Pengeraja USD15 Billion! – Taib Mahmud Orang Ti Pemadu Kaya Di Malaysia

Iya nyadika siku orang ti betanggungpengawa merah pengeraja kayu kering ari kampung di menua iya empu. Iya mega bekuasa atas semua surat pala tanah ke kandang rampa menua ti ditebang ti bulih mesai menua England, ngena pengawa enggau penuduk iya dikena iya nugungka pengaya iya enggau chara ti nyelai.
Kepala Menteri Sarawak, Abdul Taib Mahmud, mega nyadika orang ti nyaga pintu penama semua kontrak ti besai-besai ari perintah Federal ke dalam menua Sarawak lalu iya mega nukar kompeni perintah ti besai-besai menua Sarawak nyadi kompeni swasta ti dikuasa iya empu tauka sida sebilik.
Enggau penerang ari pansik ba sida Taib Mahmud sebilik, baka ti dikereja raban NGO ari menua Switzerland, Bruno Manser Fund (BMF), dia sida udah nganggarka penyampau pengeraja Taib manggai USD15 billion.

Penerang pasal pengeraja enggau penyampau reta Taib udah nyadika iya orang ti pemadu kaya di menua Malaysia beduduk ari reta ulih iya enggau chara ti salah sereta kamah ngelama tu, ngalahka pengaya “Raja Gula” Malaysia, iya nya Robert Kuok, ti ngelama tu ngembuan pengaya semina USD12 billion aja taja pan iya udah ba pun rintai nama orang ti kaya-kaya baka ti dipansik Forbes.
BMF, ti udah bejalaika mayuh bengkah kempen ngintu pemanah rampa menua enggau pengelikun pengidup orang bansa asal di Sarawak, madahka pengaya Taib mengkang betambah ninting taun beduduk ari asil pengeraja asal menua Sarawak empu.

Angka kira-kira BMF nya sebagi ari repot sida ti udah dichelak sida sehari tu dikena ngelai penemuai Menteri Pengawa Kebun Dandang Besai enggau Komoditi Malaysia, Benard Dompok ngagai menua EC. Gerempung-gerempung ti rinduka pemanah rampa menua udah mansutka jaku bantah sida ti deka ngelaban sebarang sempekat ditanggam enggau pengeluar kayu batang ari menua Malaysia nyentuk ke Malaysia badu ngulihka kayu batang enggau chara makai suap.
Repot BMF nya madahka Taib nya siku “Tauke Besai ke pengawa dagang sida sebilik” ti bepukuka laluh reta sida ti kamah ti manggai USD20 billion, enggau reta enggi iya empu enda kurang ari USD15 billion.

BMF udah madahka sida udah bejalaika pansik ti silik ba semua reta sida Taib sebilik belalauka rega reta ba pengawa dagang sida, asil pengawa ngerampas tanah orang bansa asal, asil duit suap ari pengawa ngeluarka lesen kampung enggau asil lesen muka kebun dandang besai lalu mega kontrak ti besai-besai.
Ke semua penyampau reta enggi 20 iku bala sida sebilik ti udah dipansik BMF nya manggai ngagai enda kurang ari USD21 billion. Bala sida tu nyengkaum empat iku anak iya, bala menyadi iya, petunggal iya Hamed Sepawi lalu mega enggau dua iku menantu sereta enggau ipar iya, Robert Geneid.
Repot raban BMF nya mega bisi nyebut jaku sumbung Taib empu ti kala dipansutka iya rambau kempen bepilihbesai Sarawak taun nyin kemari ti endur iya madahka iya “bisi duit mayuh ari ti ulih dipelanja” iya!

Repot sida BMF nya udah nambahka penyai dalam isu pemuntan Menteri Besai Malaysia Najib Razak ti ngambi tindak ba Kepala Menteri ti jai ulah nya, ti endur iya udah tampak rita ukai semina di menua Malaysia, ketegal penyalah makai suap, lalu makai suap dalam politik nya diatu nyau dipeda nyadika pekara ti biasa di Malaysia.

Opis Komisyen Penagang Penyalah Makai Suap Malaysia (MACC) udah mansutka jaku ti madahka sida udah muka surat pansik atas Taib Mahmud, udah bekau sida ti nerima mayuh repot enggau penerang baka ti diayanka dalam laman blog tu.
Tang, datai ke sehari tu, raban MACC nya lalu enda ulih bejalaika pengawa sida ngatika diri, lalu sida baka ti andal sereta nganti asuh ari orang bukai ti megai perintah.
Najib Razak kala didinga ngansak Taib ti udah beumur 75 taun nya nyurutka diri ari pengawa iya sebedau bepilihbesai Sarawak nyin kemari. Tang Taib ti bingking nya lalu enda nitihka penemu Najib laban iya takutka diri kena dawa sereta iya badu mangku pengawa iya nya.
Taib mega kala didinga besemaya ti madahka diri deka badu mangku pengawa sepenembu bepilihbesai, tang sampai ke sehari tu, bepilihbesai ke-13 ti semak deka diatur, iya mengkang mangku pengawa iya nya.

Enggau asil pansik ari BMF nya, Kepala Menteri Sarawak, ti nyadika orang ti pemadu kaya di Malaysia berebak enggau perintah ti dikuasa iya nya benung napi mayuh macham penanggul, lalu ngena laluh maya ke agi tinggal tu sida udah belabuh ngeleseka Penetap Kuching ti ditanggam raban penyakal di negeri Kuching maya nyambut hari Malaysia 16 September tu tadi.
Penetap Kuching nya dikena ngelai pengeran ati raban parti penyakal ti deka ngayanka basa tinggi ngagai hak orang di menua Sarawak ba segi sama-rata entara menua, baka ti udah ditetapka maya bulih merdeka suba. Ngena Penetap Kuching nya, enti raban parti penyakal ulih megai perintah tu ila, sida besemaya deka ngemunaska pengawa ngeruga enggau ngerampas tanah temuda orang bansa asal baka ti suah dikereja Taib, ngangkatka penyampau royalti asil minyak menua Sarawak dikena ngemanahka pengidup rayat Sarawak lalu madamka pengawa nerumpak asil menua baka ti benung dikereja bala orang politik ti korup diatu.
Penetap Kuching mega besemaya deka meransang pengawa pemansang perengka ti diguna enggau kualiti pengidup bala orang di Sarawak ngambika ikas pengidup sida sebaka enggau raban menyadi sida di Semenanjung Malaysia.

Tang Taib enggau bala iya dalam BN udah ngemaruhka pemesai reti Penetap Kuching nya lalu ngumbai penetap nya “enda ulih diterima akal”!
Nyentuk ke sehari tu mega Taib enggau BN mengkang enda ngetu bekerugaka tanah orang bansa asal di Sarawak, lalu sida mega nadai majak ke juluk ati sida minta ditambah royalti 5% ngagai 20% asil minyak ari Sarawak.
Nitihka penerang ti dibantaika BMF, sida Taib sebilik ti bukai endang dipaduka iya ngemataka reta pengaya ti ulih iya ngena chara ti salah nya ngelama tu.

BMF nyadang semua pengawa ngemataka dagang kompeni-kompeni sida sebilik dikereja bala ‘penulung’ iya, baka Richard Curtis, peranak Britain, ti dipaduka iya ngemataka pejalai kompeni CMSB enggau menantu iya Sean Murray, peranak Kanada enggau ipar iya, Robert Geneid, peranak Australia, tang reta iya ke bukai nya diasuh iya kemataka kaban-belayan iya ti semak agi enggau iya.
Ngena chara nya, pengaya anak indu iya, Jamilah Taib, ambi ke banding, ti diatu udah nyadi peranak Kanada nya siku orang ti megai share pemadu mayuh dalam kompeni-kompeni sida Taib di menua UK, US, Australia enggau Kanada ti dianggarka manggai USD1 billion dollar. Tang laki Jamilah, Sean Murray, semina dipaduka iya nyadi Direktor ke kompeni-kompeni sida ti semina megai share USD10 juta dollar aja.

Dalam repot BMF, sida mega bisi nuliska jaku aku Sean Murray ti madahka semua reta ti dikemataka iya di Kanada enggau di London nya endang enggi sida sekaban-belayan, lalu sida nadai nerima sebarang bantu belanja ari mentua iya, Taib Mahmud.
Repot ari BMF nya betinjau jauh ke mua merening penyalah makai suap enggau pengaya ari asil ti kamah raban Taib Mahmud sebilik nya meri malu lalu mar deka diseliahka di Malaysia.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments