Anang Bula – Kami Tu Agi Ditu!

Bala bansa Penan ti nirika empang jalai ti udah ngujungka pengawa-pengawa ngaga tekat ai Murum terjanggal dalam kandang sepuluh hari tu, udah ngambi tindak sida ngagai berita pasal pengari sida, Liwan Lagang, ti madahka ngagai raban media pemutus aum udah mujur bendar.

Ari berita ti munyi nya, bala orang Penan lalu majak ngenegapka empang jalai sida lalu pia mega nirika empang jalai ba jalai bukai nuju ngagai tapak endur ngaga tekai ai Murum nya.
Nitihka penerang ari pengarang berita kami, semua empang jalai nya diatu betuaika bala tuai bansa Penan ari semilan buah genturung pendiau Penan ti deka ampuh laban ai ari tekat Murum nya ila, lalu sida ngumbai jaku penerang ari Liwan Lagang ngagai media nya bula.
Taja pan gaya bantah ti diayanka sida nya nadai mai penyarut, sida nunu sekeda tayar lama lori dikena sida ngayanka bantah sida nya, laban enda lama agi menua enggau rampa kampung sida deka diampuhka ai ari tekat Murum.

Tangkan sida terang bendar madahka sida minta penanggul nya diputarka enggau manah ngambika pulai ke pemanah serak tubuh sida ke renggat dudi, ti udah enda mujur dikamatka Perintah Sarawak enggau mega kompeni Sarawak Energy Berhad.
Pemuntan perintah menua Sarawak ngatur penyarut enggau raban bansa Penan enggau chara ti tampak, berupai bendar belaban reti enggau atur entarabansa, nyengkaum Penetap Gerempung Entarabansa, ti dipasuk Malaysia enggau Australia enggau mega menua China, ti endur kompeni-kompeni sida baka Hydro-Tasmania enggau Three Gorges Development ti benung chakah mantu dalam pengawa ngaga tekat Murum nya.

Sekeda ari peminta raban bansa Penan nya 25 hektar tanah diberi ngagai ninting ruang bilik ke 300 buah ruang bilik ti kena tanggul tekat Murum nya; pampas ba mata duit RM500,000 ke tiap ruang bilik; 30,000 hektar tanah ke tiap genturung pendiau ke semilan buah genturung pendiau Penan; tabung pelajar ke bala anak raban bansa Penan; tabung pengawa pemansang ke raban sida; enggau kuasa sida atas semua teda tanah enggau rampa menua ti enda kena ampuh ai ari tekat Murum nya.

Lebuh bala raban NGO ngabas raban bansa Penan ti benung ngibun empang jalai nya, ti endur semua perengka pemadah udah diputuska, nya alai ba hari Satu tu tadi sida tekenyit meda jaku penerang dalam media ti madahka jurai nya udah teputar nya udah ngujungka sida saru runding, taja pan sida udah mupuk-mupuk ngatur pemulai bala sida ti indu enggau nembiak ngagai genturung pendiau sida empu ti udah tanggul laban gaya hari sekumbang sida ti nguan empang jalai nya.

Tang bala NGO enggau bala orang ti ngabas sida udah mujur mai bekal pemakai enggau bekal bukai ari pemeri orang mayuh, dikena mantu sida ti benung ngibun empang jalai nya.
Bala NGO nya madahka raban bansa Penan ti benung ngibun empang nya udu liat ati, taja pan bekal pemakai sida majak kurang sekurang, lalu ba siang hari sida ngelaban panas bisa lalu sekali-dua sida mansar diri ngelaban ujan enggau ribut. Langkau arau ti didirika sida kala mega rusak laban pangka ribut lalu ngujungka sekeda sida ngerarika diri beteduh ba kem kompeni kayu batang ti semak endur nya.

Bekal pemakai ti bisi ba sida nya semina sekeda ari bekal ti dibantu raban SCANE, ti udah beguai-guai nganjung bantu ari nengeri.
Nambahka penanggul ba pengidup sida sekumbang ti ngibun empang jalai nya, dia penyakit malaria bisi ditemu ngelekai dalam raban sida, taja pan penanggul nya enda direpotka Opis Pengerai.
Siku ari raban bala Penan ari kem nya udah ditemu kena serang penyakit malaria, lalu nitihka penerang ari pemesai Opis Pengerai ti ngabas sida ti ngibun empang nya madahka, pelilih menua 38 kilometer ari Long Malim udah mega kena rampit penyakit nya.

Tang pengeringat bala Penan ba empang jalai nya nyau betambah udah sida ninga berita ti direpotka Liwan Lagang nya. Sida berasai malu bendar laban Liwan Lagang endang bedau ngabas sida ti ngibun empang jalai nya, tang Liwan Lagang udah ngangauka 8 iku bala nembiak nyadika pengari sida bejuraika peminta sida di Bintulu kena hari Lima minggu nyin kemari.
Nitihka penerang bala tuai raban bansa Penan nya, bala nembiak ti dikangauka ngarika sida nya enda patut dibai bejuraika peminta sida ngagai perintah, lalu pia mega Liwan Lagang nya semina bejaku ngarika tuai iya, Abdul Taib Mahmud. Nitihka jaku sida, sida nadai kala meri pemendar ke Liwan Lagang mansutka penemu sida tauka ngarika sida bejurai enggau perintah. Diatu sida nyau ngasaika sida udah enda dipebasa perintah menua Sarawak.

Liwan Lagang ti besemaya deka nyuap sida enggau duit pampas RM6,000 ke tiap iti genturung pendiau raban bansa Penan enti sida besetuju ngerumpang empang jalai sida nya udah ngasuh sida majak ringat, laban nitihka penemu sida, duit ti nyampau nya jauh mimit ari pampas ti endang patut diterima sida, lalu diatu, pekara nya lalu nadai direkodka perintah.
Nitihka penemu bala tuai raban bansa Penan ti benung ngibun empang jalai nya, Liwan Lagang nadai kuasa ngumbai diri ngarika sida laban tebal agi bala sida nya nadai ngembuan surat pengelala diri tauka nyadi pengundi ti berejista di menua Sarawak.

Sebengkah repot ti udah disediaka ngarika perintah Sarawak dikena sida ngisi tanggung pengawa sosial enggau pengelikun rampa menua ti kena tanggul laban tekat ai Murum nya endang ngaku 80% ari semua raban bansa Penan ti udah besai tuai nadai surat pengelala diri, lalu enggau nya nama sida nya enda ulih dipasukka ke dalam rejista nama pengundi di menua Sarawak tauka Malaysia.
Repot nya udah tegut bendar dilalaika perintah Sarawak nyentukka iya diserungkai lalu ditiriska ngagai Sarawak Report ba minggu nyin kemari.

Kelimpah ari nya, kami mega ngayanka repot tiris ti bisi bekaul enggau isi atur pengawa pengentap pendiau enggau atur mayar pampas ngagai bansa Penan, ti mega dilalaika perintah.
Dalam atur mayar pampas nya, penyampau pampas nya jauh bendar mimit ti udah ngujungka bala Penan nya ringat bendar lalu ngujungka sida nirika empang jalai. Penyampau bayar pampas nya jauh mimit ari penyampau penatai pemisi ari baruh ikas penyeranta ti deka dibayar dalam pengelama 4 taun aja, lalu perintah mega ngagihka tanah endur sida betanam-betupi ba kebun dandang besai sawit.
Nitihka penerang ari pengarang berita kami:

Siku tuai ari raban bansa Penan ari Long Luang bisi didinga mansutka jaku serebana “di ulu din ai sungai kamah laban pengawa orang ngulihka kayu batang; di ili, sida ngaga tekat ai; ari langit, ujan nyau berachun. Sida endang deka munuh kami. Nama kebuah kami angkat lalu pindah ngagai menua ti enda ulih besemayaka pengelantang pengidup ke kami?”

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments