amu nya endang enda nemu puas ke utai ti dikemisika iya.

Lalu nadai sesen pan duit nya deka dipedua iya enggau bala rayat iya ti benung idup dalam pemerinsa ngelama tu.
Menua Australia enggau pengari sida enda patut bulih bagi ari pengawa dalam projek tu, lalu Adelaide University ti tampak sereta tebilang nama ba pekara pelajar tinggi di dunya tu mega patut berasai malu ketegal sida sanggup nerima duit sedekah beratus-juta ringgit ari Taib, ti datai ari pengawa makai suap iya lalu udah nya sida nimbal pemanah iya enggau pengawa meri iya tanda pangkat doctor kehormat enggau mayuh agi tanda pangkat ti bukai, taja pan iya endang nadai udah ditemu meri utai ti manah-manah ke rayat iya empu ti merinsa mensena di menua iya empu.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments