BN Ngenakutka Rakyat Ngena Ensera ‘Malay Spring’!

• 26 Sep 2012
• BM 翻译

Chandra Muzaffar, Kepala Gerempung Wang Turu 1Malaysia ti mega nyadi ‘tukang runding ti pandai’ BN, udah diayanka ba semua limpir mua surat berita lalu didinga mansutka jaku lalau iya pasal ‘perambu kuasa menua tasik’ ti deka ngenyarutka perintah Malaysia enggau ‘pengelikun enggau pengelantang entarabansa’!
Ba proses tu iya bisi ngaitka perintah BN enggau bala tuai kukut besi, ti endur orang di serata dunya tu udah meda pengelabuh perintah nya bedai lama tu udah. Chandra mega madahka pengawa ngelabuhka Mubarak, Gadaffi, Ben Ali enggau tuai-tuai ke bukai enda manah laban pengawa ti baka nya tau ‘ngachau’ menua Malaysia!
Chandra udah enda ingatka menua Malaysia endang sebuah menua demokrasi lalu patut bebasaka pengawa ngenataika berita enggau bebas, mansutka penemu enggau bebas, begempuru enggau chara ti manah sereta likun. Chandra mega mantah gerempung pro-demokrasi baka Gerempung Wang Turu Open Society enggau National Endowment for Democracy (NED) ti bepalan di Washington. Chandra mega balat bendar didinga ngutuk duit bantu ari menua luar ti diberi ngagai gerempung Bersih enggau Suaram, enggau gerempung bukai ti seruran bebendar ngelaban penyalah makai suap enggau menyati rayat di menua Malaysia.
Tang, baka ni penyampau duit ti mayuh ti dikena mantu UMNO/BN dipasukka ke dalam akaun Gerempung Wang Turu 1Malaysia? Lalu baka ni ba penyampau duit ti mayuh ti udah diayahka enggau chara belalai dikena mantu parti politik dikena sida ngenanka diri bekuasa dalam pengelama 50 taun?
Penyaru runding Dr Chandra berupai bendar ngayanka pemeli iya ba orang ti ningaka penemu iya. Enti nitihka penemu iya, duit bantu ari gerempung ti mit-mit ti datai ari gerempung baka NED nya, udah dikena rayat menua tasik ba pengawa pro-demokrasi baka menua Ejip, Tunisia, Libya enggau Syria.

Terang bendar Dr Chandra udah ngumbai jaku bantah ngagai tuai-tuai kukut besi nya semina ke ketegal iya aja. Ba penemu Chandra, perintah enda tau dilaban tauka dibantah sebarang gerempung ti deka nirika pemetul enggau pengelurus.

Enggau leka jaku ti baka nya, Dr Chandra udah nyemakaka perintah BN enggau rejim menua tasik baka Libya, Tunisia enggau Ejip lalu iya mega madahka penyinu ati iya ngagai teda-teda perintah kukut besi ti bukai baka Syria engga Russia. Pekara ti beguna agi, iya udah meri kelai ti madahka iya takutka rayat Malaysia nulak perintah BN sebaka enggau pengawa Arab Spring ti udah nyadi di menua Arab!

Sari tu, Kepala PKR ti mega Pengari DUN, Baru Bian, siku lawyer, udah mantah jaku serang Dr Chandra ditujuka ngagai gerempung-gerempung sivil ti mit-mit di Malaysia.

Chandra Muzaffar udah dipeda ngemelika diri enggau ngemaruhka Gerempung Wang Turu 1Malaysia lebuh iya mansutka penemu ti munyi nya, laban enggau chara ti enda disadang iya, iya udah ngayanka penakut raban BN ti diatu endang sebengkah raban ti kaya lalu seruran auska kuasa lalu mega deka nekan gerempung pro-demokrasi ti mit-mit, ti semina besenyataka pengelurus enggau pemetul.
Menua Malaysia enda lama agi deka ngatur bepilihbesai. Anang kitai rawan tauka takut ke penyarut ti dikumbai Chandra nya Pengangkat Bansa Melayu tauka pengachau ti enda masuk akal nya.
Kuasa perintah ti deka betukar enggau chara biasa enda patut ditagang, tang seagi BN enda ngelikun diri lalu ngelanggar atur ba pengawa sida ti agi deka betan ba kuasa 50 taun agi!
Enti sema penyarut enda tau enda nyadi, dunya deka besalahka perintah BN lalu ukai besalah gerempung pro-demokrasi ti mit-mit nya.