Diperintah Raban Apek Bayat! – Agi Mayuh Orang Ti Ringat Di Melikin!

• 4 Sep 2012
• BM 翻译

Ba ujung minggu nyin kemari seraban polis bisi dipeda semina bejaga seraya ke meratika kerita lipan ngerubuhka jematan ti ditengah mensia mayuh ti digaga perintah ke guna besari-sari.
Pengawa nya dipeda nyadika tindak balas bala tukang kayu batang, ti ringat ketegal bala orang kampung di menua nya ngetanka tanah NCR sida ari kena keruga kompeni kayu batang United Teamtrade Sdn Bhd, ti semina ngembuan lisin nguan sementara ba atas kampung enggau temuda menua nya.
Nya alai, nama kebuah raban polis semina bediri seraya bejaga lalu enda engkeretik?
Sekali ke kompeni United Teamtrade nya diempu dua iku menteri kanan ke Taib Mahmud, Awang Tengah (Sapit Menteri Perambu Pengawa) enggau Naroden Majais (Menteri Pemansang Pengawa Dagang)? Enti ya, reti nya menua Sarawak diatu benung diperintah ngena atur apek bayat ti nyadi menteri ngereja pengawa sepeneka ati sida beambika tanah enggau temuda orang bansa asal lalu udah nya ngerusak perengka pengangkut ti dikena mensia mayuh besari-sari nyadika chara sida bebalaska pemingking orang bansa asal ti ngetanka reta enggau hak sida?

Dalam pengelama beminggu-minggu, pelilih menua Melikin udah charut bendar ti endur bala apek bayat balat ngemba orang di menua nya. Orang bansa asal mega kena tangkap raban polis ketegal ti nagang bala apek bayat tama ngagai menua sida.
Tang perintah menua tu ti dikuasa BN nadai ngereja nama-nama pengawa dikena mutarka penanggul tu. Baka ti disebut pengari BN sida di menua nya, Snowdan Lawan, penyarut nya ‘mar diputarka’ baka nya aja!
Dalam sebengkah menua ti diperintah enggau chara ti betul sereta meruan, kompeni baka United Teamtrade deka belabuh ngereja pengawa nganti lisin nguan sementara sida udah dipeluruska (nyengkaum bantah ari orang ti empu menua).
Tang di menua Sarawak, iya ukai diperintah ngena undang-undang ti lurus, laban di menua Sarawak raban polis semina bediri lalu bejaga seraya meratika perengka diguna mensia mayuh kena rusak sepeneka ati ba mua mata sida empu, laban sida enda berani mantah penemu enggau pengawa seraban menteri ti udah makai suap!

Siti ari penanggul nya ba pengeraja asal menua Sarawak ti majak punas lalu Kepala Menteri mega nyau majak tuai, lalu bala menteri iya ke agi regas seruran enggau naka ulih ngereja tanah enggau temuda orang bansa asal endur ngiga pengaya ke diri empu.
Siti da penanggul mega iya nya dulu suba bala orang asal dikeremba lalu dikeduan, dunya luar endang bedau nemu, tang diatu enda mar ba kitai deka ngerekod sebarang pekara ti nyadi enggau naka pengelengkas!
Ari ketegal ti baka tu, dia Awang Tengah enggau Naroden Majais lalu madah ngagai kompeni seduai ngambi ke ngetu ngeruga orang di menua nya lalu nganti pemutus ari court.
Bala menteri nya mega patut betanya ba lawyer sida dikena nentu betul tauka salah pengawa sida ti betentang enggau pengawa tauka penuduk sida, ti tau ngujungka sida didawa dalam court!

Raban apek bayat enggau penyamun

Diatu, Sarawak Report benung nengkilaka pengerembai penyarut ti dikereja bala apek bayat di menua Melikin ti ngeruga sereta beduan orang bansa asal ari sembilan buah genturung pendiau ba minggu-minggu ke dulu ari tu.

Orang bansa asal udah nurun ke nengeri Kuching nganjung bantah sida. Sida mega udah muka sebengkah kes ba court. Lalu ke penudi iya sida udah nirika empang ba jalai tama ke menua sida dikena sida nagang kompeni tama.

Enggau nya, nama agi tindak balas ari kompeni United Teamtrade ti enggi Awang Tengah enggau Naroden Majais ti udu kenyang makai suap nya? Nyerahka bala orang bansa asal ngagai jari polis enggau jaku tuduh ti enda bepelasar?
Ba pun penyarut tu suba, lima iku bala orang di menua nya kena tangkap polis, lalu dituduh nadai bepelasar – tang udah nya sida lima dilepaska baru lalu nadai didawa dalam court.
Enda lama udah nya, beberapa iku ditangkap polis (nyengkaum empat iku indu) dituduh kompeni nya nagang bala tukang kayu batang tama ngagai kandang menua nya.
Tang utai ti balat agi nyadi udah nya, laban kami nadai nemu pemalat iya, bala apek bayat balat bendar ngeruga sereta ngemba orang bansa asal di menua nya.

Diatu bala apek bayat nya nyau nyadi pengari ke perintah Taib Mahmud kenyau ari 30 taun tu udah, lalu tiap iku bala polis udah enda engkeretik ke pengawa apek bayat nya.
Penerang ari bala orang di Melikin madahka raban polis semina nirika langkau arau ba tisi menua orang dia sepengelama beberapa minggu tang sida nadai ngambi sebarang tindak dikena nagang keruga ari raban apek bayat ari kompeni kayu batang nya.
Bisi penerang madahka bala apek bayat nya nyau betikika rumah panjai seraya ke ngitau-ngitauka duku sida ba mua orang mayuh dia dikena ngeremba sida. Tang bala orang di menua nya ngenatka diri enda ngelaban.
Kompeni United Teamtrade mega udah ngena chara bukai madahka sida endang bisi surat kuasa ngereja kampung enggau tanah temuda di menua nya ngena lisin nguan sementara ti diterima sida ari opis tanah.

Bisi hak ngelaban

Tang nama kebuah bala orang di menua nya ditejuka kena keruga enggau kena emba taja pan sida bebendar amat ngetanka tanah temuda rimba sida empu? Nitihka penerang ari sida, sida nirika empang jalai dikena sida nagang kompeni kayu batang nya tama ngagai menua sida. Pengawa sida nya lalu dientudika enggau pengawa polis ti nangkap sida taja pan nadai waran tangkap enggau nadai dawa ti nyengala ti madahka orang di menua berusakka perengka pengangkut baka jematan ti meraka sungai sida.

Lawyer pengelikun mensia enggau ADUN PKR, See Chee How udah datai mantu orang menua nya ti kena tanka polis, laban pengari rakyat sida empu, Snowdan Lawan, madahka penyarut nya enda ulih diputarka pia aja, tambah mega kompeni United Teamtrade nya diempu dua iku menteri BN ti bakih iya dalam perintah BN.
Orang ti endang besalah dalam penyarut tu endang bala kaban politik BN ti salahguna enggau kuasa sida ngena lisin ngulihka kayu batang ba menua nya. Nama kebuah raban polis enda mansik sida?

Penerang dalam gambar

Bala kroni enggau apek bayat Taib patut ngemas diri ba kereja jai sida. Teknologi kemaya hari tu udah kelalu laju nyerumba pengawa jai sida. Ambi ke banding, bala orang di menua nya udah dituduh ngerumpang rumah enggi kompeni kayu batang United Teamtrade lalu sida nya direpot ngagai polis ti ngujungka sida ditangkap polis.
Kompeni nya madahka pengawa ngerumpang rumah nya dikereja bala orang menua nya … tang enti nitihka dalam gambar, sapa orang ti bempu kerita lipan semak endur nya? Udah tentu enggi kompeni United Teamtrade!

Kompeni United Teamtrade udah bisi kes ba court dikena sida ngelaban orang menua nya kena 9hb Sembilan tu ila, ti keno ko sida dikena sida madamka penyalah ‘ngeruga’ perengka dikena sida bekereja di menua nya.
Berebak enggau nya, kompeni nya udah nirika empang jalai ngambika orang di menua nya enda ulih nurun ke umai enggau kebun sida, lalu bala polis mega bisi bejaga semak endur nya. Tu sebengkah pengawa kasar ti dikereja kompeni dikena ngemba bala orang menua nya laban sida seruran ngumbai diri bisi kuasa ba menua nya taja pan sida ngena lisin nguan sementara aja.
Diatu udah chukup maya iya endur Taib Mahmud dani ari tinduk iya lalu ngerara bala menteri iya ngambika enda kelalu amu begigaka pengeraja atas reta pesaka orang bukai, sebedau perintah BN iya ditulak rakyat.